Ka Makaainana, Volume VI, Number 6, 10 August 1896 — Page 3
HONOLULU, OAHU, POAKAHI, AU GATE 10, 1896. 3
NA PALAPALA
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka aia no maluna iho o na poe na lakou i kakau mai.]
Aole Malama Maikai Ia.
M R. LUNAHOOPONOPONO:---
Ke hoike aku nei au imua o ke akea, aole loa he maikai o ka malamaia ana o na keiki i loaa i na haawina a ka ma'i lepera e noho nei ma ka Home Balauwina e ku nei ma Kalawao. Ke hoohanaia nei na keiki o keia home ma ka waele ana i ka nahelehele, ma ka hookahi hora hana o ka la, mai ka Poakahi a hiki i ka Poalima, nolaila, e piha ana he 22 hora a oi o ka mahina. Eia hoi ka mea apiki, he wahi puolo paka kikalika wale no ke loaa mai iloko o keia mau hora he 22 a oi, ua like no hoi ia me ke kenikeni hookahi. Ina hoi ma ka avarige ana me ka poe hana la e hana nei ma keia home ma ka hapalua dala o ka la iloko o ewalu hora hana a oi, alaila, e loaa i ke keiki hookahi he hookahi dala a me na keneta oi iloko o keia mau hora he 22 a oi. Mamuli keia o ka Joseph Dutton hookele ana. Ku maoli no oe i ke aloha ke ike aku i na keiki liilii i palahe na lala e hele ae ana ma kahi hana me kahi oo, a ua pau pu mai ka liilii a ka elemakule, a ina e hele ole ana oia i ka hana ia hora hana, a e noho paha no ke ano onawaliwali mai o ke kino, alaila e kipakuia aku no oia mailoko aku o ia home, me ka lawe pu ia aku o kou pono kino e pili ana ia oe, e laa kahi huluhulu moe, uhi pela, pale uluna, kamaa, kuka, kokoka hoopumehana a me na mea e ae a keia haole J. Dutton a me kona mau hope iho i haawi mai ai ia oe.
O kou hewa iho la ia, o kou hele ole e hana i kou, wa omaimai, a ua manao iho la paha hoi nei kuewa he ku ia i ke karaima ia hana ana. Aole no hoi o keia mau mea na keia haole ponoi, aka, o na haawina "pila alualu" no ia a ka Papa Ola i hookaawale ai no na ma'i e noho ana ma ia home. Aole no hoi au i ike i keia mau hana i ka wa e noho ana na Virigine o ke Aloha ma keia home ma ke ano malama ana i na ma'i lepera. Ua oi aku ka lakou malama ana i na keiki i loaa i na haawina ehaeha a ka ma'i lepera, mamua o ka malama ana a keia poe eepa nui wale a ka Papa Ola i hoonoho mai ai ma ka Home Balauwina hoopau dala o ke aupuni.
Ia lakou nei no keia, me ke kuapo e loaa ai kahi lole, kamaa, papale a pela aku. Ina oe e hele aku e noi i kou haawina lole, kamaa, papale a kuka paha, eia mai ka lakou nei olelo, "Oe aole pilikia, oe nuinui lole. Ina makemake oe kela lole, oe no lawe mai kela lole oe, wau haawi lole hou oe." He nui wale aku na hana epa a keia poe haole, a he mau hana hoi i hana ole ia mamua i ka wa i na virigine.
O kahi pono o kekahi poe keiki e noho nei i keia wa, ma ko lakou hooikaika maoli ana aku no ia malalo o kekahi poe ma ka holoi lole, a ma ia hana, loaa mai la he mau wahi kenikeni a loaa iho la kahi wahi lole; a pela iho la ka noho ana o keia home i keia manawa, ka mea no hoi i ike ole ia mai kinohi mai. I ka wa hoi i noho ae oei o Joseph Dutton ma ka hakahaka o na Virigine i pau, ia wa i pii mai ai ka inoino o ka noho ana o keia home. He oi aku no hoi keia o kahi haole huhu nui wale. O ka hana pono wale no i ka Papa Ola, e hoopau ae iaia mai ia wahi ae, a e hoonoho aku imea okoa ma ia wahi. Ua oi aku paha ia o ka pono, no ka mea, ke hana nei keia haole i ka mea kupono ole iloko nei o keia Home, a ina
hoi e mau ana keia wahi haole ma keia kulana, alaila, ke olelo nei au, aole wahi ma'i e koe iho ana ma keia Home; o na poe nawaliwali loa paha, o lakou paha ke noho aku ma keia Home me ka hoomanawanui.
Owau no me ka mahalo.
M.D.K. KAUKAOPUA.
Kalawao, Molokai.
Hana Menemene Ole.
Kupanaha maoli ka hana a kekahi wahine o ka makani Moae ae nei i hana ai i kekahi la i hala hope aku nei, oia hoi, ua hele aku oia ma kahawai e holoi ai, a iaia malaila, ua oili wale aku la ke keiki mai kona puhaka aku me ka lawa pono ole o ka manawa e hanau ai, a waiho ana iwaho, a me ia ike no pela, ku ae la oia a haalele iho la me he keiki ilio la, a e ole ka naau menemene o kekahi wahine, kiiia aku a hunaia iho iloko o ka lepo. Haiia mai ana he wahine ka no na paeaina kaalalo loa aku nei o ka Hema. E hewa ole makou ke hoomaoe ae, malia ua maa aku la no i ka hana pela l ko lakou aina, a nona hoi ka hupo i oi aku i ko ka holoholona. Menemene ole maoli hoi ha.
