Ka Makaainana, Volume VI, Number 23, 7 December 1896 — Page 8
8 HONOLULU, OAHU, POAKAHI, DEKEMABA 7, 1896.
(Mai ka aoao ekahi mai)
-
hoi aku na Elele a hooikaika iwaena o ko lakou mau Ahahui e lawe i ka nupepa. "Ke Aloha Aina." Hooholoia.
Waiho mai o P Kauimakaole he olelo hooholo, e lilo na Elele a pau i mau luna no ka nupepa "Ke Aloha Aina." Hooholoia.
Ma ke noi ua heluheluia ka moolelo o ka halawai, a aponoia me na hooponopono.
Ma ke noi ua hooholoia e ku ka Aha iluna i ka wa e komo mai ai na Luna Nui o ka Ahahui Aloha Aina o na Wahine. Komo mai o Misasa Laura Mahelona, he komite mai ka Ahahui mai o na Wahine, a hoike mai, penei.
Ua noho lakou a noonoo a hooholo e kakoo i ka na kane hana no ka pono o ke Alii. Ua hoouna mai ka Peresidena ia lakou e hoike mai i ke aloha i na Elele a pau a e hoike pu aku i na Ahahui i ko lakou aloha, a hoike pu mai oia he olelo kuahaua haipule, a hookeai no ka lahui i kela Poaha a me keia Poaha.
Noi mai o L W P Kanealii e laweia ka hoike a ke komite o na wahine. Hooholoia.
Haawi ka Peresidena i ka mahalo o na Elele i ke komite o na wahine.
Hoolauna ka Peresidena i na Luna Nui o ka Ahahui o na kane.
Haawi ka Peresidena i ka mahalo o ka Aha Elelo i ka Peresidena Nui o na Ahahui Wahine no kona komo ana mai e hana pu.
Noi mai o E Kekoa e meleia ke mele lahui "Hawaii Ponoi" mamua o ka hookuu ana. Meleia ke mele a pule o J Kamakele.
Noi mai o L W P Kanealii e hookuuia keia Aha, a ua hooholoia.
Hookuu loa ia ka Aha, a noho i ka wa e kahea hou ia aku ai.
ENOCH JONHSON.
Kakauolelo Nui.
-
He Wahaolelo Hou.
E like me na mea i wawa wale ia, ua oili io mai no he nupepa puka la hou mai ka halepai o Ka Leo o ka Lahui, malalo o ka inoa "Ke Aloha Aina Oiaio," a malalo hoi o ka R.W. Wilikoki noho lunahooponopono a puuku ana. I ke ahiahi molehulehu o ka Poalua, la 1 nei, i puka mai ai. Ua loheia ka he puka pule ka kekahi a puka mai i keia la.
Ma ka helu mua no o ka malihili, ua hoikeia ae o kekahi o kona kahua, o ia ke "kakoo ana hoi i Aupuni Moi o ka lalani o na Alii Kiekie o Hawaii nei ka Moi, a o Hawaii nei no na Hawaii oiwi" Ea, kehakeha no ka hoi ua hoa nei i luna lilo loa. Ua lohe mai nae hoi makou ua papaia aku hoi oia e ke Aupuni e ku nei aole e hoeueu ia ano manao iwaena o ka lahui.
He lono no hoi ia e lawe hele ia nei ua lilo ka ia R.W. Wilikoki na pono o ia halepai. A ua lawe pololei ia mai no hoi he hoole ia makou aohe oiaio o ia lono, aka, aia no malalo o ka hoolimalima. I keia nae hoi, pio a mauliawa loa paha hoi ka ohakulai a kamalii o ka waoakua.
-
Poalima iho ka mokumahu Auseteralia.
KELA A ME KEIA.
-
E nana ae i na hoolaha hou.
E nana ae i ka hoolaha a ka Hui Kalepa Hookuonoono Hawaii.
Aoha a makou Mookuauhau Alii i keia helu, a pela no hoi me na Aina Mamao.
