Ka Makaainana, Volume VI, Number 23, 7 December 1896 — Page 3
HONOLULU, OAHU, POAKAHI, DEKEMABA 7, 1896. 3
LA KUOKOA HAWAII.
-
Na Hana Hoomanao i Malamaia
e ka Ahahui Aloha Aina.
[Mai ka Helu 22.]
"O ka eka mua keia o na hana hoopilikia i komo mai iloko nei o ka aina, mamuli o na alakai hewa ia ana o ke Alii, e ka manao lili o na kumu o ka aoao hoomana i noho mana a alakai iloko o ka aina ia mau la.
"A mawaena o na makahiki 1840 a me 1843, ua ulu hou mai he kumu hoopilikia hou maluna o ke Aupuni, o ia na mea e pili ana i ka waiwai o na kanaka Pelekane ma Hawaii nei. A e hoomalu wale ia no na kanaka Beritania aole e hoopaaia i ka hao, a he mau kumu hoopii lehulehu e ae kekahi e hoopii ana i ke Aupuni. A ua waiho aku na kanaka Pelekane he hoopii i ke Kanikela o ke Aupuni o ka Moiwahine o Beritania Nui.
"A oiai, ua ulu mai he mau kumu hoopilikia hou mai na kanaka mai o Beritania, aia no hoi ke waiho mokaki mai la na koi kuahewahewa a Farani, a ua lilo ia i hana nui na ke Aupuni o ke Alii e noonoo ai, ua kahea aku ka Moi i mau hoakaka nona no keia mau haawe kaumaha i kau iho maluna o ke Aupuni, a ma ka noonooia ana, ua hooholoia, e hoouna ia Timoteo Haalilio, kekahi alii hanau o ka aina, a me Rev. Richards, i mau Elele Aupuni i na aloalii o Beritania a me Farani, no ka hooponopono ana i na hana i hanaia e ko laua mau makaainana me ke Aupuni o ke Alii, a me ka imi ana i kuikahi mau loa no Hawaii.
"Ma ka la 8 o Iulai, M.H. 1842, i haalele iho ai na Elele Aupuni i na kapakai o Hawaii nei, me ka mana piha o na Elele Aupuni mai Hawaii aku nei, a au aku la i na ale ahiu o ka moana, no ka imi ana i ka pono o ka aina.
"A oiai na Elele Alii ma ka laua huakai imi pono, a mamuli hoi o na ulia pakalaki o ka manawa, ma ka la 10 o Feberuari, M.H. 1843, ua komo mai la ka mokukaua Beritania H.B.M.S. Carysfort malalo o kona aliimoku kiekie, Lord George Paulet (Lo Keoki), a e mau ana no na (Lo Keoki), a e mau ana no na kumu hoopaapaa mawaena o ke Aupuni a me ke Kanikela Beritania, nolaila, ua waiho loa ia aku la ua mau kumu hoopii la e na makaainana o Pelekane imua o Lo Keoki, ke oioina e hookoia ai ko lakou mau manao lili Aupuni, a me na mano haakei a uilani o ke kanaka ui, ua lawe ae la oia i na kahiko a pau o ka mana o ke Aupuni o Beritania maluna iho ona, a waiho mai la he mau koi uahoa o ka manao alunu, a hookelakela i kona ma ia; a penei ua mau koi la:
Na Kumu Koi a Lo Keoki.
"1. - E hoonoa koke ia ka hoomalu ana i ka waiwai o Mr. Charlton, e hoihoi i ka aina i laweia o ke Aupuni, a e uku koke aku i kona mau hope, i na poho nui ma na hana kaumaha a me na hewa, o ke Aupuni Hawaii.
"2. - E hoonohoia o Mr. Simpson ma ka oihana Kanikela no Beritania iloko o keia Aupuni, a e aeia oia e lawelawe i kana oihana; a e mihi aku ke Aupuni, no ka hoino i ke Aliiwahine a me kona hope Kanikela, a e ki pu aloha no ka hae Beritania, he 21 pu, alaila, ki pu aloha no ka mokukaua H.B.M.S. Carysfort he 21 pu.
