Ka Makaainana, Volume VI, Number 26, 28 December 1896 — Page 3
HONOLULU, OAHU, POAKAHI, DEKEMABA 28, 1896. 3
NA PALAPALA.
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna o na poe na lakou i kakau mai.]
-
Heaha Ka'u e Hana ai i Loaa ai
I'au ke Ola.
MR. LUNAHOOPONOPONO:-
E oluolu mai oe i kahi wahi kaawale o ka kana milimili, e hookomo iho i ko'u manao no ka ninau maluna ae.
He wahi ninau keia na kekahi kanaka imua o ka Haku Iesu Karisto. A oia ka pane a ka Haku iaia: "E hoi oe a e kuai i kou mau waiwai a pau, a e haawi wale no ka poe ilihune" I kela wa, ike no oia he nui kona waiwai, i minamina ia ke kuai a pau, nolaila, hoole oia i ke kauoha a ka Haku. Nolaila, aole i loaa ke ola iaia.
Nolaila, ua lawe mai ka mea kakau i keia wahi ninau i wahi kukui malamalama no kakou a pau, ka lahui aloha mai Hawaii o Keawe a Kauai o Manokalanipo, a e ninau kakou ia kakou iho, - pehea la e loaa ai ia kakou ke ola? He mea oiaio, oia hoi, ua loaa ae nei he Peresidena hou no ka Ahahui Aloha Aina, oia o James K. Kaulia, ma kahi o Joseph Nawahi i hala, a he mea pono ia kakou ke noonoo pono i keia manawa e hapai i kekahi mau kumuhana kupono iwaena o ko kakou mau hui ma na mokupuni a pau; a o kekahi o ia mau kumuhana ka'u e hoike ae.
AKAHI: E malamaia i lulu dala i kela mahina keia mahina ma kela apana keia apana o kela mokupuni keia mokupuni, a e waiho ae ai i ka lakou mau hoike pakahi imua o ke Kakauolelo Nui o ka hui ma Honolulu nei, i ka nui o na loaa a me na hoolilo, a ua hiki no hoi ke kaheaia e ke Kakauolelo Nui no ka malama ana i ka halawai ma Honolulu nei, ina paha ma ka hapaha makahiki e like me ka manao o ka Peresidena he pono; a e waihoia keia mau dala ma ka lima o ka Puuku o ka hui, a i ole, ma kahi wahi kupono e ae e pau ole ai i ka mu a me ka popo, i ole ai e poino ka lahui.
Oiai, eia no ke ku nei kela ninau nui o ka hopena o ko kakou aina mawaena o ka lahui a me keia Aupuni me ka maopopo ole o na aoao a elua, a oiai hoi, ke kokoke mai nei na la a kela Peresidena hou e noho ae ai ma ka hoeuli o Amerika, pehea ana la kana mau hana, e pono ana paha, aole paha, he mea ike ole ia aku ia. Nolaila, me ka makaukau e hiki ai na mea a pau ke hoohanaia Aole no noi kakou e hana aku ma ke ano e kipa aku, aole; e imi kakou i alahele kupono e hiki ai, oiai he alahele kupono no e hiki ai, o ia ka ko kakou mau kupuna i olkelo ai: "Iluna no ka ua waele a no ke pulu;" a ilaila no hoi ko kakou aloha aina, hoike iho, makehewa ka olelo iho he aloha aina au ina imua na maka a i hope ka ike. O ka mea i loaa hooleiia iho; o ka lokahi o ia ke ki a me ka mole o ke aloha aina, e kuu lahui.
ALUA: Ke ola o ka lahui, he mea nui keia, oiai, eia kakou i keia manawa e like me ka waikahe nui ka lawe i na opala e loaa ana iaia ma kona alahele a ku aku i ka moana, pela ko kakou kulana i keia wae ikeia nei, oiai keia ma'i weliweli e pahola nei maluna o ka lahui i kapaia he lepera. He mea ehaeha i ka naau ka ikeia ana o ko kakou mau makamaka e laweia ana ma kela aina i hookaawaleia no keia ano ma'i, e uwe ana ke kane i ka wahine, ka makua i ke keiki a me ka ohana, oiai na haawina i ili aku maluna o lakou. Auwe! lihaliha a manaonao wale wale ka ike ana i nei mau haawina i ili iho maluna ou, e Hawaii lahui, a ke uhai mai nei kela mau olelo weliweli a lakou nei ma ae - aole e hala he 50 makahiki ma keia hope aku, e nalowale oe e Hawaii.
