Ka Makaainana, Volume VII, Number 6, 8 February 1897 — Page 2

This text was transcribed by:	Kate Motoyama
This work is dedicated to:	very dear malik motoyama I

Ka Makaainana.

2 HONOLULU, OAHU, POAKAHI, FEBERUARI 8, 1897.

LEONE DE BOANE

KA MEA OHUMU KIPI O COADOVA

MOKUNA III.

ANO POLULUHI A HAKUMAKUMA.

[Mai ka Helu 5]

"Alaila, he mea pono loa e maopoo lea oe iaia. Ke olelo aku nei au ia oe, ua lili oia ia oe. Ua kilo a hoomapopo pono oia i ke kulana o ka Lede Lula, a pau pu no a me kona nanaina a me ke ano o kana kilohi ana iho maluna ou; a ua kilo a kiai pono mai no hoi oia ia oe; a ua ike au i kona lima i ka hapapa ana iho maluna o ke kumu o kana pahi iaia no e nana pono ana ia oe; a ua hiki loa @a'u ke heluhelu aku i ka manao nauki a ake e hookau mai i kona inaina a me kana hoopai malu na ou i ka wa i kauhola ae ai a puni kona helehelena puanuanu a piha hiona o ke ano puaikoke. E akahele loa oe no kela kanaka!"

"Hele pela, e Gaberiela. Ua makau oe me ke kumu ole. Aohe o'u makau no Abu Zama. Ina no he kumu kahi on a no ke enemi mai--"

"Alia, e kuu haku. Mai awiwi loa oe pela. E ae mai ia'u e hookuikui aku ia oe oiai oe e hele ana. Aole anei hoi he kumu kahi on a no ka enemi? Ina aole oe i hoopoina i kou hilinai ia'u--ina aole oe i hoomaopopo loa ole ae i ko'u noho'na hoa'loha loihi loa nou--e pane moakaka mai ia'u. Aole anei hoi ua aloha oe i ka wahine Mua opio?"

"Ae."

"A aole anei oe i kamailio aku no ke aloha iaia?"

"Ae."

"A oia hoi, ia olua e u holo pu ana, ua pane mai anei me ke aloha nou?"

"Ae, e Gaberiela, ua pololei oe."

"A ua manao anei oe ua hiki ole ia Abu Zama ke ike mai i nei mea? Ma o ko'u uhane la, ua ike pau loa mai no oia, a me ka maopopo loa no; no ka mea, ua kahakaha moakaka loa ia no maluna o ko ka wahine opio helehelena, a maluna no hoi o kou ponoi, me he la na ke akua o ke aloha i pena ponoi aku me kekahi hulu. A aole anei o Lula kana wahine hoowahine a i hoopalauia? Aole anei on a manao e lilo koke aku ana iaia kona lima, a mamuli hoi o ia e loaa ai iaia ona mana hou a me ka waiwai? A e hoomau mai no auanei oe i ka olelo ana aohe on a kumu no ka enemi mai ia oe?"

"A ina pela," i pauai aku ai o de Boane, me ke ano ku i kau wahi o ka hopohopo, "e loaa no paha iaia he kumu e enemi ai; eia nae, aole loa oia e aa e hoopoino mai ia'u."

"Ke hoopunipuni iho la no oe ia oe, e Se Leone. Ua aa o Aba Zama e hana i na mea a pau e hiki ai ke hoooia kona mau inaina; a malia, o hana no oia me ka maalahi a palekana loa. E hoomanao, he kiaaina Mua oia, oia hoi oe ua like me he malihini la iwaena o keia lahui paakiki a liilii wale. Ke olelo aku nei au ia oe aole loa oia e ae ana e hookuu aku ia oe e hele me ka laelae a palekana a ka hale o Baala Tama. E like la hoi me ka maopopo loa o kou ola ana, e imi aku ana oia i mea e hooko koke ia ai o kona inaina liilii maluna ou."

"Ua oki, e Gaberiela; ke kaha loa aku la oemawaho ae e na palena noonoo kupono i nei wa. Eia nae he nui no na mea e hiki ai ke noonooia no kau mau olelo, a e haawi aku no hoi au i na noonoo kupono ana a pau."

