Ka Makaainana, Volume VI, Number 13, 28 September 1896 — Page 2

Ka Makaainana.

Honolulu, Oahu Poakahi, Sepatemaba  28, 1896

Hoohaili No Ka Po

            E Ko Ana Paha Auanei na Olelo a ke Kilokilo.

            I ka po o ka 26 a ao ae la 27 o lune, ua loaa iho la keia haawina ia’u. Ua halawai iho la ko’u uhane me kekahi elemakule e noho ana iloko o kekahi hale o ke ano kahiko; aia iwaena e noho ana kekahi wahine ui o kona mau helehelena, a me kekahi poe e ae. O ka hana ka hoi a keia poe e noho nei iloko o keia hale, he huli i kekahi mau ninau a ua elemakule nei, a penei ka ninau:

            “E ku ana keia kumulaau, he 24 kapuai o ia kona kiekie, he 2 kapuai ke anapuni o ua laau nei; he elima hua a ua pau wale no keia poe hua i ka pala. A mahope iho, pau iho la keia poe hua i ka nalowale, a e kau ana ma kahi o keia mau hua i nalo wale keia mau hua (elua hua palapala) a o ka mea nona ka inoa o keia mau hua elua hua palapala, he inoa no  kekahi manu o ka lewa. A owai la ka inoa o keia manu nona keia mau huapalapala? Heaha ke ano o keia kumulaau nona ke kiekie o 24 kapuai a me 2 kapuai ke anapuni? Heaha kela mau hua elima i kau ai maluna o ua kumulaau nei a hiki ai i kona nalowale ana?”

            A o ia iho la na ninau a ua elemakule nei i olelo mai ai ia’u. Ua ala ae au mai ko’u wahi moe ae a ua noonoo au no ke ano o keia moe I hoikeia mai ia’u, a no ka maopopo pono ole ia’u, nolaila hoi au e panee aku nei imua o ke akea, a na ke Kilokilo Dimerata paha hoi ia o Ka Makaainana e uwila ae i ka ike o kana mau noii a wehewehe noeau ana.

            Owau no me ka mahalo,         S.K. Kaanaana.

Balauwina Home, Kalawao, Iulai 23, 1896.

Na Hoonanea Koeuhane.

            He ehiku no ka huina o na mahele o ka moe, oia iho keia.

            1, elemakule haawi ninau (aohe ona inoa); 2, anaina; 3, kumulaau inoa ole; 4, elima hua pala i nalowale; 5, elua hua palapala no laua na inoa i like me ko kekahi manu; 6, 24 kapuai, ke kiekie o ka laau; 7, 2 kapuai, ke anapuni o ua laau la.

Ka Wahahee a ke Kilokilo.

            1- Ka elemakule, oia ka mea ninau; 2- Anaina, o lakou na poe hai ninau. O ka huina o keia poe a pau e akoakoa ana, ua kapaia lakou o ke “Aha Hulininau.” Nolaila, he ninau ko ka po, he nune ko ke ao a me ka haohao.

            3-Kumulaau, o ia ka home, kahi i noho ai a kupa kamaaina malalo o koua malu.

            4- 24 kapuai ke kiekie, o ia pahu ka loihi o ka manawa i noho ai a kupa kamaaina ma ka home, a i ole, o ia paha ka hookahua mua loa ana o ia home, a o kona ½ paha ka loihi.

            5- Na hua pala elima i nalowale aku mai ko lakou kahua i kau ai, o ia ke kaawale ana o kekahi mea a mau mea paha mai ke kahua aku o ka home i noho ai a kupa. E manaoia ke kumulaau he makua ia, a e manaoia hoi na hua pala elima he mau keiki. A pela hoi ka home, he mau keiki iloko ona; a, e ahaia ana la keia poe?

            6- Elua huapalapala e pani ana ma kahi o na hua pala elima i nalowale, no laua na huapalapala he inoa no kekahi manu o ka lewa.

