Ka Makaainana, Volume VI, Number 21, 23 November 1896 — Page 2
2 HONOLULU, OAHU, POAKAHI, NOVEMABA 23, 1896.
LEONE DE BOANE
-
KA MEA OHUMU KIPI O COADOVA
-
MOKUNA I.
KA NAITA O NOREMANA. - NA ULIA
O KA MANAWA
[Mai ka Helu 10.]
[Ke hoomanao mai nei no paha hoi kekahi poe heluhelu lehulehu o KA MAKAAINANA nei no ekolu helu wale no i puka aku ai o keia i moolelo a o ka pio no ia, mamuli o na hana kolohe a apuhi a J.K. Kamakea, ka mea a makou i hoounauna ai o unuhi, a nalowale ai ka buke. Ua puka mua aku ma ka Helu 8, o keia Buke VI., o Augate 24 i hala, a pau ma ka Helu 10 mai o Sepatemaba 7. No na mea e pili ana i ko makou hoao ana e loaa hou mai ka buke ma ka hoihoiia mai ma ke ano maikai a ku i ke ano o ke kanakamakua, aole loa hoi ma ke ano kolohe a kohu kamalii, ua kamaaina ko makou poe heluhelu mamuli o ko makou hoeha ana i ke kolohe, hoopiiia, hookuuia mai me ka bela ole ia mamuli o ka hilinaiia mai, hookolokoloia, ae i ka hewa, hoopaiia mai a ukuia aku, a o ka hopena mai o ia hana, ua hoopii makou i ka mea i kolohe mai ia makou no ka hewa apuka i ka waiwai i haawiia iaia e malama, he waiwai hoi a makou i koho ai i ka waiwai io ma kahi o $19, ko makou kii ponoi ana e noi e hookuuia mai ke kolohe a me ka haawi i manawa nona e hoao ai e imi a loaa ole, waiho okoa i ke kauoha i kekahi halekuai buke a hiki i ka loaa ana mai nei. Poalua, la 10 nei, i loaa mai ai he buke hou mai ka Hope Ilamuku mai. Mahope o na hoopaneenee pinepine ana i ka makou hoopii, ua hoopau wale ia imua o ka Aha Apana i ka Poakolu iho la. Ke manao lana nei makou ua loaa he mea ao iaia, a i na poe e ae no paha hoi e manao ana o hana aku i kahi poe okoa ae e like la me ia ano, a aole paha hoi ua o Kamakea e hoao e hana hou pela ia makou a i kahi poe e aku no paha. L.H]
O kahi o ka moolelo i kamailioia mamua a nalowale ai ka buke i ka mu, o ia kahi e pili ana i na kukai olelo mawaena o ka Naita Leone de Boane a me Gaberiela, kona kanaka ukali a kahu ponoi no hoi, no Luia, ka Mua ui nohea o Codova, a o ke kaikamahine hoi a Baala Tama, ke Kuhina Nui o ka Moi Abedaramana III. Ua paewa ka hoike a ka mea unuhi mua na ka Moi ia kaikamahine. A mai ia wahi mai kakou e hoomau aku ai i ke kamailio ana:
I na hookuikui olelo mau hoi a Gaberiela, ua pane mai ka Naita Leone de Boane: "A pehea?" me ka haka pono aku o kona mau maka i ka helehelena o kona ukali. Aole ka Naita i ano huhu; eia nae, aole no oia i ano hoihoi iki.
"Aka, aole no i pono a maikai," wahi a Gaberiela. "Ua ino loa e like la me ke ino e hiki ana."
"Ua hiki ole ia'u ke ike pehea la ia i ino ai," wahi a Leone, me ke ano hoopalaka a hoomaopopo ole.
"E hoike aku au ia oe i ke ano, "wahi a ka ukali. "Ma kahi mua, aole anei hoi au i pololei ma ka'u i koho wale ai?"
"Pela paha," wahi aku a ka Naita opio.
"Alaila, e hoomaopopo mai oe: Ina no oe e noho ana maanei, a kaalo ae oia - aole loa oe o ike iki aku ana i kona helehelena!" [Ma keia wahi, e hoakaka iki aku ka mea kakau, oiai no hoi ka lahui Mua he poe no ka aoao hoomana Mahomeda, pela no hoi e ike ole ia aku ai na helehelena o na wahine, no ka paa i ka uhiia, mamuli hoi o na kauoha pili hoomanaoia aoao.]
I nei hoonaulu aku hoi a Gaberiela, ua pane mai la no hoi kona haku: "Malia o hapai ae no hoi oia i kona uhimaka."
"Aia hoi paha la," wahi a ka ukali i noke hou aku ai no i kona haku me kekahi hooluliluli ana ae i kona poo, "ua like ia me ka'u i manao wale iho ai. Ua maopopo loa ua komohia ke aloha iloko ou no keia wahine Mua opio nohea. A eia nae, ua ike oe iaia no elua wale no manawa"
"Eia nae," wahi a Leone, me ke ano kulipolipo io e haalipo a e haaloku ana iloko ona, "ua maopopo ia'u ua hoike mai oia i kona helehelena nani a olu waipahe ia'u i ka wa elua ma o kona manao ponoi iho no me ka ui a hookikina ole ia aku e a'u; a ua maopopo pu no hoi ia'u ua nana mai oia maluna o'u me ke ano hoohie a me ka manao pihoihoi. Ma o ka hanohano la o ka'u oihana naita, oia ka wahine oi loa aku o ka ui a'u i ike ai."
"A heaha iho la ia ina pela io no oia," o ka Gaberiela hou ana aku ma ke ano paio i kona haku. "Heaha auanei oia ia oe?"
Aole i pau.
-
Aole o Kauka Makalelana i hoea mai, nolaila, ua hoomoeia kela hoopii iaia a keia kau ae.
MOOKUAUHAU ALII.
-
Na Iwikuamoo o Hawaii Nei
Mai Kahiko Mai.
[Mai ka Helu 20.]
NA KAMEHAMEHA ME KO LAKOU MAU KAPU.
No Kamehameha I. ke kapu wohi, ka mea nona keia mau inoa, ka Napoliona o ka Pakipika, ka Nai Aupuni hoi o Hawaii nei, aohe ona mua aku, aohe hope.
He moopuna kualua ponoi oia na ka Moi Keaweikekahiahiokamoku me ka Moiwahine Kalanikauleleiaiwi o Hawaii. He moopuna ponoi hoi na ka Moi Kalanikeeaumoku, ka mea nona ke kapu alii ahi me ka enaena; pela no hoi no Kekelaokalani. O kona mau makua ponoi, na ka mua ka makuakane a na ka muli ka makuahine, oia hoi, na Kalanikeeaumoku kona makuakane o Kalanikupuapaikalaninui Keoua, kaikaina o ka Moi Kalanieiwakamoku Kalaniopuu, a kaikaina hoi o Kanekoa, a na Kekelaokalani, kaikuahine ponoi loa o Kalanikeeaumoku, o Kekuiapoiwa II, kona makuahine ponoi.
Ua hoike ka moolelo penei: I ka wa i nui ai o Kekuiapoiwa II. a kupono no ka moe kane, ua noonoo nui na makua i kane kupono na ke kama'liiwahine kapu, a ua hooholoia aohe kane kupono e ae o kona hoahanau ponoi, o Kalanikupuapaikalaninui Keoua. I kela wa e noho ana o Kalanikupuapaikalaninui Keoua ma Hana, Mau, mee kana mau wahine alii kiekie, oia o Kalanilehua me Kahikikala. Na aliiwahine keia o Maui no laua na kapu hoolewa i ka la, he kapu ke aka aole e kau maluna o laua, o ia ke kumu o ko Kalanikupuapaikalaninui Keoua hele ana i Maui i kona mau la opio, a o ka hua i loaa, oia kana kama'liikane, Kalokuokamaile. I kona hoi ana i Hawaii a hui me kona hoahanau Kekuiapoiwa II., o ka hua i oaa mai o ia ko Hawaii nei Nai Aupuni pookela Kamehameha I., ka mea nona ke kapu wohi kiekie loa. He mea oiaio, ua oleloia e like me ka mea i hoikeia ma kela helu aku nei o Kahekili ka mea nana ke keiki, aka, ua like ole ka manao o na kakaolelo. He mea oiaio loa nae keia, aole e puka mai ka lio Arabia mailoko mai o kekahi lio kumulau ke ole he kea Arabia, pela no ke kanaka, aole e loaa ke kanaka koa a wiwo ole, ina aole oia no ka welo koa mai, ma ka aoao paha o ka makuakane a makuahine paha. O ke koko he mea hoike mau ia, ina he koko kauwa haahaa, he hana haahaa na hana ke puka mai, a ina he koko alii a koa, ihiihi no na hana e puka mai ai
O keia paha kahi kumu i manao loa ia ai o Kamehameha I. na Kahekili, ka Moi pukonakona o Maui i weli nui ia. Aka nae, he poe pukonakona no ma kela aoao, oia o Kalaniopuu me Kalanikupuapaikalaninui Keoua, ka ka Moi Alapainui mau pukaua. He poe kaua no na keiki e iho a keia K. Keoua, a o Kamehameha I. ke pookela loa. Aka, hookahi mea i maopopo loa na Kalanikupuapaikalaninui Keoua ka wahine alii Kekuiapoiwa, nolaila, nana no ke keiki.
O ka makuahine o na Kamehameha II. me III., o ia ke kama'liiwahine kapu loa, Kalanikauikaalaneo Keopuolani. He Aliiwahine keia i komoia e ka pili o na alii kiekie a pau o Hawaii, Maui, Oahu nei me Kauai.
Aole i pau.
-
DR. SLOGGETT
(KAUKA SOLOGETE),
Kauka Lapaau me Oki
Kokoke ma kahi noho o H.W. Schmidt,
Esq., Alanui Beritania, Manamana.
O kona makaukau loa, aia i na Mai o ka Maka, Pepeiao, Ihu a me ka Puu.
MANAWA NOHO KEENA; Hora 8 a 10 a.m.; 1 a 2 p.m.; 7 a 8 p.m.
Telepona Helu 701.
nov 16-2m
-
OLELO HOOLAHA.
I KA MEA E PILI ANA: -
Ke hoolahaia aku nei ma keia ua haawi a hoolilo aku ka Hui Kaawai Kina, Helu 5, i pau, i kona mau wawai a me na loaa a pau i ka Ahahui Pake Lokahi ma ke ano kahu no ka pono a me ka pomaikai o ka Halemai Pake e kukuluia aku ana ma Honolulu nei. Ua aelikeia nae hoi e loaa mau no ka pono i na lala o ka Hui Kaawai Helu 5 i oleloia e lapaauia i na wa a pau a lakou ana maloko o ia Halemai me ka uku ole.
HUI KAAWAI KINA HELU 5,
AHAHUI PAKE LOKAHI.
Hanaia ma Honolulu, Okatoba 27, 1896.
nov 2-4mnw.
-
Robert Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
-
NO KE KUAI.
He ale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,00; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept 7-mp
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf