Ka Makaainana, Volume VII, Number 5, 1 February 1897 — Page 2

Ka Makaainana.

 

2                      HONNOLULU, OAHU, POAKAHI, FEBERUARI 1, 1897.       

 

-----

 

LEONE DE BOANE

-----

KA MEA OHUMU KIPI O COADOVA

-----

MOKUNA III.

-----

ANO-POLULUHI A HAKUMAKUMA.

(Mai ka Helu 4.)

            "E ka naita hiwahiwa," i kaukau ae ai oia. "Ua loihi ko'u ike ana ia oe ma ke ano he kanaka hoopono a hooikaika i ka imi naauao, aka, mai keia wa aku, e ike no au ia oe ma ke ano o oe kekahi o ko'u mau hoa'loha oiaio loa. E hele pu mai me a'u a ko'u hale, a e haawi hou aku no au ia oe i na hoomaikai ana."

            "Aole i nei wa, aole i nei wa," i pauai aki ai o de Boane, me kona hooni kukonukonu loa ia maloko e ka piha mahalo a hoomaikai o ke seika. "E hoi au a ko'u mau keena ponoi; aka hoi, i kahi wa okoa aku, e hauoli no paha auanei au ke hele aku a hoohauoli pu i kau hookipa oluolu a lokomaikai ana. Ma na ano ao a pau, e ka mea hano hano, e hookokoke mau no lu i ke'u manao makamaka a hoaloha nou ma kahi kokoke i ko'u puuwai,k a e pulaina no ma ke ano he mea hanohano ia."        

            "Ua hiki ae la no," i puana hoi aku ai o Baala Tama. "E hana oe i keia wa e like me kau i manao ai he pono; aka, e hoomanao oe, ua hamama mau ko'u mau ipuka nou."

            Me ia mau olelo ae la, ua huli ae la ke seika a i kekahi o kona poe ukali, a kauoha aku la ia lakou e hoomakaukau i lio hou no ka Lede Lula; a i ka wa i hookoia ai o nei kauoha, ua haawiia aku ka holoholona ana i kau mua mai ai ia Gaberiela, oiai, ua hiki ae oia ma ia wahi ia wa. Mamua ae hoi o ko Lula huli ana aku e hele me kona luaui, ua aui aloha ae oia maluna o Leone, a namunamu liilii iho la i kekahi mau huaolelo o ka hoomaikai a me ka piha mahalo. Ua paue aku oia no ia mau olelo e like la me ka hiki kupono iaia, a haawi aku la hoi iaia i kona aloha waipahe iloko o ka pumehana.

            Aia nae hoi he hookahi mea iloko o na poe ukali o ke kuhina i ike a i hoomaopopo mai la ua oi mamua ae o ka manao hoomaikai iloko o ka nanaina a me ka leo o ka wahine opio, a i hoomaopopo mai la no hoi i kekahi mea i oi loa aku o ke kukonukonu mamua ae o ko ano hoa'loha wale no ma ke kulana o ka naita Noremana; a o ia mea, oia no o Abu Zama. Ua hulili koke ao la kona mau maka poni e like la me ka olapa ana a ka uwila iaia i hoomaopopo mai ai i keia, a iho haalulu iho la kona lima a ke kumu o kana pahikaua. Eia nae, aohe ana mea e ae i hana ai mamua ae o ia wale ae la no. O na poe i kamaaina iaia a i kona ano, ua ike koke ae la ua hoano o ia o loko ona, a he poe no kahi iwaena o kela poe i koho koke i ke kumu o keia emoole loa o kona ano e, oiai nae paha hoi, e hookaalo koke ae ana no lakou me ka hoomaopopo hou ole ae ma ke ano he kaalo wale ana ae no nei no kekahi kuakoko o ka inaina. He hookahi wa, ua aneane loa ke seika opio e ku a e kamailio ae i ka naita Karistiano; aka, ua hoohuli ino ae oia i kona lio a holo aku la ma ka aoao o Baala Tama.

            Ua ku nana aku o de Boane i keia alaka a hiki i ko lakou nalowale ana mai iaia aku, alaila, huli ae la a hele aku la ma kona ala me ka nana o na maka iluna o ka makuu o kona noho; eia nae, na hoopuiwa koke ia ae no oia mai keia ano hakanu ona e Gaberiela, o ka holo ana mai a ma kona aoao

            "E kuu haku," wahi a ka ukali, me ka leo ano kaumha a hopohopo, "ua ike no anei oe i kau mea o ka hana ana?"

