Ka Makaainana, Volume VI, Number 26, 28 December 1896 — Page 7
HONOLULU, OAHU, POAKAHI, DEKEMABA 28, 1896. 7
LA KUOKOA HAWAII.
-
Na Hana Hoomanao i Malamaia
o ka Ahahui Aloha Aina.
[Hoopau Ana.]
"Ke manao nei au he kuhihewa loa na mea e oleloia nei, mamuli o ka hukiia ana o ka hae Beritania iluna, ua noho pio iho la kakou, ma ke ano he Aupuni Panalaau no Enelani, ke olelo nei au aole i pololei kela manao, no ka mea, o ka hae no ke Aupuni ia o Beritania, a o keia hana pakaha, na Lo Keoki wale iho no ia, me ka loaa ole he kauoha pili aupuni, mai kona Aupuni mai, e hele mai a e kailiku ae i na Paeaina o Hawaii ma lalo o ka nana o Beritania Nui, nolaila, aole hiki ia'u ke olelo ae, ua pii ae ka hae Beritania iluna ma ke ano pili aupuni. O ka hoike maopopo no ia mea, o ia no na hana makamaka a hoa'loha a Adimarala Thomas i hana mai ai ma ka la 31 o Iulai, M.H. 1843. Nolaila, aole loa e hiki ke oleloia he hana aupuni ka Lo Keoki i hana ai.
"O ka hana pili aupuni wale no i ikeia ma keia moolelo, o ia no ka hukiia ana o ka Beritania ilalo. He mea paakiki ke olelo ae, ua hoopio Aupuni ia kakou a ua lanakila Aupuni hoi.
"A o ka pololei ke oleloia, ua pakaha limanui ia ke Aupuni e Lo Keoki, a na ke Aupuni o Beritania i holoi loa aku ia mau hana ekaeka a kona kanaka i hana ai, i ole ai e hoopaumaeleia ka inoa o Beritania Nui. Nolaila, e na keonimana, ke makemake nei au e hoike aku ia kakou, o ke ano nui o keia la o kakou e hoomanao ai, o ia keia:
"1. E hoomanao kakou i keia la, ma ke ano nui, e haawi aku kakou i na hoomaikai kiekie loa i ke Aupuni o ka Moiwahine o Beritania Nui, ma ke ano he Aupuni hoopono kuio, alunu ole, a i nana hoi i ka maemae o kona inea a me kona hae.
"A no ka mea, he mea oiaio ina he Aupuni okoa ae ka mea nana keia kanaka i lawe ae ai i ka mana o ke Aupuni i keia la, a e like me ka kakou e ikemaka nei ikeia la, he maka a he maka, ina no ua lilo kahiko ko kakou pono kulana Aupuni mai ia kakou aku, a no keia mea, aohe hana i koe a Beritania e hana ai o ka apo wale mai no i ke Aupuni, i loaa i ka mana o Lo Keoki kona kanaka me ka eha ole o ka ili. Aka, aole o Beritania he Aupuni alunu wale me ka makee i ka pono noho aupuni o kekahi aupuni nawaliwale e like me ka hana a kekahi mau aupuni e ae o ka honua nei, nolaila aole loa i ae aku o Beritania e hooko aku i na manao pakaha o Lo Keoki i mea e pomaikai ai, e like me kekahi o na olelo kaulana loa: "O ka waiwai i loaa hewa mai, aole ia he mea e pomaikai ai."
"A ua hiki ia'u a ia kakou a pau ke kaena ae, o Beritania a me Farani, laua na Aupuni, aia iloko o ko laua mau umauma ka makemake ole i ka waiwai alunu, makee a pakaha, a o ka laua i hana mai ai no Hawaii, he aie nui ia e poina ole ai i ka puuwai o kela a me keia kanaka Hawaii, i na hana makamaka a hoa'loha o ia mau Aupuni.
