Ka Makaainana, Volume VI, Number 23, 7 December 1896 — Page 2
2 HONOLULU, OAHU, POAKAHI, DEKEMABA 7, 1896.
LEONE DE BOANE
-
KA MEA OHUMU KIPI O COADOVA
-
MOKUNA I.
KA NAITA O NOREMANA. - NA ULIA
O KA MANAWA.
[Mai ka Helu 21.]
"Pela no hoi me a'u," i panai aku ai o Leone, ia laua i hoomaka aku ai e hele me ka auau; "a no ka hooluolu hoi, aohe mea e ae a kekahi naita Noremana e makemake ai o ka loaa ka paha hoi o kahi o kona kino e hooluolu ai, a he malumalu hoi mai ka ua e hiolo makawalu ana."
O kahi pupupu hale e oleloia nei, aia ia malalo pono iho o kekahi papali kiekie e hapai ana i ua kumu kukane a oi loa ae maluna o kapakapa muliwai, a e hihi aku ana hoi ma kona alo he uluwehiwehi hihipea o ka waina hana waina.
Mawaena o keia papali a me ka muliwai, aole no i nui loa aku ke kowa; aole kahi pupupu hale i kaa pono ma keia wahi, eia nae, ua kaa iki ae ma kekahi aoao, iloko o kekahi wahi ano kuono, me he la, i hanaia no nona. O ka hiki ana aku no hoi o ka kakou mau kamahele ma ka puka o ua wahi pupupu akahai la, ua hoopuiwaia ae la hoi laua i ka lohe ana aku i ke pahupahu mai o na kapuai lio ma kahi kokoke loa.
"Ua puiwa kela holoholona," wahi a Gaberiela, mahope iho o kona hoolohe ana no kekahi manawa.
"Me ka oiaio loa, ae," i pane aku ai o Leone. "A - e hoolono - ua oi aku mamua ae o hookahi. Ma o ka ouli hoku la o ko'u hanau pu ia ana mai, aia aku he popilikia Ha! ua lohe aku la anei oe i kela leo uwe? Ano, ma o Sana Petero la, aia he hana imua aku o kaua."
Me ia kamailio no, ua lele ae la ka naita a ke alanui, a aole i emo iho holo paukiki mai la ke kahi lio a huli mai la i kahi kiekiena papali; eia nae, aole i mau ke ano holo ana a ka lio; ua holo mai oia me ka lele kikoi ino imua, e lele ana, e lula ana i o a ianei mai ka holo ana hoi ma ke ala pololei. Elua mea a Leone i ike a hoomaopopo koke aku iaia i kilohi aku ai: He wahine ko luna iho o ke kua o ka lio, a he ihe e paa ana iloko o kona aoao. He mau lele kakaikahi ana mai i koe a ku malie ana ka he me ka huahua o ka waha a me ka nui o ka hanu, a e hiolo makawalu ana hoi ke koko, a haule iho la ilalo o ko ia mau kuli.
Me ka emoole a hakalia ole iho no hoi, ua hiki koke aku ka naita ma ia wahi, a hapai ae la i ka ui e kau ana ma kona kua iloko o kona mau lima mamua ae o ka haule ana mai luna iho o ka noho. Ua puhiia ae ka uhi maka manoanoa o kekahi pa ana a ka makani, a nana pono iho la oia maluna o na helehelena o ka Lede Lula!
No kekahi manawa pokole, iaia e paa a e puili ana i ka ui i kona umauma, ua paua awiwi ae la kona puuwai me ka hikilele, aka, iaia nae hoi i noonoo koke ae ai no kana mau hana ma kona ano naita, ua haalele iho la oia i ka noonoo ana no keia pomaikai i kauhihi wale aku no maluna ona o ka puili ana i kana i lia ai iloko o kona mau lima, a hoihoi aku la oia i ka ui nohea i kahi pupupu hale.
Ua nana iho oia a ike iho la e mau ana no kona noonoo maikai, a i ko ka ui mau maka hoi i owaka ae ai a nana pono ae la i ka naita opio, ua ninau iho oia ina paha ua eha oia. Eia nae, ua hoopokoleia ae ka ka ui pane i ka holo pakalaki ana aku o ke kahi lio okoa iho, a iaia i lohe aku ai i ko pohapoha mai o na kapuai, ua puili ae la kona mau lima i ka a-i o ka naita Noremana, a uwe ae la, me ka leo kanikaniaula, no kona hoopakele aku iaia.
