Ka Makaainana, Volume VI, Number 12, 21 September 1896 — Page 7

Ka Makaainana.

HONOLULU, OAHU, POAKAHI, SEPATEMABA 21, 1896      7

 

NA AINA MAMAO.

 

Mau Lono Huikau mai kela a me keia Wahi Like Ole.

Make ko Rusia Loea Kalaiaina.

            Wahi a ka hoike a kekahi mea kakau nupepa o Ladana i Augate 31, mamuli ka o ka make ana o Kama'lii Lobanefa Rosetoveseki, Kuhina o ko na Aina E, ua hoololi loa ia ae ke kulana o Europa.  Aohe kanaka e ae i make i keia wa i hiki ke hoolilo aku iaia iho i mea ano nui no ka moolelo o ke ao nei ma keia mua aku.  Nona ka noonoo i hooulu ae a nona no hoi ka lima e hooko ana i na hooponopono nui palahalaha o na launa pili aupuni ana e pahola nei i nei wa a akahi no hoi a komo aku i ka wa kupilikii loa.  Ua aneane loa no e ko keia hoolala ano nui hewahewa ana i manao ai.  O kona akenui loa, o ia no ka hoolilo ana aku ia Rusia i mana nui oi kelakela ma Europa a me Asia, a e kaili ae hoi i ka oi kelakela i aneane loa e puni ke ao nei i loaa ia Beritania Nui.

            Aole i manaoioia ua manao oia e hoohana aku me na mea eha oolea, aka, i na mea paahana wale no o ka maluhia.  Ua hoowahawaha loa oia i ke kalele aku maluna o ka pahikaua, aole hoi no kekahi mau manao eeke ana a kona lunaikehala no ia ano hana, no ka mea, ua hoike mai kona molia ana i na poe Amenia i kona hoomaopopo ole ae no ke ola o kanaka, aka, ua hookau ae oia he waiwai oi ae maluna o ka lanakila o kona naauao ma ka lawelawe maalea ana i na hana kalaiaina hooponopono aupuni.  He kanaka oia i like loa ma na hooponopono kalaiaina ana e like la me Napoliona ma ke kaua.

            E lilo no paha hoi i wanana maalahi loa me ia no e make pu ai kana mau hoolala ano nui ana no Rusia.  Aohe kanaka e ae i makaukau e lawe aku i kona wahi.  O kona naauao a ano kuio maoli, aole loa ia i loaa i kekahi Rukini a ke ao nei i ike ae i keia wa.  E paniia aku ana paha oia e Nelidofa, ka Amebasedoa Rukini ma Konakinopela.

 

Na Lono no Tureke me Cerete.

 

            Ke mau la no ka manao pioloke nui ma Konakinopela, pela ka lono o ka la 5 nei, eia nae, aohe mau hoohaunaele ana i puka hou ae.  Ua hoouna aku na amebasadoa he palapala hui i ke Aupuni o Tureke, e hoakaka aku ana no ke ano o ua hana luku i na poe Amenia, me he la ua hoolala pono a maopopo loa ia.  Hookikina okoa ka ka lakou koi no ka nieniele pono loa ia aku o na kumu o keia puoho haunaele ana mai nei.

            Ua ae ka Ahaolelo, mahope iho o ke kukakuka pu ana me ke komite kipi, pela ka lono mai Canae, Kerete, o ka la 4 nei, i na hoolala hooponopono i kakauia e na Mana a aponoia ai hoi e ke Suletana o Tureke.  Aohe no ka hoi i pio iho na hana hiena a na Tuke a ke hakaka la no ka ma Tenedoso, apana o Apocorana, a me kahi mau wahi e ae.  Ke ku la he aupuni kuikawa malalo o ka noho peresidena ana a Geremonosetaroso, ke alakai Kerete kaulana, a o ke poo hoi o ka aha elele o Kerete i ka Ahakuka ai o Berelina.  He 92 kona mau makahiki a ua mau no kona eleu a me ka ikaika, a he kakoo ikaika hoi oia no ka noho mana aku o Beritania Nui ma ia mokupuni.

            He komisina ka ke Suletana o Tureke i hookohu no ka hoomaopopo ana i na poe Amerika i pakele mai na hana hiena mai.  Ua hele na ukali o na keena amebasedoa ma kekahi halawai ana o ke komisina.

 

Eeu Kipi ma na Paemoku Pilipine.

            No Manila, Paeaina Pilipine, ka lono ua puka ae he kaua kipi malaila a ua kukalaia ae ua panikuia ia wahi.  Ua kauohaia ka mokukaua Sepania Isla de Cuba (Mokupuni o Kuba) e holo koke aku no ia mau paemoku.

            Ua oleloia na Iapana ka na hoeueu i ko na Paemoku Piliine poe e kipi i ke Aupuni kuloko, no ke ake e kaili ae ka a lilo nona.  No Honakona ka lono ua alakai aku kekahi hapa-Paniolo nona ka inoa o Sanatolano he 1,000 poe kipi, ua kaua aku ia Sanisidoro, Mokupui o Luzena, ka mokupuni nui loa, a ua hoopaahaoia ke Kiaaina, kona kakauolelo a me kahi mau luna oihana e ae, a ua hana aku lakou i kekahi mau hana kanawai ole.

            He palapala pili oihana na Generala Balanaco, Kiaaina-Generala o na Paemoku Piliine, ka i hoike ae no ka loaa ana o kekahi ohumu kipi hou e kue ana i ke Aupuni o Sepania.  Wahi ana, ua laulaha loa aku keia ohumu hou ma kona mau hoolalaia ana.  Lehulehu na poe i hopuhopuia.

 

Pae ko Kina Kuhikuhipuuone.

            Augate 28 i pae ae ai o Li Hana Kana ma Nu Ioka maluna o ka mokumahu Sana Lui a ua apoia aku oia me na hoohanohano au mokukaua a me koa.  He umikumamalua na mokukaua e ku ana iloko o ke awa ia wa.  Na Generala Ruga i hookipa aku i ka malihini hapauea kaulana ma ka aoao o ke Aupuni o Amerika Huipuia.  Mahalo loa oia i ke aloha pumehana i loaa aku iaia mai ia Konela Ferede Garani ma ke alapii.  Ua hiki kino aku o Peresidena Kalivalana ma ka Li Hana Kana aha ike i haawi ai ma Nu Ioka.  He kanaka nui oia e hookipaia la e ko Amerika poe.

            I kona ninauia ana aku no na Pake e noho la malaila, ua olelo aku oia he makemake loa oia e loaa ia lakou na pono like me na lahui e ae.  Ua ninauia aku oia no kona ala e hoi ai, ua hoike aku oia ma Kanada aku oia, no ka mea, aohe ona makemake e hoi aku a ma Kaleponi, o hoouluhuaia oia e ko laila poe Pake, oiai, o ka hoomaha kona akenui a me ka hoi awiwi hoi no ka aina.

            Ma ka aha hoikeike ma Toronoto, Kanada, ua hookipaia aku oia e ka Lutanela-Kiaaina, Sa Kale Tupa, Sa Makenezi Bowela a me kahi poe e ae.  Iaia i hele makaikai aku ai i na hale hana o ka hui uwila o ka Wailele o Niagara, ua hoopa aku oia i kekahi wahi hana me kona kookoo a ua loaa oia i ka ikaika o ka uwila, a na ia mea i kono aku iaia e hoi koke no kona keena.  E kau ana oia ma ka mokumahu Emeperese o Kina ma Vanekouwa a aole e kipa makaikai aku ana ia Vitoria.  [Ina pela, aole oia e hoea mai ana i o kakou nei.  L. H.]

 

Huakai Kaahele Ike a na Alii Rusia.

