Ka Makaainana, Volume VI, Number 18, 2 November 1896 — Page 3
HONOLULU, OAHU, POAKAHI, NOVEMABA 2, 1896. 3
MAU HOALOHALOA
Na ia ALoha AIna Oiaio i Hala i ka Make.
Na ka Ahahui Opiopio Imipono Karistiano o Kaluaaha, Molokai.
I ka nupepa KA MAKAAINANA maikai;
E ae mai ia makou, oiai, ua kaa hope loa ae nei ko makou ike ana ma na nupepa ua make o Iosepa Kahooluhi Nawahi-o-Kalaniopuu, ke ahikanana, ke Kuhaimoana Kalae koakoa, ke koa wiwo ole iloko o keia Aupuni Hawaii.
Nolaila, o makou, o na lala o ka AHahui Opiopio Imipono Karistiano o Kaluaaha, Molokai, ma o ko makou komite la, ke hoike nei, ua loaa ia makou kaukana luuluu, a me ka minamina nui o ke aloha kuio, a me ka hilinai nui ia Iosepa Kahooluhi Nawahi-o-Kalaniopuu, ua hala ma kela aoao mau o ka make.
A ke hoike nei makou, aole paha e loaa hou ana he Iosepa Kahooluhi Nawahi-o-Kalaniopuu, oiai, ua lawe aku ka Mea Mana Loa i kona hanu hope ma Kaleponi, kahi kaawale mai kona one hanau aku. Aloha ino! aloha nui, ke kanaka hookahi a ka lahui i hilinai ai; nolaila,
Hooholoia, ke komo pu nei makou me ka hooma-u ana, a me ka hoomanao mau ana, me kana aliiwahine i hooneleia i ke kane o ke ola ana o keia mau la maikai, a ke haawi nei makou i ko makou aloha a hui pu ana me Mrs. Nawahi, a me ke noi ana ana i ka Makua Mana Loa, e hoomamaia kona kaumaha mai na kipona maeele o ke aloha kane;
Hooholoia, ke ae nei makou e komo pu aku ma ka auamo pu ana me kona ohana, oiai, e noho ana iloko o keia mau la me ke kaumaha, a na ka Haku Mana Loa e hoomama ia kakou. O makou no me ke aloha nui,
MRS. K. MAHOE,
MRS. K. KAUPU,
MRS. P. NAOPALA,
Komite MISS KALUNA KAOO,
MISS SELA KAO,
MISS ANA UAKOIELE.
Kaluaaha, Molokai, Okatoba 13.
Na ka Ahahui Aloha Aina o na Kane o Kohala.
Me na kuluwaimaka kumakona walohia wale, ka ehaeha kaumaha a luuluu i hoea mai ai ka lono, ua hala ka Pohakuhauoli, ka Hokuloa o ka Paeaina o Hawaii nei, ka Mea Hanohano Iosepa Kahooluhi Nawahi-o-Kalaniopuu i ke ala hoi ole mai, ma ka aina malihini a ke aloha i noho ai, a hookuu mai la oia i kona hanu hope loa ma Kaleponi, i ka la a me ka hora i manao ole ia e hiki mai ana ka Haku mea hale.
O oe no ia e ka like, ka omuo o ka lahui Hawaii, ka puuwai hao kila ma ke kupaa oiaio i kona aloha Alii, aloha aina, aloha i kona lahuikanaka ponoi.
Ia Mrs. Aima Nawahi-o-Kalaniopuu, a me na keiki makua ole, ka ohana a pau.
O makou, na hoa'loha o ka Ahahui Aloha Aina iloko o ka poai o na kane o ka apana kaulana o Kohala nui, o Kohala-iki, Kohala. Ua Apaapaa, me na manao lokahi ma o ko makou komite la. A no ka mea hoi, ua oluolu i ka Mea Mana Loa ka lawe ana aku i ka hanu hope loa o kau kane i aloha nui ia, ma ka aina i oleloia ai, malaila ka puuhonua a o ka pahu hope o kona ola ana.
Ua hoakaka mai ka Olelo Hemolele, "heaha ko ke kanaka ola ana, he mahu no ia i pua iki, ae a nalo iho." Ua pio kona kukui lama, aka, o kana mau hana maikai, eia no ia ke ola nei aole i pio iloko o na puuwai o kona lahuikanaka ponoi. Ua pau ka paio ana, a ua hoopaa oia i kana hana, a e kau mai ana anei ka lei o ke ola mau loa no kupono a me ka pomaikai o o kona aina, a no ka pono a me ka pomaikai o kona uhane.
E Hooholoia, ke komo pu aku nei makou iloko o ke kumakena pu me oe, o ka wahine kanemake, a me na keiki i hooneleia i ka makua ole, ka ohana, ka lehulehu no a pau, e u pu ana iloko o keia mau la o ka ehaeha.
Hooholoia, ke pule nei makou me ke noi aku i ka lokomaikai o na Lani, e hooluolu mai i kou mau luuluu a me ka ohana a pau.
Hooholoia, a ke nonoi nei no hoi, e hooloihiia na la a me na makahiki o kou hanu ana i na ea oluolu o kou aina aloha, a e hoomalu mai ka mana o ka Mea Ike. Ole ia, a e pomaikai oe i kou mau la ma ka honua.
Me ka haahaa, ma o ko mkaou komite la:
J. KAIMANA,
J. B. KAOHI,
H.P.K. KAPAONA,
Komite M. KAHIPA,
ZEBEDAIO UAIA.
Na ka Ahahui Aloha AIna o Mokae, Hana, Maui.
IA MRS. EMMA A . NAWAHI;
Me ka walohia.
Mamuli o ka loaa ana o kau aliikane, Misita Iosepa Nawahi, i ka ma'i i maopopo ole kona kumu, ua hoonele maopopo ia oe i ke kane ole, a me na keiki a olua i ka makua ole, a me ka lahui i hooneleia i ke kalaiaina naauao kupaa a wiwo ole, ka mea nana i kaohi i ka holomoku ana o ka lahui iloko o ka hoohuiaina; nolaila,
E Hooholoia, o makou, o ka Ahahui Aloha Aina o Mokae, Hana, Maui, ma o ko makou komite la, ke hui pu aku nei makou me oe, a me au mau keiki makua ole, e auamo pu iloko o ka luuluu a me ka lihaliha a me ke kanikau kumakena i ke aloha no kou kokoolua i hale aku ma kela aoao o ka muliwai eleele o ka make; nolaila,
Hooholoia, a oiai oe iloko o na kipona ehahea kupouli i ke aloha no kau kane, a oia ka makou e kalokalo ae nei ma ka inoa o na Mana Kahikolu Kiekie Loa, me na Ieo pule iloko o ka lokahi, e hoopau ae a e hoomama ae i kou manao kaumaha i hele a kupouli i ke aloha, a Nana no auanei e hoaahu mai ia oe me ka aahu ia oe me ka aahu apoo o ka manaoio a me ka pale umauma o ka manaolana, a e kaawale aku auanei ke kaumaha mai ia oe aku, a e noho iho oe me ka oluolu a me ka lahui pu, mai Hawaii a Kauai, no ka nee ana imua a hiki i ka pahu hopu, no ke aloha i ka Moiwahine, ka aina, ka lahui.
"A e hoomaikaiia ke Akua, no ka mea, Nana mo i haawi mai a Nana no i lawe aku." O makou iho no, o ka Hui Aloha Aina, ma o ko makou komite la,
P. KAUIMAKAOLE,
P.K. MOMOA,
P. KI,
J.K. KANOHO,
G.P. KAUIMAKAOLE,
P. KAHOOLUHI,
Komite S.K. KAIMINAAUAO,
JOHN WILIKOKI,
C. HELEKAHI,
J.M. HOOULU,
P. NALIMAKAUA,
G.M. KAHAI,
J.K. NAKILA,
I.K. MOMOA.
Mokae, Hana, Maui, Okatoba 9.
"Ohi ka Io o ka Laau."
