Ka Makaainana, Volume VII, Number 13, 29 March 1897 — Page 2
2 HONOLULU, OAHU, POAKAHI, MARAKI 29, 1897.
LEONE DE BOANE
-
KA MEA OHUMU KIPI O COADOVA
-
MOKUNA IV.
KE ANA KUAHIWI.
[Mai ka Helu 12.]
A me koia hoola ana i hoopaa loa ia iloko o kona noonoo ana, ua hilinai aku oia i hope iluna o ka pohaku puanuanu, a aole i emo iho, hiolani ana oia me Niolopua e like la me kona ukali kupaa mau.
I ka puoho ana ae o ka kakou kaeaea, ua loaa iaia na puoho a ua eueu mua ae no hoi o Gaberiela; a ike iho la no hoi oia he keu a ka malamalama o ua wahi la. He ana nui a hohonu; ano like ole ka waiho ana o kona ano, oia hoi, o na aoao; a o kaupoku hoi, ua kiekie loa ae ia maluna ona, me kekahi owa loihi a olowi, a ma ia wahi hoi i komo iho ai na kukuna malamalama o ke kakahiaka. O ka ma wale no nana i hoike aku i ka ke kanaka hana, o ia ka puka, he puka hao, a me ka noeau a mai au loa i hanaia ai a ku a pili pono loa ma kona wahi.
"Ua noke iho nei anei oe i ka nana i ko kaua wahi?" i ninau aku ai ka naita mahope iho o kona kilohi awiwi ana ia loko a puni.
"Ae," wahi aku a ke kanaka. "Ua kiei iho nei au iloko o kona mau kuono a poopoo a pau, a ua ike au ia'u iho e ae ana o keia ka halepaahao oi loa aku o ka paa a'u i ike ai. O ua keena hoopaahao o ke kakela kahiko ma Boane, he mau keena moe ia ma ka aoao o keia nei."
Ua nana hou ae o Leone i kahi o laua e noho paa pio ana, a noho iho la ma kona wahi mua o ka noho ana.
"He mea oiaio," wahi ana, "aohe wahi e hiki ai ke pakele aku mai nei; nolaila, e kakali no kaua a hiki i ka wa o na poe na lakou kaua i hopu pio e hele mai ai"
"Ae," i pane aku ai o Gaberiela, me kona lawe ae no hoi i wahi nona e noho ai.
"Aohe a kaua mau mea kaua," i hookamailio aku ai o de Boane, mahope iho o ka hoomaha iki ana.
"Aohe," wahi a kona hoa. "
A e kakali hoi kaua no ko kaua hopena me ka malie loa e hiki ana."
"Ae."
Ua meha hou iho la laua, a iloko hoi o ia wa e luaiele ana na noonoo o na poo me ko laua mau manao ponoi iho.
"E Gaberiela," i kamailio okoa aku ai ka naita, me ka leo anoano eehia, "ua noonoo pono loa au i keia mea me ke akahele, me kona mau loina ku i ka oiaio a pau, a me kona mau mea a pau e hoea mai ana; a ua konoia mai hoi au ma ka manao ana ua hooholoia ko kaua make!"
"E kuu haku maikai," i pakui aku ai ke kanaka, me ka nana ae iluna me kekahi nanaina o ka ehaeha, "aole loa au i aa e hoopuka aku ia manao ia oe; eia nae, ua ulu mai no ia haloi ia'u e like la me ia ia oe. Auwe no hoi, ina paha he mea hiki ia'u ke make nou!"
