Ka Makaainana, Volume V, Number 24, 15 June 1896 — Page 3

HONOLULU, OAHU, POAKAHI, IUNE 15, 1896 3

NA AINA MAMAO.

Mau Lono Huikau mai kela a me keia Wahi Like Ole.

Na Lonolono no Cuba.

                Ua hoole na luna Sepania i ka haawi pio ae ia Matina, o Menedoza kahi inoa ona, no ke apuka ana ka he $24,000 mai ka hui banako o August Belmont & Co. ma o kekahi kikoo i apukaia. Aia oia ma Havana, a ua kakauinoaia na palapala e Kiaaina Moatona a me Kuhina Nui Olone no kona hoihoiia aku no Nu Ioka, a ua waihoia aku keia mau palapala imua o na luna oihana Sepania. Ua akaka ole ke kumu o ka hooleia ana o kela mau noi.
            Maluna aku o $27,000,000, ka heluna nui loa hoi o na bona o Kuba, ka i kuaiia e na poe waiwai Farani. O ka manao nui o keia poe Farani, o ia no ka loaa o ka hoomalu aku i ka hapanui o ko Kuba mau aie, i loaa ai hoi he keehina iloko o ko Kuba Waihona Waiwai ma ka hoonoho ana aku i elele no ko lakou hui iloko o kela a me keia hale dute ma ia mokupuni e nana ai no ka lawelawe hoopono ia, a pela auanei hoi e loaa ai he hooia maopopo ana no ka uku pono ia o ka ukupanee o ka aie.
            Na Generala Weila i hoomanaia ae ka hoikeia o ka moolelo o na hana o ka aha-koa i hookolokolo ai ia Militona a me kekahi poe e ae i hopuia ai iluna o ka mokukuna hoopae lako kaua Competitor a ua hoounaia aku no Maderida no ka ke Aupuni mea e hana mai ai, ma ka mokumahu lawe leta i haalele aku ai ia Havana, Cuba,

i Mei 10. Aohe oiaio o ka olelo ia ina e hoololiia mai ana na hoopai o ka aha-koa i kau ai no kela poe ma keia hihia, alaila, e haalele aku no ka o Generala Weila a o kekahi generala e ae paha ona. Mei 12 i hoolahaia ae ai no ka wa mua loa ka hoopai a ka aha-koa i kau ai maluna o na poe elima i hopu pio ia ai o ka moku kipi Amerika Competitor, a he make wale no ko lakou hopena a pau. He hoopii ka i kauohaia ae no ka hoolilo aku i kela mokukuna no ke Aupuni.
            Mamuli o kekahi mau hoomaopopo ana mawaena o Sepania a me Ame rika Huipuia, e aeia no na pio o ke Komopetitoa e hookolokolo hou ia imua o na aha kivila, e like hoi me na hoakaka ana o na kuikahi mawaena o na aupuni a elua. O ke kauohaia ana mai hoi e hoounaia aku ka moolelo o ka aha koa i Maderida, he mua ka ia mamua ae o ka ke Kuhina Amerika telegarapa ana ae ia Kuhina Nui Olone, alaila, ua maopopo loa ua keakea mua loa mai o Sepania i ka hookoia o ka hoopai make maluna o kela poe, a he hope wale iho no ka hoi ka Amerika Huipuia keakea ana aku. He wahi kulana ano e paha hoi keia no ke Aupuni Amerika.

Papa Leo o kekahi mau Luna Kiekie.

                He palapala no Ladana o Mei 23 ke olelo ana: O ka hoakoakoa ana o na hae o na puali koa i ka Poakolu nei ma ka wa o ka hoomanao pili oihana ia ana o ko ka Moi la hanau, oiai, he la ano nui ia, ua aneane nae hoi e lilo i mea ole mamuli o kekahi hoopaapaa mawaena o Haku Wulu se, ka alihikaua o keia wa, a me ke Duke o Camebarige, ka alihikaua mua. Ua hoike ae ka hoi ka inoa hope i kona makemake e hele aku ma ka hookahakaha ma ke ano he Duke Alii a he Konela Nui no ka pualikaua, a ua koi aku oia maluna a mamua ae o Haku Wuluse, a mamuli hoi o ia ua olelo ae ka inoa hope aole oia a me kona mau ukali e hele aku ma ka hookahakaha. Nui ka piolokeia o keia kulana, a hiki wale no i ka waihoia ana aku imua o ka Moi, ma kana lawelawe ana aku hoi i paleia ae ai keia ano e ma kona kauoha ana i ke Kama'lii o Wale e hele a e apo mai i na hoomaikai ana a na pualikoa. Ma ke kulana hooilina o ke Kama'lii o Wale, oia ka oi maluna ae o na mea a pau, a ua hookuu hauoli aku o Haku Wuluse i kona kuleana ma o kana oihana la e lawe mai i na aloha hoomaikai ana a na koa. Iloko o ka pualikaua, ua nui ka hauoliia ua kupaa o Haku Wuluse ma kahi o kona mau pono.

Noho me ka Weli o Make.

                O ke kulana ae la keia o ke Suletana o Tureke e noho mau la mamuli o ka lono no ka pepehiia ana o ke Sa o Peresia. Iloko o na pule elua mamua aku o Mei 17, mahope koke iho o ka loaa ana ae o ka lono, ua 1500 na poe Amenia i hopuhopuia. He 52 o keia heluna i kipakuia no Anatolia. Eia nae, aole loa keia kueia o ke Suletana iwaena o na Amenia, aka, aia no ia iwaena o na Tuke opio. He heluna o ia poe opiopio i hopuhopuia a he 16 i kipaku pu ia me na poe Amenia no Anatolia. He 73 o na haumana Tuke o ke kula koa o Kulelia i hopuhopuia me ke akaka pono ole o na kumu. O na haumana hoi o ke kula Amenia ma Galata, ua pau i ka hoopaaia no 20 makahiki hoopaahao pakahi, no ka loaa ana aku o na palapala noi dala no ke kokua ana i na poe Amenia ma Zeitouna.

Holapu a ke Kole ra ma Aigupita.

                He 24 ka nui o na make kole ra ma Cairo, 28 ma Alekanederia a 1 ma Tura i Mei 19. O ka mea i make ma Tura, ua hoikeia mai ia mai waena mai o na pualikoa Aigupita. Aia ke ano hoopoluluhi mai ke hoopunana la maluna o Kairo, me ke ea koikoi a me na makani wela. He keu a ka ikaika launa ole mai o keia ahulau ana a ka mai iloko no o keia wa makamua o ka holapu ana aku. Ua kohoia ka ka nui o na make ma ke 90 hapa-haneri.
            Ua hoolalaia ae ma Ladana, Mei 26, ua ulu ae na hoohaunaele ana mamuli o ke kole ra ma Kairo. He misionari Amerika a me kana wahine ka i eha.
            A ma na lono hope loa mai nei hoi, aia ke laulaha loa aku la ke kole ra ma na kulanakauhale lehulehu o Aigupita.

Na I talia ma Abesinia.

                Aia no ka ka Moi Meneleke ke hoopaakiki la no ka hoomaluia aku o kona Aupuni e Rusia. Ke hoopilikiaia la ka nee kue aku o ko Italia mau pualikoa ma Abesinia mamuli o ka loaa ole o kekahi oihana e hiki ai ke hoolawa mau aku me na pono ai.
            Aole loa na pualikoa Italia e halele aku ana i ko lakou kulana A besinia ikaika o Kasala. Ma kekahi ulele ana ua hoauheeia aku na poe Abesinia e lakou me ka maalahi loa.

Na Hunahuna Laulaha.

                E hoohana aku ana ko Kuba poe kipi i na kaa hehihehi wawae.
            Ua hoomahuahua iki ae ke Aupuni Geremania i kona pualikoa ma Aferika Hema-komohana. O ka Rev. P. Knapp (Nape), ka misionari Amerika i kipakuia ai mai Bitilisi, ua haalele aku oia ia Bitilisi no Konakinopela.
            Ua hooholo na luna poo o Farani e hoopuipui aku i na kahua waho a pau o Farani ma Aferika, no ka hopohopoia o laulaha loa ae na hana hiena a na poe Derevise.
            No Pekina, Kina, ka lono o Mei 25, ua puoho hoohaunaele hou ae na poe Dune gana e kipi i ke Aupuni. Ua lilo pio mai  Maaiuka Wana ia lakou a ke nee nui la no ke komohana aku.
                Ma ke noi a ke Suletana o Tureke, ua papa aku ke Aupuni o Farani i ka hoopukaia ae o ka nupepa wahaolelo o ka poai Tureke opio, i manaoia e hoopuka a e hoolahaia ae ma Farani. Nui ko ka lehulehu kue no nei ano hana.
            Ia Li Hana Kana e hiki aku ai ma Geremania, ua manao ka oia e hele makaikai i ko Kurupa wahi hana pukuniahi ma Esene, kahi ana e waiho aku ai i mau kauoha no ona mau pu, a pela aku. E kipa ike aku ana no hoi oia ia Kama'lii Bisimaka. Ua kauohaia aku nei nae hoi oia e hoi koke ae i Kina ke pau na hana poni i ka Emeperoa o Rusia.
            Mahope iho o ka paa ana no kanawalu ho ra o na aoao kalaiaina elua iloko o ka Ahaolelo ma Otawa, Kanada, ua unuhi aku ke Aupuni i ka Bila Kula o Manitoba. I keia mahina e malamaia ai ke kau koho balota laulaha, a ua hilinai na aoao a elua no ka lanakila. O kela bila no nae hoi ke kumu i pau ai o ka noho ana o ke kau, a haliu aku la ka manao ana i na poe koho balota.

            Ke hoolala nei ka Hui Mokumahu o Waila Ma no ke kuai ana i mokumahu hou no lakou.

HALEKUAI LAHUI KALAHIKI.

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki, a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf

Hui Papa a Kukulu-Hale. Oahu.
(OAHU LUMBER & BUILDING CO.)

Leleo, Alanui Moi, kokoke i ke Kahua o ka Hui Alahao & Aina Oahu. Poe Kalepa Laau, Hana Aelike a me Kukulu Hale. Poe Hookomo Mai a Hoolilo aku i na Puka, Olepolepo, Kui, Pepa, Pena, Aila, Na Pono Kamana, A pela aku, a pela aku. Telepone 53. Pahu Leta 222. apl 20-tf