Ka Makaainana, Volume VI, Number 23, 7 December 1896 — Page 7
HONOLULU, OAHU, POAKAHI, DEKEMABA 7, 1896. 7
HUAKAI NO MOLOKAI.
-
Ka Ike Ana i na Maka o Kuu
Aloha.
E ka LUNAHOOPONOPONO
Mamuli o ka lokomaikai o ka Peresidena o ka Papa Ola, Wiliama O. Kamika, ua loaa mai la ia'u ka aeia e holo no Kalaupapa Molokai; ma ka Poaono, Novemaba 21. I ka hiki ana i ka hora 9 a oi, ua hemo aku la na li uwaina o ka Iwalani mai ka uwapo mai.
Ia makou iwaho o ka nuku, ua helu ae la au i ka nui o na poe e hele nei ma keia huakai aumoana no Molokai, he kanaha ka nui ke huiia na kane me na wahine, a me na haole. He malie maikai ka moana ma keia huakai moana, a e konane maikai iho ana ke aliiwahine o ka po maluna o ka ili moana, ana ke kololio o ka holo o ka Iwalani i loaa ai he aniani makani iluna o na poe o ka uneki o ka moku.
Hora 2 a.m. a oi, kaale ae la makou ma ka Laa-o-ka Ilio, a nana wale aku la no na poe o ka moku i kahi o ka moku kalepa Wilikoki e moelolii ana i ka hohonu malalo iho o ka pali kuhoho.
Hora 4 wanaao, kaalo ae la makou mawaho o ke kaikuono o Moomomi, a o ke aa hauliuli wale no ke ikeia aku me na hu'akai e kuakea mai ana i na lae pohaku.
Hora 5, kawewe aku la ke kaulahao me ka anaka o ka Iwalani i ke awa o Kalaupapa, nana aku la makou ia uka, e hulili mai ana na kukui aole i kanamai i ke awakumoku, e ae hone mai ana ka leo o na ohe keleawe a ko laila poe keiki maamaa ma ia hana. Me he la, ma ko'u hoomaopopo aku, aole no paha la kou i moe iki i pa hauoli o lakou a hiki wale no i ko lakou loaa ana aku ia makou e makaala mai ana no, a ua piha lealea ia no paha hoi lakou no ka ike malihini ana. Ae, oiaio no.
Hora 7, ua lele aku la makou no ka uwapo, ua huikau iho la me na hoa'loha iloko o ka ehaeha ia manawa, a he wa hoi ia o na waimaka a me na leo o ka walohia e kupinai ana i ka lewa.
Auwe i aole e hiki ana i kekahi mea i piha i ka makona e ku ana ma ia wahi ke hoopaakiki hou aku i kona naau me he pohaku la; e kono koke ia kona naau e weleaia i ka ehaeha, a e hoohuai, mai kona mau maka i na waimaka o ke aloha.
Hora 8, akahi no a nee ae na mea a pau mai ka uwapo a i ke kahua o na halemai o Kalaupapa, na home a me na kauhale a pau. He nui na poe me na kino maikai, a he nui no hoi na poe i oi aku ka ehaeha.
Hora 10, ua holo aku la makou no Kalawao, a ua makaikai mama aku la makou ma ia mau wahi mai na kauhale, ka home o ia wahi, a me na wahi e ae. He maikai no kekahi poe o ia wahi, a o ka hapanui nae he mea no e ehaeha ai ka naau i ke aloha. Haawi aku la i ke aloha i ko laila poe.
Hora 12 a oi, hiki hou i Kalaupapa, a ua hoholaia mai la he papaaiana o na poe ma'i. Ua haule iho la kekahi poe e hoonuu i na puaa hoolua, na bipi hoolua, na moa puholo, na i'a lawalu, na uwa'u noho-lua, na ipu-haole, na puna ko maioheohe, ka maia palakapule, a me na mea-ai he nui i hoolakoia mai, me ka ukali pu ia mai e ka "wai o Makapala."
