Ka Makaainana, Volume VII, Number 11, 15 March 1897 — Page 5

HONOLULU , OAHU, POAKAHI, MARAKI 15, 1897. 5

 

a kakou no hoi na ewe e uhai aku nei ma ko lakou meheu e hoohui mai. Malia aole no he hoihoi i ka ka oiwi, aia no a he aina aihue aku ka makemake. Ua like no hoi paha ia me ka mea i oleloia--o ka huaai i aihueia mai ka oi loa aku o ka ono. Aole anei pela?

 

Ke lalama aenei no na o Kuokoa no ke kumu o ke Aliiaimoku i haalele ai i kona hotele mua o ka noho ana, mai ka palapala a ko ke Alii kanaka i kakau mai ai ia makou a hoopukaia aku ai ma ka helu i hala. Ua oleloia ae e ka hapanui loa o na nupepa Amerika a hoopukaia ae ao hoi e na nupepa namu hoohuiaina o nei a pau, i haalele ka ke Alii ia hotele mamuli o kela iono powa, a o ke hoa no kahi ma ia ano. I ka hoikeia ana mai la hoi o ka mea oiaio, loli awiwi aenei hoi ka walaau ana.

 

Ua oleloia ae no ke ano kuaaina loa aku ka o kela hotele hou kekahi kumu o ko ke Alii nee no laila. Ahea no la hoi pau na imiapa wale ana? Ua hoikeia mai nei ae he hotele hou loa kela a me ka nani, a ua mamao hoi mai ke kikowaena aku o ia kulanakauhale poo, eia nae hoi, aole loa ia i kuaaina, oiai, aia no iloko o Wasinetona. Imi wahi olelo no hoi na poe manaoino.

 

Aohe nae hoi he hoole mai o na o Kuokoa no ke kono ole ia o kona Kuhina Haki i ka aha hoolaulea hope loa a ka Peresidena i pau, a lilo aku la hoi ka hanohano a me ka "hookohukohu" i ko ke Alii kanaka. Pehea hoi ia? Haule paha i ke "auwe" o ka hoihoi ole ia.

 

Pela no hoi paha. E like no hoi me ka hoihoi ole ia o ke "auwe" repubalika ole wale, pela no e nele ai me ko "auwe" hoohuiaina polopolona. Ua hala ka hie a ua pau ka nani o Babulona nui. Auhea ke hoa, he hoomaopopo ole iho no paha i kela palapala a makou ma ka helu i hala i loaa mai Wasinetona mai nei, a malaila i hoike maopopo loa ia mai nei no ka hoihoi ole loa ia o na olelo pili no ia manao malaila. Ua make kanu loa no!

 

O ka hoihoi ole ia paha hoi ia la, ke haiamu la ka manao hoohialaai a ko laila poe i ke Aliiaimoku, ka elele kupono hookahi wale no ma ko ka lahui aoao. Ina ua manao io na elemakule e hoouna elele, e like me ka mea i hooiaia mai ia makou, e pono loa lakou e haalele ia manao lalau a kuhihewa, oiai, ua lawa no ka hana i ka mea hookahi. O ka hana pono loa ma ko na elekule aoao, o ia ka lulu iho i waihona no ka hana, a aole hoi ma ka hoomau aku ma ka makilo hele ana a me ka haanou wale.

 

Ke haliu la na maka o ko Wasinetona poe maluna o ka Elele Alii Kiekie o ka Lahui, a ke nee la ka mahaloia nona, no ka mea, ua hoike ae oia i ka oi ae o kona naauao a noonoo maikai mamua ae o ko na elele lehulehu mai keia Aupuni, a na ia mea hoi i hoike aku me ka hooia loa ia ua hana hewa loa ia oia a me kona lahui e na poe i pakaha ai i kona mana. I lawa no ka a hoea aku nei o Kakina a me Kamika ma iho, nui ko lakou walaau no ke "auwe" polopolona i hiki ole ke loaa, a he noho malie wale ia mai no ka ia e Kalani.

