Ka Makaainana, Volume VI, Number 24, 14 December 1896 — Page 2
2 HONOLULU, OAHU, POAKAHI, DEKEMABA 14, 1896.
NA HOOKO MOEUHANE.
-
Hoike ke Kilokilo i na Mahele i Hooloia.
He moeuhane na Amalia i loaa i ka auwina la o ka La Pule, Sepatemaba 23, a i hoopukaia ma KA MAKAAINANA o Okatoba 1, 1894. Penei iho ka moe a me na wehewehe ana.
Moeuhane 1. Lohe aku nei oia a me ka lehulehu ua make ka Moi a e hoolewaia ana mai Halealii Iolani aku.
Wehewehe 1. O ka loho ana i ka make o ka Moi, he hoike ia no kona ola ana, a o kona ola ana ma kahi o kona make, he lanakila ana ia nona.
Ua hookoia keia wehewehe, a o ia keia. O kona make, oia kona noho pio ana he lawehala na ke Aupuni; o kona hookuuia ana mai ka noho pio ana a hiki i kona huikalaia ana iho nei, o ia kona ola a me kona lanakila ana.
Wehewehe 2. O ka hoolewaia ana mai Iolani Hale mai, he hoike ia no ka hoi hou ana aku i Iolani Hale.
Ua hooko pololei maoli ia ka moe. O ia maoli no ka hoihoi maoli ia ana e ke kino o ka Moiwahine iloko o Iolani Hale a hoonohoia ma ke ano he pio a hiki i ka wa i hookuuia ai, a o ka mea i koe ma ia ano o ka hoihoi ana i Iolani Hale, ina aku no ia mamua aku nei, a o ka hoea mai paha koe.
-
Moeuhane, mahele 2 Ua aluka aku nei ka hoi ka lehulehu e ike, a ikeia aku nei ka hoi aole ka Halealii i like me ke ano e ku nei.
Wehewehe, mahele 2. O ka like ole o ka Halealii me kona kulana e ku nei, he hoikeia o na manao like ole iwaena o na poe e noho nei iloko o ka Halealii a lakou i hoolilo ai i hale poo Aupuni, a me he mea la, ma ka nana ana, he paio ikaika no iwaena o lakou i oi aku ka hookiekie o kekahi mamua o kekahi.
Ua hookoia keia wehewehe, a o ia keia: Ua ulu ae he uluaoa mawaena o Misita Gude, ke kapena koa a me kona mua, a me ke konela o ka puali iloko o ka Halealii, me ka ikaika o na paio ana, a ua hookolokoloia o Misita Gude imua o ka ahakoa a hooholoia kona uku hoopai e kipaku ana iaia. O keia Misita Gude no hoi ka mea nana i ki pu mua loa ia Leialoha, e hiki ai ke olelo ae, o ke kukala kaua mua loa ia i hanaia iloko o Ianuari, 1893.
-
Moeuhane, mahele 3. Iaia i komo aku ai iloko o kekahi keena nui, ua like na ku o loko me na kia o ka luakini Katolika Roma o Malieokamalu, a ma kekahi aoao he kiekiena awai i like me ko ka Hale Opera Hawaii me na kii kumulaau, a ano e ae.
Wehewehe, mahele 3. O ke kia, he hoailona ia o ke ku ana maluna o ke kahua paa, &c.
O ka halepule, he hoikeia no kahi e waiho aku ai i na luuluu a me na kaumaha, &c. Ua hookoia keia mahele, a oia keia: Ua puka mai he leo kahea i ka lahui e kauoha ana, e hooliloia na Poaha a pau i mau la haipule me ka hookeai ana, i mea hoike i ka hoonani ana aku i ke Akua no Kona aloha ana mai i na haawe luuluu o ka ehaeha, e hoomama ae i na manao luuluu, a pela aku.
Wehewehe 2 o ka mahele 3. O ka Hale Opera, he hale ia e hoike mai ana i na lealea a me na hauoli ana, aole hoi he mau manao kaumaha maloko o ia hale.
Aole keia i hookoia, aka, malia paha ina aku a hoea mai. O keia mea i hookoia, o ia na lealea kiki pu o ke kahua kana o Laeahi.
