Ka Makaainana, Volume V, Number 25, 22 June 1896 — Page 2

Ka Makaainana.

HONOLULU, OAHU, POAKAHI, IUNE 22, 1896.

 

IOSEPINE KA EMEPERESE PUUWAI OLU O FARANI.

MOKUNA III.

HOPUIA ANA O BOHANA A ME IOSEPINE.

            Ua piha na makahiki ekolu o ko Iosepine noho ana ma ka aina hanau.  Ua hoohala oia i kona manawa ma na hana i maa iaia i na wa i hala ae, a me ka hoonaauao ana i kaua kaikamahine ma na mea ike a me ka nohoʻna o na aupuni naauao o Europa. Ua hoi hou mai la iloko on a ia manawa ua hoomanao ana no kona koko@lua o na la opio, a hu wale mai la no hoi kona aloha iaia, aka, he mea makehewa wale no ia mau upu ana, ua hala ka wa e uhi mai ai o ka noe iluna o ka aina.  Ia manawa pu no ua komo mai la na maeele o ke aloha iloko on a no kana keikikane e noho la ma Parisa, oia o Eugene, a uwe iho la me ka ehaeha n@@@ a me kana kane pu no hoi kahi

            O ke kane hoi, e hoao mai ana oia e hoopoina i ke aloha ana no Eugene a me kaua kaikamahine.  A no ia mea, ua ike iho la oia aole he mea nana e pale ae i kela aloha iloko on a no kana wahine.  O na hana hoomanao ana no ka Iosepine mau hana maikai iloko o ko laua manawa e noho pu ana, a me kona mau helehelena mohaha maikai, aia ke haawe la mahope o kona kua a ke nape malie la hoi ke aloha nona iloko o kona puuwai.  Mamuli o keia mau mea e lana malie ana iloko o kona noonoo, ua hooholo iho la oia e kauoha aku i kana wahine e hoi mai a e noho ma ko laua home aloha me na keiki.

            Ua hoouna aiai aku la oia he palapala i kana Iosepine, e hoike aku ana i ka hewa o kana mea i hana ai iaia a e mihi aku ana hoi imua on a, a noi aku la iaia e hoi mai me ke kaikamahine, a e hoopau ae hoi i ka hoomanao ana no na mea i hanaia i ka wa i hala.

            O keia palapala, ua loaa pololei aku la ia ia Iosepine a he mea o ka hauoli o kona maao i kona ike ana iho i na manao o kana kaue.  Hu mai la iloko on a ke aloha no kana keikikane, ka mea hookahi hoi nana i kono ikaika loa mai iaia e hoi hou e pili me Bohane.  A oia kana i hoike aku ai imua o kona mau hoaʻloha, ke @ie kela aloha iloko on a no Eugene, aole loa oia e hoi hou me kana kane, a e hoohala no oia i ke koena o kona mau la ma kona mokupuni iho. Ua hoao aku kona mau hoaʻloha ma na ano a pau e aua iaia, aka, aole loa e hiki, no ka mea, ua ikaika loa mai la ke aloha o ke keiki iloko on a.  A no ia mea, ua haalele iho la oia me ke kaikamahine e noho ana i kona poli i kona home mokupuni a au hou aku la no Farani, ka aina o na luhiehu he nui e hoohili ai ka manao o ka mea kaahele. 

            I keia wa, eia oia ke noho hou nei iwaena o kona poe hanohano he nui. O kana mau haiawahine, aia lakou ma kona mau aoao i ua wa a pau kahi i hoowehiwehi mau ai iaia.  I kekahi la, i ka wa a keia poe wahine e makaikai ana i ka uulalilali o ua mea hoonani makamae o Iosepine, ua nui loa ko lakou makahehi, no ia mea i pane aku ai o Iosepine ia lakou me keia mau olelo, --- "E koʻu mau hoaʻloha opio, e manaoio mai iaʻu, aole o ka nani o koʻu mau mea gula ka mea e hauoli ai.  He manawa aenei i hala, ua loaa mai la iaʻu kekahi makana maikai loa aʻu i hauoli loa ai mamua ae o keia mau opuu daimana, a o ua makana la, he paa kamaa kahiko"  Ua kahaha loa kona mau hoaʻloha no keia mau olelo ana, a oia ka lakou i noi mai ai no ka hoakaka pono ia aku o ka manao o kela mau olelo.

