Ka Makaainana, Volume VI, Number 22, 30 November 1896 — Page 6
6 HONOLULU, OAHU, POAKAHI, NOVEMABA 30, 1896.
IOSEPINE
-KA-
EMEPERESE PUUWAI OLU
O FARANI
MOKUNA VI.
IOSEPINE MA ITALIA.
[Mai ka Helu 20.]
Oiai o Napoliona e hakilo ana ma Parisa i ke kulana o ke aupuni a me kona hooponoponoia ana, eia o Iosepine ma Milana e hanai nei i ke ahi nana i paila ae i ka manao o na kanaka e hooko aku i na koiikoi ana o na manao haakei o kana kane. Aole o Iosepine manao nui no ka loaa o ka hanohano palena ole i kana kane, aka, ua kuniia ke aloha o kana kane iloko o kona puuwai; a nolaila, ua haaheo pu oia me kana kane iloko o kona kaulana, a e kokua ana hoi iaia e like me ka hiki iaia no ka hoomahuahua mau anu ae i kona kaulana. Ua olino aku la ko Napoliona kaulana a puni ke ao, a ua manao ia, ua loaa ae kona kaulana ma o kona hooikaika ponoi wale ana iho no. Aole lakou i ike o Iosepine ke kokua nui nana ia i hapai. Ma o kona hui ana me Iosepine ua pii oia, a ma kona hookaawale ana ia Iosepine, ua haule oia.
Mahope iho o kekahi mau la, ua huli hou aku la o Iosepine i kana kane i Parisa, a ua kokua oia i kana kane malaila ma ke kipaku ana i na manao kekene o na poe i lili i kona kulana e pii malie ana e kau aku i ka panepoo o ka hanohano a me ke kaulana.
Penei ka Iosepine olelo" "He mea pono no'u e aloha aku ia hai, i alohaia mai ai au e lakou." "A he hookahi wale no manawa a'u e olelo ai me ka hemolele ke makemake nei au," wahi no a Iosepine i kekahi manawa hou ae, "a oia hoi keia, ke makemake nei au e hauoli na mea a pau e hoopuni mai ana ia'u."
I ko Napoliona hoi ana i Parisa, ua hoike ae oia i kona kulana kanakamakua ma kona haaheo ole no ka lanakila nui i loaa iaia ma Italia. Ua pale aku oia i ua ano hoohiwahiwa a pau i hoaoia e papahi mai maluna ona. I kela a me keia la e hoi mai ana kona mau lutanela me na hae i lawe pio ia mai mai na poe Auseturia; aole hoi o ia wale, aka, o na kii pena, kii pohaku, a me na ano hanalima ike e ae no hoi kekahi he lehulehu, a lilo ia i mau mea e hoohauoli mau ai i ko ke kulanakauhale.
Oiai eia no o Napoliona iloko o ka iwakalua-kumamaono o kona mau makahiki, ua kapaia oia o ke kenerala o na kenerala. Ua hoomaopopo oia o kona nana ole ana aku i na manao ohohia o ka lehulehu, o ia ka mea nana e hooi hou ae i ko lakou ohohia, a ua akenui ka lahui e ikemaka iaia, aka, he kakaikahi loa na poe i ike iaia.
I mea e pale ae ai i ko ka lehulehu hoopuni mau ana mai iaia, ua hoi aku la oia i kekahi hale ano kuaaina, kapae ae la i kona aahu koa, a kahiko iho la iaia iho me ka aahu makaainana, a no ia mea, aole i hoomaopopo kalehulehu o Napoliona oia.
O Napoliona kekahi o na kanaka waiwai loa ina oia i makemake, oiai kona wa e kaua ana ma Italia. Ua ohumuhumu aku o Iosepine iaia no kona hoilihune iaia iho, oiai no nae oia e hookupu ana he mau miliona o na miliona ia Farani.
Aka, oiai aia ko Napoliona iini nui loa ma ke kaulana, a i mea e loaa ai o kona iini a hoomauia ai hoi o kona kaulana, ua haawi aku oia i ka pomaikai i loaa ma kona hooikaika ana no ka lehulehu.
