Ka Makaainana, Volume V, Number 20, 18 May 1896 — Page 1

Ka Makaainana.
BUKE V----Ano Hou Honolulu, Oahu, Mei 18, 1896. HELU 20

HANA HOOPAA INOA.
Na Poe i Paa me Kahi Mau Hoaiai.

                A hiki mai i kakahiaka Poaono nei, ka piha ana o ka hebedoma hookahi mai ka hoomakaia ana o ke Kanawai Hoopaa Inoa, ua 474 ka nui o na poe i hooko aku i ka makemake o ua kanawai la. Peneia iho ka mahelehele ana ma ke ano o na lahui: Haole, 212; Hawaii, 153; Pake, 79; Kepani, 22; Pukiki, 4; na lahui e ae, 4.
            Iwaena o na poe haole i paa, lehulehu na inoa o ua poe koikoi o kakou nei, e laa hoi me ka Pere sidena, elua Kuhina, a hookahi o na Lunakanawai o ka Aha Kiekie. Mawaho ae no hoi o lakou, he poe oha pili wale aku no paha hoi ka oi a o ka hapanui loa no hoi paha ia.
            Mamuli o ka inoino o ka hakuia ana o na olelo o keia kanawai, ua lilo i mea no ka lehulehu e nauki ai, oiai, ua lihi launa ole aku me ke kanawai i hooholoia ai i ke kau Ahaolelo o 1892 a i nalowale honua ai hoi me ko ka Moi kakauinoa ole. Wahi o ko makou lohe mai, ua manao ka Luna Helu Auhau e laweia aku ana he hihia imua o ka Aha Kiekie no ka hoao ana i ke kulana o keia kanawai hooluhi wale. Ke lilo nei ka lehulehu me kahi pomaikai ole e loaa ana i ka lehulehu, oiai, aohe loaa mai malalo o nei kanawai, aka, o na lilo ia e puehu aku nei.
            Ke loaa io hoi he hihia, malia e pau ana no i ka hoomaopopoia mamua ae o ka hoopanee ana o ka Ahaolelo. He mea pono io no paha hoi ke hoohana koke ia ae. Ina paha i manaoia pela, e pono i kahi mea e hele e hoopaa i kona inoa, a e hoole hoi i ke kau ana i ka hoailona kuni o kona manamanalima nui, alaila, e hooleia mai ana kona hoopaaia aku. Alaila, e noi aku oia i ka Aha e kauohaia ka Luna Hoopaa e hoopuka mai i kona palapala hooia me ke kuni ole ia, a ia wa auanei e hoea pono ai ka hana imua o ka Aha a maopopo hoi ka hopena o ua kanawai la. Ina pela e hanaia ai, he mea paha hoi ia e pale ae ai i kekahi mau hoouluhua ana i ko ka lehulehu manao.

            Ua hoopuka mai ka Aha Kiekie i ka olelo hooholo ma kela hihia o E Helekunihi, i hoopiiia ai no lawe i ka waiwai kipe e ahewa ana iaia, a o kona hoopai ua hoopauia mai ke kulana Lunakanawai Apana no Wailuku.

Niau Loa ia Kamaaina.