            O ka wahine i like me Iosepine ke ano, he kulana kona o ka lede oiaio, aole loa e hiki ke hoihoi hope ia kana mau olelo i hoopuka ai, no ia mea, ua pane aku la oia me keia mau huaolelo nana i hoehaeha aku i ko lakou manao.

            "Ae, e na lede opio, o keia mau mea a pau i loaa mai iaʻu, he hookahi wale no mea i oi ae iwaena o lakou a pau, oia na kamaa kahiko, he oia mau no nae ka maikai o ka ili.  I koʻu wa i hookaawaleia aku ai mai ka poli aku o kaʻu ka@e, ua mamao ka waiwai mai iaʻu aku. Ua nele koʻu wahi ekeeke me ke dala e hiki ai ke uku i na lilo o ka maua huakai moana me kuu kaikamahine.  Eia nae, ua kokua nui mai kaua mau hana ia maua iluna o ka moku ma ka makaukau i ka hulahula, ka himeni, a me na hana hoohauoli e ae, a ua lilo he mea lealea loa i na luina moku a punahele loa oia ia lakou.  A mamuli o kona paani mau iluna o ka oneki, ua pau loa ae la kona mau wahi kamaa i ka nohaehae, a i kekahi hoi ana mai on a imua oʻu, ua paa pu kona wawae i ke koko.  I koʻu nana pono ana iho, ua pukaia kona wawae i ke kui.  I kela wa, aia makou i ka hapalua like o ka moana, a he mea pono loa hoi iaʻu e hoolako iaia me on a paa kamaa mamua o kona pae ana aku i ka aina.  Ua piha loa ia hoi o Hoteneae i ke kaumaha no kona nele i ke kamaa ole, a ia maua no nae e noho ana me ka hakan@, ua komo mai la ko maua hoaʻloha, kekahi o na luina, a ninau mai la i ke kumu o ko maua noho mumule wale iho no aole hoi he ikeia maluna o na oneki, kahi i maa mau ia makou no ka hooluana ana. Ua uwe ae o Hotenese ia wa a hoike aku la, "Aole oʻu kamaa, a he huhu o mama ke hele au iluna me ke kamaa ole." Pane mai la nae na hoaʻloha la o maua, "Auwe, o kena wahi mea wale iho la no ke kumu o ka uwe ana? O! he mau paa kamaa kahiko no koʻu, a e kii ae au!"  Me ka hoohakalia ole iho, ua kii aku laua luina la i kona paa kamaa kahiko a lawe mai la.  Ua hana koke iho la maua a kupono i ko Hotenese mau wawae, a loaa hou he kamaa nona e hoonanea ai me na hoa luina on a i ke ahiahi.  Aole o keia wale no ka panina o keia moolelo o maua, aka, he nui aku no, eia nae, ua lawa ia no ka hauoli o koʻu naau no kela wahi paa kamaa kahiko o kuu kaikamahine.  Ua aie nui au i kela hoaʻloha o maua."

[Aole i pau]

 

Oluolu Pono Halemano

Maloko o ka Halepai MAKAAINANA i ke awakea o ka Poalua nei, la 16, ua hoholaia mai la e kekahi mau lede he wahi papaaina i hele a luhiehu i na kohikelekele a ka puukolu, no na paahana o ko makou halepai, he lokomaikai hoi i paholaia mai e Misita a me Misasa Tam Aliona, no ka hoomanao i ka piha ana o ka makahiki hookahi o ka laua opuu opio kane.  Ua haupa pu iho la makou i na meaai i paholaia mai i hui pu ia hoi me na kamau kiaha aua no ka hoomanao ana i ka mea nona ka la.  He papaaina hiki ole kela ke hoopoinaia ma keia mua aku, a pela pu no hoi me kela mau kuke noeau.  O ka makou wale no e kalokalo ae nei e loaa i ka mea nona ka la ua hoohauoli ana o keia mua aku.

