Ka Makaainana, Volume VI, Number 25, 21 December 1896 — Page 5
HONOLULU, OAHU, POAKAHI, DEKEMABA 21, 1896. 5
me Lunamakaainana Loud, ua kamaaina laua a elua i ko Hawaii nei mau mea, ua kue loa laua i ka manao hoohuiaina. A make no la!
-
Ke eueu nei ko kakou poe hoohuiaina, o Kakina ke poo alakai a o C.A. Blaunu ka luna hooko e noho ai ma ko lakou keena. I keia mahina ae e hoomaka ai ko lakou komo hooikaika ana aku iloko a iwaena o ka lahui e hoohulihuli a e hoonaauao ai i na pomaikai e loaa mai ana ke hoohuiia aku kakou.
-
Ua hoikeia mai ia makou eia ka o C.T. Ai, he wahi ewe hapa Pake e hana nei ma ke Keena Auhau, ke hele nei iwaena o na oiwi mauka o Kapalama a hala loa iuka o Kalihi ma ke ano piepiele i na kaa "paikikala," a o ke ano ka o ka hookaa ana, he kakau i kekahi olelo aelike, e hoopaa a e ae ana e uku liilii e like me ka mea e loaa ana. A ma na wahi ka ana i poalo hele ai, ua ikeia ke aka o C.A. Balaunu mahope mai
-
Ma ka manao o ka mea nana makou i hoike mai, he ano pahala kela iwaena o ka lahui no ka manaao hoohuiaina, ke paa aku ka na inoa no na kaa hehihehi-wawae, he mea okoa aku ana ka ka mea i manaoia e hanaia aku ai me ia mau inoa. He ewe hoohuiaina no ka hoi ka mea nana ua mau kaa la.
-
O ka makou wahi ao wale no i nei wa, e nana pono a e hana me ke akahele, a ina o ka manao io kela e paheleia nei, o ka maopopo mua ka mea pono loa. Aohe o kakou wa e aku mamua ae o keia e makaala loa ai ia lakou nei ma ae, oiai, e hoaoia mai ana no paha hoi na ano hana ekaeka a pau.
-
He wa i hala ae i hoike aku ai makou no ka hopuia ana o kekahi kauka Pake, nona ka inoa o Sun Yet Sen, ma Ladana, a na ka ohua palemo liula i hoike ae he opio oia no kakou nei, ianei oia i hanaiia ai mai kona wa uuku, a nui a ma ke Kulanui o Iolani kahi i hoonaauaoia ai. Ua hoike ae ka Bihopa o Honolulu nei ma kana nupepa-buke puka hapaha o ka la 15 nei, o Tai Chu ka kona inoa iaia e hele ana ma kana kula.
-
E ole kona lilo ana i kupa Pelekane a mamuli hoi o ke keakea ana a ka Oihana o ko na Aina E malaila a me ke kokuaia e ka Oihana Makai, loaa ai kona pakele mai ka umi-a-makeia a ialoaia, a hoonuiia aku i Kina ma ke ano he puolo no ka hookolokolo a oki ana aku i kona poo malalo o ko laila mau kanawai. He kupaianaha no keia make i manaoia nona. O ke kumu mai o keia, ua weliia oia, no ka mea, oia ka kekahi alakai o ka aoao kipi e kue i ka ohana alii Manakuria e noho mana la ma Kina, oiai, aole ia ohana he Pake oiaio, aka, he poe Tata lakou.
-
Ua hoaiai ae ka ohua palemo liula he ake ka ka aoao kipi e hoala i Aupuni Repubalika e like la ka me ia ma Hawaii nei. No ia mea, ua pane ae ka Honolulu Diocesan Magazine, aole i ike mua ia kona eu iaia ma ke kula, a aole no hoi oia i waiho iho i kahi maoli mahope nei e maopopo ai no kona hoala ana i na hana ohumu e kue i ke poo, a i ole ia, kakau paha i na manao no ko Kina hoolanakiliaia e hoea mai ana mai ka auamo ana i ka mamaka Manakuria.