"3 - He kumu hoomalu e malu ai na kanaka Beritania, aole lakou e paa i ka hao, ma keia hope aku, ke ole oia e hoopiiia mai i ka hewa i kapaia, he Feloni ma na kanawai o Beritania.
"'4. - E hana no e like me ka palapala i kakauia e ke Alii, a haawi ia Kapena Jones o ka mokukaua H.B.M.S. Curscoa, e hana no i hookolokolo hou, a me ka pono no ka hoopii ana mai a H. Skinner.
"5- 'E hoomaka koko i ka hana me ka luli ole, e hooponopono ai i na hihia o na haole Beritania, a me na kanaka o ka aina, a me na mea e ae a pau e noho ana maanei. A e hanaia imua o na kiure, he hapa o lakou he poe haole Beritania, i hoonohoia e ke Kanikela.
"'6 - E kamailio maoli o Kamehameha ke 'Lii, me ka hope o ke Kanikela Beritania, a e hoopau koko ia na hihia a me na kumu hoopii a na haole Beritania, i hoopii mai ai i na hewa o ke Aupuni Hawaii, &c &c &c
"'Kakauia maluna o ka mokukaua H.B.M.S. Carysfort, Feberuari 17, 1843.
(Inoa) "'GEORGE PAULET,
"'(Kapena).'
"Ua hoouna pu ia mai keia koi ae la maluna me kekahi palapala pakui, a kukala kaua o ke ano haahaa loa i hanaia e Lo Keoki, penei:
Palapala a Pakui Kukala Kaua a
Lo Keoki.
"'Mokukaua Beritania H.B.M.S. Carysfort. Awakumoku o Honolulu, Feberuari 17, 1843.
"'Aloha oe: -
"'Ke kauoha aku nei au ia oe, me ka mahalo, e hoomakaukauia ana ka mokukaua H.B.M.S. Carysfort, malalo iho o'u, e kaua koke aku i keia Kulanakauhale, ma ka hora 4 o ka la apopo (Satude) ke ae ole ia mai na mea a pau a'u e koi aku nei, maluna o ke Alii o keia Paeaina, a hiki mai ia hora.
"'Me ka mahalo,
"'(Inoa) GEORGE PAULET,
"'(Kapena)'
"Ua lilo keia mau koi puapuahulu a me ka palapala kukala kana a Lo Keoki i mea e houlukuia ai ka manao o ke 'Lii, a mamuli o na noonoo akahele puapuahulu ole o ke Alii, ua kono aku oia i kona mau Alii a me kona mau Kuhina no ka noonoo ana i na hana a Lo Keoki i koi puapuahulu mai ai, a ua hooholo iho la ke Alii e haawi i ka aina, i ole ai e hookaheia ke koko o kona lahuikanaka a hanainoia paha ka aina a me ka waiwai, nolaila, ua hana iho oia he palapala haawi aina penei:
Palapala Haawi Aina a Kauikeaouli
(Kamehameha III).
"'No na hihia i hoopilikiaia mai, a no ko makou manao, aole loa e hiki ke aeia na mea i hoikeia mai, e like me ke ano o ke koiia ana mai, a ka Luna Kiekie a ke Aliiwahine o Beritania, ia makou no na hoopii a na haole Beritania.
"'Nolaila, Owau o Kamehameha III, ke 'Lii Nui o ko Hawaii Paeaina, ke haawi aku nei au, ma keia palapala, i ka Pae aina i kapaia, ko Hawaii Paeaina, ia Rt. Hon. Lord George Paulet, kapena o ko ke 'Liiwahine mokukaua H.B.M.S. Carysfort, ka Luna Kiekie o Victoria, ke Aliiwahine o Beritania Nui a me Irelani, mai keia la aku; ua haawiia keia e like me na Luna i kohoia e hooponopono pu me ke Aupuni o ke Aliiwahine o Beritania. &c, &c, &c.
