Ka Makaainana, Volume VI, Number 6, 10 August 1896 — Page 7
HONOLULU, OAHU, POAKAHI, AU GATE 10, 1896. 7
NA AINA MAMAO.
Mau Lono Huikau mai kela a me keia Wahi Like Ole.
Ke Onene Kipi ma Cerete.
O ka hopeia o kekahi Ahakuka Kuhina ua waiho ae ke AUpuni o Tureke, Iulai 28, i kekahi koi malalo o na ioina maa mau i ke Aupuni o Helene e pili ana no kekahi hoouna ana i oleloia o na lako pu a me na pono kaua mai Helene aku no ka Mokupuni o Kerete, i mea hoohana aku hoi na na poe kipi o laila, a e pili ana no hoi kahi no ka ikeia ana o kekahi mau puali o na poe Helene i lako me na pon kaua ma Masedonia, e kuhikuhi aku ana i ka hopena popilikia o ka maluhia o Europa mai ia ano hana mai, a e pakui aku ana hoi aia ke koikoi no ia hana maluna o Helene.
Ua hoike ae no hoi ke Aupuni o Tureke na hooholo oia e haawi aku i kekahi mau ae ana i kaupalenaia i ko Kerete poe, a e loaa no hoi ia lakou ka pono hoouna elele i ka Ahaolelo.
A ma ko na Mana aoao hoi, ua hooholo lakou e hoouna aku i kekahi palapala hui ia Helene, e hoike aku an ae hoopio oi ai na mea a ke Aupuni o Tureke e olelo nei, a i ole ia, ua waihoia aku na ke Suletana o Tureke e hana aku a loaa hou ka maluhia ma Kerete. Ua lonoia ae ke manao la ka ke Aupuni o Tureke e hoouna i kekahi puali o na poe Alabania e kue aku i napoe Helene hoopae malu i na lako kaua, a he mea paha hoi ia e hooi loa aku ai, me ka hoohuai ole ia, i ke koikoi o ke kulana.
Hoopaiia na Kipi o Aferika Hema.
Imua o ka Haku Lunakanawai Kiekie a me na kokua, Iulai 28, i pau ai ka hookolokolia ana o Kauka Jameson, Mekia S. John Willoughby, Konela R. Grey, Konela H.F. White, Mekia R. White a me Kapena Henry F. Coventry, i hoopiiia no ke kue i ke kanawai kuikawa ma ke kono kipi ana aku iloko o na palena o ka Repubalika o Aferika Hema, ma Ladana. Enelani. Ua ahewaia lakou a pau e ke kiure no ke kue ana i ke kanawai komo i ka oihana kaua ma na aina e.
O ko Kauka Kemisona hoopai, e hoopaahaoia oia no umikumamalima malama me ka hana oolea ole, Mekia J. Wilobe no umi malama, Mekia Waite no ehiku malama, a no elima malama pakahi iho hoi o na poe e ae. Ia lakou hoi maloko o ka Halepaahao o Holowe i kahi la ae, ua hooliloia lakou a pau i poe lawehala o ka papa ekahi, a mamuli hoi o ia ano i loaa aku ia lakou, ua hiki ia lakou ke kauoha aku iwaho no ka lakou mau mea ai, e aahu i ko lakou hale ponoi iho, e lawelaweia ka lakou hana hoohaahaa loa e na paahao e ae, a me ka loaa no hoi o kekahi haawina uuku o ka bia a waina paha.
No Peretoria ae hoi ka lono o Iulai 30 i ka nupepa Telegarapa o ladana e olelo ana no ka hookuilana a hoopahaohaoia o ko laila poe i ka oluolu loa o na hoopai o keia poe. Ua heleia aku o Peresidena Karuga e ninau no kona manao, ua hoole nae hoi oia i ka hoike ae.
Na Lonolono Kaua Kipi o Cuba.
O na lono no ka hoauheeia o na kipi, o ia na lono hope loa i loheia mai Kuba mai, me ka nui no ka hoi o ka poino.
Aia he mau hooweliweli ana no kekahi ala kipi ae ma ka Mokupuni o Porto Rico, e like la no me ia ma Kuba, no ke kue aku i ka Sepania hoomalu ana aku. He palapala kipikipi ka i heluheluia aku i na makaainana ma na kaona a pau o ia mokupuni.
