Ka Makaainana, Volume VII, Number 10, 8 March 1897 — Page 3

HONOLULU , OAHU, POAKAHI, MARAKI 8, 1897. 3

 

NA PALAPALA.

[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna o na pae na lakou i kakau mai.]

 

Ka Ninau Hoohuiaina.
[Mai ka Helu 9.]

 

O na ninau i waihoia aku i na poe no lakou na inoa i hoikeia ma na helu i hala ae, oia hoi, penei:

AKAHI--Ua hookomoia aenei iloko o ka palapala hoohui ko na kanaka Hawaii kuleana pomaikai e like me ka oukou papa kuhikuhi no ka pomaikai o ka lahui a oukou e hoike nei i ke akea?

ALUA--Ina e hoohuiia ana kakou, o oukou anei na poe na lakou e haku aku i palapala hoohui ia Hawaii nei me Amerika Hulpuia?

A ma ko'u nana ana i na hunahuna o loko o na nupepa, aole mea i paneia mai o keia mau ninau ae la, a nolaila, ua noonoo iho wau heaha la na kumu o ka pane ole ia ana o ko ka lahui pono.

Ke lawe mai nei wau ia mau kumu ai kahua kalaiaina na'u e pane aku ai ia oukou a i ko oukou mau hoa kalaiaina like o ka hoohui aku ia Hawaii nei me Amerika Huipuia. O na kumu i oleloia maluna, aole loa no o hiki ia oukou ke pane mai i ko ka lahui pono iloko o ka palapala hoohui, no ka mea, he hana paakiki loa iaia oukou ke hoike mai i ka oiaio, a no ka mea hoi, aole ia he hana i noonoo maikai ia e oukou.

No ka mea, no hai ia manao a o ko hai manao a me ko hai makemake o ia ka oukou e hookani a e puhi nei i ka makani, oiai, aole he ae mai o na poe no lakou ia manao e haawi mai ia oukou e hana ia hana. O kekahi no hoi, aole lakou e ae mai e haawi i kahi lihi o ka pono hoohui ia Hawaii nei me Amerika Huipuia.

Ina ua manaoia he mea e pono ai ka lahui e like me ka oukou e olelo nei, a no keaha i hoike ole ia ai ia hana i ke akea, i mea e ike ai ka lahui ko lakou kuleaua pomaikai ma ia palapala hoohui ia Hawaii nei me Amerika Huipuia mamuli o ke koi ana mai i ka lahui e ae aku i ka hoohui, a o ia koi ana i ka lahui he mau hana ino loa ia a me ka powa i keia lahuikanaka.

Ina e hoohuiia ana kakou, o oukou anei na poe na lakou e haku ka palapala hoohui ia Hawaii nei me Amerika Huipuia? O ka'u pane, aole; no ka mea, o ia ka hana mua a oukou e hana ai ma ia palapala a hoike ae ma ke akea, ma kekahi halawai makaainana i ko ka lahui apono aku, alaila, lilo i kumuhana na oukou, a o oukou no ke hele i Amerika e hana ai i keia hana ma ka aoao o ka lahui. A no ko oukou hoike ole ae hoi i ke akea i na pane no keia mau ninau, nolaila, ua like loa oukou me kekahi mea e paa ana i ka pahi umiumi e moku ai ka puu o ka lahui.

Eia hou keia ninau ia oukou, e ua poe kakaolelo nei o ka hoohui e koiia nei o oukou. He hoohui anei keia me Amerika Huipuia i mea e kakoo ai i ke Aupuni Repubalika e ku nei, a i ole ia, o ka hoohui hea la ka mea e makemakeia nei o oukou, a i ole ia, me kekahi aupuni e aepaha a oukou e hookani a e puhi nei i ka oukou mau o-le hanapilo i ka makani?

Nolaila, e pane mai oukou i keia ninau, i mea e hemo ae ai keia manao uahoa o ka lahui. Aole au i manao i keia kumuhana e hoolilo i mea paio aku ia oukou me ka manaoino, aka, no ke pahaohao mai no i ke kumu a oukou e koikoi nei i ka lahui Hawaii.