(Inoa) "'KAMEHAMEHA III.
(Inoa) "'KEKAULUOHI,
"'Kuhine Nui.
"'Honolulu, Feberuari 18, 1843'
"I ka loaa ana aku o ka palapala haawi aina a ke Alii ia Lo Keoki, ua hauoli ae la oia no ka lanakila ana o kona mau manao powa i ke Alii o Hawaii. A ma ka la 25 o ia mahina no, o ia ka la i lele mai ai o Lo Keoki a me kona mau koa, maluna o ka lepo Hawaii, imua o ke alo o ke Alii a me kona Kuhina Nui, Kekauluohi, ua lainaia na koa, a ia wa i hookuu mai ai ke Alii a me kona, Kuhina Nui i ke Aupuni o Hawaii, kona mau Alii, ka lahuikanaka, ka waiwai, a me ka aina holookoa mai o a o, iloko o na lima o Lo Keoki, ma ke ano e noho Panalaau aku malalo o ke Aupuni o ka Moiwahine o Beritania Nui, e like me ka palapala haawi aina a ke Alii, a i ke Alii i waiho aku ai i ke Aupuni iloko o ka lima o Lo Keoki, a i ka hope loa o na hua olelo kaukau a ke Alii, ia wa i ikeia aku ai ka hae Hawaii, e nee malie iho ana mai luna iho o ka pahuhae e ku ana iloko o ka papu ia manawa; ua meha ke anaina aoho leo puai, a o ke anoano eehia ke halii iho ana maluna o ke anaina ia wa, a e hiolo ana hoi na waimaka o na Alii a me na makaainana aloha aina; a iloko o ia mau minute pokole o ke anaina e noho hakanu ana., ua loheia aku la na leo huro o na koa o ka mokukaua Beritania, a ikeia aku la ka hae ulaula o ke Aupuni o Beritania e pii ae ana iluna ma ka pahuhae, a pulelo ae la i ka makani.
Aole i pau.
-
Kakahiaka Poaono, Novemaba 21, mauka o Koleaka, alanui Papu, i hanau mai ai ka wahine a J.N.K. Keola i kekahi "wahine hou" no nei mua aku o ka aina nei.
He kuai hoemi nui ko ka Halekuai Kalahiki ke hiki aku i ka Poakahi, la 30 o Novemaba, a e hoomauia aku ana a hiki i ka po o ka la 24 o Dekemaba, .1896, i na waiwai o kela a me keia ano. Eia ka wa, e hele nui ae, a e ike ia kakou oiwi ponoi iho.
-
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
-
E loaa no oia ma kona wahi noho ma Koiuiu, Honolulu nei. Telepona Helu 833. feb 17-1mk
-
HOOLAHA HOOKAPU
Ke hoolahaia aku nei ma keia ua hoopaku a papa loa ia ka lawaia ana ma ke kai o na aina o ke Kahua Hanai Holoholona Puuhue [Puuhue Ranch], a pela no hoi ke kiki pu ana mauka o ke kula. O na poe a pau e kue ana, e hoopiiia no ma ke kanawai.
PALMER P. WOODS.
Luna Nui.
Puuhue, Kohala, Hawaii, Okatoba 7, '96.
okt. 12-2ml.
-
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,000; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept. 7-mp
-
Hui Papa a Kukulu Hale Oahu.
OAHU LUMBER & BUILDING CO.
Leleo, Alanui Moi, kokoke i ke Kahua o ka Hui Alahao & aina Oahu.
-
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo
aku i na
Puka, Olepelepe, Kui, Pepa. Pena, Aila,
Na Pono Kamana,
A pela aku, a pela aku
Telepone 53. Pahu Leta.
spl 20-tf