Ka Makaainana, Volume VI, Number 18, 2 November 1896 — Page 6

6 HONOLULU, OAHU, POAKAHI, NOVEMABA 2, 1896.

 

IO SEPINE
---KA---
EMEPERESE PUUWAI OLU
O FARANI.

 

MOKUNA V.
HOOKUUIA MAI KA HALEPAAHAO.

 

[Mai ka Helu 17.]

                O keia ae la na kukai olelo mua loa ana mawaena o Iosepine a me Napoliona, he halawai ulia wale no kela ma kekahi anaina ahiahi hoolaulea mawaena o ka wahine kanemake opio ui a piha i ka manaolana, a me kekahi kanaka opio nona ka naau i piha me na manao uilani i ke ake hanohano.
                Mahope iho o ka haawiia ana mai o ka mana maluna o napualikoa a pau o ke aupuni, ua hoopuka ae la ia i ka olelo kuahaua a laweia na pu a me na lako kaua e ae a pau mai na makaainana ae. A iwaena o na mea kaua i laweia malalo o keia kauoha a Napoliona, o ka pahikau kekahi a Bohane. I kekahi la ae, ku ana kekahi keiki opio kulana kilakila imua o Napoliona, nona na makahiki he umikumamalua, a nonoi haaheo aku la e hoihoi hou ia mai ka pahikaua a kona makuakane. Ua oluolu loa ka alihikaua nui i ke keiki a me kona kulana, nolaila, ua ae mai la o Napoliona i ke noi a ke keiki a kauoha koke ae la ia e hoihoi hou ia aku ka pahikaua a Bohane. I kekahi la ua hele kino aku la o Iosepine e haawi aku i kona mahalo hoomaikai ia Napoliona no kana kana oluolu i hana ai i kana keiki.
                Mamuli no hoi o ko Iosepine wahine ui a me kona ano waipahe, ua komo maoli no iloko o Napoliona ke ano hoohihi. A nolaila, mahope iho o keia, ua halawai mau laua, a aole no hoi i nele ko Iosepine ike a hoomaopopo manao nona.
                Ua hoomaopopo o Napoliona ina e mare ana oia i ke aiiwahine kanemake, e loaa ana iaia he kulana kiekie ae iwaena o ko Iosepine poe hoa'loha, a e lilo auanei oia i mea hilinaiia e lakou, a e lilo no hoi auanei lakou i poo kokua i kona mau manao ake hanohano. He oiaio, ua pipili aloha loa o Napoliona ia Iosepine, a oia wale no ka mea a kona puuwai i ike ai i ke aoha maluna o na papalina o ka honua, a na kupouli maoli no kona aloha i kekhai manawa.
                No Iosepine hoi, he nui kana mau kumu hoopohala no ko laua hoohuiia. Ua kakau aku oia i kekahi o kona pee hoa'loha aole oia i ike i kekahi kanaka kaili noonoo e like me Napoliona; ua mahalo no oia i ka makau ole, ua mahalo no oia i ka makau ole, ka holo o kona hoomaopopo ana, a me ka nui no o kona ike. Ua hoike pu ae no hoi o Iosepine, iloko o kona malalo ia Napoliona, aole nae oia i ike i ke aoha iaia--he makau oia iaia.
                Eia keia iloko o ka hooilo. Ua ano iki ae ka ino o ke kaua kuloko: aka, he wa ia o ka uluku, ka pi-o o, ka hoomakaukau kaua ana a me ka pilikia. Ke liuliu nei o Europa e hele kaua mai ia Farani. Aohe aupuni paa, a aole no hoi he kanawai kupono. Ua haawi pau o Napoliona i kona manawa o ke ao i ka hana o kona kulana, a i ke ahiahi hoi, ua hoohuli ae oia no ka makaala ana ia Iosepine. Ma na ano a pau, i ko Napoliona manao, he haahaa loa na wahine a pau malalo o Iosepine. He pinepine kona haawi ana i mau papaaina hoolaulea no kona poe hoa'loha, a ma ia mau papaaina a pau o Iosepine ma ke poo. Maloko o ko Iosepine home i halawai mau ai o Napoliona me ko laua mau hoa'loha pilipaa, a no ko Iosepine pono o lakou kekahi i kokua i ko Napoliona makemake. He aloha ikaika ko Napoliona, aka, na oi ae ka ikeike o kona manao haakei. Me ia mau anaina hoolaulea liilii i hoohala ai o Napoliona i kona mau ahiahi o ka hooilo, me ka hoao ana e kaili lilo loa i ka puuwai olu o Iosepine.