-
A penei iho kahi wahi o ia pane" Aole no paha hoi e hiki ana i kahi mea ke manao iho ua ao a hookomoia oia ma Iolani me ke aloha no kekahi ano hooponopono aupuni repubalika, ole loa no hoi paha me ke ake e Hoeueu kipi aku i ke Aupuni o Kina mahope o ke ano o ka repubalika Hawaii i hanau ole ae ia wa." Hoomakeaka no hoi paha ka hoike ana ae o kela ohua no ke ake o kela Pake i ke ano hooponopono aupuni repubalika e like la me ko Hawaii nei oehaa o ka hanau kamehai ia ana.
-
He palapala ka i paiia iho nei e kekahi "keiki mikanele oiaio" a hoounaia aku nei i Amerika ma ka Auseteralia o ka Poakolu iho la no ka lu ana aku iwaena o ko laila poe ma ka aoao kue loa i na hana i lawelaweia maanei a hookahuliia ai ke Aupuni Moi. Ua hauoli makou eia no ka hoi he hookahi mea iwaena o na ewe mikanele i kokua ole i na hana pakaha a kona auna, a ua holo kona aloha mahope o na oiwi o ka aina nei, kona aina no hoi i hanauia ai.
-
Aohe inoa malalo o ua palapala la, aka, aole ia he mea hewa, oiai, ua hookeia mai no a ua maopopo no ka mea nana i haku ia manao. (Ke loaa he wa ma nei mua aku, e unuhi aku no makou ia palapala.) Eia nae, oia inoa ole ana, ua lawa no ia no ka mea i manaoia, oiai, ua hoounaia aku nei no i kekahi poe i maopopo loa ma o. Ua paiia iho noi a hoounaia aku la no malalo o kona mau lilo ponoi
-
Ua hoike ae ka ohua palemo alaula aohe ka ke Aliiaimoku i hui pu me na ohua e ae o kona moku i holo aku nei, aka, ua noho paa loa no ka iloko o kona keena. E nana ae i ka hoike a kona kanaka, a e ikeia no ua hui a launa pu aku oia a ua haawi mele aku ma ke ano hoolaulea no ia anaina au moana. Mau no hoi ka inoino o ka manao a me ke ake imihala.
-
Mau La Haipule.
O keia ka la hoano o Sana Toma, ka Aposetole a Maturo. Poalima iho ka La Hanau o Iesu; Poaono iho ko Sana Setepano, ka Maturo mua, la hoano; a o keia La Pule ae hoi ko Sana Ioane, ka Aposetole a Euanelio, la hoano. E like no me ke ano mau, e malamaia ana he mau anaina haipule ma ia mau la ma na luakini o Malieokamalu a me Sana Anaru.
Ahiahi Poaha iho, hora 7, maloko o ka luakini o Sana Anaru, he anaina haipule me na himeni pili i ko ka Haku hanauia ana.
-
Komo Daimana Haawi Makana.
Ke nanaia ae ma kahi o na hoolaha hou ma ka aoao ewalu, e ikeia no ka H.W. Simida a me na Keiki makana e haawi ai i ka mea e loaa nui loa ana o na palapala (kikiki). He balota ko kela a me keia $1.00 e hooliloia ana no na waiwai o ko lakou halekuai iloko o keia mau la o ke kau kulaia e nee nei. Aia i ka la pau o keia malama e maopopo ai ka mea e eo a e lilo ai o ka makana, he komo gula me ka onohi daimana. He gula a he daimana oiaio keia, aole loa hoi he mea ano e ae, a e ikeia no ma ia halekuai ke kipaia ae e kuai.
-
Akelekele no ka Poino.
Auwina la Poakahi i hala ia Misasa Isabela Kinikako a me kekahi keiki uuku ana i puka mai ai iwaho o Alanui Moi mai kahi alanui ololi mai kauhale mai maluna o kekahi kaa huila-lua, e holo paukiki aku ana kekahi kaa panee nui ma ka iho'na ma Koiuiu mai kai aku nei a hookui aku la me ko iala kaa. Ua hina pu ka lio a me ke kaa a haule ana laua a elua, aohe nae he wahi mea iki i poino, o ka maeele wale no paha hoi i ko laua pakele mahunehune ana.
