Ka Makaainana, Volume VI, Number 8, 24 August 1896 — Page 2

Ka Makaainana.

2 Honolulu, Oahu, Poakahi, Augate 24, 1896

LEONE DE BOANE

KA MEA OHUMU KIPI O COADOVA

MOKUNA I.

KA NAITA O NOREMANA.--NA ULIA O KA MANAWA.

I ke au o Abederama III e noho ana ma ke kalaunu o Coadova, ma ka hema o na Pirinisa, ma ka anemoku o Sepania, malalo hoi o na hoomalu ana o ka lahui Mua (Moors), ua oleloia he "Makahiki Gula ia o ka Emepaea o na Mua." He lahui ia akenui i na mea maikai, a me na mea e naauao ai, a he lahui nee mua hoi iwaena o na poe Europa ma ka imi naauao ana, he lehulehu wale o na poe Karistiano i komo iloko o na kula Arabia o Coadova. He mau tausani o na mea hoonani a ka lahui Mua i lawe mai ai mai ka Hikina mai no lakou iho. Ma kekahi la makamua o ka makalii, malie a kalae na paia lani, a e iho aku ana ka la a napoo ma kela huli o ka poepoe honua, a ke hoomaka mai la e ko na kehau huihui o ke ano ahiahi, i awili pu ia me ka malu o na tausani kumu alani a me na kumu lemona, a ke waiho lahalaha mai la hoi ke ili laumania o ka wai o ka muliwai me he aniani hoonui ike la. He mau mile wale no hoi mawaho aku o ke kauhola o Coadova, kahi e moe ana ke alanui ma kapa akau o ka Muliwai Gadalakuiwa, aia malalo o ka olu kohai o na kumulaau oliva, e noho ana he elua kanaka o na kulana like ole. O kekahi o laua he Karistiano, he naita o ke kulana kilakila, me kona mau kamaa buti ili lalahi, a e anapa ana kona mau kui ke-pa ana ma kona mau kamaa, na aahuia oia me kekahi kahiko silika keokeo o ka oihana naita, a he wahi koloka poni hoi e uhi ana ma kona kua i hoonaniia me ka silika pahoehoe a ma kona a-i he ai-kala lilina o ka oihana naita a he papale veleveta uliuli ma kona poo, a maluna iho o laila, e pulelo ana na hulu aiai o ka okalike. O ka iwakaluakumamalima ia o kona mau makahiki. He mau lala kakauha kona, a he kulana hoi o ka moho nana e ulupu aku i na hana puuwai eleele a pau e halawai mai ana me ia, a ua maa no oia mai kona wa keiki mai. He mohaha maikai kona mau helehelena, a he oiwi kilakila hoi no na la e hoea mai ana. O ua mea la, oia no ka Nait a Leone de Boane o Nomanade, ke keiki kamakahi wale no a Barona Robata de Boane, ka mea i ikeia ma ka ma-kaukau i ka lawelawe ana i na mea kaua, oiai ke au noho ana ano Karistiano. Ua hoea mai ka Haku Leone ma Coadova no ka imi ana i ka makaukau ma na mea pili i ka lawelawe ana i na mea kaua a me na mea e ae e kaulana mau ai ka inoa, a ole i emo, ua lilo ae la iaia ka hooponopono ana o na mea o kona luai Barona Boane, a ua akenui iho la no oia e lawelawe i na mea a pau me ka hooko wale no. Ma na lawelawe mea kaua ana, he kakaikahi wale o na kanaka i ukali aku ma kona meheu. Hoomaopopo iho la oia, o ka hana pono wale no i ke keikialii oiaio e alakai a e hoomanao i kona lahui kanaka ma na mea maikai e holomua ai ka noho'na lahui ana. O kekahi o kana mau hana maikai loa, o ia no kona imi nui ana e kokua i na hoakula a pau ma na kula Mua. O ke kokoolua o Haku Leone e noho pu nei malalo o ka malumalu o na laau, he wahi kino peke kona, he puipui a he hiohiona o ka puuwai kupaa, a he palahalaha kona umauma, he a-i no'uno'u kona, a maluna ae o na me a pau he kanaka hiki ke hilinaiia e hiki iaia ke hooko i na kauoha a pau, a he kokoolua oiaio oia no ka huakai ulupa i na kupuino a pau ma ke alahele o ua malihini hele. He umi ona mau makahiki oi ae i ko kona baku, i pilia e ia mai na la opio mai o kona haku, aka, he kulana no hoi kona i aneane like aku me kona haku, ka Naita Leone. Ma kona poo e kau ana he papale-kapu hauliuli, i omauia me na pihi dala, a me na mea hoonani e ae i lawe noeau ia mai mai na eheu mai o ka aeto. He mau minute i hala ae o ko laua hoalu iki ana iho malaila ua poha mai la he leo hea mai keia kokoolua mai o ka naita i kona haku, e i ana: "E kuu haku, ina kaua, he manawa kupono loa keia no kaua e huli hoi ai no ke kulanakauhale, oiai, e iho aku nei ka la e nalowale, a eia hoi ka ino ke heleuluulu mai nei." I keia manawa i hooki iho ai kona kokoolua i kana kamailio ana, ua lawa ae la ka naita i kona mau maka ma ke kukulu kahi a ka la e napoo iho ana ma kela huli o ka poepoe honua, mahope aku o na ao olino ma ke kukulu komohana o Coadova, a hala he mau minute, ua pane mai la oia i kona kokoolua: "Mai noho oe a puiwa wale, e kuu Gaberiela, oiai, eia no kaua i ke ao okoa no, a he kora okoa ia a kaua e nanea iki ae ai maanei me ka pilikia ole."

