Ka Makaainana, Volume V, Number 24, 15 June 1896 — Page 6

6 HONOLULU, OAHU, POAKAHI, IUNE 15, 1896.

OLI VA KAZELA

KA OLALI NOHO KUAHIWI O INIA.

KA UI HOLOLIO IMUA O KE KAHUA KAUA.

Helu 8.

                O keia mau makana he nui i loaa mai iaia, oia kana a me kona makua i houluulu ae ai a kahi hookahi, a hoomaikai aku la i ka lehulehu na lakou i pahola mai iaia i kela mau makana.
            I ka pau ana ae o ia mau hana, uhi mai la hoi ka pouli maluna o ka aina, ua hookuuia ae la na mea a pau e hoi, a o laua nei hoi, hookau ae la laua i ka laua mau makana maluna o na kaa a hoihoi aku la no ko laua home kuahiwi. Ua piha hauoli loa ka elemakule Kazela no keia mau makana he nui, a ua hiki ole nae hoi ke pau iloko o ko laua wahi hale.
            He mau la mahope iho o ko laua hoi ana aku no ko laua wahi e noho ai, ua hiki aku la imua o laua ke kaikamahine alii o Arabia, a imua o laua i hoike aku ai oia i kona manao o ka hiki ana aku, oia hoi, no kona hoohihi loa i na hiona nani o Oliva, o ia wale no ke kumu o kona hiki ana aku. "A, e ka mea a'u e lia nei, ke noi aku nei au no kou ae mai i ka'u noi imua ou."
            Hohola ae la na mino aka maluna o Oliva a nana pono aku la i ua kaikamahine la, e hoike okoa mai ana no ua lou aku la no ka ia la manai iloko o kona puuwai, a pane mai la:
            "E kala mai, e ka mea i hoomoamoaia e ka lahui o A rabia. Ke ike nei au, ua kala kahiko loa no i hoopaaia ai kela manao onipaa o ke aloha iloko ou i kela po no a kaua i hui mua loa ai. Nolaila ke ae aku nei o Oliva e lawe mai ia noi a hoopaa iho maloko o kona puuwai, a na ka mea i ike ole ia e mawehe ae ia kaula mokumoku ole he aloha."
            Ia manawa i puili ae ai laua me na honi hoomau ana, a noa ae la kanawai ua laa aku la ia na ka mea ona waiwai, aohe kolohe nui nana e komo ae e akeakea, a pela paha i holo ai ke mele a na poe haku mele i olelo ai.
                        "Hiu no au a na'u oe,
                                Ua uoia ua paa."
                Aohe hana a ka hapauea Ka zela no keia mea a na keiki e hana nei, o ka mea i holo i ko laua manao o ia iho la kana e nana aku ai. Aia nae kona mau maka ke nana kapakahi mai la malalo o kona wahi papale palaulau nui me ka akaaka malu ana iho, me he mea la, e olelo iho ana oia: "Ua hei aku la oe i ke kuu'na akamai a ia keiki, aohe pahuna e hala ai, he kii'na na ka loea o nei ululaau."
            I ka uhi ana mai o ka po, ua hoaumoe iho la no ua ui la ma ko laua nei wahi home pelapela i kupono ole i na poe o ke kulana kiekie, aka, he mea ole ia i keia kaikamahine. Ua eleu mai la no nae ka elemakule o ka hale a hooponopono ae la i wahi kupono e moe iho ai o ka laua malihini.
            Hoaumoe nui iho la hoi ia po a ao ae, (pa ka waha hewa—ka'u pehe-hehelu,) hoomakaukau nui ae la no ka hoihoi aku o Kazela ma i ua malihini nei a laua, a ia lakou no nae e lalelale ana no hoi ana no ke kulanakauhale, ua hoea mai la he huakai nui o na kanaka no ka huli ana iaia (ke kaikamahine alii), no ka manao ia ua pau oia i na holoholona hihiu o ka nahelehele, a i ole ia, ua hu hewa paha ma kona alahele. Aka nae, ua loaa mai la no ia lakou ua kaikamahine la e noho aku ana no me ka manuheu ole o kekahi wahi o kona kino.
            E like me ko Kazela ano mau o ka hookipa i na malihini, pela no oia i apo koke aku ai ia lakou a hanai aku la me na wahi meaai kupono i loaa ia laua i paa iki aku ka houpo o na malihini.
            Ua lilo iho la keia hookipa ana a laua i mea hauoli no keia poe a no ia mea i lokahi like ae ai lakou ma ka olelo ana ae,— "Ua kupono loa ke kama'liiwahine o A rabia i hoa nou e ka opio maikai."
            Aole paha i mahui mua keia poe ua hei mua ua kaikamahine la i ka ia nei makau, a ke kali la laua o ka loaa he manawa maikai no laua e lawe ai i kela hoohiki paa imua o ka mea hoano, Alahe, ke akua o ko laua lahui.
            Nolaila, e nana ae hoi kakou i ka lakou huakai e hoi nei no ke kulanakauhale, kahi a na poe kiekie a me ka lehulehu e kali la me ka hoomanawanui o ka loaa aku o ka lono no kona hoihoi ola ia aku imua o lakou.
            I ka wa nae i hoea aku ai o ka elele a hoike aku la, eia ke hoi aku la ua kaikamahine no la me kona poe a pau, ua piha lakou i ka hauoli nui, a ua hoi iho la ka manao a lana malie.
[AOLE I PAU.]

Luina Moku Make.

