Ka Makaainana, Volume VII, Number 13, 29 March 1897 — Page 5
HONOLULU, OAHU, POAKAHI, MARAKI 29, 1897. 5
waihona no ka hana, aole hoi no ka piepiele, a mamuli o ka manaolana ana ma ia hana e komo mai ai ka manaoio no ko ka lehulehu pono o ke alu like ana e kokua, a ma ia kokua ana me ke kunukunu ole e loaa ai ka paepae oi loa aku mamua ae o ka paopao piepiele no ka pono pau wale i ka popo a me ka mu, aole hoi no ka pono oi loa aku no ka aina a me ka lahui.
Akahi no makou a hauoli ua kipehiia mai la, eia nae hoi, ua halahu loa ia kipehi ana mai la mawaho aku o ka makou i hoaiai ai, a ina hoi ua hawawa makou, ua makaukau mau no makou e auamo ia haawina hawawa i na wa a pau. E like no hoi me ka makou ao ma ka helu i hala, ina he makemake io keia no ka lahui e hookuonoono, ua ahona e komo a e kokua ae i na ahahui hookuonoono lahui mua i ku, i lihi launa ole a i lilo ole loa hoi i lala no kekahi ahahui a mau aha hui kalaiaina paha. Ma ka malama kaawale loa ana i keia mau mahele hana a elua e ike ai no ka hapanui ma kela a me keia mahele i ka nui o ka pomaikai, aole hoi paha he 10 pa- keneta wale iho no ka puka no ke dala hookahi no ka makahiki. A o ke kino kalaiaina a me ke kino hookuonoono, aole loa ia he mea hookahi, aka, he mau mea kaawale a ku kaokoa loa kahi i kahi, oia hoi, he okoa loa ka hookuonoono no ka hoahu a he okoa loa no hoi ka hookuonoono no ka piepiele, a ua pono ole hoi ia mau ano kino elua ke hoohuiia ae i hookahi. Ina ua paa ko ka Ahahui Aloha Aina manao, hana aku, a i kau mai hoi he alina, maluna no ia o kona hokua, aole hoi maluna mai o makou, oiai, ua hoolohe ole ia mai ka makou ao aku iloko o ka malie a me ke akahai.
I ke aili loa ana ae hoi o ko ka makamaka kuehuehu ana i kona manao, ua hoike mai oia i kona kamalii haalele loa mamua ae hoi o ko Waolani poe kamalii eepa kahi pohue. Ae, he mea oiaio, he kumuhana kokua na makou ka manao hookuonoono, aole nae hoi o ke ano e makemakeia nei e Peresidena Kaulia, aka, ina e kokua ae ana i na ahahui hookuonoono mua i ku, aia makou me ia. No na olelo hoi no ko makou hookonokono hewa ia mai e kekahi uhane kipa kauhale, mamuli ka hoi o ka aeia aku e komo mai, ke hoihoi hou aku nei no makou ia mau olelo lapuwale a kamalii uwe wale a nou pono aku no i ke hoa. Aohe o nei bele, aohe no hoi ho kaula huki, oiai, aohe KA MAKAAINANA nei he wahaolelo no kekahi ahahui, aka, ua alanaia oia no ka lahui a me ka aina nei i na wa a pau a ma na ano no a pau. Eia nae hoi, aohe o makou hilinai iki eia ka makamaka ke pule nei e hoopakeleia makou mai ka hoowalewaleia, a malia, e pule ana no oia no kona hoopakeleia, o hihia aua nei hoi ka umiumi a hawahawa na lima i ka waihona hoahu hookuonoono a ka lehulehu e hilinai kuhihewa aku ai. Amene.
-
HOOKUONOONO HANA IO.
-
Ke ku mai hoi ka Auseteralia i ka la apopo, e loaa mai ana paha hoi na lono ua oehu ke ahi o ke kaua ma Europa, a ua puka akea ae hoi o Beritania Nui a hoike ae i kona kokua mahope o Helene. Aohe i maopopo na hopena a ua hiki ole i kahi mea ke koho ae. Aia me Helene na manao aloha o na poe hoopono a maikai a pau ma kana kaua kue aku ia Tureke a i na poe Tuke i hoowahawaha loa ia, a oiai hoi, he uuku a he ilihune loa oia, ua loaa aku nae hoi iaia na hooia kamahao loa no ka hoohana aku mai na poe Helene ma na wahi apau o ka honua nei.
Ua lohe laulaha ole ia ae no paha hoi aia he ahahui (hookuonoono) lahui Helene nui, e lulu ana na lala o ia ahahui no kekahi waihona ma kahi o hookahi hapaha farani (ua like me 19 keneta o ko kakou dala) i kela a me keia malama mai ka Welau Akau a ka Welau Hema, a mai ka Hikina a ke Komohana. I ka wa i loheia ae ai no keia ooloku mai nei mawaena o Helene a me Tureke, ua haawiia aku keia waihona hoahua i ke Helene i hiki aku i ka huina o 12,000,000 farani (like paha me $2,400,000). Ea, he puu dala nui no kela o ka hoahuia ana e kela poe i ike i ke aloha aina oiaio.