Ua loaa mai nei ma Maderida, Sepania, he komite kipi malu no Kuba. Ua hookoloia aku no keia mai ke kumu o na hana hoolohe ole a mahuka mau o na koa Sepania. A ua loaa no hoi he mau moali kekahi i hoolalaia no ka hoomahae ana aku i na Paenmoku Pilipine.
Mamuli hoi o ka makemake a hoihoi nui ole o na koa e hele i Kuba, nolaila, o na koa hou no ka hoopuipui ana aku i na koa mua i hoounaia, he 4,000 ka nui, e hoounaia ana lakou ma ka hopena o Augate nei me na hopena o Augate nei me na lako kaua ole, mamuli o ka hopohopoia o kipi nui ae no lakou iluna o ka moku oiai ma ka moana. E hoounaia ana na lako kaua ma kekahi moku okoa ae. Ua ulu mai keia manao e hana pela mamuli o ka nui loa o na koa haalele, a ma Aragona ka oi loa. No ia mea i hopohopo loa ai na luna oihana, a o keia ae la ka hopena i hooholoia.
Ua kuhiia na koa Sepania i ka pepehi i aa wahine a me na keiki iloko lilo loa o Kuba.
Aia ka Ahaolelo o Sepania ke hoohala la i ka hapanui o kona manawa hana ma ke kamailio ana no Kuba a me Amerika Huipuia.
Alahao Beretania ma Aferika.
Iloko mai nei o ka Hale Ahaolelo Makaainana ma Ladana i hooholoia ai ka bila Alahao o Uganda ma kona heluhleu elua ia ana e kekahi koho ana a 239 kue ia 86, mahope iho nae hoi o ka hooikaika ana a Kuzona, kekahi o na koo Aupuni, ina aole o Beretania Nui e hana ana i kekahi alahao a hiki i ka Loko o Vitoria Nianaza, alaila, na Geremania no ia e hana aku.
Ua hoomaka e ia no ka hoomoe ana i keia alahao ae la. Aia moe ana i keia alahao ae la. Aia ke ala i manaoia mai Momobasa ma kahekai o Zaniziba, Aferika Hikina, holo aku ma ka akauhikina a ka akau o Kilimanajaro, ma ka aina aku o na poe Wakamaba, kaalo ia Loko Naivasa a hora i Vitoria Nianaza ma ke kuono o Berekele ma kekae akau hikina o ia loko.
Na Hunahuna Laulaha.
E hiki ae ana o Sa Kale Rusela, Haku Lunakanawai Kiekie o Enelani a Barona o Kilowene, ma ka halawai o ka Ahahui Papa Loio Amerika ma Saratoga, i kahi o keia mau la iho.
O ka Mana-nui a me ka Weliweli, elua o na mokukaua aunui loa ma ke ao nei e kapiliia la ma Enelani, ua manaoia e loaa ae ana mai na poe na lakou i hana malalo o ka aelike i keia mau la iho la, a e laweia ana no Potamouta e hoopau pono loa ia ai ka hana ana.
Ua weheia ae ma ko Iapana Keena Kuhina Elele ma Wasinetona na kohokoho ana a na poe kapili moku Amerika no ka hana ana i elua mau mokukaua nunui holo loa uo ko Iapana mau aumokukaua. Na Craup Ma o Piladelepia a me ka Hui Hana Hao Uniona o Kapalakiko keia mau kohokoho, ua koe nae hoi ka haawiia ae.
I Mau Inamona.
1. E hookomo iho i elua huahelu me 81, a e emi iho auanei malalo o ka 10.
2. Heaha ka mea i like ai ke aloha me na wawae o ke kaka?
3. Mai ka huapalapala A a i ka W, ehia mau huapalapala e hoike mai ana i ko ke Akua oia mau ana a me Kona hookumu ole ia?
4. Mahea o ka moku i lilo i mea kana na ka Ilikini?
5. Owai ke kanaka i pake e mahunehune mai ke kuahu mohaikuni mai e hana nei ma heia halepai?
O "Ka Pueo" ka ke Keiki, he Aea na Makua.
