Ka Makaainana, Volume VI, Number 23, 7 December 1896 — Page 6
6 HONOLULU, OAHU, POAKAHI, DEKEMABA 7, 1896.
IOSEPINE
-KA-
EMEPERESE PUUWAI OLU
O FARANI.
MOKUNA VI.
I kekahi po, i ka wa o ka puali Italia iloko o ka popilikia, ua luhi a nawaliwali i ke kaua mau ana me ka loaa ole o ka hiamoe, a e hoopuniia ana e na puali Auseturia, ua hoano e iho la o Napoliona iaia iho, a hele aku la e hakilo i kona poe koa kiai puka. Ma keia hele ana ona, ua loaa aku la iaia kekahi wahi koa kiai ua pauhia loa ia i ka hiamoe, mamuli o ka nui o kona malahiluhi. Lalau iho la o Napoliona i kana pu, kau ae la ma kona poohiwi, a ku kiai iho la oia ma kahi o kahi koa hiamoe no hapa lua hora. I ke ala ana ae o na wahi koa nei, a i kona hoomaopopo ana mai i ke kenerala, me he mea la ua kulai hou ia aku oia i hope, no ka nui o kona makau; no ka mea, ua ike no oia o ka make wale no ka hoopai o ia hewa. "E ke hoa," wahi a Napoliona i pane aku ai me ka oluolu, "eia ko pu. Ua hakaka oe me ka ikaika a ua loihi no hoi kahi o ka hele hele ana, nolaila, ua kalaia kou hiamoe ana. Aka, e hoomanao oe, o na sekona pokole loa i makaala ole ia, na lawa ia no ka hoopio ana i ka puali e like me ko kakou nei i keia wa. Laki loa i ko'u ala, ku iho nei au ma kou pani. E malama pono no kahi wa aku."
Ma ke "ala popilikia o ka uwapo o Lodi," ua ku iho la o Napoliona ma ka aoao o kekahi o na pu, ma kahi hahana loa o ke kana, e hoopololei ana me kona mau lima ponoi. Ua lilo i mea hauoli loa i kona mau koa ko lakou ike ana mai i ko lakou kenerala e lawe ana i ke kulana o kahi koa haahaa loa. No ia mea na haawi aku la lakou iaia i inoa kapakapa, o "Kahi Kopala Uuku," a ua lilo keia i inoa punahele i kona puali holookoa. Ua lilo no hoi keia hana a Napoliona i mea e hoolana ai i ka manao o kona mau koa, a ua makaukau mau lakou e waiho aku i ko lakou ola no "Kahi Kopala Uuku."
Mamuli o ke koi a na makaainana, na ae mai la ke aupuni o Parisa, me ka nui no nae o ko lakou lili i keia kenerala opio nona ke kaulana e pii mau ana i na la a pau, e haawiia i hookipa hanohano ia Napoliona ma ka la e kakauinoa ai ke kuikahi a Napoliona i hooikaika ai ma Italia.
Ua hoohiwahiwaia ka halealii o Lukemabuga me na hae o na puali he lehulehu ana i hoopio ai, a no ka manawa mua loa na hele haaheo ae la ke kaeaea o na kahua kaua o Lodi, Akola a me Rivoli ma na alanui o Parisa.
Ua hiki ole i ka mea kakau ke hoakaka piha ae i ka nui o na makaainana ma ia la, a me he mea la ua oi loa aku ko lakou hauoli mawaho o ka mea kupono.
Ma ke kahua hoomoana o kona puali, aia na koa o ke kenerala opio ke himeni la i na himeni a lakou i haku ai no ko lakou alakai opio, e hoike ana ma na hui o ka lakou mau himeni, ua hiki mai ka manawa e kaiehu aku ai i na poe loio e noho ana ma ke poo o ko aupuni, a e hoolilo aku o kahi Kopala Uuku ke noho mana maluna o Farani.
Ma ka haiolelo a Barasa, ka hoa'loha o Iosepine nana i wae ae ia Napoliona e kinai i kela haunaele o Parisa, a o ka mea no hoi nana i hooikaika e hoonohoia oia maluna o ka puali Italia, ua hoomakeaka ae oia ma ka olelo, "Ua haawi pau ka Mea Nana i hana na mea a pau i Kona mana Iaia i hana ai ia Punipake." Ua lilo kela mau wahi olelo i mea na ke anaina e uwa ai a e paipai ai hoi no kekahi mau minute.
Iloko o ko Iosepine noho ana hauoli me kana kane, e kaana pu ana hoi i ka hanohano i papahiia mai maluna o kana kane, aia he hookahi mea nana i hookinaunau iho i ka moekahi ana o ko laua hauoli, a oia no hoi ka lili o ko Napoliona ohana ponoi ia Iosepine. Oiai, ma ko Iosepine ano waipahe, a oluolu i na mea a pau, ua piha mau kona aloalii i na'lii o ka aina, na keiki-alii, na kaukaualii, na aliikoa a me na makaainana no hoi, nolaila, aole no i nele ko Napoliona naau i ka lili no kana wahine, ka mea i kapaia "Ka Hoku o Napoliona"
Ua hoomaopopo ka ohana o Napoliona i kona lili ia Iosepine, nolaila, ua hoopihapiha mau aku lakou iaia me na hakuepa ana he nui, a lilo ia i mea inoino loa i ko Napoliona manao. - I ka nana wale aku no nae o kona mau maka, i na wahi huaolelo uuku no i puka aku mai kona lehelehe, ua lilo ia i mea e kipaku mau ai ia Iosepine iloko o kona keena me na waimaka. Iloko no nae o ko laua kukakuka ana no na minute pokole, na auhee koke aku no ko laua mau manao eneenemi, o ka oi loa aku no nae ko ke kane.
