Ka Makaainana, Volume VI, Number 25, 21 December 1896 — Page 3
HONOLULU, OAHU, POAKAHI, DEKEMABA 21, 1896 3
LA KUOKOA HAWAII.
-
Na Hana Hoomanao i Malamaia
e ka Ahahui Aloha Aina.
[Mai ka Helu 24.]
"Ua lawe ae la na 'lii i ke Kahau Hoihoi Ea o ka aina ma Kulaokahua, kahi e kapaia nei i keia wa o Kamaki Kuea; ua kukuluia na lanai nui elua, kukuluia ae la ka pahuhae, hoohihiia ae la na lau aala o ke kuahiwi, a me na hoohiwahiwa e ae he nui.
"A i ka hoea ana mai o ka la 31 o Iulai, M.H. 1843, a ma na hora kakahiaka, ua ikeia aku la ka moe o kaoe o na makaainana, na koa, a me ka lehulehu, io ke kahua hoihoi ea, a mamua o ke alo o na lanai, na laina koa o na manuwa e ku ana iloko o ke awa ia la, o ia o H.B.M. S Carusfort, Kapena Lo Keoki, H.B.M. S. Hazard, H.B.M.S. Dublin o ka Adimerala Kamaki, a me ka mokukaua Amerika Constellation a me ka pualikoa Aupuni o Hawaii nei malalo o Lutanela Frere.
"Aia maloko o na lanai na Alii o Hawaii, na luna aupuni o na aina e, na elele, na luna aupuni o Hawaii nei, a me na poe hanohano e ae, a o ka lehulehu o na makaainana e hooopuni ana mawaho o ke kahua he mau tausani o na tausani, i ikeia kela la nui poina ole.
"I ke kani ana o ka hora 11 ponoi, ua loheia aku la na leo haawi kauoha o na aliikoa, e haawi i na hapai pu aloha ana no ke Alii ka Moi Kauikeaouli (Kamehameha III.) a me ka Adimerala Kamaki, maluna o ke kaa Moi, e hukiia ana e na paa lio eha, a i ke kaalo pono ana ae o ke kaa Moi ma ke alo o ka lanai, ia wa i haawi ae ai na pu-kuniahi i na ki pu aloha ana no ka hanohano o ka Moi.
"A i ka hala ana ae he mau minute o ka hora 11, ua ikeia aku la ka lutanela huki hae e haawi ana i na kauoha, i na poe paa hae, e hookulou i na hae imua o ke alo kahi a ke Alii e noho ana, a haawi mai la na koa i na hapai pu aloha ana, a loheia aku la ka nakolo mai o na leo o na pu-kuniahi, hookani mai lana bana o na aumokukaua i ke Mele lahui, a ikeia aku la ka hae Beritania i ka iho ana iho mai luna iho o ka pahuhae, a pii malie ae la ka hae Hawaii iluna mawaena o na leo huro o na laina koa a me na makaainana he mau tausani o na tausani, a iwaena hoi o na leo o na pu-kuniahi e kani kuilua ana, a hoopihaia ae la ka lewa me na leo hooho o ka hauoli nui. A ma ka panina o na hana o ia la, ua malamaia he anaina hoalohaloha i ke Akua maloko o ka luakini o Kawaiahao, ua paha ka luakini, a ma ia anaina ua kukala mai o Adimerala Kamaki, no ka hoihoiia ana mai o ka hae Hawaii, ke ea o ka aina O kahi hae Hawaii i hukiia ai, o ia kahi hae Hawaii hookahi iluna o ka moku o ko Adimarala Kamaki a oiai, ua hooneleia ka aina i ka hae Hawaii ole, mamuli o ka pau i ke puhiia i ke ahi o Lo Keoki, a i ka pau ana o kana mau olelo kaukau, ua ku mai ke Alii Kamehameha III. a hai mai la i ka makia o kona Aupuni a me ka nohoalii, a o ia keia moto, "Ua mau ke Ea o ka Aina i ka Pono."
"A o Ioane Ii ka haiolelo o ka la maluna o ka makia a ke Alii, a mahope o ka pau ana o kana haiolelo ana, ua hookuuia na hana iloko o na leo hooho hauoli o na 'lii a me na makaainana.
"Ma keia la, ua hoi mai la ke ea o ka aina, a hookahi mea nui a kakou a kali aku ai, oia hoi, ke kuokoa a kakou e hoomanao nei i keia la.
"E hoomanaoia aia he mau elele ko kakou ma na aina a, e imi ana i kuokoa mau loa no Hawaii nei.
"Ma ka la 19 o Dekemaba, M.H. 1842, ua kipa aku la na elele Hawaii me na poo Aupuni kiekie o ke Aupuni Amerika, a ua aeia mai ke kuokoa ana o Hawaii nei, a o ke koena aku o na hana i koe a na elele, ua hala loa aku laua no Beritania Nui. Ua kipa aku na Elele Hawaii ma Ladana, ke kulanakauhale poe Aupuni o Beritania, ua apoia mai na elele me na hookipa kiekie a ke Aupuni o Beritania Nui, ua apoia mai laua o ka Moiwahine o Beritania Nui me na hoohiwahiwa he nui i paholaia mai.
"A ma ka la 12 o Aperila, M.H. 1843, ua noho ka aha uwao o Beritania Nui, a me Farani a me na Elele Hawaii. A ua aeia ke kuokoa ana o na Paeaina o Hawaii. A i ka holopono ana o na hana a na elele, a ma ko laua ala huli hoi i ka aina, ua make iho la ka Elele Alii Timoteo Halilio ma ka la 3 o Dekemaba, M.H. 1843. He kauwa hoolohe me ka hoomanawanui no ka Moi Kauikeaouli , ua kuu ka uhi iloko o ka hauoli, no ka pono o ka aina, ka hana hoi e hiki ole ai ke hoopoinaia no ka nui o kona aloha i kona Alii, kaaina, a me ka lahui,
"A ma ke kulanakauhale poo Aupuni o Ladana ma ka la 28 o Novemaba, M.H. 1843, ua kakauinoaia iho la ke Kuikahi Kuokoa o Hawaii nei, a e heluheluia penei:
Na Olelo o ke Kuikahi.
"'O ka Moi, ke Aliiwahine o ke Aupuni Hui o Beritania Nui a me Irelani, a me ka Moi o ka poe Farani, ma ka noonoo ana a me ka lawe ana mai i ke kulana o na Mokupuni Sandwich Ailana Aupuni kona he hiki ke hoomaopopo no ka hooko pololei ana i kona mau launa ana me ko na Aupuni e, ke manao like nei he mea pono ka hui lokahi ma ka hoike ana he Aupuni Kuokoa ka Paeaina o Hawaii, aole e lawe a lilo ia laua, aole hoi ma ke kaili pololei ana, a i ole, ma ke ano hoomalu, aole hoi ma kekahi ano e ae i ke kau wahi lihi o ua wahi la.
"'O na mea nona na inoa malalo iho, oia hoi, ko ka Moiwahine Kakauolelo Nui o ke Aupuni, a Kuhina hoi o ko na Aina E, a me ka Elele Aupuni Nui o ka Moi o na Farani, e noho ana ma ke alo Alii o Ladana, i hoolako like ia me na mana piha, no ia mea ke hoike nei ma o laua la, ua lawe pakahi me ka lokahi like ia aelike.
"'I hoike no ka oiaio, ua kakau na mea nona na inoa malalo iho i keia hoopaa ana, a ua hoopili i ke Sila Nui o ka laua Oihana.
"'Hanaia ma na kope palua, ma Ladana, i ka la 28 o Novemaba, makahiki o ko kakou Haku 1843.
(Kakauinoaia) "'A BERDEEN.
(Kakauinoaia) "'ST. AULAIRE.'
-
Poino hou no na makai i na poe ki pololei o ke Komopani E ma ka hookuku ana no ka wa ekolu i kakahiaka Poalima, la 11 nei, he 19 ka oi, oia hoi, he 405 kue ia 386. O ka elua iho ia keia o na eo ana i na koa, a nolaila, o lakou ka oi a haule ino loa hoi na makai.
Elua mau hoolaha hou a ua lunahooponopono waiwai ma nei helu, hookahi na Akaneki Kekua (w), no ka waiwai o Kalahiku (k), i make, o Ewa, Oahu; a o kekahi na S.K. Kupihea, no ka waiwai o W. Apela Kukamana, i make, o Pukoo, Molokai. O ka hoomaopopo ae ka pono o na poe aie a me na poe he mau koi ka lakou ia mau waiwai.
Make loa kahi ohakulai a Kapu, a ua lohe mai makou i ka nui o ke koikoi o na poe i uku mua. O ka makou no ia i ao mua aku ai, eia nae, ua hoolohe ole ia mai ia leo ao. E hewa mai ka i ka nupepa i loaa kona kahua ponoi. Mai ke Kahua Ma'i Lepera mai kekahi mau leo huhu no ka loaa ole aku o na pepa. No ka hilinai makehewa no kahi
He mau pule i hala ae i ahewaia ai o Pipi no ka hana a kuai pia ilalo o Moanalua a ua hoopaiia e uku i $150 a me ua koina i na la hope o Novemaba. A i ka Poaha, la 10 nei, i ahewaia ai kana hunona, oia o D. Kamakauahoa, no ia ano hewa like no a ua hoopaiia e uku i $100 me na koina. Ua hoohalahala loa keia mau hihia a elua i keia kau kiure ae o Feberuari.
Olelo Hoolaha.
E oluolu na poe noho hoolimalima a me na poe e ae i aie ia Liliuokalani e hoomaopopo ua hookohuia ka mea nona ka inoa malalo iho i agena no kona waiwai malalo o kekahi palapala hookohu hope piha. Ua makemakeia ka hookohu hope piha. Ua makemakeia ka hookaa koke ia ae o na aie.
J.O. CARTER.
Helu 208, Alanui Kalepa.
dek 7-4mnw.
-
Robert Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
-
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
-
E loaa no oia ma kona wahi noho ma Koiuiu, Honolulu nei. Telepona Helu 833. 17-1mk
-
S.K. PUA,
He Agena no na Waiwai Paa
He Mea huli i na Kuleana Aina i mea e maopopo ai;
He Mea Ohi i na Aie i hiki ole ke Ohiia e na Poe no lakou na Aie, a
He Mea Hana i na Ano Palapala P Kanawai a pau
KEENA HANA: - Ma ke keena o R.W. Wilikoki, Alanui Konia. aug. 31-1mk.
-
DR. SLOGGETT
(KAUKA SOLOGETE),
Kauka Lapaau me Oki
Kokoke ma kahi noho o H.W. Schmidt, Esq., Alanui Beritania, Manamana.
O kona makaukau loa, aia i na Mai o ka Maka, Pepeiao. Ihu a me ka Puu.
MANAWA NOHO KEENA: Hora 8 a 10 a.m.; 1 a 2 p.m.; 7 a 8 p.m.
Telepone Helu 701.
nov 16-2m
-
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,000; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept. 7-mp
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
Hui Papa a Kukulu Hale Oahu.
OAHU LUMBER & BUILDING CO.
Leleo, Alanui Moi, kokoke i ke Kahua o ka Hui Alahao & aina Oahu.
-
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo aku i na
Puka, Olepelepe, Kui, Pepa. Pena, Aila,
Na Pono Kamana,
A pela aku, a pela aku
Telepone 53. Pahu Leta.
spl 20-tf