Ka Makaainana, Volume VI, Number 19, 9 November 1896 — Page 2

Ka Makaainana.

 

HONOLULU, OAHU, POAKAHI, NOVEMABA 9, 1896.

 

MOOKUAUHAU ALII.

 

Na Iwikuamoo o Hawaii Nei Mai Kahiko Mai.

[Mai ka Helu 18.]

KA PILI O NA ALII KIEKIE O KA AINA I KEKAHI ME KEKAHI,

PELA I KE ALIIAIMOKU.

 

KO KA MOIWAHINE KANEMAKE KAPIOLANI—NA KAMA’LIIWAHINE

ELIZABETH KEKAIKUIHALA KEKAANIAU ME RUTH KEELIKOLANI,

A ME KO A. K. PALEKALUHI MA MAU PILI.

 

1.             Ka mea kaulana loa ka Moi Lonoikamakahiki k noho ia Kaikilani w, Aliiwahine o Puna, loaa o Keawehanauikawalu k me Kaihikapumahana w.

2.             Kaihikapumahana noho ia Aila k, loaa o Kawelo-a-Aila k.

3.             Kawelo-a-Aila k noho ia Kauakahieleikaiwi w, loaa o Kuluwahi k, Kahalanamoino k me Holau w.

4.             Kuluwahi k noho ia Po’u w, loaa o Kalawaia k.

5.             Kalawaia k noho ia Umimahihelelima w, loaa o Holau w II.

6.             Holau w II noho ia Jean Jassin Rives, loaa o Theresa Owana, Virginia Kahoa Kaahumanu me John L. Rives.

7.             Theresa Owana Rives mare ia Gideon Laanui, loaa o Elizabeth K. Kekaaniau me Gideon Kailipalaki Laanui.

8.             Gideon Kailipalaki Laanui mare ia Kamaikaopa w, loaa o Therese Owana Kaohelelani Laanui.

9.             Therese Owana Kaohelelani Laanui me Alex. J. Cartwright, Jr., loaa o Daisy Napulahaokalani me Eva Kuwailanimamao Cartwright, a me R. W. Wilikoki, loaa o Roberto Kalanikupuapaikalaninui Keoua me Virginia Kahoa Kaahumau Kaihikapumahana Wilcox.

KO KAPIOLANI MA.

10.         Holau w noho me ka Moi Kekaulike o Maui, loaa o Kekauhiwamoku k, Kaeokulani k me Manuhaaipo w.

11.         Kaeokulani k noho ia Kamakahelei w, Moiwahine o Kauai, loaa o Kaumualii k.

12.         Kaumualii k, Moi o Kauai, noho ia Kapuaamohu w, loaa e Keliiahonui k me Kinoiki w.

13.         Kinoiki w noho me Kuhio k, loaa ka Moiwahine Kanemake Kapiolani, na Kama’liiwahine Virginia Kapooloku Poomaikelani me Kinoiki Kekaulike w

14.         Ke Kama’liiwahine Kinoiki Kekaulike mare ia David Kahalepouli Piikoi, loaa na Kama’liikane David Kawananakoa, Edward Abnel Keliiahonui me Jonah Kuhio Kalanianaole.

KO RUTH KELIIKOLANI.

15.         Kekauhiwamoku k (kaikuaana o Kaeokulani) noho ia Haalou w, loaa o Kauhiwawaeono k me Kuapoiula w.

16.         Kauhiwawaeono k noho ia Hauwahine, loaa o Keoua w, Kanahoahoa k me Kalolena w.

17.         Keoua w noho ia Pauli Kaoleioku, loaa o Pauahi w.

18.         Pauahi w noho ia M. Kekuanaoa, loaa o Ruth Keliikolani.

KO A. K. PALEKALUHI MA.

19.         Manuhaaipo w noho ia Kamehamehanui k, loaa o Kalaniulumoku k.

20.         Kalaniulumoku k noho ia Kualii w, loaa o Loeau w I.

21.         Loeau w I noho ia Koakanu I, loa o Liliha w.

 

Mai keia Liliha w aku, loaa na pua lehulehu, A. K. Palekaluhi, a pela aku.

Nolaila, ma keia kuauhau ae la, he mau hoahanau ponoi loa ka Moiwahine Kanemake Kapiolani no ke Kama’liiwahine Elizabeth K. Kekaaniau ma ke degere eha, pela hoi na Kama’lii David Kawananakoa me J. K. Kalanianaole, he mau hoahanau ponoi loa laua no Theresa Owana Kaohelelani ma ke degere elima, nolaila, he mau keiki o Daisy Napulahaokalani, Eva, Kuwailanimamao, Roberto Kalanikupuapaikalaninui Keoua me Virginia Kahoa Kaahumanu Kaihikapumahana ma ke degere eha na na Kama’lii David Kawananakoa me J. K. Kalanianaole.

Ma keia kuauhau no, he hoahanau ponoi loa no ka Moiwahine Kanemake Kapiolani ma ke degere ekolu, o Pauahi, makuahine o Ruth Keliikolani, me Liliha, makuahine o A. K. Palekaluhi ma.  No ke Kama’liiwahine Elizabeth K. Kekaaniau hoi, he hoahanau ponoi loa keia mau aliiwahine ae la ma ke degere eha.

Ina hoi e kii a ma ka papa kuauhau o Hawaii, hahau mai ia Keawenui k me Kalanikauleleiaiwi w, no ko ka Moiwahine Kanemake Kapiolani me ke Kama’liiwahine Elizabeth K. Kekaaniau, a o ko ke Aliiaimoku Liliuokalani mai ia Keawenui k me Lonomaaikanaka w mai, alaila, e loaa keia mau pili o kekahi i kekahi.  He hoahanau ke Aliiaimoku Liliuokalani no G. Laanui ma ke degere eha, nolaila, he kaikamahine o Elizabeth K. Kekaaniau na ke Aliiaimoku.

Ma ia papa no, he hoahanau ke Aliiaimoku Liliuokalani no ka Moiwahine Kanemake ma ke degere eha.  Ma ke kuauhau iho e komo ana o Lonoikahaupu o Kauai, alaila, he kaikamahine ke Aliiaimoku na ka Moiwahine Kanemake Kapiolani.

Aole i pau.

 

Hina a Nalo ka Hon. S. L. Austin.

 

            Ma Puuloa, Waimea, Hawaii, ma ka hora 10 a. m. o ka Poalima, Okatoba 2, ua haalele mai la ka uhane, ke ola a me ka hanu hope loa o ka Mea Hanohano Stafford L. Austin i keia ao mauleule maloko o ka hale noho o F. Spencer, kahi ona e hookipa mau ia ai e kona hoa’loha.  Oiai hoi oia e makaukau ana no kana huakai no ka malama ana i ke kau kiure o ka Aha Kaapuni ma Kohala, ua loaa oia i kekahi ano maimai ma ka po mamua iho, a maha ae la, me ka manao ua oluolu loa.  Aole ka!

            Ma ia auwina la, ua hoolewaia kona kino wailua mai Waimea aku a hiki i Paauhau, ma Hamakua, a kau ma ka mokumahu Kinau.  Ua ukali aku na Luna Aupuni o Kohala Hema ma ia huakai hoolewa me ka walohia.  Luuluu wale.  Ua ku mua aku nae hoie ka Hawaii i Hilo me ke kino wailua o ka Mea Hanohano J. Nawahi a mahope aku ke Kinau me ko Lunakanawai Aukina kino koou.  A i ka auwina la Poaono ae no i hoolewaia ai ka Lunakanawai i make.

            Ua hoike koke ia aku keia lono kaumaha i kona ohana a me Makai Nui Hikikoki o Hilo, a ua haawi koke ia ke kauoha e hooi@ia kona kino make maluna o ka mokumahu Kinau a hoihoi aku no Hilo, e like me ka hoike mamua ae.  Ua hoouna loa ia mai ka Hope Makai Nui o Kau, oia o W. J. Yates (Ieke) e holo mai i Honolulu nei, ma ke ano i elele nana e hoike @ ka Mana Hooko a me ka Mana Hookolokolo no keia popilikia i loaa i ka Oihana Hookolokolo.

            Ua hanauia o Lunakanawai Aukina ma Bufalo, Nu Ioka, i Aperila, 1825, a i kona mau @ opiopio hoea mai la oia i ka Mokupuni o Hawaii.  I kona hiki ana ma Hilo, ua ko @o koke oia ma ke ano kakau olelo ma loko o kekahi halekuai, a ma ia manawa hookahi no e huli ana ia i ka ike kanawai.  I ka makahiki 1852, ua aei oia e ka Aha Kiekie e lawelawe i ka oihana loio imua o na Aha a pau o Hawaii nei.  A iloko o Mei, 1887, ua hookohuia oia i lunakanawai no ka Aha Hookolokolo Kaapuni o Kohala.  Ma ka makahiki 1891, malalo o ke kanawai @ no ka Aha Hookolokolo e hoonoho ana i hookahi no lunakanawai no na Apana Hookolokolokolo Kaapuni Ekolu a me Eha, ua hookohuia no o Lunakanawai Aukina.  O Jonathan Aukina, kekahi Kuhina o ko na Aina E malalo o ke Aupuni Moi, he hoahanau oia no ka mea i make, a pela pu no hoi me Kokua Lunakanawai Kiekie B. H. Aukina i make, a he mau pokii laua a elua nona.  O kona kaikuahine, oia ka wahine a ka Rev. O. H. Kulika, a ke noho nei oia ma Honolulu nei.

            Mamua hoi o ka lawelawe ana i ka oihana lunakanawai, ua komo nui oia e lawelawe ma ka oihana mahiko, a ua holomua ole nae hoi oia.  Ua noho oia ma ke ano luna nui no ka Hui Kopaa Onomea, a nana no hoi ia mahiko i hapai.

            Ua haalele iho oia he wahine a me eono mau keiki.  I keia wa, aia kana wahine ma Kaleponi no ka ike ana i ka laua poe keikikane.  He hookahi keikikane a me hookahi kaikamahine e noho nei ma Hilo, a na laua i hooponopono na mea e pili ana i ka hoolewa o ka luaui i hala aku ma kela aoao o ka muliwai o ka make.  I ka luaui i hele ai ma kela huakai hana a make ai, ua ukali aku no kana kaikamahine, oia o Misi Aukina, a oia hookahi o ka ohana ka i ike i ka wa o ka makuakane i make ai.  Ua hala aku oia ma ka mokumahu Auseteralia o Okatoba 29 no Kapalakiko, no ka hoike ponoi ana aku i ka makuahine a me na kaikunane i keia popilikia kukonukonu a kaumaha i loaa ia lakou.  Luuluu no!

 

OLELO HOOLAHA.

 

I KA MEA E PILI ANA:—

            Ke hoolahaia aku nei ma keia ua haawi a hoolilo aku ka Hui Kaawai Kina, Helu 5, i pau, i kona mau wawai a me na loaa a pau i ka Ahahui Pake Lokahi ma ke ano kahu no ka pono a me ka pomaikai o ka Halemai Pake e kukuluia aku ana ma Honolulu nei.  Ua aelikeia nae hoi e loaa mau no ka pono i na lala o ka Hui Kaawai Helu 5 i oleloia e lapaauia i na wa a pau a lakou e makemake ai i na lawelawe lapaau ana maloko o ia Halemai me ka uku ole.

 

HUI KAAWAI KINA HELU 5,

AHAHUI PAKE LOKAHI

Hana a ma Honolulu, Okatoba 27, 1896,

nov 2—4mnw.

 

Iloko o ka Aha Kaapuni Apana Hokolokolo Ekahi

o ko Hawaii Paeaina­-Ma ka Hooponopono Waiwai

 

            MA KA HANA O KA WAIWAI O KALAHIKI (k) o Ewa, Oahu, i make kauoha ole.

            No ka mea, ua waihoia mai e Akaneki Kekua [w] ka moopuna, he palapala noi no ka hookohu Lunahooponopono Waiwai no ka waiwai i oleloia, a e hoopukaia aku ia palapala ia Solomon K. Oili, nolaila, ma keia, e hoolahaia aku nei i ka poe a pau i kuleana ma ua waiwai la, o ka POALIMA, NOVEMABA 27, M. H. 1896, ma Aliiolani Hale, Honolulu, hora 10 o ke kakahiaka, o ia kahi a u e ka manawa e hele mai ai lakou a e hoike mai i na kumu ina he kumu ka lakou e ae ole ia ai ke noi.

 

J. A. THOMPSON;

Kakauolelo.

Honoluu Okatoba 26, 1896

nov. 2—3mw

 

HOOLAHA A KA LUNAHOOPONOPONO WAIWAI.

 

            Ua hookohu pono ia ka mea nona ka inoa malalo iho i Lunahooponopono Waiwai no ka Waiwai o S. N. P. HANAIA k, o Honolulu, Oahu, i make.  Ma keia, ke hoikeia aku nei ka lohe i na mea a pau ina he mau koi ka lakou ma ka m@raki a palapala e ae paha, e hoike koke mai i ka mea nona ka inoa malalo iho nei iloko o na Mahina Eono [6] mai keia la aku, a i ole, e ho le loa ia aku mahope o ia manawa.  A o na poe he mau ale ko lakou i ka mea i make, o awiwi lakou i ka hook@a koke mai ma ke keena loio o S. K. KA-NE, ma ke kihi o na Alanui Moi a me Betela, ma ka hale maluna.

 

MRS. LILIA N. HANAIA.

Lunahooponopono Waiwai o ka

Waiwai o S. N. P. Hanaia k. i make.

Honolulu, Okatoba 17, 1896.  okt19—4m@