Poaha iho ka mokumahu Mariposa mai ka Hema mai no ka Ipuka Gula.
Nui ko na Pukiki hauoli ma ko lakou la kulaia iho nei i ka Poalua iho la..
Poaha nei i hooliloia ai na laikini awa no nei makahiki ae ma ke kuai kudala, ma ke alo iho o Iolani Hale.
Ua hookohuia o Keo Kaaka i hope no ke Aliiaimoku, a o ka hoomaopopo ae no ka pono i ka hoolaha ma nei helu.
Hui koni ka aaki o ke anu o keia mau po iho la. O ka po Poaha nei paha hoi ka oi, no ka mea, ke hele la na maka a liu a mania.
Ua lohe mai makou e mare ana ka o W Chunghoon i wahine hou i ka po Poaha iho, ia Misi Alo Akina o Kohala, Hawaii.
He omaimai ano kupilikii loa ko Kuhina Amerika Wilisi i wai iho nei, a ua manaolanaia nae hoi e pohola a e oluolu loa ae ana no oia.
Ina aole i nei la, alaila, i keia mau la iho i manaoia ai ke ku mai o ka mokumahu hou o ka Hui M. kumahu Pili-Aina. Ua oleloia o Mauna Loa ana ka kona inoa.
E loaa no na lole silika eleele a keokeo ma na halekuai elua o Sini Loi no ke kumukuai emi loa i ike ole ia mamua, mai ka hapaha o ka iwilei a pii aku. O ka wa pono o keia no na wahine.
Aohe makemake o Ailuene Buki i ke kulana hope-peresidena ekolu no ka Ahahui Aloha Aina, oiai, he hanohano hakahaka wale iho no ka. Ua hoolaha oia i kona hoole ma ka ohua palemo alaula.
Ua hanau mai na ka wahine a Manuela E. Siliva, ma ko laua wahi noho ma Aala, he keikikane nui nupunepu i kakahika o nehinei. I nei keiki iho la, pai- pai na keiki a laua, he hookahi kauna pakahi.
Iwaho o Kaalawai i nehinei, he paina ka i haawiia ae e Kami Kuaika a me kana wahine i na hoa'loha lehulehu, he hoomanao no ka piha pono ana o na makahiki he 18 o ka laua kaikamahine kamakahi i ka Poaono nei.
He ahahui kalaiaina hou ka R.W. Wilikoki i hoala ae malalo o ka inoa o ka Ahahui Pookela, a i ole ia, o ka Ahahui Aloha Aina Oiaio. I kinohi no, ua pau aku he 99-100 o na makaainana aloha aina. Aohe no he haakei aku a koe mai.
Wanaao Poaha nei, hora 1:15, i ku ma ai ka mokumahu Kina iwaho o ka nuku o Mamala, a i kakahiaka nui i hookomo loa mai ai. O keia kana huakai holo loa mai Iokohama mai iloko o 9 la, 7 hora a me 55 minute, he oi o 2 hora me 16 minute mai na holo ana mai mamua. Ua nui na ukana i lawe mai nei a i lawe aku i ka hora 10 a.m. o ka Poalima nei, me ka uhao ana iho nei he 300 paha tona lanahu.
Auwinala Poakahi i hala i pili mai ai ka mokumahu Iapana Sakura Maru mai Iokohama mai iloko o 12 1/2 la. Ua lawe mai oia he 120 poe paahana Kepani a he 123 poe "haumana," me 500 tona ukana no nei awa a 1,000 no Seatele. Awakea Poalua ae kona holo loa ana aku.
Auwina la, hora 1 paha, o ka La Pule i hala i ku mai ai ka mokumahu Mauna Lebanona iloko o 14 la holo mai Vanekouwa, Kolumebia Beritania. He 520 tona ukana i hueia no keia awa, ke hui pu ia me kekahi piha papa ana i lawe mai nei. Ua holo loa aku oia no Iapana i ka hora 6 o kakahiaka Poalua.
