Ka Makaainana, Volume VII, Number 5, 1 February 1897 — Page 4

This text was transcribed by:	Kate Motoyama
This work is dedicated to:	very dear jadoo motoyama II

Ka Makaainana.

4 HONOLULU, OAHU, POAKAHI, FEBERUARI 1, 1897.

KA MAKAAINANA,

HE NUPEPA OILI PULE.

F. J. TESTA (Noke),

On a, Luna Nui a Hooponopono

Wahi Noho, ma Honolulu,

KEENA: Helu 327, Alanui Moi, ma

Waialae, kokoke i Alanui Konia.

UKU O KA NUPEPA.

Ina e hookaa mua ia, peneia ka uku:

No Ekolu Malama . . . $ .50

No Eono Malama . . 1.00

Hookahi Makahiki . . 2.00

POAKAHI, FEBERUARI 1, 1897.

KE mantovana nei makou aole ko kaou poe e maau hele makilo aku ana i ko na Pake mau wahi me ke kono ole ia. Aia no hoi paha a loaa he konoia mai, a i ole ia, ua kamaaina loa, alaila, oolea kikoo ana o na au a me ka hoihoi pu no hoi kahi o ka manao, aohe mea e ekeeke ai a halanalana mai o loko me ka piha hopohopo.

MAI no kakou a niha iho, aka, e hoomanawanui no, a mai no hoi kakou a hopohopo no ka hoohuiia aku o ko kakou aina a holomoku aku no ka aoao hoohuiaina, no ka mea, ua maopopo loa no ia makou aole loa ia moeuhane palaualelo e hookoia mai ana. Aia no ia mea me kakou, a in a na ka hapanui loa o kakou, a in a na ka hapanui loa o kakou e haawi aku, alaila, lilo maopopo loa kakou; a mamua ae hoi o ia, aole loa.

OIAI ka lahui Pake e noho hoa'loha nei iwaena o kakou e hauoli ana ma keia la, ko lakou la kulaia hookahi iloko o k amakahiki holookoa, ke panee aku nei hoi makou i na hoomaikai ana o ka la ia lakou a pau, oiai, he poe hoa'loha io no lakou no kakou i noho me ka maluhia a me ka hoolohe i ko kakou mau kanawai. He mahele kokua nui loa lakou i ua loaa o ke Aupuni a me ka hoopomaikai pu no hoi i ka aina a lakou e noho hookama nei a me ka lehulehu.

ANEANE makou e paupauaho loa i ka houlolohi mai o ka Ahahui Aloha Aina i ka hana, oiai, o ka eha keia o na helu o ko makou paipai ana aku. Ina no hoi paha aole e hana ana, e hoole mai no hoi ka pono; a in a hoi e hana aku ana, oia, hana kakou. Heaha hoi ke kumu o ka houlolohi ana in a he manao hana io kahi, no ka mea, aohe mea e hopohopo ai. Oia, e eu ae a e hana koke aku! A in a hoi he manao hilinai aku i ka pupuahio, o ka maopopo koke ae o ia manao, o ka oi loa aku ia o ka maikai mamua ae hoi o ko makou hooluhi wale aku no ma ka paipai ana me na heoia holo i mua a holo i hope me he muhee la. Mai no a hoohakalie, eia ka wa e hoike ae ai i ka manao hana io.

He ouli ano nui a he mea hoohoihoi manao ake hookuonoono iwaena o ka lahui iloko o keia au, a me he la, e ia paha hoi iloko o na la i aui koke ae ka oi loa aku. Ke hoihoi nei makou me keia mau kahoaka, e hoike mai ana i ko ka lahui ake loa "e hookanaka." Aia no ke kohu o ka hookanaka ana a hookuonoono, o ka hookuonoono ana a hoopono, o ka hoopono ana a hooikaika, o ka hooikaika ana a holopono, o ka holopoono a holomua, o ka holomua a hana, a o ka hana hoi a lokahi like a pau loa. Ma keia manao hana maikai, ke hooia a ke haawi aku nei KA MAKAAINANA nei i kona mau kokua a kakoo ikaika ana no na wa a pau a ma na ano no a pau loa.

