Ka Makaainana, Volume V, Number 10, 9 March 1896 — Page 2
2 HONOLULU, OAHU, POAKAHI MARAKI 9, 1896.
NA AINA MAMAO.
-
Mau Lono Huikau mai kela a
me keia Wahi Like Ole.
Mau Kahoaka Kaua ma Europa.
O ke ao omamalu e hookau nei maluna iho o Beritania Nui a puni ke ao nei, he mea paha hoi ia e hookikina aku ai i ka noonoo o kona Kuhina Nui e hooko koke ia ka ninau e pili ana ia Venezuela ma ke ala o ka waiho ana aku imua o kekahi aha-uwao Eia hoi o Rusia ke hoakea loa aku la i kona mana, ana hoi i hoopalaleha ai no kahi mau makahiki. I ka pule i pau i Feberuari 22, ua hooia hou ae la oia i kona mana hoomalu maluna o na okana ma ka Balakana. A i ka pule aku hoi mamua, ua hookahua ae oia i kona kulana ano noho poo hoomalu aku ia Tureke O na wahi lono palanaiki hoi i puapuai ae mai Korea, e hoike ana na hookuene aku oia ma Seoula, he hoike ana ia no kona manao e kue aku i ka mana o Iapana a me Beritania Nui ma Kina. Ua loaa nae hoi he kuia hou ia Beritania Nui mamuli o na haawina pakalaki e loaa la i na pualikaua Italia ma Abesinia, oiai, oia wale no kona hoa'loha ikaika.
Ke hoike la hoi o Farani i na hooia hou a maikai loa no kona kulana paa a me ka ikaika, a ua hiki hoi ke hilinaiia aku e kokua no oia ia Rusia, koe wale no paha ke loaa ia Beritania Nui ho hoohui ana me ke Za. A no Geremania hoi, aia no ke mau la kona ano nunuha e kue aku. O ka lono mai ke Taranavaala e kukala ae ana na poe Boa, ke hiki aku i ka piha ana o ka 27 makahiki mai ko lakou lanakila ana maluna o na Beritania ma ka Puu o Majuba, i ko lakou kulana kuokoa loa mai ka noho ana aku malalo o Beritania, a ina he oiaio, he kaua aku no ka hopena a ua hilinai loa ia e alakoia ae ana paha hoi o Geremania e keakea.
He moku Geremania me Kikila Roke o luna ka i ili mai nei ma ke Alawai o Sueza, ua lilo ia i mea e hoopuoho ae ai ia Enelani ma ka hoike ana ae ina paha e hoopahuiu ana kekahi moku malaila i ka wa e kaua ai, he mea maopopo loa e panikuia no ia wahi no ekolu paha pule. "O kekahi panikuia no ekolu pule," wahi a ka nupepa Garafika o Ladana, "he mea paha hoi ia e lilo aku ai o Inia mai ia kakou aku a mau loa. He mea oiaio, o ke kanaka nana i kukala ae o ka Lae o ka Manaolana Maikai ke ikeia aku ana i kahi la o ia ke kikowaena o ka Emepaea, paea, aole no paha hoi i nele me ka naauao."
Ua manao maoli io no hoi o Kikila Roke i kekahi aupuni kuokoa e kapaia o na Mokuaina Huiia o Aferika Hema. Ma muli paha hoi o ka make loa o ka manaolana no ka hemo aku o ka maua mai iaia aku a me kona ike ole ia ma Enelani, he mea paha hoi ia nona e hooko aku ai ta manao kipi ona.
No Iapana, Korea a me Rusia.
Ua hoopaneeia ka noho ana o ko Iapana Ahaolelo e ka Emeperoa, i Feberuari 16 nei, no umi la. I ka wa i loaa aku ai o ka palapala Alii, e noonoo, ana ka Ahaolelo i ke kulana i ulu ae mamuli o ke ala haunaele ana mai nei ma Korea, a mamuli hoi o ia haunaele i pepehiia ai ke Kuhina Nui a me kahi mau luna oihana e ae a make, a holo hoi ka Moi ma ke keena oihana o Rusia. Ua hahana no ke kue ana i ka Aha Kuhina i noho alakai ia e Kuhina Nui Ito.