                Ua hookuu mai i kona hanu ana i na ea o keia ola ana o H. R. Hollister, ma ka hora 10 kakahiaka o ka Poalua iho la, ma kahi noho o kana hunona, H. A. Parmelee, ma Alanui Beritania, i ke 72 o kona mau makahiki.
            Ma Saulebure, Mokuaina o Konetikuta, kona wahi i hanauia ai ma ka la 13 o Sepatemaba, 1824. I ka elua o kona mau makahiki ua nee aku kona mau makua no Nu Ioka. Mai laila aku, ua nee hou aku no Winchester, Scott co., Ilinoi. Ma keia wahi oia i noho lawelawe oihana ai a mare i ka wahine, oia o Misi Charlotte Pond. Ua hanau mai na laua elua keiki, he keikikane a he kaikamahine. Ua make ka mua a o ke kaikamahine ka mea e ola nei, oia o Misasa H. A. Parmelee. I ka ekolu o na makahiki o ke kaikamahine, make aku la ka wahine; no ia mea, hoolilo aku la oia i kana oihana imi waiwai a nee aku la no Mekiko i ka 1849 a lawelawe oihana hou malaila. Pela no hoi ma Tekasa. No ka hoopilikiaia o kana oihana ma Mekiko, ua nee aku la oia no Todd Valley, Kaleponi, a mahope ma Kapalakiko. Haalele ia Kapalakiko i ka 1856, a holo mai no Hawaii nei. He puhi ko kana hana mua i lawelawe ai ma Hawaii nei, a mahope he kanu pia tapioka. No ka holopono ole o keia hana, ua hui oia me kona makuakane ma ka hana waimomona a me ke kuai paka. I ka 1878, ua hoalaia ka oihana kuai laau lapaau, a ua holomua no ma keia hana.
            Ua haalele iho oia he kaikamahine, he moopuna wahine, he hoahanau a he kaikuahine a me ka hunona no hoi. Auwina la o kahi la ae i hoolewaia aku ai kona kino koou no ka ilina o Maemae, malalo o na lawelawe ana a ka Hui Malu Masona, oiai, he lala kiekie oia no ia ahahui.

Ka La o ka Peneteko te.

                He la nui keia La Pule ae no na Ekale sia Anagalikana a me Katolika Roma, o ia hoi ka la hoomanao e hoano ai ko ka hoouna ana mai o ka Haku a Hoola i ka Uhane Hemolele maluna o kana mau haumana mahope koke iho o kona pii ana i ka lani, a ua kapaia e like me ia maluna ae. Ma kahi olelo ana, ua kapaia keia la o ka La Pule Keokeo, no ka mea, he keokeo ka aahu nui o na poe manaoio a pau i ke au kahiko. E hoomanaoia aku ana ka la me na anaina haipule kupono maloko o na luakini o Sana Anaru a me Malieokamalu.

Hookuuia o J. D. Hayne.

                Ma ka Poaha nei i ku ae ai imua o ka Aha Kaapuni ma ke kiure ka hihia o Julien D. Hayne, no na mea ino wale. E hoomanaoia ua hoopaiia oia imua o ka Aha Apana he $100 mamua aku nei, a ua hoohalahala nae ia hoopai. O ke kiure i noho e hoolohe i kona hihia, o C. J. Sherwood, C. V. Sturdevant, Archie Turner, F. Hustace, J. J. Locker, C. B. Hustace, Geo. Gray, F. M. Starkey, Wm. Lucas, A. B. Wood, C. B. Gray a me B. R. Campbell. O na olelo ike no i hoikeia imua o ka Aha olalo nei, o ia na mea i laweia ae imua o ke kiure. Pau ia, ua ku ae ka mea hoopiiia a pale nona iho me ke noi aku i ka Aha e kauoha aku i ke kiure e hookuu i ka mea hoopiiia. Elua hora a keu ka loihi o kona manawa i haiolelo ai imua o ke kiure. Pau kana, ua hoopanee mai ka Aha a ka Poalima. Ia kakahiaka, ua ku ae ka Hope Loio Kuhina a haiolelo imua o na kiure no 35 minute, a pau ia, ao mai ke kahu o ka Aha a ua komo ke kiure iloko o ka rumi a puka mai me ka olelo hooholo e hookuu ana i ka mea i hoopiiia, he 9 kue ia 3, iloko o 17 minute o ka noonoo ana.

Hookuku Kiki Pu Pololei.