Aole i pau.

MOOKUAUHAU ALII.

Na Iwikuamoo o Hawaii Nei Mai Kahiko Mai.

[Mai ka Helu 7 mai.]

KA FEDERICK WILLIAM KAPAHULA BECKLEY MAU KEIKI PONOI A ME KANA MAU MOOPUNA.

1. Frederick William Kahapula Beckley mare ia Emma Kaili Metcalf, moopuna kuakolu a Nahili k, ke Kiaaina mua a Ka Nai Aupuni Kamehameha I, no Oahu nei, hanau keia poe Sabina Kahinu w, Charlotte Halaki (ua make), Frederick William Kahapula Jr., Henry Hoolulu (ua make), Lottie Kapahukuiokalaninuimehameha (ua make), Emily Kealohanui (ua make), me Fredericka Wilhelmina Kailikapuolono Beckley. 2. Sabina Kahinu Beckley mare ia William Kauewalani Hutchinson, hanau mai o Frederick Kanoealii, William Kanewalani, Uilohelani, a me Emily Nahili Hutchinson. 

KO MRS. LUAAPANA SIMERSON MA.

1. Liloa k noho ia Akahiakuleana w, loaa o Umi-a-Liloa k. 2. Umi-a-Liloa k noho ia Kapulani w, loaa o Keawenui-a-Umi k. 3. Keawenui-a-Umi k noho ia Koihalawai w, loaa o Kanaloakuaana k. 4. Kanaloakuaana k noho ia Kaikilani w, loaa o Keakealani k. 5. Keakealani k noho ia Kaleiheana w, loaa o Moana k. 6. Moana k noho ia Piilani w loaa o Ilikia Moana w. 7. Ilikia-Moana w noho ia Kauhi-a-Haki k, loaa o Kahanaumalani k, Heiaholani k, Moana w, Koialiipuuheelani k me Huapuaalani k. 8. Moana w noho ia Keawe II. k, loaa o Kanainanui k. 9. Kanainanui k noho ia Kalanikukaulalaa w, loaa o Kiilaweau k. 10. Kiilaweau k noho ia Kalimakuhi w, loaa o Kanihomauole k. 11. Kanihomauole k noho ia Kahula w, loaa o Kanele w, Kaukuna k, me Kalua Kuakini k. 12. Kalua Kuakini k noho ia Kaaihue w, loaa o Luaapana w me Keaoku k. 13. Luaapana w mare me Kapena Aaron C. Simerson, loaa o Rose Kekupuohi, William Kuakini a me Isaac Kaleialii Simerson.