Wahi a ka oleloia, ma ka manao o ke Aupuni o Iapana, ua hilinaiia na Rusia i paipai na hana hoohaunaele kipi ma Korea me ka manao e loaa he kumu e hookahua koke ai i ko Rusia noho hoomalu aku malaila. Aia ke kahua o ke Aupuni o Korea i keia wa maloko o ko Rusia keena oihana elele, kahi o ka Moi e noho la me ke kiaiia. Ua hilinaiia no hoi na ka Moi maoli no paha hoi i hoomana aku i keia ala haunaele, i mea panai aku no ka pepehiia ana o ka Moiwahine. Nui ka pioloko ma Seoula, a mahuli hoi o kela ala haunaele ana, ua kauohaia ae ka hopuia o ka Aha Kuhina. Ua okiia na uwea telegarapa. Elua mea i make.
No Sana Peterobuga hoi ka lono na hoea aku ka Moi opio o Korea ilaila, me ka manao e imi i pono no kona aupuni malaila, malalo hoi o ka Rusia kokua a hoopakele ana. Ke malama malu loa ia la keia huakai ana ia laila. O na poe nae hoi i komo aku iloko o keia mea huna a ua ikemaka hoi iaia iwaena o lakou, ua hilinai lakou he mea ano nui loa keia e pili ana no ko Rusia kahua alakai hana ma ka Hikina.
Ua hoopuaia ae e kekahi nupepa o Sana Peterobuga, Feberuari 25, e hooholoia aku ana he kuikahi mawaena o Rusia a me Korea, a mamuli hoi o ia e loaa ai he pono ia Rusia no ka hoomoe loa ana aku i ke alahao o Siberia a kekahi awa o ka Pakipika.
Na Hunahuna Laulaha.
Ua hoike aku ko Geremania Kuhina o ko na Aina E i ka Amabasedoa Tureke ma Berelina, Feberuari 16, e ike aku ana no o Geremania ia Kama'lii Feredinana ma ke ano oia ke poo alakai aupuni oiaio o Bulegaria.
Ua koi aku ke Duke o Aoseta, keiki hanauna a ka Moi Humebeta o Italia, i ka Moi a me ke Kuhina Kaua, e aeia oia e alakai aku i kona pualikoa, i waeia hoi e hoopuipui aku i ko Italia pualikaua e paio la i na poe Abesinia.
He mea mapopo loa e haawi no o Peresidena Kalivilana i na kokua ana ia Olone a me Kalaila, ke waeia hoi laua i mau moho peresidena. Eia nae hoi, ua waeia o Olone i moho peresidena e ka aoao Demokarata o Masakuseta.
No Rio de Ianeiro ka lono o Feberuari 24 nei, e hoike ana ua puka ae ka mai fiva lenalena iluna o ka mokukaua Italia Lomobadi e ku la ma ia awa. Ua hoikeia ae he 150 ka nui o na poe mai o ke kulanakauhale me 50 poe i make.
Ke noonoo la ka Peresidena o Guatemala, pela ka lono o Feberuari 22, i kekahi manao i hanaia e kekahi mea ma ka aoao o kekahi hale hoaie dala o Hamabuga e hoaie aku ia Aupuni i $5,000.000 no na hana hou i ke awa o Sana Hose.
Feberuari 21 nei i weheia ai ke kau o ka Ahaolelo o Venezuela. Wahi o na olelo a ka Peresidena o ka Hale o na Lunamakainana, mamuli o ka ikeia ana o ka pono o ka Venezuela e paonioni nei me Beritania Nui ka mea i alohaia ai e Amerika holookoa, a loaa mai ai ke komo uwao oluolu ia mai e ka Repubalika nui ma ka akau me ka hooia maopopo ana no ka lanakila aku o ka pono.
Mai Roma ae ka lono i loaa ma Ladana, no Kairo mai, aohe hoohuoi ana ua komo ae ke Aupuni o Beritania Nui e kukai pu me Farani no ka mea e pili ana i ka haalele aku o na pualikoa Pelekane ia Aigupita. Ua manaoioia nae hoi e ano ae aku ana paha o Beritania Nui, ina aole ma ka haalele aku, alaila, ma kekahi ano e ae paha e hololea ana mawaena, o ia mau aupuni.
Iloko o ko Amerika Huipuia Aha Senate, Feberuari 24, ua hooholoia ka hoololi a ke Komite o na Haawiia Uku Hoomau, mai ka $200 e like me ke noi ma kekahi bila kanawai a i $100 o ka malama, ma ke ano uku hoomau no Misasa Geresehama, wahine kanemake a ke Kuhina Nui i make, ma ke ano o Misita Geresehama kekahi o na generala ma ka aoao Akau ma ke Kaua Huliamahi.