            "Ka'u mea o ka han ana?" i pane hookolo aku ai o Leone, me kekahi nanaina ninau a noii.

            "Ae. Aole ka oe i ike i kau mea o ka hana ana?"

            "Ea, auhea oe, aohe o''u manao pono i kupono e wahapaaia mai, e Gaberiela."

            "E papa mai ke Akua ma o ka wa e like la me keia ka i kupono no ka wahapaa. Aole, aole. Ma o ko'u hanohano la, e Sa Leone, ua manao maoli no au e hana aku a e hoopakele ia oe, ke hiki ia'u. Aole anei oe i hoomaopopo i ka nanaina o kela Mua maka-nahesa, ke Kiaaina o Casala?"

            "Aole - aole au i nana pono aku i kona kii."

            "Owau nei nae ka i nana aku, e kuu haku; a e hiki no ia'u ke hoohiki aohe ona manao maikai nou. He mea oiaio, ua mopopo no hoi oe i kona ano."

            "Ua lohe wale no au i ke kamailioia."

                                    Aole i pau.

-----

 

            Kakahiaka nui wale o ka Poa kolu iho la i ku mai au ka mokumahu Warimu mai ka Hema, a aumoe loa ae ka holo loa ana aku no ka Akau. Hookahi ohua a aohe ana ukana i lawe mai, aka, he mau ohua me na ukana kakaikahi kana i lawe aku mai nei.

-----

Amerika a me Hawaii.

 

            Ua olelo ka nupepa Manawa o Ladana iloko o 1894, penei: "E hooiaia me he la ma ka nana aku na ko ka Moi Liliuokalani ano noonoo ole o ka hana ana i haawai aku i ka Mana Hooko Amerika ha wahi e unuhi aku ai i kalakou mau kokua ana i hooia aku ai iaia. Ua koi aku o Peresidena Kaliwilana i ke Alii, ma ke ano he kumu nona e koi aku ai i ke Aupuni Kuikawa e haalele, e ae e huikala piha ia, a e lawelawe aku hoi ia (Amerika Huipuia) ma ka hooko ana ae i kana mau hooia kupono ana a pau loa. I keia mau koi kupono ole nae hoi ua hoole mua ke Alii i kinohi e ae, aku. Ua aoia aku oia e koi paakiki loa ia aku ana ia mau mea, a ina aole e aeia ana, e pau no ka ka Peresidena mau hooikaika ana no ka hoihoi hou ia ae ona ma ka nohoalii. Aia a mahope iho oia i ae aku ai, eia nae, mamuli no o kona ano houlolohi, e lilo ana paha hoi ia i mea na na poe kalaiaina Amerika e paio ai ua pau a ua hala ka manawa maikai e hiki ai ke paa ka ka Peresidena hooia ana e kokua. Ma ke ano pili pono loa, he oiaio no paha hoi ia, eia nae, e hiki ana anei hoi kahi ano hana hooluaiele hawawa ke hooia aku iaia iho i ka noonoo o ka lahui Amerika? Ua kukala ae ka Peresidena iaia iho ua makaukau oia e hana pu aku ma kekahi hoolala ahaolelo e kulike ana me 'ka hanohano, ka oiaio a hoopono Amerika.' E hiki ana anei o ka ikeia aku o kekahi Aupuni i hookaka ponoi ia e ka Peresidena ma ke ano ua hookauia aku maluno o ka lahui Hawaii mamuli o ka ikaika a me ke apuka e lilo o ia kekahi mahele o ia hoolala ana? He mea oiaio no paha hoi ua hala ae ka ka Peresidena hooia mamuli o ka aui ana ae e ka manawa, eia nae, o na kahua hoopono o ia hooia ana i hookumuia ai, aole loa paha hoi ia i nalowale honua loa aku, ina no iloko o na kupiki pikio kalaiaaina Amerika, malalo mai o hookahi malama."