                No kahi wa loihi i hala ae ke kamakamailioia ana no kekahi hookuku kiki pu mawaena o kekahi mau mahele wae o na makai kumau a me ka puali o na Koa Makaainana o ka Repubalika nei. Ua nui no na kaena ana o na aoao a elua a hiki wale i ka hooko nui ana i akaka ai owai la ka oi.
            Auwina la Poaono nei i ki ai na makai ma ko lakou kahua makai o Iwilei, a ua loaa ia lakou he huina helu nui o 354. Kakahiaka hoi o nehinei i ulele ae ai na haole, a ua loaa ia lakou he 334, he 20 ka haule mahope o na oiwi ohakulai. Lohe mai nae hoi makou ua nui ka ke kuaki o ua poe haole la, a o ka hopena no o ia, ea, o ka ulele hou aku. A ke ulele hou, ia wa auanei e maopopo ai—owai ana la o lakou ke poipoi a ke ai pulelehua ana.

            Po Poaono nei, ma kahi o ka Me re-go-rauna, ua kipakuia aku na kaikamahine a me na poe opio a pau e na makai e hoi i na kauhale, mahope iho o ka hora 9. Ke hoomaka e nei no ka paha hei ka hooko ana i ke kanawai kapu o ka po, e like la hoi me ke au o na hora kapu.

Moku Heihei Ko roneta.

                Ua ku mai i ka po La Pule, la 10 nei, ka moku heihei Ko roneta mai Kapalakiko mai iloko o 15 mau la holo. Ua loaa oia i ka pohu i ka moana, a o ia ke kumu o kona ulolohi loa. Mai nei aku oia e holo aku ai no Iapana me kana mau ohua i lawe pu mai nei. He kulana maikai kona ke nana aku. I kahi paha o keia mau la e holo aku ai oia. He 15 ka nui o kona mau kanaka lawelawe mawaho ae o ke kapena a me ka puali o na poe kilo hoku.

                Ianei mua no keia wahi moku i ka 1888, a mahope o ka hala ana o na la 8 o ke ku ana maanei, ua holo aku la oia ma kana huakai makaikai honua me 12 mau ohua hanohano. Ua ikemaka ka Moi Kalakaua i kona kapiliia ana, a ua hui a launa pu me kona ona. Ma ka heihei moku i ka 1887 mai Nu Ioka a Kuini tona, Irelani, na keia wahi moku ke eo, a haule ko Enalani moku heihei holo loa. He $10,000 ka pili. O ka manawa i holoia, he 14 la a me 19 hora oi mamua o ke Dauntless, ko Enelani moku. I kona ku ana mai ianei, ua holo aku o Kalakaua iluna ona e apo aloha ai i ke kapena a me kona ona. Makai iho o ka makeke kahiko kona wahi i ku ai.

Eia no ua Hou Pahi.

                Mahope iho o ka hora 7 o ka po nei, ua loaa mai la he lono i ka Halewai e hoike ana ua houia kekahi kanaka ma Kamoiliili i ka pahi e kekahi haole Norewai. Ua hoea aku o Kapena Sekota i kahi o ka pilikia a ua loaa aku iaia he kanaka ma ka inoa o Keaka Kahoolamau, e waiho mai ana iloko o kona hale ua hele a haukae i ke koko. I kona wa i hoihoiia ai no ka Halemai Moiwahine, ua nawaliwali loa oia. Penei kahi moolelo i loaa mai. Ua ona keia Kahoolamau me kekahi poe e ae, a ua ulu ae he hakaka mawaena o keia kanaka a me ka Norewai a ua hoehaia ka Norewai. Puka aku nei ka Norewai a hoi hou mai la a loaa o Kahoolamau a pahuia aku la mahope o ke kua me kekahi pahi pelu, a holo aku la ka mea hou pahi. I ke ahiahi okoa ka hanaia ana. Ua paa ka lawehala i ka hopuia, o O. Evenson ka inoa.

            Ua make i ka la i nehinei ma kahi noho o Edemana Haka o Mo se K. Awailua. I keia auwina la e nalo ai.