E Mr. Lunahooponopono, ua aie nui ia au i kou lokomaikai mamuli o keia hoike a'u i kou poe heluhelu. Ua halawai pu aku la au ma keia huakai me ka'u wahine ma ia kahua o ka ehaeha, ua hookaawaleia aku oia mai a'u aku no ka manawa e aneane hookahi makahiki, mamuli o ka hoohuoiia ana ua loaa ia oia i ka "ma'i hookaawale," aka, ia'u i halawai aku ai me ia, oia mau no oia, mai ko'u haalele ana aku a hiki i ko'u hui hou ana me ia ma keia huakai. Ua loli ae kona kulana ola kino mai ka omali a i ke ola kino punolunolu heluhelu, a o kahi hoailona kahiko i laweia aku ai, ua loli ae a i ke ola loa.
Ua uwe helu mai oia i kona mau hoa o ka Ua Kukalahale nei, na hoa pana pu me ia o ka huikau o ke kaona nei. Ae, i aloha mai o Sela Ringer i kona mau hoa o Honolulu nei, mai ka ua kiowao hoopulu lehua o Luakaha a i ke kaikamahine haha papai o Kapuukolo, ma ke keiki kahanalu o Ulakua, a mai Moanalua a hoea i ka pua lilia o Kapiolani Paka, ua uwe mai oia ia oukou a me ka oukou wahi e holoholo ai.
Ua uwe mai o Misasa Sela Ringer i kana mau aikane, na makamaka, a me na hoa'loha, mai ka la puka i Haehae a ka welona a ka la i ka mokupuni Kihapai o lalo. Ua haawi nui mai oia i kona walohia nui ia oukou a pau me ke koe ole hookahi. "O ka nunu," wahi a Solomona ke alii, "nana no au, a na'u hoi oia," aka, ua komo lima ikaika mai la ke kanawai pepehikanaka a hookaawa e ae la ia maua mai ko maua hooko ana i ka hapa hope o ka maua hoohiki, "e malama i ka wa ma'i a ma'i ole." A pela oia i kaawale ai mai ko maua pili ana.
Hora 4, ua haawi hou ia ae la na mapuna waimaka a me na leo kupinai aloha hope loa a makou me ke uka poe, he wa keia i hooi loa ia aku ai ka ehaeha mawaena o ka makua a me ke keiki, ke kane me ka wahine ka hoa'loha me ka makamaka, oiai, e kaawale ana. Iloko o na kuwo leo ana, ua koani hainaka a me na peahi lima ana, ua lawe aku la ka waapa ia makou no ka moku.
Hora 4:30, ua huli hoi mai la makou no Honolulu nei, oiai no nae ko uka a koali mai ana i na apana lole keokeo iluna o na laau. Noho iho la au mahope o ka moku a huli aku la e nana i hope i kuu aloha. Puka mai la ka mahina aumoe, a o ia ka'u i hikilele ai, me he la, o kuu aloha ia, a puana ae la au i ke mele:
"Aia puka mai Mahealani,
Hiki pu mai no me kuu aloha."
Me ka luuluu a me ke kaumaha o ka manao no ka wahine ia hoi ana mai. Hora 9 o ka po La Pule, ku hou ana i Honolulu nei.
Me ke aloha nui ia oe, e Mr. Lunahooponopono, a me kou mau poe paahana, a me ko'u mahalo pu hoi ia Peresidena W.O. Kamika o ka Papa Ola, no kona ae oluolu ana mai ia'u e hele.
WILLIE RINGER,
Kekahi o kou mea lawe pepa.
Honolulu, Novemaba 27, 1896.
-
DR. C.A. PETERSON,
(KAUKA PITASONA),
Ua Nee Ae Oia a ka Helu 28,
ALANUI EMA.
NA HORA KEENA: -8-10A.M.; 2-4 a me
7-8P.M.
nov. 30 TELEPONE 752. 3ml
-
OLELO HOOLAHA A KA LUNAHOOPONOPONO WAIWAI.
Ua hookohu pono ia ka mea no la ka inoa malalo iho i Lunahooponopono Waiwai no ka waiwai o PILIPO KAKIMILO k., o Honolulu, Oahu, i make.