Ua haakohi a na hanau mai he wahi buke moolelo puke pule o 16 aoao, na kekahi mau opio Aea no na Paemoku Kilipaki, a he mau ewe Hawaii no nae hoi, o mua uo a o muli, pela mai ka hoike a ke palekeiki. I ka hemo loa ana ae, eia ka he "Pueo" ua keiki la, he menu poi iole o ka po, i kakahiaka Poalima i hoea mai ai a waihoia ma ko makou pakaukau. Palanaiki no kahi kino ano omali o ua o "Ka Pueo," malia nae aia iho no iloko kahi i lolii ai o ka ono a me ka momona e mikomiko ai o ka puu o ka mea puni moolelo. Aole io no paha e nele i ka nana iho, he kawa na na makua i lele a opu; o kana ai, he kenikeni (10 keneta) wale no ko ke kope hookahi. Ua oleloia mai nae e hoonuiia aku ana ka na aoao ma nei mua iho. Imua a kau ae i kaupoku o Hanalei.
Keia Nou Pohaku o Ewa.
Ua loaa maopopo mai ia makou ka lono oiaio no kela nou pohaku palaualelo olalo o Ewa i ka hale o E.B. Mikalemi, e i ana, ua moe loa ua hana ekaeka la. Ua manaoia i Hapaiia ka ua hana la, i uluhua a manaka a manao ae e haalele ia Ewa, alaila, kani ka aka a ka mea manaoino, a ua lohea pu ia, he mau heluna eala ke haawi makana ia i ka mea a mau mea paha e hoao ana e hana a kaawale o Mikalemi mai laila ae. Ua kaawale no.
O na alina o ia mau hana ino, aia no ke hoike mau la i ke ano o ka noonoo lapuwale o ka mea i hoopihaia i ke kuko palaualelo. Ua nalo no paha kela hana i ka maka o kanaka, aka, o lakou no auanei ua hoike i kala hookolokolo hope loa.
He haole pupule ka i mahuka mai ka Halemai Pupule i kakahiaka Poakolu Iulai 29, paa hou no i ka hopuia i ke ahiahi iho. Ke kiai loa ia nei oia, no ka me aua hoao oia e kaawe iaia iho oiai oia ma ka Halewai. Eia oia i Kalaepohaku i keia wa.
AHI
[PAIKII.]
Helu 89. Alanui Nuuanu.
PAIKII--Owau no nei, o ko oukou hoa kamaaina kahiko loa. E kipa mai, ne emi loa na kii o na ano a pau ma ko'u hale paikii.
NA LAKO HALE--Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau, Pela, Uluna, Moena, a pela aku. Emi loa.
E loaa no kumukuai maikai kupono no ke Keleawe a me ke Kepau.
iun 22-6ml
Hoolaha Mano Hooko Moraki a Kuai a ka Mea Paa Moraki.
I kulike ai me na olelo o kekahi moraki i hanaia e G.B. ELAMA [k] a me KEALALAINA, kana wahine, ia John Pulaa [k], i hanaia ma ka la 28 o Mei, 1888, i kopeia ma ke Keena Kakau Kope, Oahu, ma ka Buke 110, aoao 329 me 330, ke hoolahaia aku nei ma keia, ke makemake nei ka mea paa moraki e hooko i na moraki la, no ka uhakiia ana o ke kumu aelike, oia hoi, ka uku ole ia o ke kumupaa, a me ka ukupanee ma ka wa e ukuia ai.
Ke hoolahaia aku nei hoi, mahope iho o ka hala ana o na pule ekolu mai keia la aku, e hoolahaia aku no ka aina i paa ma keia moraki ana, no ke kuai, a e kuaiia aku no ma ke kudala akea ma ke Keena Kudala o Jas. F. Moragan, Honolulu, Oahu, ma ka POAKOLU, Augate 12, 1896, ma ka hora 12 o ua la 'la.
No na mea i koe e ninau ia J.A. MAGOON,
Loio o John Pulaa, ka Mea Paa Moraki
Honolulu, Hale, Alanui Kalepa,
Hanaia ma Honolulu, Iulai 20, 1896.
Eia ka waiwai e kuaiia aku ana:
O kela apana aina a pau e waiho la ma Kapaakea a me Opukaala, Waikiki, Oahu, i hoakakaia ma ka Palapala Sila Nui Helu 2568, Kuleana 1536 ua Kaneauhii, maloko o laila he Eha a me 30-100 Eka.
iul 20-4t
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai $1.00
Gaberiela Lenoa .75
R.W. Wilikoki .50
Hookahuli Aupuni o 1895 .50
a pela aku, a pela aku.
O na buke e ae no hoi kekhai, e laa na buke kanawai, a me kahi mau ano e ae, ke ninau pololei ia mai ia
F.J. TESTA (Hoke),
eke 28-tf
987 Alanui Moi.