KO BERNICE PAUAHI ME SARAH KAHAKUAKOI.

14. Moana w noho hou ia Heulu k, loaa o Hakau w. 15. Hakau w noho ia Kauainanui k, loaa o Hao k me Wahine w. 16. Hao k noho ia Kailipakalua w, loaa o Luahine w. 17. Luahine w noho ia Pauli Kaoleioku k, loaa o Konia w. 18. Konia w noho ia Paki k, loaa o Bernice Pauahi. 19. Wahine w noho ia Keakaainalu k, loaa o Kepoo w. 20. Kepoo w noho ia Kahalepuhie k, loaa o Poki w. 21. Poki w noho ia Paalua k loaa o Sarah Kahakuakoi. 22. Sarah Kahakuakoi mare ia C. Kealohapauole k, loaa o Annie Niulii w, Lydia Kamae w me George Kawelookalani k. 23. Annie Niulii mare ia Kahaleaahu k, loaa o Helen Kalolowehilani, John Paalua me David Kauluhaimalama. 24. Lydia Kamae w noho i kana poe kane, loaa he mau pua.

KO KA MOI LUNALILO MA KO CHARLES KANAINA AOAO.

25. Moana w noho ia Palila k, loaa o Kauwa w. 26. Kauwa w noho ia Eia k, loaa o Charles Kanaina. 27. Charles Kanaina mare ia Kekauluohi w, loaa ka Moi William Charles Lunalilo.

Aole i pau.

Robert Napunako Boyd (ITALIA)

He Ana-aina a he kokua no hoi ma ka hooponopoo ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp

C. B. DWIGHT {KALE KUAIKA.}

Mea Hana Pohaku Kaekae Alanui, na He Kupapau a me na Kia Hoomanao Mabala. E loaa no oia ma kono wahi noho ma Koioio, Honolulu nei. Telepon Helu 833. 17-lmk

BUKE BANAKO NALOWALE.

Owau o ka mea nona ka inoa malalo iho nei, ka ona nona kekahi Buke Banako Hale Leta i nalowale, a i ole, lawe maoli ia paha mai ko'u wahi noho aku ma Kaopuaua, Honolulu, Oahu; ke hoike-ia aku nei ka lohe i na mea a mau mea paha e loaa ana ua Buke nei, nona ka Helu 7962, ma ka inoa o Luacy Kalei, e hoihoiia ae ma ke keena o ka Makaainana, a i ole, ma ke keena loio o Jas. K. Kaulia, ma Honolulu, Oahu, a e loaa no he uku makana i ka mea nana e hoihoi mai i ua Buke nei. Owau iho no, LUACY KALEI. Honolulu, Augate 17, 1896. aug.17-4mw

OLELO HOOLAHA A KA LUNA HOOKO KAUOHA.

Ua hookohu pono ia ka mea nona ka inoa malalo iho i Lunahooko Kauoha malalo o ka Palapala Kauoha hope loa a Mrs. Lahela Shaw, o Lahaina, Maui, i make. Ma keia ke hoikeia aku nei ka lohe i na mea a pau he mau koi ka lakou ma ka Moraki Palapala e ae paha, e hoike koke mai i ka mea nona ka inoa malalo iho nei iloko o eono mahina mai keia la aku, a i ole, e hoole loa ia aku mahope o ia manawa. A o na mea a pau he mau aie ko lakou i ka mea i make, e awiwi lakou i ka hookaa koke mai i ka mea nona ka inoa malalo iho ma kona wahi ma Lahaina i oleloia. C. B. COCKETT, Lunahooko Kauoha no ka Palapala Kauoha hope loa a Mrs. Lahela Shaw, i make. Lahaina, Augate 3, 1896.