"Ua hopu pio aku lakou i ko'u mau ukali - ua pepehi lakou i kuu lio a make - a ke imi mai nei lakou e hopu pio ia'u!"
"Owai? - owai?" i ninau iho ai ka Naita Leone.
"Na poe powa o ka mauna!" i pane ae ai oia.
Ua hoomaopopo koke ae o Leone i na mea a pau iloko o ka manawa pokole loa a ua eleu a maopopo loa kana mau mea a pau e hana aku ai. O Alecasina hoi, ka hapauea kaomi waina, ua puka ae oia iwaho o kona wahi pupupu hele i ka wa kupono e ike ai i ka haule ana o ko ka ui lio, a iaia i haawi aku ai ka kakou kaeaea i ka malama ana i ka ui i haule mai iloko o ka puili ana a kona mau lima.
"E lawe koke aku iaia a kekahi wahi malumalu," i kuhea aku ai oia, "a e waiho mai na maua e hoomaopopo ae i keia poe. No kou ola, mai noho iho oe maanei, aka, e hele aku!"
Me ka puai leo ole mai ua hapai ae la ka elemakule i ke kaikamahine iloko o kona mau lima a hele awiwi aku la no kona wahi, a o Sa Leone hoi, iaia i huli ae ai, na huli pono ae oia imua o kekahi mea maluna o kekahi lio i kokoke loa mahope ona. O keia mea i hiki aku, he kanaka Araba loihi a ikaika oia i hele a malo pono a kakau ke aa, a na kona nanaina hiena a me kona aahu ahiu i hoike maopopo loa mai i kona ano he powa oia ma ka nana wale ana aku no. A aole no hoi oia i hookahi wale, no ka mea, ma hope koke aku no ona, a o ka hiki like ana aku no hoi, he kokoolua i like loa no ke ano a me ka hiohiona me kona.
"E ku iho malaila!" i kahea aku ai ka powa mua, me ka lele ana mai luna iho o kona lio, a hoomaka aku la e hele no ka hale, kahi a ka hapauea e hoomaka aku ana e komo i ka ipuka me kana ukana makamae.
"I hope!" i kahea leo nui aku ai ka naita Noremana, me ka unuhi ana ae i kana pahikaua mai kona wa-hi ae, a lele aku la a ku imua o ka powa.
Aole i pau.
-
"Ka Noeau o Hawaii."
O keia ae la ka inoa o kekahi halekuai i weheia i ka La Kuokoa nei o kekahi poe wahine Hawaii, ma kekahi keena o ko Kale Aki hale hoolimalima nui hou o ke kukuluia ana iho nei ma Leleo, e kokoke aku ana i Koiuiu. Malaila e kuaiia aku ai na mea Hawaii i hana maiau ia e na lima o na wahine, e laa na ie papale, na peahi, na moena, na eke kakai, na lihilihi, a me na mea e ae he nui a he lehulehu wale, a o ka humuhumu lole no ka hoi kekahi. Eia keia halekuai malalo o ka lawelawe like ana a na Misasa Aana Kekoa me kona pokii, L Aoe Like, a me Meleana Li. Ua loheia mai na uhau nui aa ka me ka ihu o ka puaa, a uaa haupa nui iho no me na hoa i luhi pu ai a lawa pono. O ka makou kalo kalo hoi no lakou, e halawai lakou me na haawina o ka pomaikai me ka holomua.
-
O ka Hui Kalepa Hookuonoono Hawaii, he wai halaka ia no ka muliwai Nile, maluna o laila e haalei ai i na anoano (kenikeni) huita a hala na la he nui, e ohi no i na pomaikai
Ahiahi molehulehu o ka Poaha, Novemaba 12, i make ai o C. Hammer (Kale Hama), haole hana ili, i ke 60 o na makahiki a keu. I kahi auwina la ae no oia i nalo ai iuka o Maemae, malalo o na lawelawe ana a ka Hui Malu Masona.
Ke hoomauia nei no ka hale oihana humuhumu lole o ke tela oopa (H.S. Tregloan) i make ai i na la hope o Augate aku nei e kana wahine. O ke kolu keia o na wahine haole e hoomau nei i na hana a ka lakou mau kane i make, oia o Misasa Tregloan, Misasa Horo, a me Misasa Love.