A heaha ka kakou hana pono e ola ai kakou? Hookahi wale iho no, o ka lokahi o na mea a pau, oia keia: e hana kakou i kekahi palapala noi ma o ko kakou hui la, oiai, oia ko kakou wahaolelo i keia wa e ku nei, a e hoopii aku imua o keia Aupuni e ku nei no ke kaohi ana mai i na poe i loaa i na haawina ano mama o ka ma'i a me ka wae ana i na poe e noho la ma ke kahua ma'i i loaa ia mau haawina like, oiai, he nui loa o ia ano e noho la ilaila. Ua pau a ua maikai loa kekahi poe, a aole no he ano ma'i o kekahi. A o ia poe ano ma'i ole, e pono e hoihoiia mai lakou na ka ohana na e malama ia lakou, a no na poe i kukonukonu loa ka ma'i, e pono no ia poe na ke Aupuni no e malama ia lakou a hiki ka loaa ana paha he maha maluna o kekahi poe o lakou, a he mea hiki no ia ke noonoo aku mahope.
Nolaila, ua manao ko oukou hoa'loha nei he mea pono ia kakou a pau ke hapai i keia hana nui ina he aloha hoakanaka io ko kakou, a i kulike ai hoi me ke poomanao e kau ae la maluna. Oiai, i Aupuni no i ka lahui, a i Moi hoi i ka lahui. A ina me keia kakou e ku wale ai me ka nanamaka, e uhai mau ana ka pilikia ia kakou i na wa a pau. He nui na mea i koe, ua akea ka puka no kakou, a e pono ia kakou a pau e kalai like maluna o keia mau mea nui elua, a e haawi i ka lokahi i loaa ai ka lanakila.
CHAS KAHUAKAILOA.
Honolulu, Dekemaba 3, 1896.
-
E lawe nui i KA MAKAAINANA i ike mau i na mea hou
Pomaikai ka Moku o Kaululaau.
Ke nanaia ae ma kahi o na hoolaha, ua ku ae nei he hui lawelawe oihana hou malalo o ka inoa Lanai Land and Development Co, Limited (Hui Aina a Hooholomua Lanai, Kaupalenaia), a ua kohoia ae hoi kona mau luna mai waena mai o kekahi poe i kamaaina i o kakou nei. Ua hoikeia mai ia makou no Nu Ioka, Amerika Huipuia, ka hapanui o na poe dala na lakou i kakoo nui i ka hoala ana i keia hoi. O ko lakou manao ka hoolilo ana i kekahi huina dala nui no ka hoohoihoi ana i na hana e hoopomaikai ai a e ikeia ai hoi kahi e loaa mai ai o na hua ohiai o ka Mokupuni o Lanai, ma ka hookomo ana mai i na holoholona bipi a hipa oi ae o ka maikai; kanu ana i ke ko ma na aina haahaa e huli la ia Lahaina, mai Maunalei a Kahalepalaoa; eli ana i na luawai ma na owawaa me ka hoohui ana mai na wai-mapuna lehulehu i hookahi wahi e hookio ai no ka hookae ana ma kahi o na mea kanu e hoouluia ai a me ka hoohainu ana i na holoholona. E kanuia aku ana ke kope iloko o na awawa lehulehu, a pela no hoi me ka manila (sisal). Me na luna no lakou na inoa i hokeia mai ka hoolaha, he mea maopopo loa he manao hana io no ko ka hui hou. Aohe mau mahele e hooliloia ana maanei aia a maopopo mua i ka hui na mea e hiki ai ke hanaia ma ka Moku o Kaululaau, he pahulu paha, a i ole ia, he waiwai a pomaikai nui paha
-
WA KARISIMAKA.
Eia ka wa kupono, no ka mea, e hoao aku ana o
H.W. Schmidt & Sons
(H.W. SIMIDA & KEIKI)
e hoolilo pau loa aku i ko alkou waiwai oia ke kau KARISIMAKA me ka hoomaopopo ole ae no ke kumulilo. O ka emi no a emi loa, aohe lua ma na halekuai o Honolulu nei i ko lakou mau waiwai KARISIMAKA.
He wa maikai loa keia e loaa ai o na Makana KARISIMAKA kupono a waiwai no ke kumukuai oluolu loa. E hoohauoli i kou mau hoa'loha ma ka La KARISIMAKA a e wae i kou makemake mai ka halekuai o
H.W. SCHMIDT & SONS,
ma ka Hale Pohaku o vona Holo, Alanui Moi, ma Waikiki iho o Ka Hale Oiwi.
dek 7-1 ml.
-
HOOLAHA A KA LUNAHOOPONOPONO WAIWAI.