No ka pono hoi o ka hoohui aku i ko kakou aina aloha me Amerika Huipuia, o ka'u hoi ia e haohao nei i ka pala io ae o ka maia e ono ai o ka puu moni-ai. Aka, ina aole loa e hiki ia oukou ke pane mai, alaila, aia au ma ka aoao paio mau aku i ka pono o ko'u aina hanau a me ka Moi, a me ku lahui oiwi i aloha nui ia a i hooneleia hoi me ko lakou pono i keia wa, a hiki i ke au hulihia ana o na manao kuhihewa o oukou a me oukou a pau loa, na poe e alakai hewa ia nei e na uhane ino o na kupuna o oukou i hala e i ka po. Ina mai ia lakou mai keia mau manao o oukou e alakai hewa nei ia oukou, a nolaila, eia ka wa kupono no oukou e pikai a kai olena ai a kualima. Amama, ua noa! E aliali kapu, e aliali noa, noa ia, noa honua!
Aole i pau.

 

E Kipa a e Ike Ae

I kela hoa oiwi o kakou, ia S.M. Kamakau, ma ka halekuai waiona o Lovekeoe Ma, kihi o na alanui Nuuanu a me Marine. He heahea a he oluolu oia, a ua loihi kona kamaaina ma ia hale, malalo o kona mau haku mua elua, i pau. O na waiona maikai wale no ke loaa malaila, a pela no hoi me na waina Kaleponi maikai loa. Oluolu na kumukuai, a pela no me na hookipa a kuka pu ana me ua hoa la malalo o kona mau haku hou.

 

Eia mai no ka makou mau moolelo ke oili aku la, a na oukou hoi ia e kaana iho i ko laua mau kuhinia like ole.

 

He wati gula na kekahi wahine ka i haule a nalowale, maluna paha o kekahi kaa panee i ka hora 10 a.m. o ka La Pule, Ianuari 31, ma alanui Papu a holo iwaho o alanui Beretania, lele ma alanui. Piko a hoi no kauhale ma alanui Iana aku. O ka mea e loaa ai a hoihoi ae ia Misi Parisa, ma ka Hale Oiwi, e loaa no he uku makana. *8-1

 

NA MOKUPUNI.
Na Lono Huikau no ka Paeaina Holookoa.

 

Na Hunahuna no ka Makani Apaapaa o Kohala.

 

Iloko o kela mahina aku nei, la 9 paha, ua moku aku la ke kaula uwea o Honoipu, mai ka hale kopaa a me ko ka moku, ua kokoke loa i ka pali a ua haule pu me ke kaa a me na apana papa hole, ua pau ke kaa i ka nahaha, a mai pilikia paha ina he ola kino kanaka kekahi iluna. He ulia no keia na ike mua ia.

Eia ma ke awakumoku o Mahukona he moku Kaleponi o ka laina moku a ka Ona Miliona o Kula o Kamaomao. Ua kamaaina kona kapena i ke awa o Mahukona. Ke ku kona moku i ke awa no hoolei oia i kana na opelu he nui loa i kana upena. E ai mea hou ana o Kohala nei i na opelu hou; mai Kohalawaho a me Kohala-leko, e ai ana ia mau opelu hou. E hoi ana ia mau opelu hou. E hoi ana no Kaleponi i keia la. Uweae lala oe, i o ae nei, i kela kapena.

Ma ka malama o Ianuari, la 10, ua hoike ke Kula Sabati ma ka luakini o lole, o ka lakou haawina, o ia ka hanau ana o Iesu Karisto ma Betelehema Iudea. He maikai na ninau a me na himeni, aia maloko o ka Hoku Ao Nani na himeni, a me kamalii kula kaikamahine o Mauna Oliva. Ua nani no i o ae nei. Ua hiki mai no o T.S.K. Nakanelua, Kahu Kula Sabati Nui.

Ma kekahi ku ana mai o Kinau i Mahukona, oiai ka makani e pakuikui ana makai mai me ka ino nui. Mai Hilo mai oia a holo no Kawaihae. Ia ku ana mai i Mahukona ia po, ua like me ke kanaka ona ka luli i o a ianei, oiai ke kai e poi ana iluna o ka uwapo, aole i manaoio e ku mai ana ka waapa oiai e kaliia ana, ua loheia aku la ka leo o ke alii waapa e kahea ana i na kolu e kau na hoe iluna, me ka eleu nui na pili mai la ka waapa i ka uwapo me ka poino ole. Ma ka huli hoi ana o ka waapa ua loaa mawaho ae o Kapua, ua piha paha ka mile mai Mahukona aku a hiki ilaila. Oiai ka ino e pahola ana ma ia po, ua ike aku makou i ke kukui o Kinau me ka ikaika loa.