I ka auwina la Poalua ae hoi, ilalo o Moanalua, ia Keoki Holo i hooheia ai i kekahi bipi a paa me ka paa mua o kana ka kaula i ka makuu, ua holo ka bipi ma kekahi aoao a ewala hoi kona lio a haule oia me ka paa no o kekahi wawae iloko o ke keehi. Ua kaualakoia oia, a e ole e hoohei okoa ia ka lio a okiia ke kaula - keehi, pakele mahunehune mai ai no kona ola, ua holo nae kona kua a eha a pau i ka paholehole. Ua kii koke ia ae o Kauka Wahie e kekahi pokii ona, a eia oia malalo o kana lawelawe ana. ke ano oluolu ae la oia.
Hui Keaka Montague-Faust.
E like me ka hoolahaia ana ma ka helu i hala, ua wehe io ae no keia hui i na hana a kona mau lala i lehia ai ma ka hooko ana i ka po Poalua iho'la. Aole no i piha loa ka Hale Opera Hawaii ia po, eia nae, ua pomaikai na poe i hele, no ka mea, ua ike lakou i kekahi mau mea ano hou loa i ike ole ia mamua. Ua weheia na hana e na poe hookani bele, he elima lakou, a ua ku no i ka mahaloia na mele i hookaniia mai. Pela iho no hoi na hana hoomakeaka a kekahi mau mea elua me na pila kuolo, ke kuwalawala mai o laua me ka mau no o ke kuolo ana i na pila a hiki i ko laua hookani like ana i ka pila hookahi iloko o elua mahele me ka huli aku he alo a he alo. A pela iho no hoi kekahi mau mea e ae i hoikeikeia mai, e laa ke puhiohe, a pela aku. Ma na hana kuwalawala, ua hoikeia mai me ka oi aku o ka maemae a me ka mimo a makou i ike ole ai i ka hanaia o kekahi poe maanei mamua. He nani okoa no hoi ka wahine hookani pila manadoline. O ka panina loa o na hanai, o ia ka aiia mai o ke ahi e Porofesa Monotague, puhiia ka uwahi a me ke ahi ma ka waha, a pau ia, hukiia mai na lipine o na waihooluu like ole. Nui no ka mahaloia o na hana a pau, a ua hoi kela a me keia me ka piha hauoli a o ka paipai mau ia ka hoike maopopo loa no ia mahalo a hauoliia.
Ua hoomau mai no nei hui i ka hoolaulea i na po Poaha a me Poaono nei, a i ka auwina la Poaono nei no hoi kekahi, no ka pomaikai o na wahine a me na keiki. E hana hou ana no i ka po o ka la apopo.
-
Wehe i ka Pili.
Ma ka la 16 o Dekemaba nei, ma Kamoiliili , ua wehe mai la-i ka pili me na makua a me na kaikuaana o Kina-liilii, kekahi o na kaikamahine a Misita a me Misasa J.W. Mikasobe, a hele kohana aku la i ke ala hoi ole mai. Ua hanauia oia i Sepatemaba 8, 1889, a make i Dekemaba 16, 1896. He 7 na makahiki o kona hoohala ana ma keia ao inea, a he elima la o kona kaa ana i kekahi mai i manao ole ia e hele koke ana. Ma Kamoiliili i hoi ai ka lepo i ka lepo a moe i ka lepo a moe aku la iloko o ka maluhia. Aloha wale oia. (O ka umi ia o ka laua mau keiki, he eiwa i koe e ola nei.
-
No ka hoao ana o kau wahi keiki Pake e aihue i kekahi mau hua alani o loko o kekahi pahu i onaia o Kapena Godefere, oiai no na pahu la makai o ka uwapo i kahi mau la i hala ae, a me kona hoao ana e kipe i kekahi makai me 60 keneta e hookuu iaia, ua hopuia oia a hoopaaia, a imua, la 11 nei, ua ahewa a hoopaiia oia e hoi i Keoneula e noho ai no 25 la.