Ua lilo ko Napoliona wahi kino nawaliwali a me kona kaeaea ma ka oihana koa i mea na kona mau koa e kaao mau ai ma ko lakou mau ka'e kapuahi a maloko o ka laina. E hoao ana kekahi e hooi ae i kona mahalo i ko lakou alihikaua opio mamua o ko kona hoa, a ua lilo na ala loihi a lakou e maki ai i mea pokole ma ko lakou kaao hele ana no keia wahi keiki, nona na haawina a na lani i hooili mai ai maluna ona a ke ao holookoa e huli aku ai a nana me ke kahaha a me ka mahalo, aole wale hoi no kona wiwo ole, aka, no kona hoohaahaa i na poe kiekie a me na mana aupuni, a hookiekie ae i na poe haahaa a ilihune. Aole i pau.
-
Ua oleloia he $50 no o ka malama ka uku o ke kapena o ka mokumahu Kepani Toio Maru i ku iho nei, he $35 o ka wiliki, a o na luina hoi mai ka $3 a $5. Ole loa no ka hoi.
Ua kolo mai ka mokumahu Keauhou i ka mokumahu Waialeale mai Kauai a hoea mai i keia awa i ke awakea Poaono, la 14 nei. O ka pilikia o ka mokuhope, i hakiia ke kano o kona huila iaia i ku aku ai i Koloa i ka Poakolu aku, a e ole e hoea aku ke Keauhou, loaa ai kokua a hoihoi loa ia mai, o ka u haalele ana aku i ke ahiahi mamua iho.
Mamuli o ka ma'i o kekahi luina o luna o kekahi kiapa Geremania o ke ku koke ana iho nei ianei, na uku pau la oia. Iaia no a pau mai, lawe i ka hoohiki a komo iloko o kekahi pualikoa, a eia ke hana nei iluna o ke kao onio lepo, e noke nei o ka po a me ke ao. He keu no na poe Olelo E a na poe laki i ka hana malalo o keia Aupuni.
MOI KALAKAUA.
-
Na Hana Hoomanao no Kona
La Hanau.
Ma keia la,o ia ka la 16 aku nei, ua poha mai la ka la me kona nani a pau. Ua nele ka la me na hiohiona ua, ke ano mau hoi i ikeia no ia la i na wa i hala ae. Malie a kalae pu ka lewa.
E like no hoi me na mea i hoike mua ia aku no na hana e malamaia ana no ka hoomanao ana ia la, oiai hoi, ua make a ua hala a nalo loa aku ke Alii nona ka la, aole nae hoi i hoopoinaia o kekahi poe iwaena o kona lahui. Ua malama io ia ae no hoi na hoohoihoi moku-liilii o ka Ahahui Moku-liilii Hawaii, no ke alualu ana i na makana i hookaawaleia.
Na Heihei Moku-liilii.
Elua no mau heihei o ka la O ka mua, ua eo ka makana helu ekahi ia Lady L, ka moku o Kama'lii Kalanianaole; makana elua ia Wild Bird (Manu Ahiu), i onaia e Ekela Mahuka, he $10, makana ekolu, lilo ia Healani, i onaia e Kaauwai, he $5, makana eha, i ko Namaielua moku, ua hoihoi kumupaa ia aku no kana uku hookomo.
O ka heihei elua, ua eo ka makana mua o $20 i ko Hugo Kawelo moku, a o ka makana elua iho o $5 i ko Kama'lii Kawananakoa moku.
I ka pau ana o keia mau heihei, ua haule ae na poe a pau a ma kekahi papaaina i hele a luluu ma Honuakaha, a o ka panina loa no hoi ia. Ma ka hoike a ka puuku o keia ahahui, ua holomua lakou, oia hoi, ua ukuia na mea a pau me ke koe wahi aie ole, a he koena iho no koe ma ka waihona.
Na Heihei Au me ka Inoa Moho.
