Ka Makaainana, Volume V, Number 11, 16 March 1896 — Page 6
6 HONOLULU, OAHU, POAKAHI, MA RAKI 16, 1896.
ROMULA
Ke Duke Kuewa o Farani.
[Helu 9.]
Ae koke mai la ua Roselina la me ka olelo pu ana mai hoi, "E hele mau ae oe i ko maua wahi pupupu hale e noho nei i kela a me keia la, a ia manawa auanei au e hoike aku ai ia oe i na helehelena o ka mea au i aloha ai, a e hilahila no auanei oe ke ike aku iaia. O keia iho la ka laau lapaau maikai loa a'u e hoike aku ai ia oe. Pehea la ia i kou manao?"
Ua ae aku la o Oromela i keia mau olelo a Ro selina, aole nae ona hilinai e hiki ana ke pau keia aloha iloko ona no kana huapala i minamina ai. Nolaila, i kela a me keia la e hele mau aku ana ua Oromela la i kahi o ua mau kaikamahine la i huna ia laua iho, a e loaa mau mai ana hoi iaia na olelo hookaau e like me ka mea i maa mau iwaena o ka poai o na keonimana me na lede.
O ia mau mea nae a lakou e noke ana i ke kamakamailio, aole loa ia he mea e hiki ai ke hoopauia ae na manao uluku o ke aloha iloko o O romela no Roselina, ka mea ana i manao ole ai oia no keia e ku nei a e kamailio pu nei me ia. He keu a ke pohihihi o ke au o ka manawa iaia, aole he maopopo iki heaha la kana e hana ai nona iho.
Hala ae la he mau la loihi o ka hoohui mau ia ana o na helehelena o keia mau opio, a ua hiki ia Selia ke ike mai ma na helehelena o Roselina ua piha oia i ke aloha no ua ipo nei ana i mauna ai i kona kino wahine e hele auwana iloko o na ululaau, a haalele aku i ka nani a kona makuakane kolea i imi ai me ka lima nui.
A i kekahi la, mahope iho o ka hookuu ana ae o ka lakou noho hoonanea ana, huli hoi aku la o O romela no ke kahua hoomoana o kona mau hoa, a o Roselina hoi a me Selia, haele aku la laua e holoholo iwaena o ka ululaau e hoohala manawa ai.
I ka hoomau ana aku i ko laua alahele imua, halawai aku la laua me kekahi kanaka aoo (Duke Romula) e hele mai ana mamua o laua, a ku iho la laua me ke ano pahaohao a pela pu no hoi me ke duke. Oiai, aole loa i maopopo iaia owai la keia keiki opio kulana maikai e ku aku la imua ona. Me keia manao uluku iloko ona, ninau aku la oia:
"Owai oe, a no ka ohana hea mai oe?"
Minoaka iho la o Ro selina no keia ninau a ke duke a pane mai la:
"No kekahi ohana kiekie mai au o ke kulana maemae, e like la me oe; aole nae oe e lohe i ko'u inoa."
I keia mau olelo a Roselina, nana pono aku la ke duke me na helehelena piha hauoli, no ka mea, akahi no a maopopo iaia no ke kulana kiekie mai oia.
No ko Ro selina ike ana i ka hoike mai o ke duke i na hiona o ka hauoli maluna ona, ulu ae la ka manao iloko ona e hoike iaia iho imua o kona makua, aka ua kaua hou iho la oia a no kekahi manawa hou aku, alaila, hoike oia iaia iho imua o kona makua aloha.
Nolaila, e nan a hou ae kaua e ka mea heluhelu no Oromela ma kana huakai no ka hale o Roselina ma e noho ana, kahi i kauohaia mai iaia ilaila e pau ai kela mea he aloha iloko ona no kekahi mea kino uhane.
Ia O romela i ala ae ai i ke kakahiaka nui o kekahi la, komo koke iho la oia i kona aahu a hele aku la oia e hooko i ka Roselina kauoha iaia. Iaia e hele malie ana ma kona alahele ike aku la oia i kekahi kanaka e moe ana ma ka honua a e wili ana kekahi nahesa nui ma kona a-i, a i ka wa a ka nahesa i ike mai ai ia Oromela e hele aku ana holo koke aku la ua holoholona la me ka haalele iho i ke kanaka e moe malie, me he mea la ua make.