Ma keia ke hoikeia aku nei ka lohe i na mea a pau he mau koi ka lakou ma ka Moraki a Palapala e ae paha, e hoike koke mai i ka mea nona ka inoa malalo iho nei iloko o eono mahina mai keia la aku, a i ole, e hoole loa ia kau mahope o ia manawa. A o na mea a pau he mau aie ko lakou i ka mea i make, e awiwi lakou i ka hookaa koke mai, ma ke Keena Loio o S.K. Ka-ne, ma ke kihi o na alanui Moi a me Betela, ma ka hale maluna.
S.K. AKI,
Lunahooponopono Waiwai o Pilipo
Kakimilo k., i make.
Honolulu, Iulai 18, 1896.
iul 20-4mw.
-
HOOLAHA A KA LUNAHOOPONOPONO WAIWAI.
Ua hookohu pono ia mai ka mea nona ka inoa malalo iho i Lunahooponopono Waiwai me ka Palapala Kauoha no ka Waiwai o MA-O [w] o Honolulu, Oahu, i make.
Ma keia ke hoikeia aku nei ka lohe i na mea a pua he mau koi ka lakou ma ka Moraki a Palapala e ae paha, e hoike koke mai i ka mea nona ka inoa malalo iho nei iloko eono mahina mai keia la aku, a i ole, e hoole loa ia aku mahope o ia manawa. A o na poe a pau he mau aie ko lakou i ka mea i make, e awiwi lakou i ka hookaa koke mai ma ke Keena Loio o S.K. Ka-ne, ma ke kihi o na alanui Moi a me Betela, ma ka hale maluna.
KELIIHANANUI,
Lunahooponopono Waiwai me ka Palapala Kauoha o ka Waiwai o Ma-o [w], i make.
Honolulu, Iulai 14, 1896.
iul 20-4mnw.
HOOLAHA A KA LUNAHOOPONOPONO WAIWAI.
Ua hookohu pono ia ka mea nona ka inoa malalo iho i Lunahooponopono no ka Waiwai o PAELE [k] o Waikele, Ewa, Oahu, i maka. Ma keia, ke hoikeia aku nei ka lohe i na mea a pau he mau koi ka lakou ma ka moraki a palapala e ae paha, e hoike koke mai i ka mea nona ka inoa malalo iho nei iloko o na mahina eono (6) mai keia la aku, a i ole, e hooleia aku mahope o ia manawa. A o na poe he mau aie ko lakou i ka mea i make, e awiwi lakou i ka hookaa koke mai ma ke Keena Loio o S.K. Ka-ne, ma ke kihi o na alanui Moi a me Betela, ma ka hale maluna.
MRS. KANUI PAELE,
Lunahooponopono Waiwai o ka Waiwai o Paele [k], i make.
Honolulu, Okatoba 17, 1896.
okt 19-4mnw.
-
MORIKAWA,
Ka Oi ma Kana Hana.
Ua nee ae nei kona hale hana mai
Alanui Betela a i ka Halelio o
Akana, Alanui Konia, mauka
o Alanui Hotele.
Amara a Mea Hana Kaa me ke Kapili
Kapuai Hao Lio
Oluolu loa ka uku o ka hana, i hiki ole i na poe e ae ke lihi launa aku.
jun 8-3ml.
-
Kuai Hoemi Nui
-
Elua Halekuai i ka Wa Hookahi.
-
Kwong Sing Loy
a me Sing Loy
-
E hoomaka ana i keia la 30 o Novemaba, 1896, pela no e hoomauia aku ai no Hookahi Mahine.
-
Na MUUMUU, Na PALEKOKI,
a me na Pono e ae o na Wahine, i hana maiau ia, emi a emi loa!
Na LIHILIHI, Na PAPALE a me
Na KAMAA o na Wahine,
aohe emi aku a koe mai!
Na PAA LOLE PIHA, na PAPALE
a me na KAMAA o na Kane,
oluolu loa Kumukuai!
Na PAA LOLE o na KEIKIKANE
a me na KAIKAMAHINE,
he Makepono Loa! He keu aku a ka olu
waipahe'a ka launa ole mai.
O na Waiwai no a pau loa ke kuai hoemi loa ia kau ana, a he mau Waiwai hou loa wale mai nei no ka hapanui.
E Hoomano i na Halekuai a Elua.
nov. 30-5mnw.
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp. feb 3-mp