Ka Makaainana, Volume VI, Number 24, 14 December 1896 — Page 2
HONOLULU, OAHU, POAKAHI, DEKEMABA 14, 1896.
(Mai ka aoao ewalu mai.)
-
a me na mea heluhelu like ole, a aole loa hoi o na mea opala wale.
-
No ka oiaio ole o kana hoopunipuni, mauliawa ai no kana nupepa ia R.W. Wilikoki, a e ole hoi ka Wilikoki nupepa, olioli oia no ka loaa wahi hana (no ka manawa paha), a olioli pu hoi na maka o ka wahine ke hoi aku. I na la mamua ae, he neo ka mea i ikeia. A ina hoi he hoa'loha o Wilikoki no makou, a makou hoi e kuhihewa ole nei, aole loa oia e ae e malama a e hanai i kekahi ino a makou i ike maopopo lea ai i kona ino aloha ole a me ke kolohe a aihue i ka makou i luhi ai iloko o ka hoomanawanui.
-
Malia nae paha hoi aia a ike iho oia i kana mau hana e like la me ko makou ike a kamaaina o ka hoomanawanui loihi ana, alaila paha mihi iho. O na poe mua o kahi ohakulai i mauliawa iho nei ka i ike ia ano epa a kolohe o ua ino la, E lawa na olelo i ke hoa mamua ae o ka haukae ana a loaa i ka poino.
-
Mokumahu Mauna Loa.
Hora 9 paha o ka po Poakolu iho la i ku mai ai keia mokumahu Hawaii hou nona ka inoa maluna ae, iloko o 8 1/4 la holo mai Kapalakiko mai me ka piha ukana, malalo o ka hookele ana a Kapena Godefere, Peresidena o ka Hui Hooholo Mokumahu Pili-Aina, ka hui hoi nona nei moku hou. He keu no a ka holo, me ka hookikina nui ole ia e kona mau enekini, a hookahi ona la i holo ai a loaa he 286 mile Iaia i hookomo mai ai, ua kiolaia mai ka malamalama noii o kona kukui uwila o mua a ua ahuwale kona ala e hookomo mai ai ia Kou nei. Ua pili ae oia ma ka aoao ma Ewa o ka uwapo o Burua. I ke ao ana ae no i hoomaka ai e hue i kona mau ukana, he mau mea-ai holoholona ka hapanui no ka Hui Kalepona. Lehulehu na poe i hele makaikai aku ia luna, mai na oiwi a na haole, ia la a po, a pela no hoi mahope mai nei.
Ma na ano a pau, he moku oi ae oia o ka nui i ka Malulani, a he ku no hoi i ka maikai a me ke ano paa. Aohe ona laau ihu e like la me kona mau mua maanei. Na ka hui o na Hoahau u Hall o Awa Blakely oia i hana, ka hui no hoi i hana ai i na mokumahu e ae o Poka e holoholo nei maanei He 900 ikaika lio ka ikaika hoonee o kona mau enekini, a na ka Hui Hana Hao Fuletona o Kapalakiko i hana a hookomo. O kona inoa mua i heaia ai mahope iho o ka hoolanaia ana, oia o James Spiers, no kekahi lala o ka hui nana oia i kapili, a heaia me kona inoa hou i ke kaa a hoopaaia ana malalo o ka hae Hawaii. He 195 kapuai kona loa, he 34 kapuai ka laula a he 15 kapuai ka hohonu, nolaila, ua oi iki ae kona nui i kahi mokuamhu e ae o kakou nei. Malalo mai nei o ka hui o W.G. Iwini Ma oia i holo mai nei, a e pani aku ana oia ma kahi o ka Malulani, i kela pule no paha, a i ole ia, i keia mau pule ae paha.
-
KELA A ME KEIA.
-
E kilohi ae no i na hoolaha hou.
Ke pau ka la apopo, kuala na hookaa auhau ana.
Poaha iho la paha i pae aku ai ke Aliiaimoku i Kapalakiko
Poaha iho ka mokumahu Alameda mai Kapalakiko no ka Hema.
Eia o Kapena Poo Paka ke waiho ma'i nei, a ua manaolanaia nae hoi e pohola ae ana no.
Poalima i hala i hemo mai ai ke Kinau mai ke aluhukimoku a i kakahiaha Poaono nei i holo aku ai no kona mau awa mau.
Ua kuahaua ae ke Kuhina Kalaiaina e hoomanao kulaia ana ke Aupuni i na la Kalikimaka a me Makahiki Hou.
I nei ahiahi paha e ku mai ai ka mokumahu Belegika mai ke Komohana me na eemoku Pake a me Kepani hou no na mahiko.
Poakahi, Novemaba 30, i huli hoi loa aku ai ka mokukaua Amerika Alabaterose, o ke ku ana iho nei i Kou nei, no Kapalakiko.
Pukiki ka hoi ka pa o ua makani mai nehinei a po a ao aenei, ola nae, na ano akakuu a hakanu mai. Nui ka puehu o ka lepo e pula ai na maka.
Ahiahi Poaono, la 26 ae, ma Waikapu, Maui, ma kahi noho o Wm. Sylva, e mareia ai kana kaikamahine, o Misi Julia Sylva, ia Henry Kuikahi.
He wahi hoopuoho pauahi ko ka po Poaha nei, mauka aku o ko makou halepai, ma ke kihi o na alanui Hotele me Maunakea, aka, ua pio koke no.
Ua hoomaopopoia i nei wa aia ka heluna lahui o ka heluia ana iloko aku nei o Sepatemaba ma kahi o 109,009. Aole no i pau loa i ka hanaia, a malia o oi iki aku paha
Mamuli o ke omaimai o ka Rev. A. Makinikoki, aole oia i malama ae i na anaina haipule o nehinei ma ka luakini o Sana Anaru. Ua hele na poe o kana anaina i na anaina a ka Bihopa.
Po Poaono nei i uniki ai ka pa kula ao hulahula Europa o uka o Keoneula, nona ka inoa o Waipuilani. Nui no ka hoi ka lealea o ko laila poe, a ola no ka inoa o ko Kau Lunakanawai Apana ia lakou nei.
Auwina la Poalima nei i ku mai ai ka Auseteralia, iloko o 6 la a me hora mai Kapalakiko. Ua lawe mai oia he piha ohua nui, he 76 helu ekahi a he 38 helu elua. Auwina la o ka Poakolu iho e huli hoi aku ai.
Awakea Poaono nei i haalele mai ai ka mokukaua Adamu ia Kou nei no Mea Ailana, Kaleponi, mahopo o ke ku loihi ana i o kakou nei. Ua nee ae ka Aleti a mo-ku ma kona wahi. Lehulehu paha na puuwai palupalu o hope nei i eha i ko ka Adamu holo ana aku la.
Ua hoopauia kekahi kumu wahine haole o ke Kula Po no ka ae ole e lawe i ka hoohiki.
Ahiahi Poakolu iho la, hora 6, i hookomo mai ai ka mokumahu Mariposa mamua ae o kona wa ku mai i hoolahaia iloko o 16 la holo a keu mai Kikane. Awakea Poaha ae i holo loa aku ai no Kapalakiko.
He luna luina no luna o ka mokukaua Adamu ka i ki iaia iho i ka pu i ka Poaono nei, mamua ae o ka holo ana aku o ka moku, no kona makemake ole ka e haalele iho i kana mea i aloha ai mahope nei. Ua komo ka poka pu-raifela ma ka waiu akau a puka loa ma ke kua. Eia oia ke waiho nei i ka Halemai Moiwahine me ke akaka ole o kona hopena.
Alahula o loko o ka Hale Oiwi o Wile Kaimana i ka po Poaono nei, a pela no hoi me waho iho i ka lehulehu, no ka hoolohe ana i kekahi ahamele himeni a na lala o ka Puali Puhiohe Lahui maloko o ia halekuai nani a maikai. E hoomauia aku ana la ano ahamele i na po Poaono a pau ae na la kulaia. Mai no kakou a hopohopo, aka, hele no a komo, oiai, no ia oiwi no o kakou ia halekuai.
He mau komo gula me na onohi daimana na makana a ko H.W. Simida & Keiki halekuai. E nana ae i ka hoolaha ma nei helu. I keia mau la iho e maopopo loa ai ke ano o ka mea e hanaia aku ai a lilo mai ia mau makana makamae. Ua hoikeikeia ae na komo iloko o kekahi pukaaniani o ia halekuai i ke ahiahi Poaono nei a he nani maoli io no. He mau daimana oiaio maoli no kela, aole he aniani a he mea oiaio ole. E hele ae no i ikemaka.
-
Olelo Hoolaha.
E ike auanei na mea a pau loa, o ke Kai Lawaia o Kahala me ka pa-hale, ua lilo mai ia'u ma ka hoolimalima, a ua hookohu aku au ia Akana Kalauki oia ka mana ma na ano a pau, a hoopii paha ma ke kanawai.
J. AEA.
Honolulu, Dekemaba 7, '96, dek 14 - 4mnw
-
HOOLAHA A KA LUNAHOOPONOPONO WAIWAI.
Ua hookohu pono ia ka mea nona ka inoa malalo iho i Lunahooponopono no ka waiwai o Apela Kukamana o Pukoo, Molokai, i make. Ke hoikeia aku nei ka lohe i na mea a pau he mau koi ka lakou ma ka moraki a palapala e ae paha e hoike koke mai i ka mea nona ka inoa malalo iho nei iloko o na mahina eono mai keia la aku, a i ole, e hooleia aku mahope o ia manawa. A o ka poe he mau aie ko lakou i ka mea i make, e hookaa koke mai i ka mea nona ka inoa malalo ma kona hale noho ma Pukoo, Molokai.