            Aka, o ka manu hea la o ka lewa ka mea nona ko laua inoa, oiai, he nui no na manu no lakou na huapalapala palua e like me keia: (1) Io, (2) Oo: (3) O-u; (4) A’o; (5) Ku. Nolaila, ua manao au, he Ku ka manu nona na huapalapala elua, i mea e loaa ai ka haina o na hua pala elima i nalowale ai. No ka mea, ina e hoopili mai ia (o’e) me ku, a i ole ia, kaawale paha me ku, e loaa ana ka haina, penei: kuo’e I ke ala me ka maka: a i ole, ku kaawale; oia hoi, ku a kaawale aku, alaila, he kipaku ke ano o na huapalapala elua no na hua pala elima, ua loaa iho la ko lakou paui he kipakuia, a i ole, he hooneeia aku paha ma kahi e aku.

            Nolaila, heaha ia na mea i loheia, a i manao wale ia ma ka home o na poe pilikia mahope iho o ka wa i loaa ai keia moeuhane a hiki mai la i ka la i hoounaia mai nei o keia moe? A heaha na mea i nune wale ia? Aka hoi, ina o ka inoa (Ku) a hoopili mai me (u), he maalahi ka hoi ia; oia hoi ka olelo ana ae, (kuu) loa ae i na poe iloko o ka pilikia. Hele hoi ha a like pela, no luna mai ia; helelei ka la, mahina me na hoku, o ke keu aku ia o ka hemolele lua ole.

            Aka, ke hai nei ka inoa o ka mea nana ka moe (paha), he ana ana maoli no nei hana a ua home la, a pela paha i nalowale ai kela mau hua pala elima, no lakou keia mau hua, 1-a, 2-l; 3-o; 4-h; 5-a.             Loaa ai ka puana a ka moe, o ia keia: ALOHA.

            7- Elua kapuai ke anapuni o ka laau. O keia mau kapuai elua hiki mai ana ia i kahi i kaupalenaia ai ka home, aole e hele aku mawaho o laila, ua like ia mau kapuai, elua me kekahi. A ke hookuli no, he oehu ka hope.

            O keia ae la ka’u mau kualehelehe ana, a’u e olelo ae, aole paha i like me ka haina o ka ninau a ka elemakule e noke la i ka ninau i mua o ke anaina, ua loaa mua aku la paha ka haina a ke anaina i ka elemakule, a hiki hope hoi ka’u. Minamina no!     Kilokilo Dimerata.

 

Mookuauhau Alii

Na Iwikuamoo o Hawaii Nei Mai Kahiko Mai.

            Hoakaka.  O @ak Mahi k@i puka ma kela mau helu aku nei, oia no ka Mahiolole k@ He mea pono e maopopo keia poe Mahi @, no ka mea, he ekolu lakou, na keiki ponoi a ke Alii o Kohala, oia o Kanaloanoo k. Me ka wahine mua, oia Kapuleiolaa w, loaa o Kapaihi w; me Kihamoi hala w, loaa o Mahikapalena k; me Hoolaaikaiwi w hoi, loaa o Mahiolole k me Mahikuku k.

 

Ko Ke Kama’liiwahine Elizabeta Kekaikuihala Kekaaniau Pili I Na Kamehameha.

            1. Keawekekahialiiokamoku k pio ia Kalanikauleleiaiwi w, loaa o Kalanikeeaumoku k me Kekelaokalani w.

            2. Kalanikeeaumoku k noho ia Kamakaimoku w, loaa o Kalanikupuapaikalaninui Keoua k.

            3. Kalanikupuapaikalaninui Keoua k noho ia Kahikikala w, loaa o Kalokuokamaile k.

            4. Kalanikupuapaikaleninui Keoua k noho hou ia Kekuiapoiwa w, loaa o Kamehameha I.

            5. Kalakuokamaile k noho ia Kaloiokalani w, loaa o Kaohelelani w.

            6. Kaohelelani w noho ia Nuhi k, loaa o G. Laanui k.

            7. Gideon Laanui k mare ia Theresa Owana Rives, loaa o Elizabeta Kekaikuihala Kekaaniau me Gideon Kailipalaki Laanui.

            8. Gideon Kailipalaki Laanui mare ia Kamaikaopa w, loaa o Theresa Owana Kaohelelani.

            Mai keia papa a me ka papa o na Kamehameha, loaa keia iho:

            (a) He kaikuaana o Kalokuokamaile no Kamehameha I.

