Ka Makaainana, Volume VI, Number 21, 23 November 1896 — Page 7
HONOLULU, OAHU, POAKAHI, NOVEMABA 23, 1896. 7
NA AINA MAMAO.
-
Mau Lono Huikau mai kela a me keia Wahi Like Ole.
Na Amazona ma ke Kaua
Ua loheia mai Remedioso, Kuba, o na Amazona (poe wahine) no kekahi e hele pu la iloko o ke kaua ma ka aoao o na kipi, a ua hoikeia ae na hana wiwo ole lehulehu a kekahi puulu o lakou malalo o ke alakai ana a Senorita Perezo. Aia nui lakou maluna o na lio a ke kaahele la ma kekahi mau wahi lehulehu, e ake ana o ka ike aku i na koa Sepania a ko lakou inaina e hookau aku ai. Ua hoopuiwaia ke kulanakauhale o Vueletoao e lakou i ka auwina la Poaono, Okatoba 3, malalo no o ke alakai ana a Senorita Pereze. He umikumamalua poe koa Sepania i loaa aku e ku kiai ana ma na ipuka pa a pau nui i ka lukuia. Ma ia hope iho, ua holo ae lakou ma na alanui o ia wahi, me ke oki ana aku i kekahi poe koa Sepania e ae e luana nui ana mamua iho o kekahi hale inu kope. Ua lehulehu na poe koa Sepania e ae i holo aku no na halekoa, oiai, aohe a lakou mau mea kaua me lakou ia wa.
O keia Senorita Pereze, he wahine opio oia i hoopalauia me kekahi aliikoa o ka aoao kipi i hopu pio la a pepehiia. Na ka make ana o kana mea i aloha ai i kono aku i keia wahine e hele i ke kaua ma ka aoao kipi no ka luku aku hoi i na poe Sepania, i panai hoi no ka hoopai i hookauia maluna o kela aliikoa opio i alohaia.
Ko Enelani Kulana a me Tureke.
Nui na lono i na la i hala ae no na mea e hanaia aku ana e Enelani a me na Mana Europa e ae no ka mea pili i na hana hiena i lawelaweia ma Tureke, eia nae hoi, aohe mau mea hou i loheia mai.
Eia iho nae hoi na olelo a kekahi nupepa alakai o Viena, Auseturia, e pili ana no ka Enelani hoopaakiki e hou ma ke komo ana aku ma ke alakai olowi o ke Dadanele, no ka mea, mawaena o Konakinopela a me ka popilikia i kau pono imua o kona mau maka, aia ko Tureke kanaaho a kalele nui e hilinai ai ma o ke Dadanele la, me na mile he 47 o na puu i lako me na pu-kuniahi, i oi loa aku hoi no ka hoopakele ana iaia mamua o kona mau mokukaua kakaikahi a lako ole me ka makaukau kupono. Ina o keia kowa a iloko o na lima o kekahi Mana ikaika kaua okoa aku, aole loa paha e hiki i na aumokukaua paonioni ke hoohoa aku e hookomo, eia nae, pehea ana la ina e hoohoa io aku ana ko Beritania mau aumokukana e hou a hoea imua pono o Konakinopela, ua hiki ole loa ia ke hoomaopopoia.
Me ka noonoo ole ae hoi no na hoopakele maopopo ole mai na mea hoopahu topido mai, a aohe hoi he hoohuoi ana i koe iho, me ka heluna mahuahua o kona mau moku nunui i lako pono o ke ano hou loa, a me ka makaukau no hoi e malia aku i kahi o lakou ke hoea mai ka wa no ka hana, e hiki ana no ia Enelani, a i kona amebasedoa paha malaila, ke hoopio aku i na kiloo a hoohiolo hoi i na papu a pau ma kela a me keia kapa o ke Dadanele a hoea imua o Konakinopela iloko o kekahi manawa pokole loa, ina nae hoi e hooholoia ana e nou a e hoohoa aku imua.
Venezuela a me Enelani.
Ua pau ka hana a ke komisina Amerika e pili ana no kela paee palena aina mawaena o na aupuni a elua maluna ae, i hookohuia hoi e Peresidena Kalivalana ma o ke kauoha a ka Ahaolelo. E waihoia aku ana paha ka hopena o keia ninau imua o kekahi aha uwao. Ua laulaha ae hoi ka lonoia o ka Moi aku ana paha o Suedena me Norewai ke noiia aku ana e lawelawe ma ke ano lunahoomalu ku i ka wa no kekahi komisina uwao. Nolaila, he mau mahina loihi paha ke hala ae ana mamua ae o ka maopopo loa o ka hopena o keia ninau.
E ano ko ana paha e like me kekahi hoohikilele ana i puoho ae ma Enelani, mamua iki aku nei, no kekahi haiolelo i hoopukaia e Sa Edewada Kalaka, Lunamakaainana no Pilimouta a Loio Kuhina hoi iloko o ko Haku Saulebure Aha Kuhina. mua, a ke noke la na nupepa kakoo Aupuni iaia no ia mau olelo. Ua olelo oia ua manaoio oia e kue ana ka olelo hooholo a ke Komisina Palena Aina Amerika ia Enelani, aole loa hoi no ke kue maoli o ia komisina, aka, ua manaoio oia aole loa e hiki i kekahi aha uwao hoopono a noonoo kapakahi ole ke haawi i ka pono ma ko Enelani aoao mamuli o na olelo ike e loaa a e waihoia aku ana.
Ua hoolahaia ae ma na nupepa o Ladana, mamuli paha hoi o ka loheia mai Amerika Huipuia aku, he elima ana ka ka nui o na lala o kela komisina uwao, a e hai inoa ia ae hoi o na mana hookolokolo o na aupuni a elua, oia hoi, elua e ko Enelani Lunakanawai Nui, a elua no hoi e ko Amerika Huipuia Lunakanawai Nui, a ua ae like ia hoi o ka Moi Oseca II. o Suedena me Norewai ka lima. Ua hooiaio loa ia hoi keia lono mai na wahi mai e hiki ai ke hilinaiia aku. Mamuli hoi o keia lono i huaiia ae ma ka la 11 nei, ua nui na kohokoho ana owai ana la na mea a Haku Rusela e wae ae ai ma ko Beritania Nui aoao. Ua manao a hilinaiia nae hoi keia hopena i loaa i keia ninau i aneane loa ai e ulele hakaka mamua aku nei me ka oluolu a koana pono iho o ka manao e waihoia aku ana imua o kekahi aha uwao, he hopena naauao hoi mawaena o ia mau aupuni alakai o ke ao nei.
Omaimai ko Berazila Peresidena.
He lono uweaolelo ka i loaa aku i ke Kuhina Berazila ma Wasinetona mai ke Kuhina o ko na Aina E ma Rio de Ianeiro, e hoike aku ana mamuli o ke omaimai o Peresidena Purudenete de Moraese, ua oluolu iki ae nae hoi, ua hiki ole oia ke hoomau aku ma ke poo o na hana o ka lehuehu a ua kono aku i ka Hope-Peresidena, Manuela Vitorio Pereira, e auamo ae oia i na hana o ke kulana Peresidena oiai kona wa e omaimai ana.
Haalele na Poe Amenia no Amerika.
O na poe Amenia i komo ai me na mea hoopahu iloko o ka Banako Otomana Imeperiala ma Konakinopela, Tureke, a hoouna nui ia ai mahope i Maseile, Farani, kahi o lakou i hoopaahaoia ai, ua pau nui ae i ka hookuuia i na la hope o Sepatemaba aku nei. Elua nae hoi o ko lakou mau alakai i hoounaia aku i Geneva, Suezelani, a he umikumamalima poe e iho i hookauia ma kekahi mokumahu no Bueno Ea, Berazila.
Ua pae ae ma Nu Ioka, Okatoha 19, he 167 poe Amenia o ke kau ana ma Bulona, Farani, a ua lawe nui ia no Mokupuni Elisi, kahi o lakou i nanaia ai e na luna o ka Papa Ola a me ka Oihana Hoopae Eemoku. Iwaena o ia poe he hookahi ohana o umikumamaono, mai ke kane, ka wahine, na keiki, he makuakane, he makuahine a he pilikana hanauna no ia ohana. Ma ke ano nui o ia poe o ka pae ana aku, he poe komo i na aahu maikai, ano naauao, a me he la no hoi aohe i halawai me na ulia o ko lakou hoopilikiaia ana ma ko lakou aina ponoi. Aia na poe o kekahi mau anaina Karistiano ke komo a ke hoolaulea la iwaena o lakou.
Na Hunahuna Laulaha.
Ua hookohuia o Li Hana Kana, pela ka lono mai Pekina, o Okatoba 26, i Kuhina no ko na Aina E.
He aie lahui hou o $80,000,000 ka i loaa mai nei ia Sepania, a ua pau no na bona i ka lilo i na banako o Sepania.
Okatoba 23 i make ai o Charles F. Crisp, Lunahoomalu i pau o ka Hale o na Lunamakaainana, ma Atalanata, Georgia. No kahi mau malama lehulehu kona ma'i ana.
E ulele hakaka ana o Sake me Fitisimona i Dekemaba 2. Ke pau ka ia hakaka ana, alaila, e holo mai ana o Sake i Honolulu nei e ike ai i na hoa'loha kahiko ona o nei.
He ohumu kipi e kue ana i na luna oihana o Sepania, i loheia mai Maderida i Okatoba 28, ka i loaa ma na Paemoku Lulu, a ua hoounaia aku na pualikoa mai Manila aku i na Paemoku Pilipine.
Ua noi aku ka Moi o Abesinia i ka Pope e uwao ae ma ka paee mawaena o kona Aupuni a me Italia. Eia nae, e hoole ana ke Aupuni o Abesinia i ka hookuu ae i na pio kaua Italia e paaia ia ma kona aoao.
No Kapetaona ka lono o Okatoba 28, ua hoopoinoia a pau i ka wawahiia ma ke kauoha a Kenela Badene Paowela he heluna lehulehu loa o na kauhale hoolulu a hoomoana o na poe Matabele, a ua manaoia e haawi pio laulaha koke aku ana ia poe.
O ke ano komo kipi a pakaha wale a Kauka Kemisona i hoao ai ma ke Taranavaala, o ia paha ke ano pii loa. Ua hooholo ke Aupuni o ke Taranavaala e koi i £1,000,000 poho mai ka Hui Aferika Hema Beritania, i mea hoi e uhi ai i na poino i loaa mamuli o ia huakai paoa.
HELE HOOLUOLU.
O.R.L.Co.
MA NA POAONO A ME NA LA PULE
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb 10-tf
-
AHI
[PAIKII.]
Helu 89, Alanui Nuuanu.
PAIKII - Owau no nei, o ko oukou hookamaaina kahiko loa. E kipa mai, he emi loa na kii o na ano a pau ma ko'u hale paikii.
-
NA LAKO HALE - Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau, Pela, Uluna, Moena, a pela aku. Emi loa.
-
E loaa no kumukuai maikai kupono no ke Keleawe a me ke Kepau.
iun 22-6ml