"A me ka ehaeha no ke hoomanao ae, i keia la ke hoomanao nei kakou no ka hauoli ana i ke kuokoa o ko kakou aina, aka, ia kakou e hoihoi mai ai ia mau hauoli ana a hookuu iho ma ko kakou mau aoao, e hookui ana ia hauoli me na haawina ehaeha o ke kailiia ana o na pono kaokoa o ke kanaka Hawaii i kukuluia e ka pono o ke kuokoa i loaa mai mai na Aupuni o Beritania Nui a me Farani, ua kailiia aku ia mai luna aku o ko kakou mau poohiwi, a ke ku nei ke kanaka Hawaii me he kuewa la aohe ona aina.
Papa Hoonohonoho o Keia Haiolelo.
"1. Mai ka hoounaia ana o na Elele T. Haalilio a me ka Rev. W. Richards, a hiki i ka la i kakauinoaia ai ke kuikahi, he 1 makahiki, 4 mahina me 20 la.
"2. Mai ka haunaele mua loa a na Farani a hiki i ka la i kakauinoaia ai ke kuikahi kuokoa kauinoaia ai ke kuikahi kuokoa o Hawaii nei, he 4 makahiki, 10 mahina me 26 la.
"3. Mai ka hukiia ana o ka hae Hawaii ilalo, a ke kau hou ia ana o Adimarala Kamaki, he 5 malama a me 3 la.
"4. Mai ka hookahuli ana a Lo Keoki i ke Aupuni a hiki i ka aeia ana o ke kuokoa o Hawaii nei e Beritania Nui, he 9 mahina me 16 la.
"5 . A mai ke kakauinoaia ana o ke kuokoa a hiki i keia la he 53 makahiki, ua like hoi ia me 54 la kuokoa o Hawaii nei."
-
Eia mai no o Boane me kona mau kuhinia hoonoono puu, o na makamaka heluhelu o ka makahiki hou.
Poakolu iho, la 30, ma Waimea, Kauai, e mareia ai o Walter A. Wright ia Misi Lucy Aukai. Ua puka na palapala kono no ko laua mare.
Me ke ano ole a me ka hoohiwahiwa ole ia i laweia aku ai ke kino kupapau o Misi Kate Fila a hookauia iluna o ka mokumahu Belegika i ka auwina la Poalua, la 15 nei, no ka laweia a Kapalakiko, a ilaila e puhi ahi ia ai e like me kana kauoha. Ke pau ia, e hoihoi loa ia aku ana ka lehu a waiho ma ka Ilina o Mauna Aubwn, Nu Ioka, a ilaila e waiho ai e like me kana i kauoha hope loa ai.
Kuai o na Laikini Awa.
Awakea Poaha, la 3 nei, e like na hoolaha ana a ke Kuhina Kalaiaina, ua malamaia ke kuai kudala akea ana i na laikini awa no hookahi makahiki. Malalo i ho ka papa hoike o na laikini i lilo.
OAHU.
Honolulu, C.K. Aki $1,500 00
Koolaupoko " .. 105 00
Ewa me Waianae " .. 101 00
Waialua Kaiaikawaha................... 230 00
HAWAII.
Hamakua, J.W. Kaumelelau ................. $101 25
Kohala Hema, Moses Koki..................... 101 00
Kau, Moolau .............................................. 169 00
Kohala Akau, Aloi Kimo ......................... 105 00
MAUI.
Hana, M.H. Reuter ........... $101 00
Lahaina, Ah Hana.............. 530 00
Wailuku, Hip Chong ......... 800 00
Makawao, S. Kahakauila....250 00
KAUAI.
Lihue, Mrs. Wahine Kaiu................................$102 00
Waimea, Yik Lum Kee 429 00
Koloa, J.W. Kaikaina haole ............................ 101 00
Aole laikini no Koolauloa, Hilo, Kona Akau me Hema, a me Hanalei.
-
Kuahaua Haipule me Telepone.