            (e) He hoahanau ponoi na Kamehameha II, me III ma Kinau w pu no Kaohelelani w ma ke degere ekahi.

            (i) He hoahanau ponoi na Kamehameha IV me V no G. Laanui ma ke degere elua.

            (o) He hoahanau ponoi Ka Haku o Hawaii no Elezabeth Kekaikuihala Kekaaniau ma ke degere ekolu.

            Nolaila, he kupunakane kualua o Kamehameha I no ke Kama’liiwahine Elizabeta, Ke kaikuihala Kekaauiau.

            Nolaila, ma keia mau papakuauhau ae la, ua maopopo, ma ka aoao o ko Kamehameha i makuahine, oia o Kekuiapoiwa me ke kupunawahine, oia o Kamakaimoku w, ko ka Moiwahine liliuokalanimau pili ia I na Kamehameha.

            Ko ka Moiwahine Keuemake Kapiolani pili hoi ma o Kanekoa la, kaikama o Kalanikupuapaikalaninui Keoua a Kalanikeeaumoku k.

            Ko ke Kama’liiwahine Eliza.

            Ko ke Kama’liiwahine Elizabeth Kekahikuihala Kekaaniau pili hoi i na Kamehamea, mai ia Kalanikupuapaikalaninui Keoua mai, no ka makuakane like o kona kupunakane kualoa ponoi, oia o Kalokuokamaile e me Kamehameha i, o Kekuiapoiwa w, ma o Kekelaokalani la, ko lakou kupunawahine kuaha ponoi i nili ai.

 

Kekahi o Na Moopuna A Kaumualii, Moi o Kauai

1. Kaumualii noho ia Nalu. ahi w, loaa o Kukiiahu w.

2. Kukiiahu w noho ia—(he haole Rukini), loaa o Kapulo w. I kela mahina aku nei no kona make ana i ke 88 o kona mau makahiki o ke ola ana.

3. Kaumualii noho ia Makua w, loaa o Nahinu w.

 

Hakaka o Na Luina Moku

            He hakaka ka I ulu ae mawaena o ke kuke a me kekahi mau luina o luna o ka mokupea S. N. Kakela I kakahiaka La Pule, la 3 nei, mamuli o ko ke kuke kuhi ana aku ua aihueia na mea ai. Ua hiliia kona @ me ke pine, a ua hou pahi ak@ oia i kekahi luioa, a ua hala hoi he poka pupanapana. Ma ia hope iho, ua pau lakou i ka hopuhopuia a nonoho ana malalo o ko ka Ilamuku malu. A mamuli hoi o ka nienieleia ana e Kanikela Keuerala Mila a me ka Ilamuku, no hooponoponoia nei hana mawaho o ka Aha. Ekolu o kela poe i uku piha ia a ua hoouneia aku no Kapalakiko.

           

            Poalua, la 15 nei, i hoomaka hou ai ke kau kiki mamu.

            Ina ka e hanaia i aniani malalo ae o na waapa lawaia, he ike waleia no na i’a o loko o ke kai. Ua hoaoia keia e kekahi poe a na ikeia ka waiwai.

            Ua pau ko S R. Hapuku noho Lunakanawai Apana ana no Lihue, Kauai, a o H. K. Kahele aku la ma kona wahi, pela ka lonoia mai.

            Ua kohoia ka nui o ka waiwai o “Mama” Kuke i make iho nei o a ka $155,446, a e like hoi me kana kauoha e maheleheleia iwaena o kana mau keiki. Ua hookohuia o Kale Kuke i lunahooko me ka hona ole.

            O na lauina o na nupepa ohakulai a huaelo omaka hou o luna loa aku nei o kipapa waho o ka paepae, he poe ai luai nae wale no a pau. Palolo na waha i ka hoino mamua, a i nei wa hoi, hoi hou no e ai i ka luai me he poe ilio la.

            No ko Kailipaka aihue ana hoi I ka wati a Misasa J. D. Robinesona, I hoikeia aku no ma ka lelu ua pakuiia aku he 1S @alama hoopaahao hou nona mawaho ae o na makahiki ekolu no ka aihue ana I ka wati a Misasa J. F. Hakafile Ea, kanono no ka hoi.