I keia wa ua hiki aku laua ma kahi laukanaka loa o ke kulanakauhale, a ua hookiia iho ke kukai kamailio ana. Ua hoolimalima ka naita he wahi hale nuku i kokoke i ka muliwai, a ua kau pono aku hoi kona alo i ke alanui, a ma kekua aku he malapua i holo a kae muliwai. Na hoopakeleia keia malapua e kekahi pa pohaku kiekie a oolea a he puka kahi e oili aku ai a kekahi alahaka waapa ma ka muliwai, a iloko o keia kihapai he mau kumu hua-ai a mena pua aala onaona lehulehu. Na Gaberiela e kuke no laua, a e ma'ama no hoi i kahi, me ke kokua pu au no nae hoi kahi o kona haku ma na hana koikoi. O ka ka naita hana mua, iaia i hoohiki aku ai i kona wahi, o ka wehe ae i kona mau aahu no kahi mau aahu hou, a ma ia hope i noho iho ai i kana mau haawina, oiai hoi kona kauwa na hele aku i kahua no on a mau pono ai na laua. Ua noho iho o Leone e hoopaauaau i kana mau haawina, eia nae, aole loa i hiki i kona noonoo ke hookupaa iho maluna o na haawina o loko o ka buke mamua on a. E hoao a e hooikaika e like la me ka hiki iaia, ua lilo wale no i mea ole, oiai, o Lula ke kumuhana hookahi i lilo ai o kona mau noonoo ana a pau ia manawa.

Aole i pau.

Ina aole oukou e lawe ana i KA MAKAAINANA, alaila, e pio loa ana ke kukui i kou hale a haha poele ka papai o Honolulu, oiai, ua nele oe me ke kukui ole.

OULI HOA KA PO.

Hoike Kakoo Paha no na Hana

o ke Ao.

Ua loaa keia moe ia'u i ka po o ka la 21 o Ianuari, 1897 nei E ku ana ko'u uhane ma alanui Moiwahine e pili la me alanui Kaahumanu, a ua piha hoi ia wahi i na kanaka he lehulehu wale e kuku ana malaila. Ike aku la au i ka lewa, me he la i ka paia lani, i kekahi papa pohaku nui i like me ke pani puka e kau mai ana ma kekukulu akau, a ua kauia i kekahi mau hua palapala nui elua, L. R. Ia wa au i kahea aku ai i na kanaka e kuku ana, "E! na ike anei oukou i kela mea e kau mai la?" Ia wa ua alawa ae la lakou iluna i kahi a'u e kuhikuhi la i ka paia lani, a ninau mai la lakou ia'u "Heaha ke ano o kela mau huaolelo?" Pane aku la au ia lakou "Long life." Pane hou mai la lakou ia'u, "Heaha ke ano o ia olelo?" Pane aku la au, "Ola loihi," (a mahope, noonoo hou @ho la au, ua loaa ae la lookahi huaolelo a koe iho la hookahi huaolelo i koe.)

Mahope iho o ia wa, alawa ae la au i kai, a ike aku la au i ke po'i mai a ka nalu aole i kaua mai kona kiekie. Manao iho la au e poino ana kuu wahi waapa, no ka mea, o ia kahi a'u i nakii ai a paa, o ka nalu ka'u i ike aku ua kaa mai iloko, a o kuu wahi waapa hoi ua kaa aku la iwaho, a puoho ae la au.

JNO M MAHUKA.

Na Hooheno Wehewehe

Ma ka nana iho i ka moe, he 10 ka nui o kona mau mahele.

1--"Ka lehulehu o na kanaka," he hoike ia no kekahi mau manao hoeueu a hoalaala iloko o ka aina. Heaha la keia mau manao hoeueu iloko o ka aina; he manao uluku haunaaele anei, a he mau manao kalai aupuni hahana paha? Na ke kiai o ka manawa e hai mai.

