Ka Makaainana, Volume VII, Number 3, 18 January 1897 — Page 6

Ka Makaainana.

 

6                      HONOLULU, OAHU, POAKAHI, IANUARI 18, 1897.

 

IOSEPINE

KA

EMEPERESE PUUWAI OLU O FARANI.

MOKUNA VII.

IOSEPINE MA MALAMAISONA.

 

            No kekahi manawa ua launa leta mau o Napoliona me Iosepine, aka, mahope iho o ka luku ia ana o ke aumoku Farani e Haku Nelekona ma ke kaikuono o Abuka, a panikuia ke Kai Waenahonua e na mokukaua Pelekane, ua okiia ko laua launa ana ma ka leta.

            Ma o na mea pili kalaiaina he nui na poe i hoao e oki ae i ko Iosepine pauleleia ana mai e kana kane.  A i mea e ko ai keia mau manao, ua hoao ae la lakou e houluulu i ko Napoliona lili.

            A oiai no hoi, ma ka Napoliona mau leta i loaa mai ai ia Iosepine, ua kauoha mai o Napoliona ia Iosepine e hoolaulea mau aku oia i kona (Napoliona) poe hoa'loha, i mau ai ko lakou kakoo ana mai iaia (Napoliona) a ina he mea hiki, e apo aku i na poe a pau e launa mai ana me ia, i mea e mau ai kona ohohiaia.

            Ma ia hooko ana a Iosepine ia kauoha a kana kane, - e piha mau ana kona home ma Malamaisona me na kanaka opio o ke kulana koa a me na poe koikoi e ae no hoi o Farani,-ua lilo ia mau mea na ko Iosepine poe enemi e hakuepa ai.

            I mea hoi e holopono ai na hoolala ana a ko Iosepine poe enemi, ua loaa ia lakou he poe agena iloko o ke kahua hoomoana o Napoliona, a na lakou e hoopihapiha mau aku i ko Napoliona mau pepeiao me na olelo hakuepa he nui wale, a na ia mea i ho-a ae i ko Napoliona inaina no kana aliiwahine.  A iloko o kona huhu, ua kakau mai la oia i kekahi leta i Iosepine me na huaolelo welawelaia, e ahewa mai ana i kana wahine no kona "launa hewa ana me na kanaka a pau o ke ao nei."

            Ua ehaeha loa ko Iosepine manao no keia mau olelo a kana kane, a ua kakau aku oia i pane.  Ua piha kela leta me na huaolelo o ke aloha, a me na hooia ikaika hoi e hoike ana i kona hewa ole.  Ua okiia ua leta la (oia hoi, ua kailiia e ka enemi ke ala), a aole i loaa aku ia Napoliona.

            Nolaila, no na mahina he lehulehu, ua oki pu ia na launa leta ana mawaena o ka home a me ka puali ma Aigupita mamuli o ka makaala o na Pelekane.  Ua kupilikii ko Iosepine noho ana i kekahi manawa mamuli o kona lohe ole mai i na mea e pili ana i kana kane a me kana keiki.  Ua hoomaopopo no hoi oia, mamuli o na hana imihala a hakuepa wale iho no a kekahi poe, na lilo oia i pulakaumaka a i mea hoowahawahaia hoi e kana kane, a he hopohopo kona, i ka wa e hoi mai ai o kana kane, aole paha e hiki iaia ke hooia aku i kona hewa ole imua ona, i hoihoi hou ia ai oia iloko o ke aloha o kana kane.

            Aole nae oia i iuha i ka malama ana i na kauoha a kana kane, me ka makaala mau ana i kona pono.  A oiai e noho mau ana oia iloko o ke kupilikii o ka manao, ua uhi iho nae oia i kona mau manao kaumaha a pau me na hana hoolaulea a na hoa'loha o kaua kane, me ka hoolanalana mau ana i kona manao no ko laua noho ana laulea ke hiki mai ka la o kana kane e ku mai ai imua o kona alo a lohe aku i kana mau olelo mai kona mau lehelehe ponoi aku.

            Iaia ma Malamaisona hookahi ana hana puuahele loa,- he hana puuahele no hoi i na poe noonoo maikai a pau-o ke kanu ana i na pua.  E hoohala mau ana oia i kekahi mau hora o na la omalumalu a oluolu iwaena o kana malapua, me na mea paahana.