Makemake no nae paha oe e hui pu me na opio o ka Puali o ke Aloha e hapai pu i kekahi mau hana hoonaauao maloko o ka Baibala? Ina pela, hele ae hoi ha ilaila, a ua noa i na mea a pau.
Ua hooleiia mai nei ka inoa hoohanohano maluna o ka Rev. S.E. Bihopa e Amherst College, kekahi o na kulanui o Amerika Huipuia. E kau ana na huapalapala D.D. (Loea ma ka Hoike Akua) mahope aku o kona inoa ma nei mua aku. He omaimai iho nei kona a ua oluolu ae hoi.
Mau Holoholona Hanau Eepa.
Ma ka lokomaikai o Milolii (Palalu) o Kamoiliili, ua hoikeike mai la oia i kekahi o ko makou limahana i kekahi puaa keiki hanau kupanaha ana i malama maikai ai, a e ola nei no a hiki i keia la.
Ua hanau mai keia puaa ponoi mai no, he nui no na keiki e ae, aka, o kekahi nae o keia poe puaa o ia ka mea i hanau kupanaha ia, he puaa eleele i kapaia he "hiwapaa," ua huipuia nae kana "Eiki-pihulu" me na "Ulu-a-Weli," maluna ae nae ke kihapai pua i ka lewa, a malalo iho no hoi na Ulu-a-Weli kahi i olo ai, na nele nae hoi i ka oo e hiki ai ke wilinau ilalo a iloko.
He hookahi mahina ka loihi o na la o kona ola ana mai kona kulana kino, he ola maikai, aole no e make ana. He kupanaha maoli no na hana a ke Akua i hana ai.
Mamuli no hoi o ke ohohia nui o kekahi makamaka o Kamoiliili no haano'u mai la oia no kana holoholona hanau kupanaha, oia.hoi, he wahi moa hoi kana wahi holoholona i hoohanau kupanaha ia mai mailoko mai o ka hua moa.
O ka inoa o ka mea nana keia wahi moa hoehaa, o Misita Ohule, o Piliamoo, Kamoiliili. He wahi keiki moawahine keia, he eha nae ona mau wawae, a ke ola nei no. He like kana hele ana mai e like me ka lio nui a me ka ilio paha, ka hele no o na wawae a eha.
Ua nonoi mai oia i KA MAKAAINANA, aole pono e kapaia o Kamoiliili o Waolani, kahi o na eepa, no kela mau mea hoehaa. Kupanaha maoli no ka ke Akua mau hana ma keia Apana.
He Wahine Lapu me ka Aahu Eleele.
He wahine haole me ka aahu a me ka uhimaka eleele ka lono hoohikilele a ka nupepa Pi Ki Adavataisa o kakahiaka Poakahi i hala, Iulai 27, me kahi mau kakahiaka mai, e maau hele ana ka e huli i kana kane mamuli o ke aloha. O ka oleloia malia he kane no ua mea la, a i ole, aole loa no, oiai, he kakaikahi loa na poe i ike a i hoomaopopo i ua mea la. He palau a he epa no hoi paha. No keia lono hoohikilele, ua hoohalua iho la kekahi poe a puni na wahi i mea i ka ikeia, aohe oiaio iki, a ke loaa ka ua mea la, alaila, na ua mea la e loaa ai e hoohiki no kona pakele mahunehune imua o ka Halewai. O kahi oleloia, he wahine akua-lapu ka, a ma kahi kokoke i na pa ilina ma alanui Moi nei ka ikeia ana o kekahi poe e hoi ana o ka po no waho o Waikiki. A ma ka makou koho iho hoi, he mea imi olelo wale no nei, no ka nele i kahi mea kamailio ole e piha ai o na kolemu o ia nupepa.
He lono ka i wawaia mamua aku nei ua make ka o Koolau, ke koa o na pali o Kalalau, Kauai. A ma na lono hope loa mai nei hoi, ua ikeia no oia e hele ana me ke ola maikai he mau la i hala ae, a e paa ana no me kana pu a me ka lei i ke kaei poka. Na Kenewanui, kaikamahine a ke kiai awapae, i ike iaia ma Waimea a na lululima pu.
C.E. Williams me Keiki
E d. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
He mau mea kuai lako hale o na ano a pau loa.
He mau mea Hana Pahu Kupapau a Hooponopono Hoolewa.
E hoolakoia no na Kaa Kupapau, na Kaa pio a me na Kaa ohana.
Ina no e ninau ia laua, e loaa no na Pohaku Kia Hoomanao no na He Kupapau.
O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F.D., he mea i puka pono ma ka Kalaka Kula o ka Ialoa Maikai ana iloko o Mei, 1894.
--NA TELEPONA--
Keena, Helu 179--Kauhale a me Kahea Po, Helu 815.
nov 2-mp feb 3-mp
HELE HOOLUOLU.
O. R. L. Co.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55P.M.
NA PALAPALA UKU PUNI
Papa 1. Papa 2.
Manana $ .75 $ .50
Mahiko o Ewa 1.00 .75
Waianae 1.50 1.25
F.C. Smith,
Agena Ohua a Palapala Nui
feb 10-tf
Hui Papa a Kukulu Hale Oahu.
(OAHU LUMBER & BUILDING CO.)
Leleo, Alanui Moi, kokoke i ke Kahua o ka Hui Alahao & Aina Oahu.
Poe Kalepa Laau, Hana Aelike a me Kukulu Hale Poe Hookomo Mai a Hoolilo aku i na Puka, Olepelepe, Kui, Pepa, Pena, Aila, Na Pono Kamana.
A pela aku, a pela aku.
Telepono 53. Pahu Leta 222.
apl 20-tf