 

MOKUNA VI.

 

IO SEPINE MA ITALIA.

 

                Ma ka la 9 o Maraki, 1798, ua mareia o Iosepine me ka alihikaua opio Napoliona. Na ke kaua kuloko i pulumi pau aku i na mea laahia o ua oihana a ke kanaka a me ka ke Akua pu hoi, a ua hooliloia ka oihana laahia o ka mare i mea haahaa, a me he mea la i hoohui wale ia ae no ke kane me ka wahine me he mau hoa nui lawelawe oihana kalepa la, me ka manao a hiki no i ko laua manawa e wehe ai i ka hui, ua pau ae la no. A malalo o ia ano i hele aku ai o Napoliona me Iosepine imua o ka lunakanawai a hooia aku i ko laua hoohuiia ana. He mau wahi hoa'loha kakaikahi wale no ka i ukali aku i laua i poe hoike no ka laua hooia ana imua o ka lunakanawai.
                Aole i pau.

 

                Na ua lono a loaa mai nei ma ka Auseteralia, ua pii ae ka oluolu o ko V.V. Akepoka omaimai a ua puka oia iwaho a hele i ka holoholo kaa.

 

NA KIKE OLELO ANA.

 

A na Mea Elua Iloko o ke Kino Hookahi.

                N.--Ke kono mai nei oe, e ala ae, e eu, e koi aku i ko kakou kulana no ka pahu baota, ua manao anei oe he hana kupono ia no keia manawa?
                H.--Ua manao au he hana kupono ia ma ka aoao e ka lehulehu ke kuekaa mua ana ma na mea e pili ana no ka pono a pono ole paha o ke kumuhana koho balota, i mea e pau ai kona pohihihi a e makaukau ai ka lehulehu no ia kumuhana, mamua ae o ko Amerika hooko ole ana mai. O ka hoomakaukau mua ana o ka lehulehu, o ko alahele ia o ko lakou makaukau. A ke hana ole io mai o Amerika, alaila, ua makaukau ka lehulehu no ka imi ana i ko lakou kuleana oiaio e koiai; noka mea, aia ma ka aoao o ka lehulehu na pohihihi elua; o ko Amerika hana ole mai, owai la ka i ike e hana mai ana oia, a e hana ole mai ana paha? Koe wale iho no ko kakou hoomaopopo ana aku aole o Amerika i haalelel i na hoopii i waihoia aku imua ona, a ma ia ano kakou e kakali aku nei, a ke kakali nei no, a pela i ku mau ai ka huaolelo kukiai o ka manawa "Hoomanawanui," a hala ae ana, a pela aku ana, aole wale o ka aoao o ka lahui ka i pohihihi wale ma keia hana a Amerika, a me he la o ke Aupuni e ku nei no kekahi. Nolaila, o ka hoomakaukau mua ana e ka lehulehu no keia kumuhana, he like ana ia me ka hoomakaukau mua ana o ke kanaka mahiai kula i kana waena a makaukau mua, alaila, kakali aku o ke kuaua e hoea mai ana, alaila, manao ae ke kanaka mahiai i kona pono. Pela au e manao nei, e mahiai mua ka lehulehu maluna o ka mala o ke koho balota e makaukau, alaila, kakali aku i ko Amerika hana ole mai, a ke hiki ia mai ia wa hoela ke ano, alaila, ua ike kela a me keia i kana mea e hana ai, alaila, aole hoi e ulolohi. Aka hoi, i hana mai o Amerika, aohe olelo ana o ia, aka, o ka hana hea la ia e hanaia mai ana, o ke koho balota paha, o ka hana hea aku la.
                N.--O ke koho balota hea la kau e kono nei i ka lehulehu?
                H.--O ke koho balota me ka manao kuokoa o ke kanaka me ka manao lanakila, a hoohaiki ole ia. Aole au e kono aku ana ia oe a i ka lehulehu, ma ka hoohiki kakoo aku a hookaa aku paha i ka auhau, i mea e luna mai ai kou mana koho balota a o ko ka lehulehu paha. No ka mea, ua ike kaua ia mea, he mea i hoowahawaha loa ia e ka lahui a ke ike nei no kaua ia mea a hiki i keia la.
                Ua maopopo ia oe a me a'u, o ka hoohiki ana aku o ka lahui a me ka hookaa ana aku i ka auhau i mea e loaa mai ai ka mana koho balota, o ke alahele no ia o ka ae ana aku e ku a e paa ke Aupuni o ku nei, a malia paha o ke alahele no ia e pau loa ai ka lahui ma ke ano he kipi ia i ke Aupuni e ku nei. Nolaila, aole au i manao e kono aku ia oe ma ia alahele, o ke koho balota kuokoa o ke kanaka me ka hoohiki ole ia ka'u e olelo nei. Malia paha o hana mai o Amerika maluna o ke kahua koho balota, alaila, ua ike ka lehulehu i ka lakou mea e koho ai. Aole anei pela kou manao o ka hoomakaukau e i ola honua? A ke olelo nei au, he kumuhana keia i koi ole ia mai e ka lahui; aka, malia paha ua nanea a palaka pu wale ka lahui no keia mea, a ina e mau ka nanea pu wale pela, a hoea ia o kekahi mau manao hoopuiwa wale, o ka puiwa koke no ia me ka hoomaopopo ole i ka lakou mea e hana ai, kuhihewa i ka puiwa he mea oiaio, a o ka hana kuhihewa aku no ia. Aole anei pela kou manao?
                P.--Pela io no paha, he mea pono io no ke hoomakaukau mau.