Mamuli o ka mana i loaa ia'u ma ke kanawai, e like me ia i hookohuia ai e ka Aha Hooponopono Waiwai, o ka Aha Hookolokolo Kaapuni, Apana 1, imua o Lunakanawai Carter, nolaila, ke hoikeia aku nei ka lohe i na kanaka a pau he mau koi ka lakou i ka waiwai o KALAHIKI iki o Honouliuliu, Ewa, Mokupuni o Oahu, e waiho mai i ka lakou mau bila koi ia'u i hooiaio pono ia ma ko'u wahi noho ma Puuloa, Ewa i oleloia, a i ole, ma ke Keena Loio o J.K. Kahookano, ma alanui Kaahumanu, Helu 115, Honolulu iloko o eono mahina mai keia la aku, a i ole pela, e hoole mau loa ia aku no. A o na poe hoi a pau i aie ia Kalahiku [k], i make, i oleloia, e uku koke mai i ka Lunahooponopono i oleloia, a i ole ia, e hookaa ma ka lima o J.K. Kahookano, ka loio o ka waiwai o ka mea i make i oleloia.
AKEN KI KEKUA [w],
Lunahooponopono Waiwai o Kalahiku [k], i make.
Honolulu, Dekemaba 12, 1896.
dek 14-4mnw.
-
Hoolaha no ke Kohoia ana o na Luna o ka Lanai Lad and Development Co., Ltd.
Ma ka halawai mua o ka Papa Hooko o ka hui i hoikeia maluna ae i malamaia ma ke keena o ka hui ma Honolulu i ka la 23 o Novemaba, M.H. 1896, ua kohoia na poe no lakou na inoa mahope iho i mau luna no ka hui no ka makahiki e nee nei, oia hoi:
F.H. HAYSELDEN.....................Peresidena
GEORGE HERBERT.................Hope Peresidena
R.D. WALBRIDGE....................Kakauolelo
R.H. DRAPER.............................Puuku
L.M. VETLESEN........................Luna Hooia
O na Luna no i oleloia ka Papa Hooko.
R.D. WAI BRIDGE,
Kakauolelo.
Hanaia Honolulu, Dekemaba 14, 1896
dek 2t-2mnw.
-
Hookahi (1,000) Tausani Apana Aina ma Kapiolani Paka no ke Kuai.
Aia no he 1,000 a oi aku Apana aina, 50 kapuai laula a he 100 kapuai loa, mauka iho o Kapiolani Paka, e pili ana me na Pa-hale o Messrs. C. Brown, H.J. Nolte, T Hollinger a me kekahi poe e ae.
E kuaiia aku ana keia mau Apana Aina me ka emi loa i ike ole ia ma Honolulu nei mamua aku nei, a mahope mai hoi o ke au i noho alii ai o Kauikeaouli, ka Lokomaikai, (Kamehameha III.)
E hoomoeia ana ka wai i ka wa e makaukau ai ka poe kuai mai e kukulu i na hale.
O ke kumukuai o na Apana Aina mai ka $100.00 no ka Apana a emi aku a hiki i ke $50.00.
Aohe wa maikai e ae e loaa ai na home.
E aeia no ma ka uku liilii.
No na mea i koe, e ninau ae ia
W.C. ACHI & Co.,
Boroka o na Waiwai Paa.
Honolulu, Novemaba 25, 1889.
dek 7-4mnw.
-
Olelo Kuahaua.
Ke kuahauaia aku nei i na lala a pau o ka HUI ALOHA AINA O NA WAHINE HAWAII mai Hawaii a Niihau, e malamaia ka Poaha o kela a me keia pule i ka haipule i ke Akua me ka hookeaia, no ka nonoi ana aku i ka lokomaikai o na Lani no ka pono o ko kakou aina hanau, e hoomaka ana mai ka Poaha elua o Dekemaba nei, la 10, a e hoomauia aku keia hana.
KUAIHELANI CAMPBELL,
Peresidena Nui o ka Ahahui Aloha Aina o na Wahine
awaii.
JANE CLARK,
Hope-Kakauolelo.
dek 7-4mnw.
-
MORIKAWA,
Ka Oi ma Kana Hana.
Ua nee ae nei kona hale hana mai
Alanui Betela a i ka Halelio o Akana, Alanui Konia, mauka
o Alanui Hotele. Amara a Mea Hana Kaa me ke Kapili
Kapuai Hao Lio
Oluolu loa ka uku o ka hana, i hiki ole i na poe e ae ke lihi launa aku.
jun 8-3ml.
-
HELE HOOLUOLU.
O.R.L.Co.
MA NA POAONO A ME NA LA PULE
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb10-tf