 

Ua lilo ka hoi na elale a me na wahaolelo o keia Aupuni o ke Kuokoa i poe hoomakeaka loa ia ma o, no ko lakou kohu ka nae he poe hoomakeaka la o loko o kekahi aha keaka lio hoolealea. A ia lakou hoi e hana nui ana pela, e lualai malie wale ia mai ana no ka ia o ko ka lahui elele aloha aina a aloha lahui oiaio. Pehea hoi ia?

 

Eia hou mai nei no me makou kahi manu iiwi a ua hoike mai ua hooiaia mai nei ka i ke Aupuni maanei, mai Wasinetona loa mai, he malama maikai ka ke Alii iaia iho, aohe ka he kamailio pili kalaiaina ae malaila, a no nee mai nei hoi ka mahalo nona. A ma ka olelo pu mai nei no ka hoi he oiaio ole ka no nupepa olelo hoino nona, no ka mea, aohe ka ona puai leo aku ma na mea pili kalaiaina a ano e ae paha, he ole a he ole loa no.

 

No ia ka hoi i mahaloia ai ke Alii, a nee nae hoi ka hoinoia ma o Kapena Pama la, no kona ano hukihuki, hoihiihi a hookapukapu loa ae ka. A no ke Alii ka hoi, aole mea e hiki ke oleloia nona. No ke Kapena na hoino ana a pau, eia nae, ua like wale no ia iaia me he wai la iluna o ke kua o ke kaka. O ka kakou no hoi ia e ike nei maanei o ka hoinoia o ke Kapena, a ua like ia mau hoino me he makani la. E hoino wale ia no oia aohe waiwai e loaa ana, no ka mea, aia no oia ke hoomau la i ka hana no ke Alii. O kona hoinoia, o kona hauoli loa hoi ia, oiai, he hoinoia ana ia no ke Alii i hoinoia a no kona lahui no hoi i hoinoia.

 

Ma ka hoike nae hoi a ka hoa namu o ke Kuokoa, ua lilo ka ke Alii i mea heakaaka a paheneheneia ma Wasinetona. Ke pane aka nei hoi makou aohe oiaio o ia ano olelo, aka, e like me ka hoike mamua ae ka mea oiaio i loaa mai nei i ke Aupuni.

 

O ka mea oiaio nae hoi, aia na Senatoa a me na Lunamakaainana ke kipa ike mau la i ona la, a ua oi loa ae hoi ke kulana i loaa iaia malaila mamua ae o ka mea loaa ia Haki, Kakina, Kamika a ia Palani Hosetine paha. Ua lilo ia aluh=ka i poe hoomakeaka loa ia, a ua lilo hoi na olelo hoino Alii i mea haule pu loa.

 

Aia nae hoi o Haki ke hoolaha la ma ko laila mau nupepa aohe ka o W.O. Kamika kulana pili oihana malaila, a i Kapalakiko nae hoi, ua hoike aku ua o Kamika, ka haku pookoi hoi o keia hui Aupuni o lakou, i ko laila poe kakau nupepa ua hiki aku oia ilaila ma ke ano he elele kiekie loa a he elele kuikawa hoi no ke Aupuni Hawaii. Ma Kikako ka laua i hui pu ai, pela ia mai nei. Auwe no ka hoi, huikau na makau a na lawaia la!

 

Ua lilo paha hoi ko ke Alii hoikeia mai me na hoomaikai ana e na loaa kalaiaina o na aoao Demokarata a me Republaika i i mea hoehaeha loa i ko kakou poe mikanele, a na lilo hoi i mea mulea a awahua loa no lakou ka hoomaopopo ana ua hiki ole loa ia Makinile ke kokua mai ia lakou, ina no e makemake io ana oia, no ka mea he kue loa kona Kuhina Nui i ka manao hoohuiaina. Na keia ae hoi i hoolilo aku i ko kakou poe hoohuiaina waha nunui i poe maluhiluhi loa, a ua hookaumaha loa mai hoi na hana uko ole a Kamika, Kakina a me ia aluka iho ma Amerika Huipuia a ua lilo hoi i mea luuluu loa no nei. Auwe ka make e!