 

HOOLAHA A KA LUNAHOOPONOPONO WAIWAI.

                Ua hookohu pono ia ka mea nona ka inoa malalo iho i Lunahooponopono Waiwai no ka Waiwai o S.N.P. HANAIA k, o Honolulu, Oahu, i make. Ma keia, ke hoikeia aku nei ka lohe i na mea a pau ina he mau koi ka lakou ma ka moraki a palapala e ae paha, e hoike koke mai i ka mea nona ka inoa malalo iho nei iloko o na Mahina Eono [6] mai keia la aku, a i ole, e hoole loa ia aku mahope o ia manawa. A o na poe he mau aie ko lakou i ka mea i make, e awiwi lakou i ka hookaa koke mai ma ke keena loio o S.K. KA-NE, ma ke kihi o na Alanui Moi a me Betela, ma ka hale maluna.
MRS. LILIA N. HANAIA,
Lunahooponopono Waiwai o ka Waiwai o S.N.P. Hanaia k, i make.
Honolulu, Okatoba 17, 1896. okt 19--4mw.

 

S.K. PUA,

He Agena no na Waiwai Paa
He Mea huli i na Kuleana Aina i mea e maopopo ai. He Mea Ohi i na Aie i hiki ole ke Ohiia e na Poe no lakou na Aie, a He Mea Hana i na Ano Palapala Pai Kanawai a pau.
KEENA HANA:--Ma ke keena o R.W.Wilikoki, Alanui Konia. aug. 31--1mk.
Robert Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp

 

NO KE KUAI.

                He Hale o ELima Keena, hookahi makahiki o ka paa ana, a me Elua Apana AIna ma Kalia, Waikiki, maka mahele aina o Bruce Waring & Co., e hooliloia aku no i ka mea e makemake mai ana.
                Aia keia wahi ke pili kokoke la i kahi noho o E.S. Boyd.
KUMUKUAI:--$1,000; $500 ma ke kuike, a ma ka Moraki ke koena no ekolu makahiki ma ka 8 pa keneta ukupanee.
                No na mea i koe, e ninau ia BRUCE WARING & CO., a i ole, ia F.J. TESTA, ma ke keena o keia nupepa. sept. 7-mp