Ka Makaainana, Volume V, Number 23, 8 June 1896 — Page 3

HONOLULU, OAHU, POAKAHI, IUNE 8, 1896. 3

NA AINA MAMAO.

Mau Lono Huikau mai kela a me keia Wahi Like Ole.

Ulia Alahaka Weliweli.

                Ma Vitoria, Kolumebia Beritania, Mei 26, ua loaa iho la he ulia ma kekahi alahaka. Oiai, e hoomanaoia ana ko ka Moiwahine la hanau ma ia la, ua nui ko ka lehulehu hele ma na kaamahu me na kaa panee a ma na ano e ae no hoi no kahi o kekahi hoouka kaua hoomeamea a hookahakaha aumokukaua e malamaia ana ma ka lae Makaule, kokoke ia Esekimala. Ua piha kui na kaa a pau ma na ala a pau me na poe makaikai. Hora 1:30 ua haalele aku he kaa nui a kaumaha ia alanui Aupuni me 100 a oi aku poe o luna. I ka hiki ana aku iwaenakonu o ke alahaka o 150 kapuai ka loa, ua haki pu iho la a haule iho la ia kaa a me kekahi heluna o na kaa lio maoli a me na poe helewawae iloko o ke kahawai malalo ae, he 100 kapuai ke kiekie mai ke alahaka aku. He 80 ka nui o na ola i poino ma ke piholo nui ana iloko o ka wai.

Puoho na Hana Hiena ma Ke rete.

                Maloko o ka nupepa Manawa o La dana o Mei 25 he palapala mai Atenai aku, e olelo ana: Me he la ka hoi, ua hoopuoho emoole ia ae ka popilikia i upu loihi ia ma ka mokupuni o Kerete, a mai ka La Pule mai ua noho alii ae na hana kanawai ole ma Canea. O na koa Tureke hoi keia, me ka hiki ole ke hoomaluia aku, ua hele makawalu ae ma na alanui, e ki ana a e luku wale ana a me ka hao wale aku no i na waiwai o ka poe Karistiano.
            Ua telegarapa ae na Kanikela a pau no ona mau mokukaua. I ka loaa ana aku o ka lohe ma Malata, ua holo koke aku na aumokukaua Beritania e ku ana malaila no Kerete i keia la. O ka mokukaua Beretania Huda (Hood) e ku ana ma Palaruma kekahi e holo aku ana no laila i keia po. Apopo paha e holo aku ai na aumokukaua Helene.
                O na elele a poe lawelawe hoi o na keena Kanikela Helene me Rukini, ua pepehiia a pau i ka make. Ua mana ole ia Tukehana Pasa ke papa a kaohi aku i ka na koa hana, oiai, aohe maikai o kona launa ana me ke kiaaina koa, o Isedini ka inoa, ka mea hoi i hoohuoiia oia ke poo a me ka hiu o keia popilikia. O ke kumu nae hoi i ulu mai ai o keia hana, aole loa i maopopo iki, oiai, aohe hana a na Karistiano e hiki ai keia hoopai weliweli ke hookauia aku. Ua ano like no hoi ke kupilikii o ke kulana ma Retimo. Maluhia o Herakelione, aka, ua hoikeia ae aia he hakaka hahana mawaena o na poe Tuke a me Karistiano ma kahi kokoke ia Vamoso.
            Mai a mahope aku o na lono maluna ae, ua ala hou ae no ua mau hana hiena hou. Ua lehulehu o na mana i hoouna aku i mau mokukaua no ke kahua o keia mau hana. O na Kanikela o na aina e a pau ma Canea, ua pau nui aku iluna o ka mokukaua Beritania Huda iaia i ku aku ai. Ua piha na kahua o na kanikela a pau me na poe i holo aku e imi i wahi no lakou e pakele ai. He lohe wale ia aku no ke kani mai o na pukuniahi ma kahi mai o Kaleve, kahi o kekahi pualikoa i hoounaia aku ai no ke kokua ana i ka papu a ua halawai aku nae hoi me na poe kipi ma ke ala. Ma ka la 28 hoi, ua pau ka hakaka ana ana mawaena o na koa a me na makaainana ma na alanui o Canea, aka, ua mau aku no nae ka hakaka ana ma na wahi mawaho aku o ia awa-kumoku.
                O ka hoolewa hoi keia o na poe Karistiano i pau ai i ka lukuia ma Canea, ua lawelaweia no ia malalo o ka hoopakele ana a na pu o ka mokukaua Beritania Huda. Aole na pilikana o na poe i pau i ka make i aa e ukali aku mahope o ka lakou poe make a ka ilina. Ua hiki aku he 3,000 poe Kerete i lawa pono me na mea kaua ma ia wahi no ka hoopakele ana i ko laila poe Karistiano.

Kikiao Makani Ku i ka Weliweli.