Hele hou aku la o O romela a kokoke ma kahi a ka mea e moe ana, i maopopo ai iaia owai la ua mea la, aia hoi, ike aku la oia he liona wahine e moe ana kona poo ma ka honua, e kali ana o ke ala-ae o ka mea e moe ana, no ka mea, aole loa he makemake o ka liona e ai i ka io o kekahi mea a mau mea paha i make. Aia nae ko Oromela mau maka ke nana pono la maluna o ka liona, me ka haka pono ana no kana mea e hana mai ai.
O na manao like ole o ke kanaka koa, aia ia ke paila malie la iloko o ua opio la a ke kali la oia o ka loaa iaia he kulana maikai e hiki ai ke lele aku e paio pu me ka liona no ka make a me ke ola. A he mea oiaio, e like no me kona lanakila ana ma kekahi manawa i hala ma kona paio ana me kekahi mau kanaka o ko ke Duke Ferederika aloalii, pela no oia i manao ai e lanakila ana oia maluna o ka liona.
(Aole i pau.)
Moe Kau a Moe Hooilo.
Ua make o Mi sita Namaile i ka la 22 o Feberuari, 1896, ma ka hora 11 kakahiaka, ma Kapualei. Nolaila, ua haalele mai oia ia makou a pau, ua pau kona maalo ana ma na aekai o Kapualei, pau ka lohe ana i ka nehe a ke kai o Heleiki, ua malie, a malie Molokai, huli papu i ka makani. He kupa oia no Kamalo a he kamaaina no Molokai-Nui-a-Hina.
He oluolu, he lokomaikai, he heahea, a he makamaka hoi no na malihini kipa ma kona home. He ai leo ole a he puuwai hamama ma na ano a pau. Ua haalele mai ia makou na keiki a me na moopuna e paiauma aku, ua haalele mai hoi ia makou a pau kona ohana e u a e kanikau aku iaia, he hope loa nae i na mea a pau. Nolaila, e hoomaikaiia ua lani kiekie loa, "Nana no i haawi mai a Nana no i lawe aku." I kulike ai hoi me ka ka Buke Hemolele, he "mahu no ke ola o ke kanaka i pu-a ae a nalo aku," iloko o ke ao polohiwa mea a Kane. Aloha no ka makua.
S. K. PEELUA.
Kamalo, Molokai, Ma r. 6, '96.
O Kaena ka inoa o kahi mokumahu Waimanalo i keia manawa.
Ua mahuka aku no Kaleponi ma ka Alameda o ka la 5 nei o Nike Iakesona. He hana maa mau loa no ia iaia.
Ma ka oili ana mai nei o ka Taribiune o Hilo, aole he mau wahi kolamu ma ka olelo makuahine. Heaha mai nei la keia o ua wahi pepa la. Kapae loa ia ka inoa o ka lunahooponopono oiwi. Ma ka olelo namu wale no ia e hele mai nei.
HOOLAHA.
Ma keia a mahope aku o keia la ke kauohaia aku nei na poe a pau e paa ana i ko'u mau Aina iloko o keia Aupuni ma ka hoolimalima e uku koke mai i ko lakou auhau hoolimalima, ina ua hiki i ka manawa e hookaa ai, ia Prince David Kawananakoa, ma Honuakaha, Honolulu, Oahu. KAPIOLANI. Honolulu, Ianuari 23, 1896. ian 27-3ml
HELE HOOLUOLU.
O. R. L. Co.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni.
Papa 1. Papa 2.
Manana - - $ 75 $ 50
Mahiko o Ewa - - 1 00 75
Waianae - - - 1 50 1 25
F. C. Smith, Agena Ohua a Palapala Nui feb 10-ff
Hoolaha Manao Hooko Moraki a me ke Kuai.