He malie maikai o Kohala nei i keia mau la a he mau kilihune u aliilii no, aka, he mea ole nae ia i na kupa o ka aina Haaheo i ka hele a ke kula, kohu ahuula ke ike aku, e aloalo ana i ka ua, he mea ole nae ia.

Ma ka la 14 o Feberuari i hala, i hoike ai ke Kula Sabati o Kaipuhaa i huiia me ko Haena. He ekolu papa kula; o na opio, o Misasa Carrie Luhiau; na makua, o Rev. S.C. Luhiau; ko Haena, o C. Kaili. He maikai na ninau a me na himeni malalo o ke alakai ana o Misasa Carrie Luhiau. O na himeni, ma Nalii; no Solomona na haawina a me na ninau; o na himeni ma ka Hoku Ao Nani. Ilok o keia Kula Sabati, o na keiki kekahi e Puuwaialoha Club. Ua hiki kino mai no ke Kahu Kula Sabati Nui. T.S.K. Nakanelua mai Kawaihae kai mai ia kakahiaka Sabati. He nui na mea hou ua pokole ka manawa.
PUUWAIALOHA.
Mahukona, Hawaii, Feberuari 17, 1897.

 

E HOOPAA POHO

I Kou Hale a me na Pono o loko mai ka poino ana i ka Ahi me ka

--HUI--

Panihakahaka Ahi Springfield

WAIWAI IO, $4,105,374/75.

Oluolu a Haahaa loa na hoouku ana.

W. F. WILSON, Agena, Helu 209, Alanui Kalepa, Honolulu.

[ fby. 15-6ml.]

 

HUI HAWAII KUAI AINA.
NA LUNA NUI.

JAS. H. BOYD                      Peresidena.
J.K. KAULIA                        Hope Peresidena.
C.A. LONO                            Puuku.
ENO CH JOHNSON              Kakauolelo.
W. C. ACHI                            Luna Hoohana.

NA LALA O KA PAPA ALAKAI.

J.K. KAHOOKANO,            R.W. WILCOX,                    J.W. BIPIKANE.

He Hui i kukuluia no ka hookuonoono a kokua ana i ka lahui Hawaii; na makemakeia na Hawaii a pau loa e komo mai i ka Hui.
Honolulu , Ianuari 11. jan. 11-1yr.

 

HALEKUAI LAHUI KALAHIKI.

Helu 405, Alanui Nuuanu, ma ka aoao mauka ke keena mua o ka "Hawaii Holomua." Ma ia halekuai o na oiwi e loaa ai na anoi a me na palihi o na ano hou loa, e laa Na Kalakoa, Na Keokeo, Na Makalena, na Kinamu, Na Huluhulu, Na Lihilihi, Na Kamaa o na Kane, e Wahine me Keiki a pela aku.

Oluolu no ke kuai ana. Aohe hewa ke ipa mai e ikemaka a aohe no hoi he kunuunuia no ka hoikeike ana i na mea kuai. M. PALAU, Luna Nui.
ok 14-tf

 

Hui Papa a Kukulu Hale Oahu.

(OAHU LUMBER & BUILDING CO.)

Leleo, Alanui Moi, kokoke i ke Kahua o ka Hui Alahao & Aina Oahu.

 

Poe Kalepa Laau, Hana Aelike a me Kukulu Hale. Poe Hookomo Mai a Hoolilo aku i na Puka, Olepelepe, Kui, Pepa, Pena, Aile, Na Pono Kamana, A pela aku.
Telepone 53. Pahu Leta. anlfby-tf

 

F.J. TESTA (Hoke).
MEA OHI A KOI AIE

Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.

Ua makaukau mau oia e lawelawe i na ano hana a pau e haawiia mai ana iaia e hana. Kuike ka rula.