Ua malamaia he anaina haipule o na wahine aloha aina o Huelo nei ma ke kakahiaka nui Poaha, la 10 nei, a hiki i ka napoo ana o ka la, i kokua pu ia e na kane ma ia hana maikai e noi ana i ke Akua e like me na kuahaua ma na nupepa.
Ua hiki mai nei ka huki uweaolelo (telepone) i Kailua, Huelo nei, i ka la 13 nei, me ka holopono o na hana i manaoia. E olelo aku ana o Huelo nei i. Paia, a pela i Hana me ka hikiwawe loa, mamuli o ka ume uwila. He mea hou keia i ka puni ana o Maui nei i keia hana hou. O C.H. Dickey ka'u i ike ma Haiku i ka uweaolelo, no laila kela olelo kaulana, "O Maui no ka oi." A na ka Rev. S. Kapu hoi i haku ke mele malalo ^ o ia mau olelo kelakela.
MISASA P. PAPAIAKEA.
Huelo, Maui, Dekemaba 15, 1896.
-
Hala ma Kela Huli.
Aumoe o ka La Pule, Novemaba 29, i haalele mai ai o Anakulani (w) i keia ola ana ma kahi noho o kana kaikamahine hanai, Misasa Kekula, mauka o Koiuiu, Kapalama. He aoo oia,
i piha paha ke 70 o na makahiki. Auwina la Poakahi ae i hoolewaia aku ai kona kino koou wailua a nalo ma ka ilina o Makiki. Oia ke kaikuaana o elua man luahine i make ai i kai o ka pa kolera o Kakaako i ka makahiki i hala, i ka wa no a ke kolera e holapu ana, a o ko korela no ko laua ma'i o ka make ana, no laua na inoa o Mahoe Kainoa a me Mele, a ua piha paha ia laua pakahi ke 60 makahiki a keu. No Hanalei Kauai, lakou, a he poe lakou a pau no ka hoomana Moremona.
Olelo Hoolaha.
E oluolu na poe noho hoolimalima a me na poe e ae i aie ia Liliuokalani e hoomaopopo ua hookohuia ka mea nona ka inoa malalo iho i agena no kona waiwai malalo o kekahi palapala hookohu hope piha. Ua makemakeia ka hookohu hope piha. Ua makemakeia ka hookaa koke ia ae o na aie.
J.O. CARTER.
Helu 208, Alanui Kalepa.
dek 7-4mnw.
-
Rober Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.
Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
-
C.B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
-
E loaa no oia ma kona whai noho ma Koiuiu, Honolulu nei. Telepona Helu 833. 17-1mk
-
S.K. PUA,
He Agena no na Waiwai Paa
He Mea huli i na Kuleana Aina i mea e maopopo ai;
He Mea Ohi i na Aie i hiki ole ke Ohiia e na Poe no lakou na Aie, a
He Mea Hana i na Ano Palapala P Kanawai a pau
KEENA HANA: - Ma ke keena o R.W. Wilikoki, Alanui Konia. aug. 31-1mk.
-
DR. SLOGGETT
(KAUKA SOLOGETE),
Kauka Lapaau me Oki
Kokoke ma kahi noho o H.W. Schmidt, Esq., Alanui Beritania, Manamana.
O kona makaukau loa, aia i na Mai o ka Maka, Pepeiao. Ihu a me ka Puu.
MANAWA NOHO KEENA: Hora 8 a 10 a.m.; 1 a 2 p.m.; 7 a 8 p.m.
Telepone Helu 701.
nov 16-2m
-
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,000; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept. 7-mp
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
Hui Papa a Kukulu Hale Oahu.
OAHU LUMBER & BUILDING CO.
Leleo, Alanui Moi, kokoke i ke Kahua o ka Hui Alahao & aina Oahu.
-
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo
aku i na
Puka, Olepelepe, Kui, Pepa. Pena, Aila,
Na Pono Kamana,
A pela aku, a pela aku
Telepone 53. Pahu Leta.
spl 20-tf