Hoolaha Manao Hooko Moraki a me ke Kuai
MAMULI O KA MANA KUAI I hoikeia maloko o kekahi Moraki mai ia Pau (k) o ke Awawa o Nuuanu, Honolulu. Mokupuni o Oahu, Paeaina Hawaii, ia Levi Drew, o ia wahi like no, i hanaia i ka la 3 o Aperila. M.H. 1888, i kopeia ma ke Keena Kakau Kope Aupuni ma Honolulu i oleloia, iloko o ka Buke 107 ma na aoao 361, 362 a me 363, a ua hooliloia ua Moraki la ia A. Rosa, Kahu Waiwai;
Ke hoolahaia aku nei ma keia ua manao o A. Rosa i oleloia, ka mea i lilo ai mai ka Mea Paa Moraki aku i oleloia, e paniku aku i ka Moraki i oleloia no ka uhakiia o kekahi kumu, oia keia: ka hookaa ole ia o ka ukupanee a me ke kumupaa i ka wa i kupono ai no ka uku ana, a mamuli hoi o ia hooko ana e hoolilo aku no i kahi hoakakaia maloko o laila a me na hana hou a pau maluna iho, ma ke kuai kudala akea, ma na Keena Kudala o James F. Morgan, ma Alanui Moiwahine, ma Honolulu i oleloia, ma ka
POAONO, LA 28 O MARAKI, M.H. 1896,
MA KA HORA 12 AWAKEA.
A. ROSA,
Mea a ka Mea Paa Moraki i Hoolilo aku ai.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
O kahi i paa ma ka Moraki i ole oia a e hooliloia aku ana, o ia "kela apana aina a pau loa e waiho la ma Kapouhuluhulu, ma ke Awawa o Nuuanu i oleloia, a i hoakakaia ma ka Palapala Sila Nui 2433 (Aina Aupuni) no Popoki, nona ka ili o 9-10 eka, a i lilo mai hoi i ka Mea Hana Moraki ma o ka Palapala Kuai, i hanaia i Aperila 3, 1888, i kopeia ma ke Keena Kakau Kope i oleloia iloko o ka Buke 110, aoao 175."
He Pa-hale a he aina Kalo ko keia apana aina, ma ka huli ma Ewa o Alanui Nuuanu e pii la iuka, ma kekahi aoao ae o na Loi Kalo a Haalelea, me kekahi alahele a hoea iwaho o Alanui Nuuanu. Ua paa i ke kalo i keia wa a ua hoolimalimaia mahope mai o ka hanaia ana o ka Moraki. He mau pono wai no hoi kahi o ka aina.
mar2-4pl
-
Hoolaha Manao Hooko Moraki a me ke Kuai.
MAMULI O KA MANA KUAI I HOIKEKIA ma kekahi Moraki i hanaia e G.W. OKUU o Honolulu, Mokupuni o Oahu, Paeaina Hawaii, ia A. ROSA, Kahu Waiwai, i kakauia ma ka la 5 o Iune, M.H. 1889, i kopeia ma ke Keena Kakau Kope Aupuni ma Honolulu i oleloia, iloko o ka Buke 110, ma na aoao 368 a me 369;
Ke hoolahaia aku nei ma keia ua manao ka Mea Paa Moraki e paniku aku i ka Moraki i oleloia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W.S. Luce, ma ke kihi komohana o na Alanui Papu me Moiwahine, ma Honolulu i oleloia, ma ka
POAKAHI, LA 30 O MARAKI, M.H. 1896,
m ka hora 12 Awakea, i na aina a pau loa i hoikeia maloko o ia palapala a i hoakaka piha loa ia hoi malalo iho.
A. ROSA,
Kahu Waiwai no ka Mea Paa Moraki.
Honolulu, Feberuari 29, 1896.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
-
O kahi i paa malalo o ka Moraki i oleloia, o ia no: Keia mau apana aina a pau loa e waiho la ma Moanalua, ma ka Mokupuni o Oahu i oleloia, a i hoakakaia ma ka Palapala Sila Nui 427, Kuleana 1186, no Kukalamanu, no laua hoi ka ili o 4.65 Kaulahao, a i loko mai i ka Mea Hana Moraki ma o kekahi Palapala Kuai i hanaia i Mei 12, 1886, i kopeia ma ke Keena Kakau Kope i oleloia iloko o ka Buke 102, ma na aoao 37 a me 38.
Ua paa keia aina i ke kanu laiki ia e kekahi Pake, e uku mua ana he uku hoolimalima o - Dala no ka makahiki.
mar 2-5pl.
-
HELE HOOLUOLU.
O.R.L.Co.
MA NA POAONO A ME NA LA PULE
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb 10-tf