S.K. KUPIHEA,
Lunahooponopono Waiwai o ka Waiwai o Apela Kukamana, i make.
Pukoo, Molokai, Dekemaba 1, 1896.
-
HOOLAHA A KA LUNAHOOPONOPONO WAIWAI.
Mamuli o ka mana i loaa ia'u ma ke kanawai, e like me ia i hookohuia ai e ka Aha Hooponopono Waiwai, o ka Aha Hookolokolo Kaapuni, Apana 1, imua o Lunakanawai Carter, nolaila, ke hoikeia aku nei ka lohe i na kanaka a pau he mau koi ka lakou i ka waiwai o KALAHIKI iki o Honouliuliu, Ewa, Mokupuni o Oahu, e waiho mai i ka lakou mau bila koi ia'u i hooiaio pono ia ma ko'u wahi noho ma Puuloa, Ewa i oleloia, a i ole, ma ke Keena Loio o J.K. Kahookano, ma alanui Kaahumanu, Helu 115, Honolulu iloko o eono mahina mai keia la aku, a i ole pela, e hoole mau loa ia aku no. A o na poe hoi a pau i aie ia Kalahiku [k], i make, i oleloia, e uku koke mai i ka Lunahooponopono i oleloia, a i ole ia, e hookaa ma ka lima o J.K. Kahookano, ka loio o ka waiwai o ka mea i make i oleloia.
AKEN KI KEKUA [w],
Lunahooponopono Waiwai o Kalahiku [k], i make.
Honolulu, Dekemaba 12, 1896.
Dek 14-4mnw.
Poalima iho e hoomaha pokole ai na kula aupuni a me kuokoa no elua pule.
Poaono iho e hoomanao ai na kula Kamehameha i ko ke Aliiwahine Pauahi la hanau me na lealea hooikaika kino kupono a me kahi mau hana e ae ma ke kahu o ke kula o na opio kane.
Ahiahi apopo e wehe ai ka Hui Montague - Faust, he hui hana keaka hou mai nei mai Auseteralia, maloko o ka Hale Opera Hawaii. He nui a lehulehu ka lakou mau hana lealea e hoikeike mai ai. Aia iloko o keia hui he hookahi ohana i lehia maka hookani bele a o mai na ano mele like ole. E nana ae i ka hoolaha a mai poina i ka po o ka la apopo.
Aneane i ka hora 11 a.m. o ka Poakolu iho la i hookomo mai ai ka mokukaua Amerika Aleti a mo-ku mawaho aku o ka uwapo o Burua, iloko o 20 a oi la holo mai Kapalakiko mai. Ua lawe mai oia he mau eke leta piha nupepa lehulehu loa a me na leta kakaikahi. Oia ke pani ma ko ka Adamu wahi. Ua kukaiia aku na hoomaikai ana e ko ke Aupuni waapa hou malalo o Akukana Sepa.
Ke waiho ma'i nei o "Mama" Balaunu, makuahine o Palanike Kope a me Kikila ma, a eia ma kahi noho o kana hunona kane, ka Rev. A. Makinikoki. Ua hopohopoia e popilikia ana paha oia, oiai, ua 80 na makahiki a keu. Aole oia a me kana hunona wale no na mea o ia hale, aka, he mau lala e ae no kahi o ia ohana, a he kohu halemai maoli ka ka nanaina. Ke manaolana nei nae hoi makou no ka pohola ae o ka luahine.
-
HUI MONTAGUE-FAUST.
-
PO APOPO
E WEHE AI MA KA
Hale Opera Hawaii
-
Poe Hookani Bele, Hulahula, Ai Ahi,
Himeni Lealea, Kiola-leo, a me na
Hana Hoolealea e ae he lehulehu loa.
Ukukomo.................$1.50, 75 me 50 keneta
BEVAN MONTAGUE,
dek 14 - 1mnw LUNA NUI
-
MAU DAIMANA
-
Ina ua aeia kahi poe e ae e haawi i na palapala no kekahi Kii Milimili, e haawi hoi makou i mau DAIMANA i ko makou poe e hele mai ana e kuai i na waiwai o ko makou Halekuai.
E loaa no he PALAPALA DAIMANA I KELA A ME KEIA MEA E KUAI KUIKE ANA HE $5.00 MA NA WAIWAI LIKE OLE. I keia mau la iho e akaka loa ai ke ano o ka hana ana e lilo ai na Makana. E ikeia no na KOMO DAIMANA ma kekahi Piikaaniani o ko makou Halekuai.
-
H.W. Schmidt & Sons
dek 14 HALE O VONA HOLO. mhp