            Aia ke Za a me ka Zarina o Rusia ma kekahi huakai kaahele ia Europa, a ua hiki i Viena.  Oiai ma ke ala ua ano nui a kaumaha loa ka opu hapai o ke Zarina, a ua kauoha ke kauka e hoi hou no Sana Peterobuga, a o ke Za no ke hoomau aku ma kana huakai kaahele, eia nae, ua ae ole oia a ua paakiki no e hele pu.  He makemake loa ke Za e kipa ike aku ia Kama'lii Bisimaka.  La 5 nei i hoea aku ai laua i Bereselau, Geremania, a ua apoia laua ma ke kahua alahao e ka Emeperoa a me ka Emeperese, e na kama'lii opio, a e kekahi heluna nui o na aliikoa a me na luna oihana.  He hookahakaha paikau ka i haawiia iaia a he ahaaina ma Coliza, a ua haawi ae o Emeperoa Uilama he haiolelo kuio iaia i haawi ai i na olelo puke kiaha no ka mahele ekolu o ka pualikaua.

 

Ko Iapana mau Popilikia.

            O na ma'i kolera kauliilii ma na awa-kumoku nui o Iapana, he ma'i hi welawela e noke la i kekahi o kona mau okana, o ka hoomauia hoi o ke kaua kipikipi kuahiwi ma Foamosa a me na hoopehu loa ia ae hoi o ka heluna o na ola i poino i ke kai hoee o Iune i hala, o na lono ano nui ia i loheia mai nona.

            Nui ka pioloke ma Iokohama, i ka la 2 nei, no na lono palanaiki i loaa aku no kekahi olai hoopoino ma na apana o ka akau-hikina o ka mokupuni nui.  O keia no na apana like i halawai ai me na poino nui o kela olai weliweli a kai mimiki o Iune 15 i hala, ka wa hoi i hului pau loa ia ai o kekahi mau kulanakauhale lehulehu a he 30,000 ka nui o na ola i poino ma ke kohoia.

 

Na Hunahuna Laulaha.

            Ke pii mau la ke ano maluhia ma Rodesia.  Maluhia loa na poe Matabele.

            Augate 12 iho la i hookoia ai ka hoopai make maluna o Mola Reza, ka mea nana i lawe ke ola o ke Sa o Peresia i make.

            Ua hoole ke Kanikela Geremania ma Zaniziba e haawi pio aku i ke Suletana i hoopauia, Saida Kalida, i na Berltania.

            He paonioni Aha Kuhina ko Iapana.  Ua haalele aku o Kuhina Nui Ito, a pela no hoi me ke Kuhina Kalaiaina a me ke Kakauolelo o ka Aha Kuhina.

            Ma Madegasaka, ke puapuai la ka inaina o na oiwi i na Farani a ke luku la.  O na poe kipi a pau loa e paa ana i ka hopuia, ua pau i ka hoopai make ia e na Farani.

            Ua loaa aku ia Berazila ka Italia palapala koi hope loa a e hooponopono ae ana, a ua manaoioia nae hoi aole laua e ulele hakaka ana.  E hololea ana no iloko o ka malie.

            I ka po o Augate 28, ma Kapalakiko, ua lilo o Makaaulifa i mea ole ia Koiniseki iloko o eha puni ma ka hookuku ana i ko laua ike a me ka ikaika kuikui puupuu imua o 5,000 poe nana.

            Ma ka huakai huli welau akau a Kauka Nanasena, ua hele oia a hiki i ke 86 degere me 15 minute, a na ka paupauaho ana o kana mau ilio i kono iaia e huli hoi hou no Suedana.

 

Uoia a Lilo i Hookahi.

            Ma ka aina kaulana o Moanalua, Sepatemaba 13, 1896, ua puili ae la na lima o Misita Andrew K. Williams a me Misi Elizabeta Kekapalau Malao ma ka berita maemae o ka mare, a na ka Rev. D. Kapali i hooko i ka oihana o ka mare maluna o laua.  Mahope iho o ka pau ana o na hana, ua haule iho la na hoa'loha a pau i akoakoa aku e hoopiha i ka lua o ka inaina.  Ua lawelaweia ia mare ana me ka malie loa a hookuuia na hana me ka hauoli a me ka maluhia.