He mau heihei au iho hoi ko ia auwina la, i malamaia malalo o na lawelawe ana a ka Ahahui Hooikaika Kino Honolulu. Ua hoomakaia na hana mahope koke iho o ka hora 4 mai ka hale mai o ka Hui Waapa Makala. Eha ka nui o na heihei. O ka mua, no na oiwi, he 100 iwilei ka pahu. Ehiku poe i komo, no lakou na inoa o Wm. Peter, James McCandless, Mokulehua, Kimokeo, Kalaikini, Moke a me Keliihuluhulu Eo ia Kimokeo iloko o ka manawa o hookahi miniute me 14 sekona
Heihei elua, no kamalii, he 100 iwilei ka pahu. Eha poe i komo, no lakou na inoa o Moke, Keliihuluhulu, Kalaikini a me Arthur Harris Eo i ka inoa hope iloko o hookahi minute me 15 sekona
Heihei ekolu, no na poe a pau, he hapalua mile ka pahu. Eha poe i komo, oia o Puahi, Kimokeo, J.L. Marshall a me J. Mitchell. Eo ia J L Marshall iloko o 16 minute me 10 sekona. O ka heihei oi keia o ka la, no ka mea, ua lilo pu me ka inoa moho no Kou nei. Heihei eha, no kamalii haole wale no. Elima i komo, oia o A. Welsh, A. Harris, C.D. Walker, A.W. McCurrie a me C. Mayne. Ua eo hou no ia Arthur Harris iloko o hookahi minute me 16 sekona.
O ka panina no hoi ia, a hoomaka mai ana e uhi na eheu o ka poeleele. Ua pono no, pela iho la e hoomanao mau ia ai nei la.
-
Rober Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
-
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
-
E loaa no oia ma kona wahi noho ma Koiuiu, Honolulu nei. Telepona Helu 833. feb 17-1mk
-
HOOLAHA HOOKAPU
Ke hoolahaia aku nei ma keia ua hoopaku a papa loa ia ka lawaia ana ma ke kai o na aina o ke Kahua Hanai Holoholona Puuhue [Puuhue Ranch], a pela no hoi ke kiki pu ana mauka o ke kula. O na poe a pau e kue ana, e hoopiiia no ma ke kanawai.
PALMER P. WOODS.
Luna Nui.
Puuhue, Kohala, Hawaii, Okatoba 7, '96.
okt. 12-2ml.
-
OLELO HOOLAHA.
I KA MEA E PILI ANA: -
Ke hoolahaia aku nei ma keia ua haawi a hoolilo aku ka Hui Kaawi Kina, Helu 5, i pau, i kona mau wawai a me na loaa a pau i ka Ahahui Pake lokahi ma ke ano kahu no ka pon oa me ka pomaikai o ka Halemai Pake e kukuluia aku ana ma Honolulu nei. Ua aelikeia nae hoi e loaa mau no ka pono i na lala o ka Hui Kaawai Helu 5 i oleloia e lappauia i na wa a pau a laku e makemake ai i na lawelawe lapaau ana maloko o ia Halemai me ka uku ole.
HUI KAAWAI KINA HELU 5,
AHAHUI PAKE LOKAHI
Hanaia ma Honolulu, Okatoba 27, 1896.
nov 2-4mnw.
-
MORIKAWA,
Ka Oi ma Kana Hana.
Ua nee ae nei kona hale hana mai
Alanui Betela a i ka Halelio o
Akana, Alanui Konia, mauka
o Alanui Hotele.
Amara a Mea Hana Kaa me ke Kapili
Kapuai Hao Lio
Oluolu loa ka uku o ka hana, i hiki ole i na poe e ae ke lihi launa aku.
jun 8-3ml.
-
Hui Papa a Kukulu Hale Oahu.
OAHU LUMBER & BUILDING CO.
Leleo, Alanui Moi, kokoke i ke Kahua o ka Hui Alahao & aina Oahu.
-
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo
aku i na
Puka, Olepelepe, Kui,
Pepa. Pena, Aila,
Na Pono Kamana,
A pela aku, a pela aku
Telepone 53. Pahu Leta.
spl 20-tf