                He kino make no kekahi luina o luna o ka moku kalepa J. B. Thomas ka i loaa aku e lana hele ana iloko o ke awa i kakahiaka Poalua iho la, ma kahi kokoke i ke alahaka hoopaelimahana. O kona inoa o John Smith, he Amerika, a he 29 ona mau makahiki. Ua elua la kona waiho ana iloko o ke kai a ua hele a inoino na helehelena. I ka wa i loaa aku ai e lana ana kona kino ma kahi he ekolu kapuai ka hohonu o ke kai. Ua hoihoiia mai kona kino i ka Halewai, e paa ana no kona mau pono a pau, aohe nae he kamaa a me ka papale.
            I ka po Poaono aku, la 6 nei, ua haalele like iho oia me ekolu poe e ae i ka moku, elua nae laua aohe ike i ka au a ua hooleiia he mea hoolana iloko o ke kai no laua, aka, oia ka i piholo aku a pakele kahi maluna o ua mea hoolana la.
            Ua kanuia oia i ka auwina la iho no o ia la ma Makiki.
            Ua paa ae i ka hopuia ia po Poalua no na poe i mahuka pu ai me ia, ma kekahi mau kauhale mauka o Puowaina, a ua hoihoi nui ia iluna o ka moku i ka auwina la Poaono nei mamua ae o kona holo ana aku no Bosetona, me ka paa no i na hao.

            Puhiohe hou no ma Maki Ailana i nehinei. He keu ka lealea!
            Ua huli hoi moi ka Adamu mai kana huakai kiki pu hoomaamaa aku nei mawaho ae o Lahaina.
            O ka Ma riposa ke ku mai ana ma ka la 25 ae mai na Panalaau Hema, a o ka Miowera hoi mai ia awa like no i ka la 24.
            Ma ka Poaono, la 6 nei, ua kaili aku la ka make i ka hapuu hou loa a ko makou makamaka, J. K. Kaunamano, ma ko laua home ma Alanui Kuakini.
            Ua paa ae i ka hopuia he 7 kane a me 2 wahine i ka Poalua iho la no ka piliwaiwai. I ka hookolokolo nui ia ana ua pau i ka hoopaiia he $10 pakahi me na koina.
            Aole no i nele loa ka heleawai ana o ka piliwaiwai ma ke kahua heihei o Kapiolani Paka i ka Poaha iho la. He hookae wale iho no ka hana a na kiu o ke Aupuni. Ula!
            Ia Manuela Siliva e hoi mai ana maluna o kona lio mai Kapiolani Paka i ka Poaha nei, a ma kahi kokoke i ka pa luakini o Kawaiahao ua puiwa ae la ka lio a haule aku la oia ilalo a moku ka maka hema ma o ka pa ana i kekahi mea oolea. Ua hapaiia aku oia a loko o ka pa o Kamaiena, a ilaila i holoiia ae ai a pau ka hilihili koko maluna ona a hoihoiia maluna o ke kaa no kauhale.

Piholo i ka Hohonu.

                Ua hoikeia ae maloko o ka nupepa Ekamina o Kapalakiko, na hana koa wiwo ole i hanaia e kekahi luina o luna o ka moku kiai kapakai Komo doa Pere, he mau pule aenei i hala. Mahope iho o ka haalele ana o ua moku la ia Kapalakiko no Keomolewa, ua loaa iho la oia i kekahi ino nui a uhi pu ia o luna o ka moku o ke kai, a iloko o ia manawa pu i lilo aku ai ke aliiwaapa, nona ka inoa o Halfeli. Ua hookuu koke ia he waapa me ekolu mau kanaka no ka hoopakele ana iaia. Ua noke lakou i ka huli aole nae i loaa, a ia wa lakou i hoi mai ai no ka moku, ia manawa i kahuli ae ai ka waapa a lana nui iho la iluna o na ale. I ka ike ana aku nei o Mulatopa, kekahi o na luina, i keia pilikia o kona mau hoa, ua lele koke aku la oia iloko o ke kai me kekahi piko o ke kaula e paa ana iaia a o kekahi piko ua hoopaaia iluna o ka moku, a loaa kela poe ekolu hoopaa iho la ia lakou me ke kaula a hukiia aku la no ka moku, a pakele iho la lakou. A oia hoi, ua nalowale iloko o ka hohonu. He 29 ka nui o kona mau makahiki. He wahi luina oia i manaoia e hoopii aku ma ke kulana alii-waapa, me ka loaa pu iaia o kekahi medala gula, poino e nae.

            Ua make i ka Poaha nei o Kale Buluka, keiki a Buluka i make, ma Kaakopua, i ka 10 o kona mau makahiki. Auwina la o nehinei i maheleia ae ai kona kino lepo no ka halepule Katolika, a mai laila aku no ka ilina o Koula.

Waihona Buke Hawaii.

E loaa no na buke ma ka olelo makuahine no ke kuai ma ke keena o ko makou Puuku. Penei iho ke kahi o ia mau buke: Laieikawai - - - $1 00 Gaberiela Lenoa - - - 75 R. W. Wilikoki - - - - 50 Hookahuli Aupuni o 1895 - 50 a pela aku, a pela aku. O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia F. J. TESTA (Hoke), 327 Alanui Moi. ok 28-tf

HELE HOOLUOLU.
O. R. L. Co.
MA NA POAONO A ME NA LA PULE.

                E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.

Na Palapala Uku Puni.

Papa 1. Papa 2.
Manana - - $ 75 $ 50
Mahiko o Ewa - - 1 00 75
Waianae - - - 1 50 1 25
            F. C. Smith, Agena Ohua a Palapala Nui. feb 10-tf