Aole i pau.
Hoalohaloha no J.K. Nawahi.
Mamuli o ko makou aloha nui ia J.K. Nawahi o Kalaniopuu a me kana wahine i aloha nui ia, E.A. Nawahi, a me na keiki i hooneleia i ka makuakane ole; nolaila, ua ili iho maluna o makou na kaumaha a me na luuluu no kona pauaho ana mai i keia ola ana, a nele pu hoi ka lahui i ka puuhonua ole nana e hoomaha mai, e like me ka ka Buke nui i hai mai ai - "he mahu ke ola o ke kanaka i pua ae a nalo aku" i ke ala hoi ole mai o keia ola ana.
Nolaila, o makou, o na lala o ka Hui Aloha Aina o Kapulena, Hamakua, Hawaii, ke komo pu aku nei makou e auamo me ka wahine i hooneleia i ka hoapili ole he kane a me na keiki i hooneleia i ka papa ole. Aloha no oia!
Nolaila, e Misasa E.A. Nawahi a me na keiki makua ole: Welina wale. O kau kane i aloha nui ia, oia ka kakou e auamo pu ai iloko o ke kaumaha a me ka luuluu. Welina wale! Nolaila, ke noi nei makou i ke Akua nui ma ka lani a me ka honua, e hoomama mai i kou mau kaumaha, a me kou luuluu, a pela na keiki makua ole, e hoomama mau mai i ko lakou mau kaumaha, a me ka ohana no a pau, a e uhaiia ka lakou mau leo pule e na pomaikai ma o Iesu la ko kakou Kalahala, i keia ao a i kela ao aku. Amene
O makou iho no me ke aloha nui a mau aku,
{C.P. MAHI OPIO,
{MRS. K. MAHI-OPIO,
{J. MAHI-OPIO,
{P. MAHI-OPIO,
{P. PELEKAPU,
{C.H. MAHI,
Komite {J. MAHI,
{W. WAIKAKAI,
{W. MAKAKUAPUU,
{P. PA,
{T. KANAMU,
{MRS. KANAMU,
{MRS. KAUHANE,
{MRS. KANUKU,
{MRS. POUPOU,
{T. KALALUHI,
{T. KAOPUA,
{MRS. KAOPUA,
{MRS. KAOLUOLO.
-
O ka inoa o kela mea i haule ai mai luna iho o ka mokumahu Likelike ma ke alahukimoku, i hoikeia aku ma kekahi helu i hala, o Joe Pai
Piha hauoli kamalii lawe a ka lewa o ka nupepa Hoku i ka Poaha, Novemaba 26. He paina ma ka hale puhi palaoa o Love, a pau ia, kau ma kekahi basa nui a holo kaapuni ma na alanui me ka uwauwa a me na ohe puhi hanakuli, a holo loa no waho o ke kahua kinipopo e hauoli ai. Huli hoi nui mai no hoi ua poeleele.
He keiki uuku na kekahi mau oiwi o uka o Kalihi waena ka i wela i ke ahi o kapuahi i kakahiaka Poalima, Novemaba 20 Iloko o ka o ka nui o ka leo uwe o ke keiki, aohe i hoomaopopo koke ia aia a ua nui loa ka wela a pau kekahi aoao. Ua laweia no ka Halemai Moiwahine a make i kahi la ae, a hoihoiia no iuka e kanu ai ma ka ilina ohana o Pedero, oiai, na kana kaikamahine ia keiki.
S.K. PUA,
He Agena no na Waiwai Paa
He Mea huli i na Kuleana Aina i mea e maopopo ai;
He Mea Ohi i na Aie i hiki ole ke Ohiia e na Poe no lakou na Aie, a
He Mea Hana i na Ano Palapala P Kanawai a pau
KEENA HANA: - Ma ke keena o R.W. Wilikoki, Alanui Konia. aug. 31-1mk.
-
Rober Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
-
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R.W. Wilikoki - - - - 50
Hookahuli Aupuni o 1895 - 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F.J. TEST (Hoke),
ok 28-tf 327 Alanui Moi.
-
DR. SLOGGETT
(KAUKA SOLOGETE),
Kauka Lapaau me Oki
Kokoke ma kahi noho o H.W. Schmidt, Esq.,
Alanui Beritania, Manamana.
O kona makaukau loa, aia i na Mai o ka Maka, Pepeiao. Ihu a me ka Puu.
MANAWA NOHO KEENA: Hora 8 a 10 a.m.; 1 a 2 p.m.; 7 a 8 p.m.
Telepone Helu 701.
nov 16-2m
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
AHI
[PAIKII.]
Helu 89, Alanui Nuuanu.
PAIKII - Owau no nei, o ko oukou hookamaaina kahiko loa. E kipa mai, he emi loa na kii o na ano a pau ma ko'u hale paikii.
-
NA LAKO HALE - Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau, Pela, Uluna, Moena, a pela aku. Emi loa.
-
E loaa no kumukuai maikai kupono no ke Keleawe a me ke Kepau.
iun 22-6ml
-
HELE HOOLUOLU.
O.R.L.Co.
MA NA POAONO A ME NA LA PULE
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb 10-tf