Ua malama ae o Misita a me Misasa Leleopu he paina luau la hoomanao no ka piha ana o ka makahiki hookahi o ka laua lei i make, mauka o Kunawai i ka la 3 o Novemaba, a ua nui no napoe i hiki ae a haupa iho la i na mea i hoomakaukauia maluna o ka papaaina, a mahope iho ua malamaia he mau lealea me ka maluhia.
Ma ke Kauoha.
-
OLELO HOOLAHA.
-
OIHANA WAIWAI,
HONOLULU, Dekemaba 1, 1896.
Ke hoolahaia aku nei ma keia i na poe a pua e paa ana i na Bona o ke Aupuni Hawaii o na la a me na heluna dala mahope iho, mai a mahope aku o ka piha ana o ka wa hookaa o keia kupona. (coupon-palapala hooia ukupanee) ae, iloko o na malama o Maraki a me Mei o 1897, e pau no ka ukupanee.
E ukuia no ke kumupaa o ua mau bona la ke waihoia ae ma ka la o keia piha ana ae o ke kupona.
KANAWAI O AUGATE 5, 1882.
Papa U, Bona Helu 74, hanaia Sept. 1, 1882, no $5,000
Papa U, Bona Helu 75, hanaia Sept. 1, 1882, no $5,000
Papa U, Bona Helu 76, hanaia Sept 7, 1882, no $5,000.
Papa A, Bona Helu 347, hanaia Sept 1, 1882, no $1,000.
Papa A, Bona Helu 348, hanaia Sept. 1, 1882, no $1,000.
Papa A, Bona Helu 349, hanaia Sept. 1, 1882, no $1,000.
Papa A, Bona Helu 350, hanaia Sept. 1, 1882, no $1,000.
Papa A, Bona Helu 361, hanaia Sept 7, 1882, no $1,000.
KANAWAI O SEPT. 27, 1876.
Papa A, Bona Helu 327, hanaia Nov 1, 1878, no $1,000.
Papa E, Bona Helu 249, hanaia Nov. 9, 1878, no $500.
S.M. DAMON,
Kuhina Waiwai.
Nov. 30-4mnw.
-
KUAI NO 30 LA!
-
E HOOMAKA ANA
Poaono, Nov. 28, '96
-
Hoopau i ka Noho Hui ana.
-
I mea hoi e hiki ai ke uku i kekahi o ko'u mau hoa hui, ua konoia mai au e hoolilo aku i ko'u mau waiwai kalepa a pau loa, ma na kumukuai i emi iho i ke kumulilo.
E nana mai i na kumukuai mahope iho, a e ike lea mai i ka emi a oluolu io
Kukaenalo, 11 i-a no..................$.50
" 1 i-a laula, 15 i-a.......................1.00
Keokeo Manoanoa, 12 i-a............1.00
" Huluhulu, no ka i-a....................10
Huluhulu Moe, akea, keokeo a ano e ae, no ka paa..............80
Huluhulu Moe, akea, manoanoa, no ka paa...........................1.00
Kakini Eleele o na kane, wai paa, no ka paa..........................1.00
3 paa no............................... .25
Kakini Eleele o na kane, ano maikai loa, no ke kakini..........1.85
Kakini Eleele o na wahine, no ka paa.................................. .10
3 paa..................................... .25
Kakini Elele o na wahine.
maoanoa....................... .15
2 paa............................. .25
Kamaa wahine, no ka paa.................... .75
" " ano maikai loa..................................$1.00, 1.25
Kamaa Kane, aoao paa a meli, no ka paa.......................1.25
Kamaa Kane ano maikai loa, o na Makai......................2.50
Kamaa Wahine Pihi o ke ano maikai loa.......................1.25, 1.50
Palule Hana Maikai o na kane, pakahi.......................... .20
Palemai maikai o na kane, pakahi.................................. .20
Palemai maikai o na kane, ano manoanoa..................... .35
Lolewawae Ahinahina no ka paa................................. 1.50
Lolewawae Huluhulu Hana, no ka paa..........................1.50
Kuka Maikai loa o na kane...........................................2.00, 2.50
Papale o na kane, mai ke 40 keneta a pii aku.
Kihei Huluhulu o na wahine, $1.00, $1.50 a pii aku.
O ka wa keia e loaa ai o na waiwai ma na kumukuai oluolu a waihpahe loa. He mea hooluhi ole ka hoikeike ana.
YEE CHAN.
Alanui Nuuanu, mauka o Alanui Moi.
nov. 30.-4mnw.