Ka Makaainana, Volume V, Number 24, 15 June 1896 — Page 2

2 HONOLULU, OAHU, POAKAHI, IUNE 15, 1896.

IO SEPHINE
— KA—
EMEPE RESE PUUWAI OLU O FARANI.

MOKUNA II.
KA MA RE ANA O IOSEPINE.

                O ka wahine nae ana i kakau aku ai i keia palapala, ana hoi i hilinai ai aole loa e loaa ana he mau mea e kuee koke ai oia me kana kane, ua heluhelu iho oia i ua palapala la a hoouna mai la ia Bohane. I ka ike ana iho hoi o Bohane i ka huaolelo i kahakahaia maluna o ka apana pepa e na lima ponoi o kana wahine, ua pii ae la kona inaina me ka hikiwawe loa. Komo iho la iloko ona ka manao hoohuoi eia he mau hoolala malu ke holo nei mawaena o kana wahine a me Uilama, a no ia mea ua hiki ole iaia ke kaohi iho i kela manao huhu iloko ona no keia hana a kana wahine. Ua hoopuka aku oia i kekahi mau olelo oolea imua o kana wahine ma ke ano hoonaukiuki, lawe ae la i ka laua keikikane, Eugene, mai kona makuahine aku, me ke kamailio pu ana aku iaia no ke oki mare mawaena o laua. Ua kukuli aku o Iosepine imua ona me ke noi pu ana aku, no ka pono o ka laua mau keiki, aole e hoikeia ae keia kuee mawaena o laua imua o ke ao holookoa.
            O kona mau waimaka e kulu malie ana imua o kana kane, me kona mihi pu ana aku i kela mea ana i hana ai, aole no i maliu mai o Bohane iaia. No ia mea, ua kakau oia he palapala imua o ka aha hookolokolo no ka hookaawale ae i ko laua noho ana iloko o ka materemonio a aole hoi oia e malama i ke ola o o kana wahine. Aole he mea hiki ia Iosepine ke hana ae. Haalele iho la oia a me kana kaikamahine i kahi a lakou e noho ana a hoi aku la no ka hale hookahi, a ilalia laua e noho ai me ke kali ana no ka ka aha mea e hana mai ai no ka hoopii a kana kane. Hala ae la he mau mahina o kona noho hoomanawanui ana, loaa mai la he lono iaia ua hooleiia ke noi a kana kane, a e malama ana o Bohane iaia a me kana kaikamahine a pau na la o ko laua ola ana.
            Ua haalele koke iho la o Io sepine i kahi a laua e noho ana a hoi aku la e noho pu me kona mau hoa'loha, ua apo koke mai la hoi lakou me ke aloha iaia a hookipaia aku la. Aka, o ia mau hana maikai a kona mau hoa'loha iaia aole no ia he mea e hoomamaia ae ai kona manao luuluu o ke aloha keiki, a oia kana i hoopuka ae ai—aole oia i kupono e ola maluna o keia honua. Iloko o na hoao mau ana a kona mau hoa'loha e hoopau a e hoopoina ae hoi oia i na mea i hala, aole no e hiki, no ka mea, ua ulu ia mea iloko o kona puuwai a ua lilo he mea no kona noonoo e hoolauwiliia ai ma o a maanei.
            I kekahi la, ua hoao iho la kona mau hoa'loha e lawe iaia no Vaseile, kahi a lakou i manao ai malia ilaila paha e loaa ai he noho'na oluolu a me ka maha iaia, a e hiki ai hoi iaia ke hoopoina i na mea i hala. Kaalo ae la lakou ma na aoao o na malapua me na pio elua i hoowehiwehiia me na lau nahele o Tairiano, kahi e hoohala ai o Maria Akone i kona manawa o ka la me na lealea like ole. I keia wahi e olelo mau ia ai, pau ke kulana Moiwahine o Akone, a o na poe a pau e hiki mai ana ma ia wahi, o lakou kona mau hoa e hoohala manawa pu ai. Iaia e noho ana me ka nanea i na mea like ole imua o kona alo, maalo ae la kekahi poe wahine ma kekahi aoao a aia hoi iwaena o lakou kekahi wahine e nana ana i na mea hanalima akamai o na ano like ole, ike koke aku la oia aole he mea e, aka, o Iosepine no ia. Nolaila, holo aku la oia a kahea aku la e hele mai, a hele mai la no hoi o Iosepine a hui ae la laua me ke aloha. A o ia ka ka Moiwahine i kamailio aku ai me na minoaka ana, "E Madame Bohane, ua hauoli au i ko'u ike ana ia oe ma keia wahi. Ua hiki ia oe ke ike i ke ano o keia mau mea nani e waiho nei (o ia na kii pena i hana maiau ia). Ua oluolu loa au e hookipa ia oe ma na ano a pau." O keia mau olelo i puka aku mai ko Akone waha aku, ua lilo ia he mea hoohauoli loa ia Iosepine. O kona iini nui loa no ia o ka loaa he mau hoa'loha pilipaa nona. I kekahi la ua konoia aku oia e Akone e hele mai no kekahi kukakuka ana mawaena o laua. Ia Iosepine i noho iho ai ma kona aoao, ua hoopuka aku oia i na olelo me ke akahele a me ka oluolu me kona hooia pu aku nana (Akone) e nana i ka pono o kana keikikane, a ia manawa pu no hoi i wehe ae ai i kona lei a-i i okomokomoia me na pohaku makamae a hoolei iho la maluna o Iosepine, he hoike hoi no kona mau manao maikai iaia a me ke aloha. Ua hoea mai ka Moi iloko o ia manawa a laua e kuka pu ana, no ka mea, ua komo iloko ona ke aloha no keia wahine i haaleleia e kana kane. Ua pumehana keia hui ana o lakou ma ia keena.
            Mahope iho o kela mau la o ka hui aloha pumehana ana mawaena o laua me Akona, ua loaa mai la he palapala iaia mai Ma tinuku mai, e kauoha mai ana iaia e huli hoi aku no kona aina i hanau ai. Hooholo iho la oia i kona manao e ae aku i kela kauoha mai iaia e huli hoi aku. Hookahi mea nana i hoehaeha loa mai iaia, oia kona haalele iho i kana keikikane e noho mahope nei, he puupuu ikaika loa hoi ia i kuiia aku imua ona. No ia mea i hele aku ai ua wahine ahonui la a noi aku la ia Bohane e aeia mai oia e lawe pu ia Eugene me ia. Aka nae, ua hoole mai o Bohane imua ona me ke oolea loa.
            No kekahi mau la haalele iho la o Iosepine a me kana kaikamahine ia Bohane a me Eugene, a kau aku la maluna o ka moku no Matinuku. Hoomanao ae la i na la i hala ae o ko laua noho pu ana he kane a wahine, na la hoi ana i hoomaopopo mua ole ai he hopena ke hiki mai ana mahope aku no ia mau mea.
            Aia ka makani ke puhi malie la i na pea o kona halelana au i ke kai maluna o ka Atelanika, a ke nana hoomau la hoi oia i ka aina ana i noho ai a loaa na keiki me na hoa'loha lehulehu. O ke kaumaha a me ka luuluu, aia no ke mau la iloko ona, a ua like ia me kekahi ohu nee i ke kuahiwi. Puili ae la ia i kona mau lima a hoomohala ae, aole nae he mea i loaa iaia.
            O ka mea nui loa mahope iho o kona pae ana aku i Matinuku, o ia no ka poai puni ana mai o na paele iaia, kona mau hoa paani pu iloko o na wa i hala. He keu ko lakou hauoli i kona ike hou ia ana ma ia mau kaiaulu.
(Aole i pau).