                Ua halawai ae o Sana Lui, Misouri, Amerika Huipuia, me kekahi kikiao makani, i kapaia he saikalone (cyclone), ikaika i ikeia ma kona moolelo i Mei 27. He mau haneri o na ola i poino a he mau miliona hoi o ka waiwai io o na waiwai ka i hoopoinoia. Ua kololio aku keia kikiao hoopoino mai Misouri a komo i Ilinoe a me Inidiana, a o na wahi a pau ana i holo aku ai, ua halawai me na poino he nui.
            O na lono hope loa nae hoi no ka poino ma na Mokuaina ekolu, ua koho wale ia ua oi aku mamua o 1,000 ola i poino, a ua manao wale ia no hoi e oi loa aku ana keia i ko na mea i koho mua ia. E like me na wahi i halawai me ka poino, ua maheleheleia na make e like me keia iho: Sana Lui, 300; Sana Lui Hikina, 450; Darake, Ilinoe, 80; Rush Hill, Misouri 10; Renike, Misouri, 5; La Bade, Misouri, 10; Ranadope, Misouri, 7; Mauna Venona, 10. Aohe i maopopo ko na wahi e ae. Ua kohoia aia ma kahi o na tausani ka nui o na ola i poino.

Poniia ke Za o Rusia.

Ma Mosekao, Ru sia, Mei 26, i poniia ai ke Alli ka Emeperoa Nikolasa Alekanaderovita, ka mea mana hookahi o na Rusia a pau, a me ke Alii ka Emeperese Alekanederia Feodoravana, me ka eehia nui, maloko o ka Luakini o ka Asumetiona, me na oihana haipule kiekie loa a e like hoi me na loina haipule a me na hana kahiko. Ma na olelo hoi a na poe kakau nupepa i ike, ua palena ole ka nani a me ka hiehie o na aahu o na poe kiekie, mai na alii o ka aina, na luna kiekie hoi o ka Ekalesia, a me ko na luna oihana kuloko a kuwaho, a pela no ka hoi me na hoohiwahiwa ana ma o a maanei, iloko hoi o na hiohiona hauoli nui o ka lahui.
            Ma ka ke Za palapala o ka hoopuka ana ae mahope iho o kona poniia ana, ua hookuu aku oia i na auhau i uku ole ia ma Rusia Europa a me Polani; ua hoemiia mai ka auhau aina he hookahi hapalua no umi makahiki, a ua hookuu a hoemi mai paha i na hoopai a pau; hoopau loa ia na hoopai liilii e hoopaahaoia ai kahi a e uku ai paha hoi i ka hoopai dala a 300 rubela, me ke koe nae hoi o na poe i hoopaiia no ka powa, apuka, anunu dala, hoopukapuka kue kanawai, banekarupa kolohe, a i ole ia, o na hewa paha i kue i ka hanohano o ke kanaka. Ua hoemi a hooluolu akahele ia mai hoi na hoopai o na poe i hoounaia i Siberia. O na poe Pole kipi hoi i holo mahuka aku mai ke kanawai, i ku ole i ka hewa pepehikanaka, hoomainoino a puhiahi paha, ua hookuu loa ia mai ka hoomalu a kiai hou ana aku a na makai a ua aeia aku hoi e koho ae me ke kuokoa no ko lakou wahi e noho ai, aia nae hoi a lawe lakou i ka hoohiki kakoo aku i ke Alii a me ke aupuni.

HALEKUAI LAHUI KALAHIKI.

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki, a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf

Huina Waiwai Nui!
Hoemi Nui Loa Ia!!

Pomaikai Nui ma na Mahele a pau ma ko L. B. Kerr Halekuai, —Alanui Moiwahine.— 30 i-a Kalakoa no $1. Papale Mauu Laiki no 25 keneta pakahi. 12 i-a Kalakoa Huluhulu no $1, 18 i-a Lipine no 25 keneta, 15 i-a Makalena Keokeo no $1. Na Hainaka Silika 10 keneta pakahi. Na Pua a me na Hulu Papale, aneane e haawi wale ia. Ua makemakeia e lilo pau loa aku na waiwai, aohe hookoe ana iho i kahi mea. O ka emi oiaio keia i ike ole ia mamua. E hele koke mai, i loaa koke no na mea e anoiia ana. Na ka hiki mua no ka wae mua. L. B. Kerr, Alanui Moiwahine. apl 27-tf

Hoolaha Papa.

Owau, o Ah Ong [Pake], no Kamalo, Molokai, ke papa loa aku nei i na poe a pau aole e hoa e mai i kuu wahine mare ia Keola Ilianu, no ka mea, ua haalele kumu ole mai oia ia'u. Aole au e uku i kona mau aie. AH ONG. ine 8-

C. E. Williams me Keiki.
E d. A. Williams, Luna Nui.

Helu 611, Alanui Moi, ma Ewa iho o ka Pa o Ai gupita. He mau mea kuai lako hale o na ano a pau loa. He mau mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaapio a me na Kaa-ohana. Ina no e ninau ia laua, e loaa no na Pohaku Kia Hoomanao no na He Kupapau. O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono ma ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179—Kauhale a me Kahea Po, Helu 815. nov 2-mp. feb 3-mp.

HELE HOOLUOLU.
O. R. L. Co.
MA NA POAONO A ME NA LA PULE.

E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni. Papa 1. Papa 2. Manana - - $ 75 $ 50 Mahiko o Ewa - - 1 00 75 Waianae - - - 1 50 1 25 F. C. Smith, Agena Ohua a Palapala Nui feb 10-tf