-
Moeuhane, mahele 4. O ka mea mua ka hoi ana i ike aku ai e hanaia mai ana, ua hoomaka mai na koa o ke Aupuni Repubalika e ku nei, e kiolaola mai i na kino make o na Moi mua. Ua hanaia na pahu a like loa me he mau kino kanaka la, ua uhiia a paa me na kapa eleele. Ua kiolaia mai ka pahu mua, a hooho aku la kona uhane i ka lapuwale o ka hana a keia poe, a hooho leo akahele ae la ka lehulehu: "O Kamehameha I kela!" Pela i kiolaolaia mai ai a pau ehiku pahu, na Moikane ehiku o kakou.
Wehewehe, mahele 4. O ka pahu kupapau, me he kino kanaka la, a i hoouhiia me ke kapa eleele, he hoailona ia o na manao lapuwale kahiko loa i upu mau ia, he kino kupapau ka noonoo o na poe o ka aoao Repubalika, aohe uhane hoopono iloko.
Ua hookoia keia, a o ia keia: Eia ua mau manao lapuwale la i hanaia: Ua hoomaewaewaia ka iwi o na alii ma ka ilina alii ma Maunaala, ua nana ole ia ko lakou kulana iwi alii ma ke ano menemene aloha alii, ua kiloiia me ka hooponopono ole ia me ke ano ku i ka lapuwale me ka noonoo hoowahawaha o ke ano Karistiano ano ole.
Moeuhane 2 o ka mahele 4. A o ka hopena loa i kiolaia mai, o ia ka ewalu, he wahi opeope i puoloia a poepoe, ua wa hiia no me ka uhi kapa eleele A lele ana ua wahi puolo nei, hooho ana ka lehulehu, "Auwe, o Liliuokalani kela!"
Wehewehe 2 o ka mahele 4 He puolo o Liliuokalani i kapaeia, aka, e nee hou aku ana ua puolo la no kahi hana ano nui i maopopo ole i keia wa.
Ua hookoia keia, a o ia keia: I ka la 4 iho la o Dekemaba nei, ua nee aku la ua puolu nei me ka maopopo ole i ka lehulehu, a puiwa ae la ko ke kulanakauhale mai o a o me ka huaolelo - "ua hala aku la ka Moiwahine Liliuokalani no ka hauoki o Kaleponi!" O ua puolo la ia, he huaolelo ko loko. Nanaia aku.
Nolaila, ua manao ka mea wehewehe e waiho aku i na mahele aku i koe, no ka mea, ua hiki mai la i kahi i akenuiia e ka mea wehewehe A hookahi a kakou mea nana aku o ka huai aku o ka puolo la i na mea pohihihi o loko o ua puolo la imua o kana wahi i hele aku la.
Nolaila, ke nonoi aku nei o Dimerata i na tausani o na poe heluhelu o KA MAKAAINANA no ke kala ana mai iaia, ina ua hooluhiia oukou no na nane o ka wa i hala aku. Nolaila, hookahi a kakou mea nana aku o ka pu iwa o ke kaa a nahaha ka lio, no ka mea, he owala ke kaa, a he hoopupu ka lio. Aka no!
KILIKILO DIMERATA.
-
He £350,000 ($1,750,000) ma ke gula a ka mokumahu Mariposa i lawe aku nei no Kapalakiko mai Auseteralia.
Ua nee ae nei ko Kauka Pitasona keena oihana lapaau a ma ka Helu 38, alanui Ema. E nana ae i kana hoolaha pili oihana.
He $25,000 a C.R. Bihopa i haawi makana ae i ka hale waihona hoahu heluhelu buke Honolulu. O ka ukupanee nae hoi o keia mau dala ke hooliloia. He pani keia no kana haawi makahiki mau o $1,000
-
Olelo Kuahaua.
Ke kuahauaia aku nei i na lala a pau o ka HUI ALOHA AINA O NA WAHINE HAWAII mai Hawaii a Niihau, e malamaia ka Poaha o kela a me keia pule i ka haipule i ke Akua me ka hookeaia, no ka nonoi ana aku i ka lokomaikai o na Lani no ka pono o ko kakou aina hanau, e hoomaka ana mai ka Poaha elua o Dekemaba nei, la 10, a e hoomauia aku keia hana.
KUAIHELANI CAMPBELL,
Peresidena Nui o ka Ahahui Aloha Aina o na Wahine Hawaii.
JANE CLARK,
Hope-Kakauolelo.
dek 7-4mnw.
-
Olelo Hoolaha.
Mamuli o ka hooholo ana o ka AHA ELELE o ka Ahahui Aloha Aina o ko Hawaii Paeaina, ma kekahi halawai i malamaia ma la 30 o Novemaba, M.H. 1896, ke kukalaia aku nei na Ahahui Aloha Aina a pau o ka Paeaina, e malamaia ka Poaha hope o Dekemaba i la hookeai, a me ka malama ana i anaaina haipule a puni ka Paeaina.