2--"Alanui Moiwahine" Ua ikeia ka lehulehu ma keia alanui, nolaila, he mea pono ke hoopiliia ka hana a ka lehulehu i akoakoa ai ma keia alanui, o ia hoi kekahi "niau manao hoeueu a hoalaala iloko o ka aina," no ke alanui a ka Moiwahine i hele aku @. Ina aia ilaila keia manao hoeueu a hoalaala, aia no he mea i mauaoia ma ke alanui a ka Moi i hele ai. Ina iho la ia o ka hoike a ka moe ma o ka lehulehu la, a na lilo ia i mea nuue niu ia, alaila, heaha la ka hope o alanui Moiwahine?

3--"Papa Pohaku nui." @ mea pono ke hoomaopopoia k@ hana a ka papa pohaku ma o ka papa-poahku kakau a na keiki hele kula. O ka hana a ka papa-pohaku kakau, o ia kahi e imi ai i na ninau paakiki me ka noonoo nui i mea e loaa mai ai ka haina, a me he la o ia no ka mea i hoikeia ma keia papa-pohaku nui; ua imiia, ua huiia, ua hoolaioia ka haina, a o ia hoi kela mau hua-palapala elua i hoikeia mai he L. R. a i hoikeia e ka mea nana ka moe kona ano, he Ola loihi (Long life). Nolaila, ua hiki ke manaoia he olelo kanaenae ia, e like me ka olelo ana ae a na poe ki-ke kiaha, "E ola loihi ka Moi."

4--Na huaolelo "L. R.," heaha ia? O ka mea hiki ke olelo ae, o ka haina no paha ia. No keia mau huaolelo ae la, e loaa ana ka hoi ia'u he wahi namu kapulu i kahi ae la o keia mau huaolelo, a o ia keia: L, like paha ia me Liliuokalani; R, like apaha ia me Restoration, o ia hoi ka puana ana ae, "E hoihoiia ana o Liliuokalani." Ina o ka haina keia, alaila, o ke au o ka manawa ka i ike ia mea. A ua like no hoi me ka puana ana ae Liliuokalani Regina, oia hoi, Moi Liliuokalani, a i pili pono ai ka haina a ka mea nana ka moe o ke "ola loihi," e kanaenae ae ai penei, "E ola loihi ka Moi," a pela ka mea wehewehe e koho nei, o ka haina i hoomaioia maluna o ka papa-pohaku i hoopaaia ma ka paia o ka lani, o ia hoi ka olelo ana ae, ua hooiaio mai na lani ia L. R. i Moi e like me keia: E hoihoiia ana o Liliuokalani, i aha? I Moi, e like me ka hoike a ke alanui ma ia inoa he Moiwahine. Nolaila, o (L), o Liliuokalani; o ®, o hoihoi ana ia; nolaila, loaa ka haina piha o ia keia: "E hoihoiia ana o Liliuokalani i Moi."

5--"Long life," OIa loihi. Ina he hoike loli ole keia na ka moe, alaila, ua lawa ka hoike i haiia ae la ma ka mahele 4; aka hoi, in a he pee keia hopunaolelo ola loihi no kekahi hoopoino, alaila, o ia paha. Alaila, ua hiki ke manao aku i keia hana pee maluna o alanui a me Moiwahine, o ia ka olelo ana ae, o ke alanui a ka Moiwahine i hele aku la, ua piha no ia me na hoohalua a ua alepo'i o ke kai e popoi aku ana me ka lumilumi pu aku i ke ola loihi i ola pokole, e like me ka nalu po'i ma ka mahele 6 malalo iho, in a e ku ka hana a ka moe ma ia ano.

6--"Ke po'i ana a ka nalu aole i kana mai," o ia paha ke kaikoo; he hoike ia o na manao uluaoa me ka pioo o ka lehulehu i like me ka nunulu o na ale o ke kai, pela paha ke kupinai o na lono hoolele hauli no kekahi ale nui e uhi iho ana, in a no loko iho nei keia nalu po'i, a no waho mai paha, a i ole, he kai hooee maoli paha, a i ole ia, he ma'i ahulau paha. A i ole, he puka mai paha no ke Aupuni me na kiwi bipi. Nolaila, he kaikoo paha ko ka po, he uluku pioo ko ke ao.

Aole i pau.

Eia mai no o Iosepine me kana mau mea ai hoonoono puu.