Aole nae paha hoi e hewa makou ke hoopuka ae i kekahi mau olelo ao no ke ano o ka lawelawe ana i kekahi mau hana o kekahi hui i kukuluia no ka lawelawe ana i kekahi hana kalepa. Ke ao a ke hoike aku nei makou he mea pono ole ke awaha wale ia na loaa o ka hana, a e lilo hoi ia i mea pakaukau hele ia ma o a maanei, me ka manao paha he mea ia no kahi poe e ae i komo ole ia hui e punihei ai a komo aku ma ke ano lala. Eia nae, ia makou oiwi nei la a iwaena hoi o na haole, aole ia he mea walaau wale ia, aka, he mea hiipoi a makee loa ia ia; a no kekahi hui hoi, aia wale no a imua ponoi o kekahi halawai ana o na poe paa mahele kuleana iloko o ka hui. He mea pono ole no hoi ka hele ae o na lala o kekahi hui mahope iho o ka hoonohoia ana o kekahi lala i luna nui a i luna hoohana paha, ma ke ano e kilo a e hakilo hoi i ke ano o ka lawelaweia ana o ka hana me na buke a me na penikala ma na lima. E hooki ia ano hana, no ka mea, he hoike ana no ia i ka hilinai ole i ka ka hui kanaka i hoonoho ai e hookele i ka hana. Na na luna nui a me ka papa hooko ia apana hana, a ma ka hoike hoi a ka luna hoohana imua o kekahi halawai ana o ka hui e kuleana ai kela a me keia lala e kamilio a e hoike ai i kona manao, a malaila wale no, aole mawaho ae, e kupono ai ia mau mea e kukakukaia. Ina ua pono ole ka ka luna hoohana lawelawe ana i ka hana, e hoikeia ae ana no ia e na luna e ae, a na ka papa hooko aku hoi ka hoomaopopo ana.

Ua konoia mai makou e hoopuka aku i keia mau olelo maluna ae mamuli o na mea i lohelohe wale ia a i ike pono ia no hoi i ka lawelaweia e na lala o kekahi hui kalepa hookuoaoono o ke ku koke ana ae nei a ke lawelawe nei hoi i ka hana. Nolaila, ke uwalo aku nei makou e hooki i keia mau ano hana, a ke manaolana nei hoi makou aole loa e lohe hou mai ana a aole hoi e ike hou aku ana. E kapae i na ano hana hawawa, a e lawelawe hoi kakou ma ke kulana naauao e ku ai i ka hilinaiia mai a me ka hilinai aku. Ma ke ano nui nae hoi o nia mau hana hookuonoono, ua mahalo makou, i hooi loa ia nae hoi i ka ike a hoomaopopo aku aia iwaena o na opio, e like la no paha hoi me makou nei la, keia ake loa i ka hookuonoono, a ke lawelawe ia hoi me ke akahele a me ka hoopono, aohe no e nele ana ka ohi mai i na hana ohiai o ka pomaikai. A o ka makou hoi--e hoomau aku no ma neia hana maikai, oiai, aia ilaila he ola no ka lahui a me ka aina nei.

MAU LONO HOUPUUPU.

Nui no hoi ke makou haohao i kahi i ulu mai ai a i pahola ae ai hoi o na lono ano ole a ku i ka houpuupu wale iloko o na la i hala iho la, a na hele hoi a lauahea loa ma o a maanei me ka hiki ole loa ke hooiaioia. Ma ka aoao hoi e makee ana i ko kakou kulana noho'na maluhia, he mau lono waiwai ole keia a me ka hiki ole loa no hoi ke hilinaiia aku e na poe noonoo maikai a pau, oiai, aole loa no he wahi lihi iki no ka oiaio. Eia nae hoi, ua hilinai loa ia no iwaena o kekahi poe o kakou.

O ka makou nae hoi ia i makemake ai e hoomaikeike iki aku, a ke hoike aku nei hoi makou i ua mau loaa la e like me ia e pakaukau a e kalewa hele ia nei e ko kakou poe puni lawe olelo. Penei iho na lono ano nui e lauaheaia nei: Ua palapala mai nei ka o Haki iauei e imi i hewa nui a koikoi no ke Aliiaimoku, a e hoopukaia i palapala hopu no ke kikoo aku iaia ma o a hoihoi hou ia mai ianei e hoopaahao a e hookolokoloia ai. O kekahi manao ka keia o ka Kakina huakai, a e kekahi ka, e hoaoia aku ana kekahi hana ekaeka a powa hilahila ole i ko ke Alii ola ma o, malalo paha hoi o ua lawelawe ana a neia elele. A o kekahi hoi o na lono, e kukala hou ia ae ana ka ke kanawai koa, i hiki ai ka hoi ke hooweliweli a ke hookikinaia na oiwi e kakauinoa no ka hoohuiaina. Ma na ano a pau, aohe o makou hilinai iki i keia mau lono hiki ole ke hooiaioia a ke hilinaiia, aka, ke haawi a ke hoike aku nei no nae hoi makou e like la me na ano e wawaia nei, a mawaho ae hoi o ie, aohe a makou mea i ike a i maopopo.

E hewa ole nae paha hoi makou ke hoomaoe ae he mau kahoaka keia no ka "haehae ka mauu, ke aleale mai nei ka wai," a ke puiwa e nei no paha hoi lakou nei ma ae i ko lakou mau aka ponoi iho no. Aohe o makou hilinai iki e hupo ana ke Aupuni e ku nei e lawelawe @o ae ia mau hana, no ka mea, o ko lakou make maopopo loa ana no ia in a e hoaoia ae ana ia mau haua pela ae la. Nolaila, ea, ke ao aku nei makou ia kakou a pau, mai no a hilinai a lawe hele i na mea i hiki ole ke hooiaioia. Aia no ka waiwai a hoea io ao, alaila, ia wa a ia wa wale no auanei hoi makou e hilinai ai, a pela no paha auanei hoi me ka lahui. Aka, mamua ae hoi, aole loa E pono e hooki loa kakou i na nune ana, oiai, he mau mea hoopilihua wale no neia mau houpuupu ana.

"KE ALEALE NEI KA WAI."

Ma ko makou manao he keu keia poo ae a ke poo maikai, no ka mea, o na ouli o ka aleale mai o ka wai ia e ikeia aku nei mamua pono.

No ke ano hoi o keia wai, ua maopopo ole ia makou, a ua hiki ole no hoi ke hoomaopopo aku. Heaha ana la? He wai malie paha, a i ole ia, he wai oehuehu a kupikipikio paha; he wai awaawa a awahua paha, a i ole ia, he wai mulea a huakakai paha e halanalana ai loko, a i ole ia, he wai ono a momona paha. Ke waiho aku nei no makou a ua ke au no o ka manawa e nee aku nei e hoike mai.

O ka makou wale no e olelo a e hoomahuihui ae--"E haehae ka manu, ke aleale mai nei ka wai." Malia he wai no ke aloha a no ke aloha ole paha, no ka mumule a mumule ole paha, no ka hakanu a hakanu ole paha, no ka make a make ole paha, a no ke ola a ola, ole paha. O ka wai o ke aloha, ka huoli a me ke ola ka makou e kaunui aku nei me ka manaolana amu, aka, na koe aku ia ia makou pehea la a i ka wa hea la e hoea mai ai, a nawai ana la e haawi mai.

Pehea mai la kakau e Kilokilo Dimerata, he wai la uo ke aha? Malie e like no me kou mau,--nana aku, nanaia aku, kakali aku, hoomanawanui aku me ke kaniuhu a paupauaho ole, a o ke ano wai aleale e hoea mai ana ma neia mua iho, o ua wai la ia. Pela io anei?

Eia nae, ke haehae e nei no o Kaulakou i kana manu, ua ma kau honua i kona aka ponoi iho,