"Hamau, e kuu hoa'loha. Mai olelo ae oe pela. Aole loa au e kuai aku i ke ola me ia kumukuai. Eia nae, ke mahalo aku nei au ia oe. Ua ike no au ua aloha oe ia'u; a owau no hoi kahi, ua aloha ia oe; no ka mea, ua oiaio a ua kupaa oe. Aole, aole - ina he ola kahi e hoopakeleia ana, o kou ia, no ka mea, no'u keia manao inaina loa ia e hookau mai i hoopai. E uwalo aku no au ia lakou, e Gaberiela, no kou ola, i hoihoi aku ai hoi oe i kauwahi olelo mai a'u aku i Noamanade. E paleia ae no ka hookahi-hapalua o na hoomaka'uka'u ana a ka make ina e hiki ana ia'u ke hoouna aku i ka'u olelo aloha hope loa i kuu makuahine aoo. O, ke manaolana nei au e hookoia keia iini o'u!"
"Auwe!" i leo ano uwe aku ai ke kanaka me ke kaumaha kuhohonu naauauwa, "e lilo ka hoi ia i huakai haalilipo loa o ka luuluu welenia no'u. Ua oi aku no ka make. Pehea la au e hui aku ai i kou makuahine-pehea la au e hui aku ai me na kanaka Noamanade - me ka olelo maluna o ko'u mau lehelehe ua haalele iho au ia oe e make?"
Mamua ae o ka hiki ana ia de Boane ke pane ae no nei mea, hemo ana kapuka hao kaumaha, a komo ana ke alakai powa me ka ukaliia aku e eono o kona poe hoa powa hiena.
Aole i pau.
-
Moa Hanau Apikiia.
La 22 nei, ma Kaneloa, Waikiki, ma kahi noho o Misasa L. Kainana Puahi, ua kiko mai la kekahi kumulau moa, he eiwa ka nui o na keiki, a o ka moa keiki hope loa he eha ona mau wawae, elua wawae e like me ke ano mau o na moa, he elua mau wawae malalo ae o na keu ma kahi e pili ae ana i ka puapua Eia no ke ola nei me ka maikai.
-
Ke hoomanaoia nei no paha hoi no kahi mokumahu Kahului, e holoholo ana mawaena o Kapalakiko a me Honolulu nei no Kahului. Aia oia ke hoomaemae hou ia mai la ma Kapalakiko, e ana hou ia ana a loaa ka hoopaa a hoonohoia aku malalo o ka helu a me ka hae Amerika, a e heaia ana i inoa hou nona, oia o Kalivilana, mahope o ko laila Peresidena i pau.
I NUI KA PULE!
-
Ko ka Po Hoike ia, a Heaha
ana ka ke Kiai?
I ka po o ka la 1 o Feb, 1897, loaa iho la ia'u keia wahi moe. Ike aku la, ko'u uhane i kahi moku kiakahi hoihoi Helena iwaho o ke awa. Ike hou aku la au e huli iho ana a ala hou ae la, a huli hou iho la no a ala ae la, pela mau iho la ke ano a hiki i kekahi puhi i ka lae pohaku. Ia wa au i ike aku ai ia Kole e hele ana mai ka moku ae a i uka o ka aina. Ia wa ua huro aku la makou me kau haole. I keia wa i pane mai ai o Kole: "I nui ka pule, i make ka enemi." A puoho ae la au.
JNO. M. MAHUKA.
Na Wehewehe Hoohano.
He 8 no mahele ma ka moe ma ka nana iho:
1- Kiakahi heihei. O ka hana a ka moku heihei, he hana paonioni ia i akenuiia e loaa ka lanakila; eia ke hoike nei ka moe, ke alakai ae nei i kona hopena i ka lae pohaku i kahi o ke puhi.
2 - Ka inoa Helena. He hoike ia no ka papahi lei kalaunu. Helena, like ia me hele ana paha, nolaila, aia i ka hele ana ka wehi, ka ohu; ka lei o ke kalaunu.
3 - Ka huli ana o kahi moku a ea hou ae, a pela aku; he hoike ia o ke kulanalana me na manao kuihe, ka manao haalele wale a me ka pono noho pu wale iho no.
4 - Ka hiki ana o ka moku i ka lae pohaku. Ma ka hoomaopopo ana, me he la o ka hopena loa ia o ka hoohanaia ana o keia wahi moku, pau. Ina iho la ia o ke kulana o ke Aupuni i noho hookeleia e Kole, alaila, ua hiki i ke puhiia ana e ke kai, aka, maalahi no, ua kau i ka lae pohaku.