-
Olelo Hoolaha.
E oluolu na poe noho hoolimalima a me na poe e ae i aie ia Liliuokalani e hoomaopopo ua hookohuia ka mea nona ka inoa malalo iho i agena no kona waiwai malalo o kekahi palapala hookohu hope piha. Ua makemakeia ka hookohu hope piha. Ua makemakeia ka hookaa koke ia ae o na aie.
J.O. CARTER.
Helu 208, Alanui Kalepa.
dek 7-4mnw.
-
Olelo Kuahaua.
Ke kuahauaia aku nei i na lala a pau o ka HUI ALOHA AINA O NA WAHINE HAWAII mai Hawaii a Niihau, e malamaia ka Poaha o kela a me keia pule i la haipule i ke Akua me ka hookeai, no ka nonoi ana aku i ka lokomaikai o na Lani no ka pono o ko kakou aina hanau, e hoomaka ana mai ka Poaha elua o Dekemaba nei, la 10, a e hoomauia aku keia hana.
KUAIHELANI CAMPBELL,
Peresidena Nui o ka Ahahui Aloha Aina o na Wahine Hawaii.
JANE CLARK,
Hope-Kakauolelo.
-
Olelo Hoolaha.
Mamuli o ka hooholo ana o ka AHA ELELE o ka Ahahui Aloha Aina o ko Hawaii Paeaina, ma kekahi halawai i malamaia ma la 30 o Novemaba, M.H. 1896, ke kukalaia aku nei na Ahahui Aloha Aina a pau o ka Paeaina, e malamaia ka Poaha hope o Dekemaba i la hookeai, a me ka malama ana i anaina haipule a puni ka Paeaina.
Ma ke Kauoha,
J.L. AHOLO,
Hope-Kakauolelo Ahahui Aloha Aina, Honolulu Dekemaba 2, 1896.
dek7-3mnw.
-
Hookohu Peresidena Nui.
O makou, na poe no lakou na inoa malalo iho, na Elele i akoakoa mai ma ka halawai a ka AHAHUI ALOHA AINA o ka Paeaina ma ka la 28 o Novemaba, i ka Makahiki o ko Kakou Haku Hookahi Tausani Ewalu Haneri me Kanaiwa kumamaono, he mau Elele i kohoia a aponoia e na Ahahui lala o ua Ahahui'la, ma keia, mamuli o ko makou hilinai a me ka manao pono i kona naauao a me ke akamai, ke koho nei makou ia JAMES KEAUILUNA KAULIA i Peresidena Nui no ka Ahahui Aloha Aina o ko Hawaii Paeaina i oleloia.
Hanaia a kakauinoaia e makou ma ke Kulanakauhale o Honolulu, i keia la 28 o Novemaba, M.H. 1896.
S T Piihonua, J M Kauwila,
Edward Kekoa, Chas Keawe,
Jack Honokaupu, W A Mio,
P Kauimakaole, J W Naehu,
A K Palekaluhi, John W Recard,
J K Laioha, J A Kaukau,
J N Kamoku, J Luaehu,
W L Holokahiki, J Kamakele,
M Kaliula, Lyons B. Nainoa,
M Kealoha, Wm K Kaleihuia,
Joseph Kekuku, H N Baker,
Mose Manu, D K Napuunoa,
F S Keiki, D Nahuewai,
Sam Kanehailua, Abram Kaleikau,
E W Palau, L W P Kanealii,
S K Hui, A S Keohoehu,
L K Naholowaa, JOs M Kauhi,
M Kane, C W Antone,
G M Keone, J Heleluhe,
Enoch Johnson, S Kuaulalii,
A Kaulia, Geo Kekipi,
H Kauaihilo, William White,
G P Kauimakaole, D H Keliiaa,
Mrs L A Like.
Ua hanau mai i nehinei na ka wahine a A M Hewitt, he kaikamahine, a laa hoi ia "wahine hou".