Ma ke Kauoha.
J.L. AHOLO,
Hope-Kakauolelo Ahahui Aloha Aina, Honolulu Dekemaba 2, 1896.
dek7-3mnw.
Kuai Emi a Emi Loa
Iloko o keia mau la, e kuai emi a oluolu loa ia aku ana na waiwai a pau o ka
Halekuai o Eleele.
Eia ka wa no ko Kauai poe e hoomaopopo mai ai. E loaa no he 18 i-a Kalakoa maikai no $1.00; 10 i-a Keokeo a Kukaenalo, o hookahi iwilei ka laula, no $1.00, a pela aku a nui wale.
O ka wa keia, oiai hoi ke Kau Kulaia Karisimaka a me Hape Nu Ia e kokoke mai ana. He lua ole keia o ka emi a me ka oluolu i ikeia ma o Manokalanipo nei. Eia ka wa, mai kaukaulua iho.
JOHN I. SILVA, Ona
dek 7-1ml.
-
WA KARISIMAKA.
Eia ka wa kupono, no ka mea, e hoao aku ana o
H.W. Schmidt & Sons
(H.W. SIMIDA & KEIKI)
e hoolilo pau loa aku i ko alkou waiwai oia ke kau KARISIMAKA me ka hoomaopopo ole ae no ke kumulilo. O ka emi no a emi loa, aohe lua ma na halekuai o Honolulu nei i ko lakou mau waiwai KARISIMAKA.
He wa maikai loa keia e loaa ai o na Makana KARISIMAKA kupono a waiwai no ke kumukuai oluolu loa. E hoohauoli i kou mau hoa'loha ma ka La KARISIMAKA a e wae i kou makemake mai ka halekuai o
H.W. SCHMIDT & SONS,
ma ka Hale Pohaku o vona Holo, Alanui Moi, ma Waikiki iho o Ka Hale Oiwi.
dek 7-1 ml.
-
Hookahi (1,000) Tausani Apana Aina ma Kapiolani Paka no ke Kuai.
Aia no he 1,000 a oi aku Apana aina, 50 kapuai laula a he 100 kapuai loa, mauka iho o Kapiolani Paka, e pili ana me na Pa-hale o Messrs. C. Brown, H.J. Nolte, T Hollinger a me kekahi poe e ae.
E kuaiia aku ana keia mau Apana Aina me ka emi loa i ike ole ia ma Honolulu nei mamua aku nei, a mahope mai hoi o ke au i noho alii ai o Kauikeaouli, ka Lokomaikai, (Kamehameha III.)
E hoomoeia ana ka wai i ka wa e makaukau ai ka poe kuai mai e kukulu i na hale.
O ke kumukuai o na Apana Aina mai ka $100.00 no ka Apana a emi aku a hiki i ke $50.00.
Aohe wa maikai e ae e loaa ai na home.
E aeia no ma ka uku liilii.
No na mea i koe, e ninau ae ia
W.C. ACHI & Co.,
Boroka o na Waiwai Paa.
Honolulu, Novemaba 25, 1889.
dek 7-4mnw.
-
Hoolaha Halawai.
Ua makemakeia na lala a pau o ka HUI KALEPA HOOKUONOONO HAWAII e akoakoa ae ma ko lakou hale halawai mau ma Kapalama ke hiki aku i ka Poalua, la 15 o Dekemaba nei no ka hoomaopopo ana i na mahele kuleana o kela a me keia e like me ia i hoomaopopoia ma ka Pauku 4 o na Kanawai o ka Hui.
Ma ke Kauoha.
D.W. KELIIOKAMOKU,
Kakauolelo Hui Kalepa Hookuonoono Hawaii, Honolulu, Dekemaba 3, 1896.
dek 7-2mnw.
-
AHI
[PAIKII.]
Helu 89, Alanui Nuuanu.
PAIKII - Owau no nei, o ko oukou hookamaaina kahiko loa. E kipa mai, he emi loa na kii o na ano a pau ma ko'u hale paikii.
-
NA LAKO HALE - Oluolu a makepono loa ke kuai ana o na Moe, Noho, Koki, Pahu-lole, Pahu-ume, Pahu-ku, Pahu-kupapau, Pela, Uluna, Moena, a pela aku. Emi loa.
-
E loaa no kumukuai maikai kupono no ke Keleawe a me ke Kepau.
iun 22-6ml