            No Hotenese hoi, oiai he hoopipili loa oia i kona makuahine, aka nae, aole loa ona hoihoi i ka hana i punahele i kona makuahine, a pela no hoi i kona mau la kanakamakua, aole no oia i hoohala i kekahi o kona manawa ma ia ano hoohala manawa ana.

            Ma na hele holoholo ana a Iosepine, e huli mau ana kona mau kapuai wawae mai ua alanui akea ae, a kipa ae ma na alanui ololi e alakai aku ana iaia i na kauhale o na poe ilihune.  Malaila oia e hoohala ai i kekahi manawa ma ke kamailio ana me lakou e hoolohe ana i ko lakou mau moolelo, no ka hauoli a luuluu paha.  Ua hoohalike lakou i ko Iosepine kipa ana aku i o lakou la me ha kipa ana la na ka anela, e hele mai ana e hoolaulea a e hoohauoli ia lakou.   Aole e paa kona hipuu i ka nele o ka mea ilihune.  Aole no hoi o ia wale kana hoike ia lakou i kona aloha, aka, he puuwai hamama kona, e kaniuhu pu ana me lakou iloko o ko lakou kaumaha, a e hauoli pu ana hoi me lakou iloko o ko lakou olioli.  I kona wa i kau ae ai ma ka noho alii o Farani, a no ka wa loihi hoi mahope iho o kona hooluolu ana iloko o kona luakupapau, ua piha a puni o Malamaisona i na mahalo ana no kona aloha me ka oluolu.                   

                        Aole i pau.

 

Loaa Nui ua Opiuma.

 

            Kakahiaka Poaha, la 7 nei. hora 8:30 paha, i paa ai elua mau Pake i ka hopuia e Kapena Kanae no ka malama opiuma, a he 85 kini i loaa.  Na kekahi Pake i hoike ae iaia, a iaia hoi e hele ana no kahi i hoikeia aku me ua Pake la, na halawai mai la me ia ka wahine oiwi nona ka hale i waihoia ai o kela mau kini, me ka hoike mai na makau oia a ua hiki no iaia ke kuhikuhi i ka Pake nana ia mea.  Ua hele aku oia a hiki i kahi i hoikeia, ma alanui Papu, maluna aku o alanui Kukui, a iloko o ka hale i oleloia a loaa aku la he eke kapolena i hamo ka ia me kela ukana makamae o loko.  I ka hopuia ana o ka Pake nona ia waiwai, ua hoao ka Pake kiu e lawe aku i kela eke me ka haawi ae ka i $100, a pau elua laua i ka hopuia.  A imua o ka Aha Apana i ka Poaono mai, ua ahewaia ka mua e uku i $250 hoopai a me na koina, a ua uku koke ia aku no.  He mea kuai poi ua Pake la, o Awai kona inoa.  No ke kiu hoi, ua hookuuia oia ma ka hoopau wale ia ana o kona hihia.

 

            E loaa mai ana he waapa hou no ka hui Makala ma kekahi mokumahu o keia mua iho mai Kapalakiko mai.

 

DR. C. A. PETERSON,

(KAUKA PITASONA),

Ua Nee Ae Oia a ka Helu 28,

ALANUI EMA.

Na Hora Keena: -8-10 a. m.; 2-4 a me 7-8 p. m.

nov. 30            TELEPONE 752.        3ml

 

C.B. DWIGHT

[Kale Kuaika.]

Mea Hana Pohaku Kaekae Alanui, na He Kupapau a me na Kia Hoomanao Mahala.

           

            E loaa no oia ma kona wahi noho ma Koiuiu, Honolulu nei.  Telepona Helu 833    17-1

 

Robert Napunako Boyd

(Italia)

 

            He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, 2 pela aku.

            Keena Hana: Mauka iho o ka Hale Leta, maluna ae o ka haleaina Pake, Alanui Betela.                                                                                                                                           apl 13-mp

 

NO KE KUAI.

 

            He hale o Elima Keena, hookahi makahiki o ka paa ana a me Elua Apana Aina ma Kalia, Waikiki, ma ka mahele aina o Bruce Waring & Co., e hooiloia aku no i ka mea e makemake mai ana.  Aia keia wahi ke pili kokoke la ma kahi noho o E. S. Boyd.

            Kumukuai:  $1,000; $500 ma ke kuike a ma ka Moraki ke koena no ekolu makahiki ma ka 8 pa-keneta ukupanee.

            No namea i koe, e ninau ia.