Aole ka Puali Puhioho Lahui e wehe ahamele ana i ka po o ka la apopo, aka, e paani akea ana lakou i ka po Poalima aku ma ke kahua o ka Hotele Hawaii. Ua makemakeia ka lehulehu e lulu no ko lakou pomaikai ia po a i keia mau la iho no hoi paha kahi, i mea kokua hoi no lakou o ka hoi nele ana mai nei. O ka makou wale no, e alu like ka pule iloko o ka lokahi mau.
-
Hoolaha Halawai.
Ua makemakeia na lala a pau o ka HUI KALEPA HOOKUONOONO HAWAII e akoakoa ae ma ko lakou hale halawai mau ma Kapalama ke hiki aku i ka Poalua, la 15 o Dekemaba nei no ka hoomaopopo ana i na mahele kuleana o kela a me keia e like me ia i hoomaopopoia ma ka Pauku 4 o na Kanawai o ka Hui.
Ma ke Kauoha.
D.W. KELIIOKAMOKU,
Kakauolelo Hui Kalepa Hookuonoono Hawaii, Honolulu, Dekemaba 3, 1896.
dek 7-2mnw.
-
Kuai Emi a Emi Loa
Iloko o keia mau la, e kuai emi a oluolu loa ia aku ana na waiwai a pau o ka
Halekuai o Eleele.
Eia ka wa no ko Kauai poe e hoomaopopo mai ai. E loaa no he 18 i-a Kalakoa maikai no $1.00; 10 i-a Keokeo a Kukaenalo, o hookahi iwilei ka laula, no $1.00, a pela aku a nui wale.
O ka wa keia, oiai hoi ke Kau Kulaia Karisimaka a me Hape Nu Ia e kokoke mai ana. He lua ole keia o ka emi a me ka oluolu i ikeia ma o Manokalanipo nei. Eia ka wa, mai kaukaulua iho.
JOHN I. SILVA, Ona
dek 7-1ml.
-
WA KARISIMAKA.
Eia ka wa kupono, no ka mea, e hoao aku ana o
H.W. Schmidt & Sons
(H.W. SIMIDA & KEIKI)
e hoolilo pau loa aku i ko alkou waiwai oia ke kau KARISIMAKA me ka hoomaopopo ole ae no ke kumulilo. O ka emi no a emi loa, aohe lua ma na halekuai o Honolulu nei i ko lakou mau waiwai KARISIMAKA.
He wa maikai loa keia e loaa ai o na Makana KARISIMAKA kupono a waiwai no ke kumukuai oluolu loa. E hoohauoli i kou mau hoa'loha ma ka La KARISIMAKA a e wae i kou makemake mai ka halekuai o
H.W. SCHMIDT & SONS,
ma ka Hale Pohaku o vona Holo, Alanui Moi, ma Waikiki iho o Ka Hale Oiwi.
dek 7-1 ml.
-
Hookahi (1,000) Tausani Apana Aina ma Kapiolani Paka no ke Kuai.
Aia no he 1,000 a oi aku Apana aina, 50 kapuai laula a he 100 kapuai loa, mauka iho o Kapiolani Paka, e pili ana me na Pa-hale o Messrs. C. Brown, H.J. Nolte, T Hollinger a me kekahi poe e ae.
E kuaiia aku ana keia mau Apana Aina me ka emi loa i ike ole ia ma Honolulu nei mamua aku nei, a mahope mai hoi o ke au i noho alii ai o Kauikeaouli, ka Lokomaikai, (Kamehameha III.)
E hoomoeia ana ka wai i ka wa e makaukau ai ka poe kuai mai e kukulu i na hale.
O ke kumukuai o na Apana Aina mai ka $100.00 no ka Apana a emi aku a hiki i ke $50.00.
Aohe wa maikai e ae e loaa ai na home.
E aeia no ma ka uku liilii.
No na mea i koe, e ninau ae ia
W.C. ACHI & Co.,
Boroka o na Waiwai Paa.
Honolulu, Novemaba 25, 1889.
dek 7-4mnw.