-----

            O ka mokumaku hou no ka Hui Mokumahu Waila, i kapiliia mai nei ma Kapalakiko, ua hoolanaia ae i Ianuari 1S. Ke pau pono a makaukau loa oia, alaila, haalele aku paha la laila i ka la 15 iho. A ke hoea mai oia malalo o kona inoa Helene, a malalo hoi o ka hookele aua a Komodoa Mooheau, e ike aku no paha auanei hoi kakou i kela hae Hawaii nui i haawi makana ia ai e kona poe hoa hana pu, i kokua pu ia e W.G.Iwini, a me ka hulalali mai o na pihi kelewae ana o ka ohi ana iho o ka mokukaua Hawaii Kaimiloa moewaa. E haaheo ana no paha hoi ua kauaka.

 

-----

O Kama Wale No1

-----

Pomaikai no ka Mea Ilihune.

-----

            Ma keia mua aku he 5% ke hoolaweia ana ao kela a me keia kuai ana ma ke dala kuike mana waiwai a pau o ko makou halekuai. E hoomanao ua kau moakaka ia kumukuai kuike maluna o kela a me keia mea no ke kuai aku. Nolaila, he pomaikai ke kuai ma o ko makou nei halekuai, ua like me he 10 pa keneta a oi ma na wahi e ae i kau moakaka ole ia kumukuai.

            Mamuli hoi o ka nui o ka makou hana i ka makahiki 1896 i pau iho la i konoia mai a i makou e hana aku e like me keia ae la, i mea hoi e pomaikai ai o ko makou poe kuai mai a e hoomahuahua loa aku ai no hoi kahi i ka makou hana. O kamaa wale no ka makou e lawelawe nei, i loaa mai ma ke kuai kukaa a ua emi loa iho i ka ko na poe e ae maanei; a nolaila, pela no hoi paha e hoemi loa ia iho ai kumukuai o na kamaa i hiki ole i na wahi e ae ke hoohoa mai.

            No ka oluolu, ka heahea a me ka hookipa maikai mai ke kumu i pii mau ai o ka makou hana, a ke hauoli mei no ia mea. Aia ka makou mau kamaa ma na wawae o na poe kupono a pau mai Hawaii a Niihau. E kipa ae hoao i ko makou Halekuai Kamea, a ua hoihoiia kela a me keia ke komo mai, ino no aole e kuai ana.

 

Hui Kamaa o na Poe Hana

D. B. KAMIKA,

            Luna Nui.

            Alanui Papu, makai mai o ke kihi o Monikahaae.                   jry. 25-tf.

-----

 

HELE HOOLUOLU

 

O. R. L. Co.

 

MA NA POAONO A ME NA LA PULE.

 

            E haalele mai no na Kaamahu i ua hora 9:15 A.M. a me 1:45 P.M., a hoea hou mai i Honolulu nei ma na na hora 3:11 a me 5:55 P.M

Na Palapala Uku Puni

 

                                    Papa 1.                        Papa 2.

Manana                       $75                  $50

Mahiko o Ewa             1 00                 75

Waianae                      1 50                 1 25

F. C. Smith,

 

Agena Ohua a Palapala Nei

feb 10-tf

 

-----

Hui Papa a Kukulu-Hale Oahu.

(OAHU LUMBER & BUILDING CO.)

Leleo, Alanui Moi, kokoke i ke Kahua o ka Hui Alahao & Aina Oahu.

 

----

Poe Kalepa Laau, Hana Aelike a me Kukulu Hale:

Poe hookomo Mai a Hoolilo aku i na

Puka, Olepelepe, Kui, Pepa Pena, Aila, Na Pono Kamana, A pelu aku, a pela anku.

Telepone 53.   Pahu Lete.

@

 

-----

Hoolaha Hoohui

            Ma ka halawai na o na poe i lawe mahele iloko o ka "Hui o na Keiki Oiwi, Kaupalenaia," i malamaia ma Honolulu nei i keia la, ua koho pono ia na poe malalo iho i mau Luna Nei no hookahi makahiki mai keia la aku;

Jas. N. K. KEOLA                 Peresidena

S.K. KA-NE                           Hope-Peresidena

S. LUI KEKUMANO            Kkauolelo

JNO. D. HOLT                       Luna Hooia

a o lakou a me na poe malalo iho o lakou na koa o ka

PAPA HOOKO:

            JAS. K. KAULIA, F.R HARVEY (Palakiko) a me Jas. L. HOLT.

                                    S. LUIKEKUMANO,

                                    Kakauolelo H.K.O.

            Honolulu, Ianuari 7, 1897.      jan 11-9tf