            O kahi oi loa aku o ka oluolu a me ka maikai o ka noho ana, aia no ia ma kekahi wahi apana aina uuku ma Farani, o Aumone ka inoa.  He 40 ka nui o na poe e noho nei malaila, he 23 o lakou ua piha he 80 makahiki pakahi, a hookahi i hiki aku i ka 100.

            O ka Poakahi iho la, oia ka piha ana o 121 makahiki mai ka hoomaka ana o kela kaua o Bunker Hill, Amerika Huipuia.

            Ua make mai nei ma Hilo o Kapena J. R. Lopikana, makuakane o Misasa C. W. Akepoka.  He kamaaina kahiko oia no onei.  Nana i kapili kela alahaka o Waimea, Oahu nei.

            Eono la holo o ka mokumahu Peru mai Kapalakiko mai a keia awa i ka Poakolu nei.  Mahope iho o ka hora 5 no oia ahiahi i holo loa kau ai no Iapana a me Kina me 45 mau ohua Pake.

 

Ma Ke Kauoha

HOOLAHA WAI.

I kulike ai me ka Pauki I, o ka Mokuna XXVI, o na Kanawai o 1886.

            O na põe a pau loa e paa ana i na pono wai a e uku ana paha hoi i na uku wai, ke hoi@eia aku nei ka lohe ma keia, ua kupono, a e ukuia hoi na uku wai no ka manawa e pau ana i Dekemaba 31, 1896, ma ke keena o ko Honolulu Oihana Wai ma ka la 1 o Iulai, 1896.

            O na uku wai e koe ana i uku ole ia no umikumamalima la mahope iho o ke kupono ana e ukuia, e hookauia no he uku kaulele o 10 pakeneta.

            Aia ma ke keena o ka Oihana Wai ma Kapuaiwa Hale e ukuia ai na uku wai.

ANDREW BROWN,

Luna Nui o ko Honolulu Oihana Wai. 

Honolulu, H. I., Iune 15, 1896

jun 15 3mnw

 

HELE HOOLUOLU

O. R. L. Co.

MA NA POAONO A ME NA LA PULE.

E haalele mai no na Kaamahu i na hora 9:15A.M. a me 1:45 P.M., a hoea hou mai i Honolulu nei ma na hora @:11 a me 5:55P.M.

Na Palapala Uku Puni.

                                    Papa 1.                        Papa 2.

Manana                       $.75                 $.50

Mahiko o Ewa             1.00                 .75

Waianae                      1.50                 1.25

 

F. C. Smith,

Agena Ohua a Palapala Nui

feb 10-tf

 

MORIKAWA,

Ka Oi ma Kana Hana.

Ua nee aenei kona hale hana mai Alanui Betela a i ka Halelio o Akana, Alanui Konia, mauka o Alanui Hotele.

Amara a Mea Hana Kaa me ke Kapili Kapuai Hao Lio.

Oluolu loa ka Uku o ka Hana ana, i hiki ole i na poe e ae ke lihi launa aku.

jun 8-3ml

 

Waihona Buke Hawaii.

E loaa no na buke ma ka olelo makuahine no ke kuai ma ke keena o ko makou Puuku.  Penei iho kekahi o ia mau buke:

Laieikawai                              $1.00

Gaberiela Lenoa                      .75

R. W. Wilikoki                        .50

Hookahuli Aupuni o 189@     .50

a pela aku, a pela aku.

O na buke e ae no hoi kekahi, e laa na buke kanawai, a me kahi mau ano e ae ke ninau pololei ia m@i ia

F. J. TESTA (Hoke)

ok 98-tf           327 Alanui Moi