Ka Makaainana, Volume VI, Number 18, 2 November 1896 — Page 7
HONOLULU, OAHU, POAKAHI, NOVEMABA 2, 1896. 7
NA AINA MAMAO
Mau Lono Huikau mai kela a me keia Wahi Like Ole.
Waiho i ke Kulana Alakai.
He palapala ka Ela Rosenbere, Kuhina Nui i pau o ka poai Liberala, i kakau aku ia Misita T.E. Elisi, hoa Ahaolelo Liberala, e hoike aku ana ua waiho oia i kona kulana no ia poai kalaiaina, a i ka la 7 o Okatoba i puka loa ae ai keia palapala i ke akea. O ke kumu o kona waiho no ka like ole o kona manao me ko Pohakuhauoli a me kekahi hapanui ae o ia poai ma ka ninau o ka Hikina. Ua hoike o Haku Rosebere nona iho i Sepatemaba 18, e pili ana no ka hoeueu manao ma Enelani no ko Beritania Nui keakea aku ia Tureke, ma ka olelo ana: "No Enelani e keakea aku ia Tureke me ka ae ole o na mana,ua like ia me ke kono ana kau i kekahi kana Europa." Ua hookahua oia i keia me amamuli o ka manao ana aole la o Rusia i hoomaopopo ae i kana i olelo ai iloko o 1895 no ke kue mai i kekahi hana kaokoa ia aku o Tureke e kekahi mana hookahi ae.
E kue ana hoi i nei manao o Haku Rosebere, o ia ke kulana i laweia ae e Pohakuhauoli ma kana haiolelo i noonoo akahele
ai i hoopukaia ma Livapulu i Sepatemaba 24, a ma ia oia i kukala ae ai: "He kuleana pono ko kakou (Beretania Nui) e hooweliweli aku ai ia Tureke me ka hookikina ikaika aku, eia nae, aole loa he kaua ka manao o ia. Ua manao au o ke keehina mua, o ia ke kauoha aku i ko kakou amebasedoa e hoi mai, a e ukaliia aku hoi ia ma ke kipaku ana aku i ka amebasedoa Tureke mai Ladana aku nei."
Ma ka manao o kekahi o na nupepa alakai o Ladana, o ka la 8 ae,--"Ua kohu hana keaka a weliweli no hoi ka hopena o ko Haku Tesebere haule ana. Na ka lima no nana oia i hapai ae i huki iho no iaia ilalo. Hookahi
hopena maopopo i loaa o ko Haku Rosebere noho alakai ana, ua hiki ke oleloia aole loa ana na Liberala e alakai hou ia e kekahi ewe alii o ka aina."
I ko Sa Wiliama Venona Hakota uiia ana aku no nei mea, ua pane aku oia aohe oiaio o ka lono ua waiho aku oia i ka noho alakai ana no ka poai Liberala iloko o ka Hale Makaainana.
Mau Lono Pili ia Tureke.
No Konakinopela, Tureke, ka lono o Okatoba 15 na waiho aku o Kuhina Amerika Terile me ke Aupuni o Tureke he koi poho no $40,000 ma ka aoao o Misasa Lenz, ka makuahine o Frank Lenz, ka mea holo kaa hehi wawae o Pitibuga i pepehiia ai e na poe Kude oiai oia e kaahele ana mai Tureke Asia aku i kahi wa o ka makahiki i hala.
A kahi la ae no hoi i hoouna aku ai na elele o na Mana i kekahi palapala like o ka manao i ke Aupuni o Tureke, e hoole ana i kana koi e loaa aku iaia ke kuleana e huli ai i na moku o na aina e ma na wai o Tureke no na poe Amenia.
Ua hoomaka hou no ka luku weliweli ana i keia wa ma Vana, Amernia, i Okatoba 2, pela ka lono mai Parisa ae i Ladana, Okatoba 20, mai kekahi mea kakau nupepa Amerika. Aohe mau hoakaka i hoikeia ae.
No Beralina, Geremania, hoi ka lono i loaa ae ma Ladana, Okatoba 19, e hoike ana aia he mau kukai olelo ana mawaena o na Mana a me ke Aupuni o Tureke no ka hoopauia ae o kekahi mau wahi o ke kuikahi o ke Dadanele. Aohe no ka he kue o ke Suletana i nei kumuhana, wahi a ka hoikeia. E hooia aku no na Mana i ka hoopakeleia o ke Suletana a me ka mau o kaemepaea Tureke ina e hooko pono ia nei hana me ka oili hou ole ae o na hana hiona hou.
Pauahi Weliweli a Nui o ka Poino.
He ahi nui ka i hoiapu mai nei ia Gaiakuila, he kulanakauhale no Ekuadoa, i na la mua o Okatoba, a ua manao wale ia he hana na kahi poe kolohe. He poe kekahi i hopuhopuia. Lehulehu na ola i poino iloko o ke ahi. O kahi lawelawe oihana kalepa o ia wahi ka i pau nui loa. Ua kohokohoia na poho ma kahi o $54,000,000. Oiai ke ahi e holapu ana, ua nui ko ka lehulehu pioloke ma ka hoao ana e kinai a e lawe aku i na wahi pono, aka, ua lilo ia mau luhi ana i mea ole wale. Nui na poe i hooneleia me na home a aia i kula kahi i hoomoana ai, a ke malama nui ia la malalo o ke kokua ana o ke Aupuni. Ke koi la ka lehulehu me ka piena i ka hoopai koke ia o na poe i hewa. He mea e hoao ana e puhi ahi ka i loaa pono aku i Okatoba 7, a ua ki koke ia oia e na koa a make. O na koa ke kiai o kahi poino a ua maluhia ke ano pioloke.
E Hookuuia ana na Pakaha.
Ua hoikeia ae ma Ladana, Enelani, Okatoba 19, he mea maopopo loa e hookuuia aku ana o Kauka L.S. Kemisona a me na poe e ae i hoopai a hoopaahao pu ia ai me ia no ke komo pakaha ana ma ke Taranavaale. E aeia ana ka ko lakou hookuuia, wahi a ka oleloia, mamuli o kekahi hoike lapaau e olelo ana ua kupono ole ko lakou mau ola, a o ka hoomauia aku o ko lakou hoopaahaoia ana he mea hoopoino loa ia ia lakou.
Lono Kipi o na Paemoku Pilipine.
He lono pili oihana no Manila ka i hoikeia ae ma Maderida, Sepania, i Okatoba 15, e hoike ana na pio loa ke kini me ka Mokupuni o Milidanao, ka lua o na mokupuni nui o ia paemoku.
A no Okatoba 19 hoi ka lono ua lilo pio mai o Basugudua ia Generala Juramila. He 114 na kipi make i haaleleia iho ma ke kahua kaua. O ka poino ma ko na Sepania aoao, he elua koa i make a he 23 i eha.
Pani Oihana o Kama'lii Lobanofa.
He palapala no Parisa, Farani, ka i loaa ae i Ladana a hoopukaia ae o ka nupepa Manawa o ka la 15 nei, e olelo a na na manaoioia malaila o Kouna Voronezofa ka i loaa ae i Ladana a hoopukaia ae e ka nupepa Manawa o ka la 15 nei, e olelo ana ua manaoioia malaila o Kauna Voronezofa Dasekofa (Count Vorontzoff-Daschkoff), Kuhina Rukini o ke Aloalii Imiperiala, ke pani aku ana ma kahi o Kama'lii Lobanofa Rosetoveseki, i make, ma ke kulana Kuhina o ko na Aina e.
Na Hunahuna Laulaha.
Ua hoea ae ma Wasinetona, Amerika Huipuia, o Musetafa Tapesini Be, ke Kuhina Tureke hou.
Ua haawi makana ae ka Moi o Italia ia Peresidena Kalivalana me kekahi mau buke e pili ana me ko Amerika moolelo mua loa.
Aia ka mokukaua Italia Caristoforo Colomobo ma Balatimoa, a ua hoolaunaia aku o Lutanela ke Duke Aberuzi ia Peresidena Kalivalana ma Wasinetona.
Ke pahenehene la o Sake ia Kobeta i hoeha i kekahi kanaka maikai ma kona ola ana. Aohe waiwai i loaa mai iaia i ka hoauhee ana ia Sulivana
Ua hoaoia mai nei e hoopoino i ke kaamahu alii e lawe ana i ka Moi, ka Moiwahine Kahu Aupuni a me na lala e ae o ke aloalii o Sepania, aka, ua loaa o ka boma dainamaita i waihoia ma ke alahao mamua ae o ka hiki ana aku o ke kaa ma ia wahi.
Ua telegarapa ae ka mea kakau o ka nupepa Ahailono kau o ka nupepa Ahailono o Nu Ioka mai Rio de Ianeiro, Berazila, Okatoba 19, aia ka poai pualikaua a me kekahi poe kalaiaina e uhai ana ma ka meheu o ia poai ke hapai la i ka inoa o Kuinitano Bocaiuva (Quintano Bacayuva) i moho no ke kulana Peresidena.
Okatoba 19 i haalele iho ai ke Kama'lii Kalaunu o Napoli a me o Kama'liiwahine o Monotenegero ia Citine, Monotenegero, no Italia me ka ukaliia e ka ohana alii o Monetenegero, no
ka hele ana hoi i ko laua mare. Ua paa na aoao o ke alahele a ke kahua kaamahu me na koa, a ua kiia hoi na pu aloha alii, me ka paiakuli o ka lewa i na leo hooho piha hauole o ka lehulehu.
La Hanau o ka Mikado.
Apopo e piha ai ke 44 o na makahiki o ka Emeperoa o Iapana ma nei ola ana, a e hoomanaoia ana e na makaainana o ke Alii Imiperiala a puni ke ao nei, oia hoi, ma na wahi a pau a lakou e noho ana, a o ka aina oiwi no paha hoi ka oi loa aku. E hoomanaoia ana no me ka hiwahiwa nui ma o kakou nei. He aha ike ke haawiia ana e Kanikela-Kenerala a me Misasa Simimura ma ka Legationa, (keena poo oi h ana a wahi noho o ko Iapana luna kiekie maanei, iuka o Kaalea-lalo, alanui Nuuanu,) i na poe Kepani o kakou nei. Mai na hora 3 a 5, he aha ike no na luna oihana Aupuni, na luna kiekie o na aina e na kanikela, a me na poe koikoi e ae iwaena o ka lehulehu e kipa aku ana e haawi i na hoomaikai ana o ka la i ko ka Mikado hope a elele maanei. E hoolaulea ae ana ka puali puhiohe Aupuni ma na aha ike a pau o ia la.
O ia mau no ke kumukuai kuwaho o ke kopaa e like me ia ma ka helu i hala. He 4 keneta hoi ko ka laiki me na hiohiona o ka pii hou ae.
HOOLAHA A KA LUNAHOOPONOPONO WAIWAI.
Ua hookohu pono ia ka mea nona ka inoa malalo iho i Lunahooponopono no ka Waiwai o PAELE [k] o Waikele, Ewa, Oahu, i make. Ma keia, ke hoikeia aku nei ka lohe i na mea a pau he mau koi ka lakou ma ka moraki a palapala e ae paha, e hoike koke mai i ka mea nona ka inoa malalo iho nei iloko o na Mahina Eono [6] mai keia la aku , a i ole, e hooleia aku ma hope o ia manawa. A o na poe he mau aie ko lakou i ka mea i make e awiwi lakou i ka hookaa koke mai ma ke keena loio o S.K. KA-NE, ma ke kihi o na Alanui Moi a me Betela, ma ka hale maluna.
MRS. KANUI PAELE,
Lunahooponopono Waiwai o ka Waiwai o Paele ike i make.
Honolulu, Okatoba 17, 1896.okt19--1mw
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku, Penei iho kekahi o ia mau buke:
Laieikawai $ 1.00
Gaberiela Lenoa .75
R.W. Wilikoki .50
Hookahuli Aupuni o 1895 .50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia. F.J. TESTA (Hoke),
ok 28-tf 327 Alanui Moi.
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii" Holomua.
Ma ia halekuai o na oiwi e loaa ai ma anoi a me na paihi o na ano hou loa, e laa
Na Kalakoa, Na Keokeo, Na Makalena, Na Kinamu, Na Huluhulu, Na Lihilihi,
Na Kamaa o na Kane, Wahine me Keiki a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunu kunuia no ka hoikeike ana i na mea kuai. M. PALAU, Luna Nui,
ok 14-tf