5 - Ka lele ana o Kole mai ka moku aku no ka lae pohaku i kahi o ke puhi. Ina ua pili keia haalele ana o Kole i ka moku no kona haalele i ke Aupuni, a i ole, waiho paha, he mea hou ia ina io paha pela, a i ole, ua aneane iho nei paha e haalele iloko iho la o na la i hala iho la.
6 - Ka makani. Aole he kumu e huli ai ka moku ke ole ka makani, nolaila, ua hiki ke hoomaopopoia keia kahulihuli e kahi moku (aupuni) ma o ka ikaika puhi o na olelo paio hahana iloko o ke Aupuni, a me he la, ua ulu mai he mau manao haalele a hoohuakeeo paha iloko o ka Mana Hooko o ke Aupuni, e like me ia e ikeia nei ma o ko Kole haalele ana i ka moku.
7 - Na leo huro o na haolo me na kanaka. He hoike ia o na leo mahalo ia Kole, o ia ko ka po; aka, he hoohilahila me ka hoowahawaha a me ka hoohenehene paha auanei ka mea e hoea mai ana.
8 - Ka leo kauoha o Kole, "I nui ka pule, i make ka enemi." I ka hoomaopopo ana i keia noi pule a Kole, me he la, ua ikeia ka nui o ka pilikia e nee mai nei mamua, i noi ai oia i ka lehulehu e pule i make na enemi. He pilikia io anei o mua a hoea mai? I nui ka pule!
KILOKILO DIMERATA.
-
O Kamaa Wale No!
-
Pomaikai no ka Mea Ilihune.
-
Ma keia mua aku he 5% ke hoolaweia ana no kela a me keia kuai ana ma ke dala kuike ma na waiwai a pau o ko makou halekuai. E hoomanao ua kau moakaka ia kumukuai kuike maluna o kela a me keia mea no ke kuai aku. Nolaila, he pomaikai ke kuai ma o ko makou nei halekuai, ua like me he 10 pa-keneta a oi ma na wahi e ae i kau moakaka ole ia kumukuai.
Mamuli hoi o ka nui o ka makou hana i ka makahiki 1896 i pau iho la i konoia mai ai makou e hana aku e like me keia ae la, i mea hoi e pomaikai ai o ko makou poe kuai mai a e hoomahuahua loa aku ai no hoi kahi i ka makou hana. O kamaa wale no ka makou e lawelawe nei, i loaa mai ma ke kuai kukaa a ua emi loa iho i ka ko na poe e ae maanei; a nolaila, pela no hoi paha e hoemi loa ia iho ai kumukuai o na kamaa i hiki ole i na wahi e ae ke hoohoa mai.
No ka oluolu, ka heahea a me ka hookipa maikai mai ke kumu i pii mau ai o ka makou hana, a ke hauoli nei no ia mea. Aia ka makou mau kamaa ma na wawae o na poe kupono a pau mai Hawaii a Niihau. E kipa a e hoao i ko makou Halekuai Kamaa, a ua hoihoiia kela a me keia ke komo mai, ina no aole e kuai ana.
Hui Kamaa o na Poe Hana
D.B. KAMIKA,
Luna Nui.
Alanui Papu, makai mai o ke kihi o Monikahaae. jry. 25-tf.
-
ED. A. WILLIAMS.
Helu 514, Alanui Papu, ma Ewa iho o
Pa Aloha.
-
He mea kuai lako hale o na
ano a pau loa.
-
He mea Hana Pahu Kupapau a Hooponopono Hoolewa.
E hoolakoia no na Kaa Kupapau, na Kaapio a me na Kaa-ohana.
Ina no e ninau iaia, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa iaia aia ia malalo o ka lawelawe ponoi ana a Ed A. WIlliams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po.
Helu 815.
nov2-mp. feb 3-mp