MAMULI O KA MANA KUAI I hoakakaia maloko o kekahi Moraki i hanaia e GEORGE W. NAWAAKOA, o Honolulu, Mokupuni o Oahu, Paeaina Hawaii, ia Isaac Testa, i kakauia ma ka la 8 o Dekemaba, M.H. 1890, i kopeia ma ke Keena Kakau Kope Aupuni ma Honolulu i oleloia, iloko o ka Buke 129, ma na aoao 97, 98 a me 99;
Ke hoikeia aku nei ma keia ua manao ka Mea Paa Moraki e hooko aku i ka Moraki i oleloia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e hoolilo aku no ma ke kuai kudala akea ma na Keena Kudala o W. S. Luce, kihi komohana o na Alanui Papu me Moiwahine, ma Honolulu i oleloia, ma ka POAKAHI, LA 30 O MARAKI, M.H. 1896, ma ka hora 12 awakea, i na apana aina a pau loa i hoikeia maloko o ia palapala a i hoakaka piha loa a hoi malalo iho. ISAAC TESTA, Mea Paa Moraki.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
O na aina i paa i ka Moraki i oleloia, aia ma Kaikahi, Pauoa, ma Honolulu i oleloia, kahi i waiho ai, oia hoi:
Akahi— O kela apana aina a pau loa nona ka ili o 1 69-100 eka, i hoakakaia ma ka Palapala Sila Nui 4453, Kuleana 1555, no Kealaau, a na Kealaau i oleloia i hoolilo i ka Mea Hana Moraki ma o kekahi Palapala Kuai i hanaia i Maraki 25, 1863 i kopeia ma ke Keena Kakau Kope Aupuni iloko o ka Buke 18, ma na aoao 288 a me 289;
Alua— O kela apana aina a pau loa nona ka ili o 36-100 eka, o ia hoi ka aina i hoakakaia ma ka Apana 1 o ka Palapala Sila Nui 2638 [Aina Aupuni] ia Mele Nahakuelua no kana mau keiki, Kalaimia, Ema a me Ioane, a na lakou hoi i hoolilo aku i ka Mea Hana Moraki ma o kekahi Palapala Kuai i hanaia Aperila 20, 1885, i kopeia ma ke Keena Kakau Kope i oleloia iloko o ka Buke 96, ma na aoao 223 a me 224.
He mau aina kalo a me kula keia mau apana a elua me na pono wai, kokoke i ke kahawai o Pauoa makai mai o na aina o ka Peresidena, a aia hoi kekahi mahele malalo o ka hoolimalima i kekahi Pake no ka uku hoolimalima o Hookahi Haneri Dala o ka makahiki. mar 2-5pl
Hoolaha Manao Hooko Mo raki a me ke Kuai.
MAMULI O KA MANA KUAI I HOIKEIA ma kekahi Moraki i hanaia e G. W. OKUU o Honolulu, Mokupuni o Oahu, Paeaina Hawaii, ia A. ROSA, Kahu Waiwai, i kakauia ma ka la 5 o Iune, M. H. 1889, i kopeia ma ke Keena Kakau Kope Aupuni ma Honolulu i oleloia, iloko o ka Buke 110, ma na aoao 368 a me 369;
Ke hoolahaia aku nei ma keia ua manao ka Mea Paa Moraki e paniku aku i ka Moraki i oleloia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W. S. Luce, ma ke kihi komohana o na Alanui Papu me Moiwahine, ma Honolulu i oleloia, ma ka POAKAHI, LA 30 O MARAKI, M.H. 1896, ma ka hora 12 Awakea, i na aina a pau loa i hoikeia maloko o ia palapala a i hoakaka piha loa ia hoi malalo iho. A. ROSA, Kahu Waiwai no ka Mea Paa Moraki. Honolulu, Feberuari 29, 1896.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
O kahi i paa malalo o ka Moraki i oleloia, o ia no: Kela mau apana aina a pau loa e waiho la ma Moanalua, ma ka Mokupuni o Oahu i oleloia, a i hoakakaia ma ka Palapala Sila Nui 427, Kuleana 1186, no Kukalamanu, no laua hoi ka ili o 465 Kaulahao, a i lilo mai i ka Mea Hana Moraki ma o kekahi Palapala Kuai i hanaia i Mei 12, 1886, i kopeia ma ke Keena Kakau Kope i oleloia iloko o ka Buke 102, ma na aoao 37 a me 38.
Ua paa keia aina i ke kanu laiki ia e kekahi Pake, e uku mua ana he uku hoolimalima o — Dala no ka makahiki. mar 2-5pl.
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki, a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf