Ka Makaainana, Volume VI, Number 22, 30 November 1896 — Page 2
2 HONOLULU, OAHU, POAKAHI, NOVEMABA 30, 1896.
LEONE DE BOANE
-
KA MEA OHUMU KIPI O COADOVA
-
MOKUNA I.
KA NAITA O NOREMANA. - NA ULIA
O KA MANAWA.
[Mai ka Helu 21.}
"Ina e aloha ana oia ia'u, e lilo no hoi paha oia i mea nui," wahi aku a ka Naita Leone i kona kanaka, ia Gaberiela.
"Auwe no ka hoi o kuu uhane a me kuu kino, heaha ke ano o keia manao ou?" i pane aku ai o Gaberiela.
"O ka'u i olelo ae nei, o ko'u manao no ia. E pono e ike au ina e panai mai ana oia i ko'u aloha, a, ina pela io mai ana oia -"
"Ae, a ina pela - heaha ia?"
"No keaha - alaila, e hoao hou aku no hoi au e lilo mai oia na'u ponoi nei."
"Ua pupule anei oe, e kuu haku?"
"Aohe no hoi i lihi launa aku, e Gaberiela!"
"Eia nae oe ke kamailio e nei no ka lilo loa mai o Lula ia oe?"
Me he la nae hoi ia laua e kukai kamailio nei, ua lilo keia i mea hoonaulu loa i ka manao o ke kahu no kona haku opio, eia nae, na pane aku no ka Naita, "Pehoa iho la ia."
"Aka, ke olelo aku nei au, aole loa ia he mea maikai. Aole anei oia ka ui opio nohea piha haakei loa o Coadova holookoa nei? - ae, iloko o Sepania a pau, no ka mea, aohe he kaikamahine a ka moi; nolaila, o ke kaikamahine a kona alii poo a kuhina nui hoi ka i kupono e lilo i aliiwahine opio alakai a pookela loa no ka aina. A ua manao anei hoi oe e ae ana o Baala Tama e haawi aku i kana kamalei hookahi wale iho no i kekahi, naita Karistiano?"
Mai awiwi loa mai paha hoi oe pela, e kuu Gaberiela maikai. Ua lilo mai no nae hoi i na naita Karistiano, mamua aku o keia wa a kaua e kamailio nei, na kaikamahine opio a na poe Mua me ka nana ole ae i ka manao a me ka makemake o na makua."
"Ano, ma o Sana Mareko la, e Sa Leone, ina pela iho la ke ano o kou manao ana, e kuhi okoa aku no au ia oe ua pupule maoli oe. Ua manao anei oe, me ka oiaio maopopo loa, e hoao aku e holo malu me ka lede?"
"Penei ko'u manao," i pane aku ai ka naita, me ke kamailio ano kuio loa aku: "ina e panai mai ana ke kaikamahine a Baala Tama i ko'u aloha, e lilo no oia ia'u ina la he mea hiki. Nolaila, ilaila la, ea, e hookuu kaua i na kamailio ana no nei mea."
"E ae mai nae hoi oe ia'u hookahi wahi huaolelo i koe," i koikoi hoopaakiki loa aku ai o Gaberiela me ka hoonaulu mau. "Aole i pau ka'u mau mea i manao ai e kamailio aku. Aole anei hoi i ulu mai iloko ou ka noonoo ana ua hoopalauia aku ka Lede Lula i ke Alii Abu Zama, Kiaaina o Cazala?
"Aole loa ia ho hooia ana ua aloha oia iaia."
"O, e kuu haku, auwe no ka hoi oe, ua kaa aku kou poluluhi pouli a hala loa i ko'u hoomaopopo aku. He mea oiaio loa, ua ume a hoopouliia oe e ka helehelena o keia Mua nohenohea."
"Ua oki, e kuu Gaberiela maikai. Ua lawa ko'u lohe ana i kau mau olelo. Heaha kela i halulu mai la?
"He halulu io no!" wahi a ke kahu, me ke kaulona pono aku hoi o kona mau maka i ka akau. "Ua like no me ka'u i uwalo ai ia oe. Eia ae ka ino ua kokoke loa e kau mai maluna o kaua. E nana aku - ua anoano loa i o kaua nei. Ua nalo aku ka la, a eia ae ka ua ke nee papa mai nei."
Pela io no e like me ka Gaberiela i olelo ai. Ua pukiki mai ka pa ana o ka makani ma ka muliwai me kekahi leo halulu pakalaki ku ole i ka hoihoi; e luli ana o luna o na kumulaau nunui i o a ianei, a aole i u iho, ua hoomaka mai la ka helelei ana o na kulu pakana eloelo. Ua ike a na hoomaopopo o Sa Leone o ka ino i hoopoluluhi ai ma na ala kuhoho kuhau o ka Mauna Morena ahiu kohu waoakua, e lilo ana ia i ike kukonukonu loa, a ua noonoo ae oia no kahi e malu nalu ai. Aole i mamao loa aku mai ka ulu oliva ka pupupu hale o kekahi mea kaomi waina haahaa a akahai, a o kahi keia ana i manao ai e hele aku. O ka mea oiaio maoli nae hoi, o kani malumalu wale no ia e loaa ana maloko mai o hookahi mile me ka hapa, a aole i kaukaulua iho keia noonoo ana ona.
"E loaa ia kaumalumalu ilaila," i pane aku ai oia i kona hoa; "a, ina he mea kupono, e hiki no ia kaua ke noho ilaila a ao ka po."
"Ae," i panai aku ai o Gaberiela, oiai, o ka pono a me ka oluolu o kona haku opio ka mea nui iloko o kona noonoo ana mamua o na mea e ae a pau, "ua manao au e loaa no he wahi ku pono nou e hooluolu ai mai ka hapauea mai. Ua kamaaina loa au iaia."
Aole i pau.
-
Elua pule o ka noke ana o ko ka waoakua poe, a he keu no a ka ole loa a piha olohaka. Ina paha he pilikia io ke kumu i apuka ai he hookahi helu o na poe heluhelu i hookaa, no keaha ka hoi ka mea i hele ole ae ai i na halepai e ae e pai ai. Hookahi no mea maopopo loa, ua apukaia ka lehulehu. A pela mau aku no paha auanei e hanaia ai.
MOOKUAUHAU ALII.
-
Na Iwikuamoo o Hawaii Nei
Mai Kahiko Mai.
[Mai ka Helu 20.]
HOOPOLOLEI - He Kaikuaana o Kalanikupuapaikalaninui Keoua no Kanekoa, aole he kaikaina, oia ka mea pololei.
NA KAMEHAMEHA ME KO LAKOU
MAU KAPU.
Ma ka aoao o kona makuakane, oia o Kiwalao, he Keawe, Lonomaaikanaka w, Kalaninuiamamao, Kamakaimoku w, he Kalaniopuu a he Kalolawahine-a-Honokawailani w.
Ma ka aoao hoi o ka makuahine, oia o Kekuiapoiwa Liliha, he Keawe no, he Kalanikauleleiaiwi w, Kalanikeeaumoku, Kamakaimoku w, Kalanikupuapaikalaninui Keoua, a he Kalolawahine a-Honokawailani. Ma keia e ike koke ia no he Maui o Kalolawahine - a - Honokawailani, kaikuahine ponoi o ka Moi Kahekili o Maui, a o Kamakaimoku, kaikuahine o Heulu, he Oahu, a o na Alii i koe he poe Hawaii, i pili no i na Alii o na mokupuni e ae.
Penei e maopopo ai ka pi'o ana o na makua o keia Aliiwahine kapu loa. Na Kamakaimolu keia keiki ponoi, o Kalaniopuu me Kalanikupuapaikalaninui Keoua. Na Kalolawahine-a-Honoikawailani keia mau keiki ponoi, Kiwalao k me Kekuiapoiwa Lilihanui. Na Kalaniopuu o Kiwalao, a na K. Keoua o K. Lilihanui, a o Kalola ko laua makuahine.
Kiwalao pi'o ia Kekuiapoiwa Lilihanui, loaa o Kalanikauikaalaneo Keopulani, ke Aliiwahine niaupi'o, nona ke kapu-moe a he kapu akua.
Kalanikauikaalaneo Keopuolani nohoia e ka Na'i Aupuni Kamehameha I., mahope o ka hooili kaua hahana a lanakila a ua Na'i Aupuni nei ma Iao, Wailuku, Maui, i ka 1790, a i kapaia ai ia kaua o "Kepaniwai o Iao," mamuli o ke paniia ana o ka wai e na koa make o Kalanikupule, keiki a Kahekili, i auhoe a holo no Oahu nei. Ina i lanakila ole o Kamehameha I. ma keia kaua, ina aohe e loaa o Kalanikauikaalaneo Keopuolani i wahine nana, ka mea ana i kuko nui ai no ke kiekie o ke kapu.
O na pua i loaa mai, oia na keiki kapu ahi a enaena a he kapu akua, o Liholiho (Kamehameha II.), Kauikeaouli (Kamehameha III.) me Harieta Na hienaena.
Kamehameha II. pi'o ia Kamamalunui, aohe pua.
Kamehameha III. mare ia Hakaleleponi Kalama, ua make wale ka laua pua.
Harieta Nahienaena mare ia W.P. Leleiohoku, keiki a Kalaimoku, aohe pua.
Kamehameha I. me Kaheiheimalie, kaikaina o Kaahumanu, loaa o Kamamalunui w me Kinau w.
Kiaau w mare ia Mataio Kekuanaoa, loaa keia, Lot Kamehameha, Victoria Kamamalu ma Alekanedero Liholiho. O keia inoa hope ka i kau i ka Moi Kamehameha IV., a o Lota o Kamehameha V.
Kamehameha IV. mare ia Emma Kaleleonalani, loaa o Ka Haku o Hawaii.
O na Kamehameha IV. me V., he mau kapu no ko laua malalo iki ona Kamehameha II. me III.; aka nae, mai ia Lonoikamakahiki mai no o M. Kekuanaoa i iho lalani mai ai, mai ia Keawehanauikawalu, nolaila, he Alii kiekie no, aka, o ke kau ana o na keiki i ke kalaunu, ua like na kulana.
Ua pau loa aku na Kamehameha i ka make, aohe mea i koe. Aka, ina aohe o Hawaii nei i apo aku i ke Karistiano i alakai no ka noho a kane a wahine ana, alaila, hookahi ponoi Kamehameha i koe, he Alii pua ole nae, e mau ai ka manaolana no na Kamehameha, o ia hoi ke Kama'lii Albert Kekukailimoku Kunuiakea. O Kauikeaouli Kamehameha III. kona makuakane, ua haiia mai ka mea kakau e na haole kupa me na Hawaii i hilinaiia, ua hii maoli o Kamehameha III., me ka olelo ana, o ka'u keiki ponoi keia. E nana i ke kii o Kamehameha III., e ike koke ia auanei kona ouli ma ka ihu me ka papa o ka lehelehe o ke Kama'lii A.K. Kuniakea.
Nolaila, o na Kamehameha a pau he poe Kalanikupuapaikalaninui Keoua lakou a pau, pela no ka Moi Lunalilo O na Moi hope iho nei he poe Kamakaimoku w, a he Kamakaehoikuli, a o ia ko lakou mau pili i na Kamehameha a me ka Moi Lunalilo.
Aole i pau.
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp. feb 3-mp.