 

Nana a kuekaa ka o R.W. Wilikoki i ko makou manao ma ka helu i hala e pili ana i ka hiki ole i kana nupepa ke hoopuka ae i na kalaimanao pili kalaiaina a olelo iho la ka he mea hoopiha nupepa wale no ka ia, no ka nele ka i kahi mea e piha ole ai. Ina o ko ka hoa'loha manao io ia, alaila, ua nele loa oia me ka noonoo e hiki ole ai ke hoomaopopo i ka mea hiki ia makou ke hana. Aohe wa o makou i nele ai, aka, ua makaukau mau i ua wa a pau e hoopiha a hu a hanini loa aku mawaho. Aohe wa e emi a e pio ali o ka wai hu o ka manao, i lohe ke hoa.

 

Pii aenei hoi ko lakou nei ma ae makau i na eemoku Kepani hope loa e hoomaluia nei makai o Kahakaaulana, nee mai ke kauohaia iuka nei no ona poe makai hou e kokua ai i ko kai poe kiai i ka hora 10 aumoe o ka Poalua iho la, e kani makawalu ana na ulili kahea a e naholo paukiki ana hoi na makai kaulio. Eia ka i makemakeia i poe kiai no J.A. Makuna, ka lunahoomalu o ka aha nieniele no ke ano o ka laweia ana mai o ia poe eemoku i o kakou nei.

 

Maalea no nae hoi ka waihoia ana mai a ma ka po mamua iho o ko ka Auseteralia wa holo. O ka manao paha, i mea e hoopuiwa aku ai i ko Amerika Huipuia poe a hoohui koke mai ia Hawaii nei. Eia nae, ua ike koke ia no nei hana a lakou, oiai, ua kapulu ka lawelaweia ana, a e hoka mai ana no . A ike iho no hoi kakou la!

 

He uku ana no hoi paha ko lakou nei ma ae hoihoiia mai malalo o ko Makinile au hooponopono mamua ae hoi o ka mea i loaa lakou nei ma ae hoihoiia mai malalo o ko Makinile au hoopopopono mamua ae hoi o ka mea i loaa ia lakou malalo o ko Kalivilana au. Ua make loa ka hoohuiaina. A ua haiki loa hoi kahi manaolana no ka hooloihiia aku o ke ola ana o ke Kuikahi Panailike. Nolaila, aohe no he waiwai e loaa mai ana ma nei hana hoopuiwa hope a lakou.

 

O ka mea i maopopo loa i nei wa, ua ulu he hana me Iapana, a i loaa hoi nei hana mamuli o ka ike kanawai o ka Loio Kuhina no ka manawa. Ua malama a ua lawelaweia kela aha nieniele i keia po a pau i ka hora 4 paha o ka wanaao, me ka ae ole ia o kekahi mea ma ko na eemoku aoao, ole loa hoi nai na luna o ke Aupuni o Iapana maanei a mai na agena eemoku hoi o nei. He ole a he ole loa no, a he keu maoli keia a ka hana kapakahi.

 

Mamua iki aku hoi, he aha nieniele okoa no kahi i malamaia e ka Luna Kiai Awa, a i nei iho nei hoi, ua ikeia ua like ole na olelo hooholo no na poe i kuleana e hoopaeia mai a me na poe hoi i hiki ole ke aeia e pae mai. Ua haaohaia ka mokumahu e hoihoi hou aku i na poe i hooleia, a ua hooleia mai e ke kapena. Nolaila, heaha ana la ka mea e hanaia aku ana nona.

 

Nawai la hoi i hoomana aku i aha okoa ae kahi mawaho o na aha hookolokolo i hookumuia e ke kanawai? Na ka manao piha haakei no hoi paha o keia Aupuni, a pela no hoi me ka hoomanaia ana o Makuna i lunahoomalu. Ia Makuna nae hoi, kiaiia oia e na makai me na pu, a kauoha oia aeia na poe kakau nupepa.

 

 

Ua kuleana ole loa hoi nei hoao ana e punuku i na nupepa, oiai, o lakou no na maka o ka lehulehu, a ua kuleana hoi lakou ma na wahi a pau. Eia nae hoi, i nei au ke ake loa ia e

 

(E nana ma ka aoao ewalu.)