Mai ka hoomaka ana o ka Hui Papaa Kukulu Hale Oahu e ku ae lawelawe i ka oihana kuai papa a kukulu hale, ua loaa mai ia hui he elua mau moku piha laau, eia ke kolu ke hue nei ma ka uwapo Alahao, eia hou ae no a ku mai he moku hou, iloko paha o kekahi mau pule helu. Ua hoike mai ka luna nui ia makou no ka piha o ka moku e hue nei, o ia ka oi kau o ka piha papa maikai i loaa mai ia lakou , a he inoino hoi, ko na moku mua elua. No keia piha moku ka olelo ana no ka moekahi o ka io o ka laau, like ke oloia ana, a ua nele no hoi me na opuupuu lala. O na papa keia a lakou e kaena nei aohe i loaa ma na pa paa e ae, a o ka lakou ka oi loa o na papa maikai. Mamuli hoi o ka haiki loa o ko lakou pa-papa ma Leleo, ua loaa ia lakou he wahi hoahu laau hou ma ke kahua aina o ka Hui Alahao & Aina Oahu ma Ewa o ka uwapo o Hooliliamanu, a ma ka aoao makai o alanui Moi, a he wahi nui okoa no hoi ia. Ua lilo aenei keia hui i hui i hoohuiia me ke kaupalenaia o ke kuleana koi aie maluna o na mahele e paaia ana e kela a me keia mea paa kuleana iloko o ka hui.
Ua hoea mai la ma ka Mariposa o ka Poaha, Okatoba 22, he poe haole me na papale laiki keokeo me ke kii kalaunu o Kikane mamua o ka papale i omauia me ka lopi gula, a me na aoao he mau paresaido a me ke gane garu. Oiai keia poe ma Honolulu nei, e holoholo ana, ua nui ko lakou hakiloaa e na hanaiahuhu ailoaa a ke Aupuni baibala opiuma. Pioo no paha na poe kolohe.
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomamao Mabala.
E loaa no oia ma kona wahi noho ma Koiuiu, Honolulu nei. Telepona Helu 833. 17-1mk
HOOLAHA HOOKAPU.
Ke hoolahaia aku nei ma keia ua hookapu a papa loa ia ka lawaia ana ma ke kai o na aina o ke Kahua Hanai Holoholona Puuhue/Pauhue Ranch/, a pela no hoi ke kiki pu ana mauka o ke kula. O na poe a pau e kue ana, e hoopiiia no ma ke kanawai.
PALME R P. WOODS.
Luna Nui.
Puuhue, Kohala, Hawaii, Okatoba 7, '96.
okt. 12--2ml.
MO RIKAWA,
Ka Oi ma Kana Hana.
Ua nee ae nei kona hale hana mai
Alanui Betela a i ka Halelio o Akana, Alanui Konia, mauka o Alanui Hotele.
Amara a Mea Hana Kaa me ke Kapili
Kapuai Hao Lio Oluolu loa ka uku o ka hana, i hiki ole i na poe e ae ke lihi launa aku.
jun 8--3ml.
Hui Papa a Kukulu-Hale Oahu
(OAHU LUMBER & BUILDING CO.) Leleo, Alanui Moi, kokoke i ke Kahua o ka Hui Alahao & aina Oahu. Poe Kalepa Laau, Hana Aelike a me Kukulu Hale. Poe Hookomo Mai a Hoolilo aku i na Puka, Olepelepe, Kui, Pepa, Pena, Aila, Na Pono Kamana, A pela aku, a pela aku Telepone 53. Pahu Leta.
apl 28-tf
HELE HOOLUOLU
O. R.L. Co. MA NA POAONO A ME NA LA PULE E haalele mai no na Kaamahu i na hora 9:15 A.M. a me 1:45 P.M., a hoea hou mai o Honolulu nei ma na hora 3:11 a me 5:55 P.M. Na Palapala Uku Puni.
Papa 1. Papa 2.
Manana $ 75 $ .50
Mahiko o Ewa 1.00 .75
Waianae 1.50 1.25
F.C. Smith,
Agena Ohua a Palapala Nui
feb 10-tf
AHI
[PAIKII.]
Helu 89. Alanui Nuuanu.
PAIKII--Owau no nei, o ke oukou he kamaaina kahiko loa. E kipa mai, he emi loa na kii o na ano a pau ma ko'u hale paikii.
NA LAKO HALE--Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau. Pela, Uluna, Moena, a pela aku. Emi loa.
E loaa no kumukuai maikai kupono no ke Keleawe a me ke Kepau.
iun 22-6ml