            O ka mokumahu Kepani Toyo Maru ka i ku mai i ka Poakolu nei me 14 ona mau ohua papa ekahi a me 301 ohua papa elua. I ka la apopo no paha e holo aku ai no kona awa i holo mai ai.
            Ua hoole o Kiaaina Budd o Kaleponi i ka hoololi ae i ka hoopai o ka make i kauia maluna o Paulo Kamaunu no ka pepehi ana i kekahi wahine haole ma Kaleponi no. O ka la 19 o keia mahina e kauia ai oia i ka amana.

            E like me ka mea maa mau iloko o na makahiki i hala, pela no ka mea i hanaia aku ai i na Kahunapule, na Kahukula Sabati a me na Elele o na Ekalesia Kalawina a puni ka Paeaina, i akoakoa mai ma ka halawai o ka Ahahui Euanelio, ma ka haawi manawalea ia ana aku ia lakou he paina, e na wahine haole maloko o ka Luakini Halepapu i ka Poalima, la 5 nei.

Mele no Kamalii Auwana.

A i Hauhaukoi ka'u aloha,
I ka wai o ka bia hoonui hana,
Ilaila au i ike iho ai,
I ke Sahiohio o na hoa,
Pane mai Davida me ka unahe,
O ke Kapena nui o ka Puali,
Paa like na hoa me ka omole,
Lilo oe i ka inu wai kaulana,
Kuu pau na hana i ke akea,
Ka'uka'ulua ole i ka lehulehu,
Lehulehu na hana a ka Mafia,
A ka hui kaulana auwana po,
Loaa nui aku i ke aumoe,
Ma ke kihi o ke Alanui Lehelehe,
Kahale mai au a ke aloha,
A ke Za kaulana o Rusia,
Pehea iho oe i kahi He rio,
O ke kuke hana ono o kapuahi,
Pau ole no hoi ke koiikoi,
I ka pela nolunolu o Kakae,
Ka ukali pilikino o ka emepe ra,
I alohaia no ia uka iu,
I ka ai kaulana a na kupa,
I nai pu me ka hiu kamano,
Amaama melumelu mikoikoi,
Na mea ai o ka po kaulana,
Kaulana na hoa o ka Mafia,
I ke ku'i puupuu i ka makai,
Makai auwana mai o Kawa,
Kaluaia iho i ka auwai,
Mea ole ka lepo o na loi kalo,
I ka naholo e pee o hopuia,
Hu mai ke aloha no ia uka,
I ka ululaau ulu oliva,
                        Hainaia mai ana ka puana,
                        Na hoa auwana o ke aumoe.
            [Hoohenoia no ka la 11 o Iune e kamalii wahine o ke Alanui Pauahi.]

MO RIKAWA,
Ka Oi ma Kana Hana.

Ua nee aenei kona hale hana mai Alanui Betela a i ka Halelio o Akana, Alanui Konia, mauka o Alanui Hotele. Amara a me Hana Kaa me ke Kapili Kapuai Hao Lio. Oluolu loa ka Uku o ka Hana ana, i hiki ole i na poe e ae ke lihi launa aku. iun 8-3ml

Hoolaha Papa.

Owau, o Ah Ong [Pake], no Kamalo, Molokai, ke papa loa aku nei i na poe a pau aole e hoa e mai i kuu wahine mare ia Keola Ilianu, no ka mea, ua haalele kumu ole mai oia ia'u. Aole au e uku i kona mau aie. AH ONG. ine 8.

C. E. Williams me Keiki.
E d. A. Williams, Luna Nui.

Helu 611, Alanui Moi, ma Ewa iho o ka Pa o Aigupita. He mau mea kuai lako hale o na ano a pau loa. He mau mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaapio a me na Kaa-ohana. Ina no e ninau ia laua, e loaa no na Pohaku Kia Hoomanao no na He Kupapau. O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono ma ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179—Kauhale a me Kahea Po, Helu 815. nov 2-mp. feb 3-mp.