                        BRUCE WARING & CO., a i ole, ia F. J. Testa, ma ke keena o keia nupepa. sep 7-m

 

HALEKUAI LAHUI KALAHIKI

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."

Ma ia halekuai o na oiwi e loaa ai na anoi a me na paihi o na ano hou loa, e laa.

Na Kalakoa,    Na keokeo, Na Makalena, Na kinamu, Na Huluhulu, Na Lihilihi

            Na Kamaa o na Kane, Wahine me Keiki a pela aku.

            Oluolu no ke kuai ana.  Aohe hewa ke kipa mai e ikemake a aohe no hoi he kunuunuia no ka hoikeike ana i na mea kuai.

            M. PALAU, Luna Nui.

ok 14-11

 

Hoolaha Hoohui.

 

            Ma ka halawai ana o na poe i lawe mahele iloko o ka "Hui o na Keiki Oiwi, Kaupalenaia," i malamaia ma Honolulu nei i keia la, ua koho pono ia na poe malalo iho i mau Luna Nui no hookahi makahiki mai keia la aku:

Jas. N. K. Keola................Peresidena

S. K. Ka-ne..................Hope-Peresidena

Chas. Wilcox...............Puuku

S. Lui Kekumano..........Kakauolelo

Jno. D. Holt............Luna Hooia

a o lakou a me na poe malalo iho, o lakou na hoa o ka

Papa Hooko:

            Jas. K. Kaulia, F. R. Harvey (Palakiko), a me Jas. L. Holt.

                        S. LUI KEKUMANO, Kakauolelo H. K. O.

Honolulu, Ianuari 7, 1897.      jan 11-2ts.

 

HUI HAWAII KUAI AINA.

NA LUNA NUI.

Jas. H. Boyd........................Peresidena

J. K. Kaulia.....................Hope Peresidena

C. A. Long......................Puuku

Enoch Johnson..............Kakauolelo

Jos. Paakaula................Luna Hooia

W. C. Achi...............Luna Hoohana

NA LALA O KA PAPA ALAKAI.

J. K. Kahookano,        R. W. Wilcox  J. W. Bipikane.

            He Hui i kukuluia no ka hookuonoono a kokua ana i ka lahui Hawaii; ua makemakeia ua Hawaii a pau loa e komo mai i ka Hui.

Honolulu, Ianuari 11.  jan11-1yr.

 

S. K. PUA,

He Agena no na Waiwai Paa

He Mea huli i na Kuleana Aina i mea e maopopo ai;

He Mea Ohi i na Aie i hiki ole ke Ohiia o na Poe no lakou na Aie, a

He Mea Hana i na Ano Palapala Pili Kanawai a pau.

Keena Hana:-Ma ke keena o R. W. Wilikoki, Alanui Konia. aug. 31-1mk.

 

DR. SLOGGET

(KAUKA SOLOGETE)

Kauka Lapaau me Oki

 

Kokoke ma kahi noho o H. W. Schmidt, Esq., Alanui Beritania, Manamana.

            O ko a makaukau loa aia i na Mai o ka Maka Pepeiao.  Ihu a me ka Puu.

            Manawa Noho Keena: Hora 8 a 10 a. m.; 1 a 2 p. m.; 7 a 8 p. m.

Telepone Helu 701.

nov 16-2m

 

HELE HOOLUOLU

O. R. L. Co.

MA NA POAONO A ME NA LA PULE

            E haalele mai no na Kaamahu i na hora 9:15 a. m. a me 1:45 p. m., a hoea hou mai i Honolulu nei ma na hora 3:11 a me 5:55 p. m.

 

Na Palapala Uku Puni

 

                                                                        Papa 1.                        Papa 2.

Manana                                                           $.75                 $.50

Mahiko o Ewa                                                 1.00                .75

Waianae                                                          1.50                1.25

 

F. C. Smith,

Agena Ohua a Palapala Nui   

iehio-1f

 

Hui Papa a Kukulu-Hale Oahu

(OAHU LUMBER & BUILKING CO.)

Leleo, Ananui Moi, kokoke i ke Kahua o ka Hui Alahao & Aina Oahu

 

Poe Kalepa Laau, Hana Aelike a me Kukulu Hale.

Poe Hookomo Mai a Hoolilo aku ia ua Puka, Olepelepe, Kui, Pepa, Pena, Aila, Na Pono Kamana, A pela aku, a pela aku

Telepone 53, Pahu Leta.

@