Mai manaoia mai ilaila no i pau ai neia hana makee aina o na Helene. Aole loa pela. Oiai, he lahui kahiko loa mai lakou, ua kukuni paa loa ia ka manao aloha a makee aina iloko o lakou, me he la, ua komo a hookahi ka noho ana iloko o ua aa, ke koko a me na iwi, a o ia kahi mahele o ke ola o ia lahui, e like no me ko na lahui kumu e ae o Europa. I lawa no a loheua ae keia lono no ke kaua, ua hoouna koke ae o Averofa, ka ona banako hapauea e noho mana la maluna o na miliona dala ma Alekanederia, Aigupita, he 20,000,000 farani ($4,000,000) ma ke gula no ka waihona lahui, a ua olo ae ka pihe o ka mahaloia ma Europa no ka manao aloha aina oiaio iloko o keia hapauea i hanauia ma Masedonia, a ua hehi ole aku hoi kona mau kapuai maluna o ka lepo o ke Aupuni o Helene, ka aina hoi ana i aloha loa ai.
Aia na poe mai na anaina hoolaulea kiekie o Europa e nee la ka hele pualu ana no Helene me ka awiwi loa no ke komo aku e haawi i na kokua hooikaika kino a lawelawe lima maoli aku, a e ike aku ana ke ao nei i kekahi paio oi loa aku o ka hahana, e like me kekahi mau hooili kaua ana o na au i hala hope, e hiki ole loa ai hoi i ko ke ao nei ko hoopoina koko. Iloko o ke akahele a me ke akahai, ua hoike ae ka Moi o Helene iaia iho iloko o kona noho hoomalu loihi ana maluna o ia aina uuluku, ua kupono loa oia e hilinai a e alohaia o ia lahui. A ano hoi, ua aa aku la oia e paio no ka pono o kona lahui a no ka ihiihi a me ka hanohano hoi o kona aina, oiai, ua ike paha oia mahope iho o ka noonoo pono ana, ua makaukau loa oia e hoopapa aku ma nei hakoko ana.
O keia ae la ke aloha aina a makou i makemake ai, oia hoi, aole o ke kaua, aka, o ka hoahu ana i waihona no kahi hana i ike ole ia ma nei mua aku. E hookuonoono ae ka Ahahui Aloha Aina e like la me ka na Helene i hana ai ma ke ano kalaiaina no ka pono kalaiaina, a aole hoi ia hoahu a hookuonoono ana a na Helene i lawelaweia ma ke ano piepiele no ka pono piepiele o kela a me keia lala, aka, ua hanaia no ka pono kalaiaina o ka lahui holookoa. Ke hoomaikeike aku nei makou i keia ae la no ka pomaikai o kela makamaka i hoohihia ae i ka hoa'loha - Ke Aloha Aina.
-
KA OPALA HOPE LOA.
-
KOLE IA HAKI - (Ma ka Rio de Ianeiro) - He mea ku i ke alohaia a me ka iini nui ia mai ka Repubalika o Hawaii nei, i weluwelu hoi me na manao hoomahaema ka aina nei a i hilinai ole ia hoi ma ko na aina e. Aohe no hoi paha au e olelo aku ia oe no ko'u maloeloe a maluhiluhi, no ka mea, o na heluna kii hoolele aka lehulehu a'u i lawe mau iho nei, ua hoike moakaka loa mai ia i ka maluhiluhi a'u e noho nei. Mahope o ke kukakuka pu ana me o'u mau hoakukakuka, ua hooholo paa ko'u manao e hookikina aku ia Makinile e hoike ae i kona lima. Oiai hoi, ua hoomaopopoia o kahi mea wale no e hoomaka aku ai i ka hoeueu ana i ka lahui Amerika e pili ana no Hawaii nei, o ia ka hopohopo o lilo ko kakou mau paemoku i mahele no ke Komohana (o ka'u nae hoi ia e ike ole nei pehea ana la lakou e oi loa aku ai mamua ae o ia i nei wa), a he mau manao apakau mai kahi a Iapana maluna o ko kakou aina, ua hooholo au, i mea hoi e hoolaulea aku ai i ko kakou poe auamo pu, a iloko hoi o ka hopohopo a me ka haalulu o lilo auanei ia i mea e hooinaina aku ai i ko kakou poe mahiko, e hoohuli aku i hope i ka nalu nee holomuku mai o na eemoku Kepani, a ua hana hawawa a kapulu loa ia hoi e Kakela a me Kupa a lilo ia i mea no Iapana e kue maia ai, a ia wa aku auanei -hoaha ana? E palapala aku ia Peresidena Makinile, me ke kalele kokoko ole loa hoi i na kumu oiaio, i ka pilikia e hooweliweli mai nei ia kakou mai ia Iapana mai. Aia ka hapanui o ko'u hopohopo loa ana no keia mua aku o'u ponoi a o keia hoi ka'u pale no ka loihi loa o keia palapala. E like me kahi mea o ke au kahiko, "ua hoopaa au i ko'u ola maluna o kekahi loina kii, a e ku no hoi au mahope o ka poino ma ia hana." Ta ta!
-
"KE ALEALE NEI KA WAI."
-
No ke Kuokoa namu mai o ka auwina la Poakolu iho la ka makou lawe ana mai i "Ka Opala Hope Loa," a me he la, pela io no pahahoi ka mea i hanaia aku nei e Kole. Na nei mua aku ia e hoike a e huai ae i ke akea, ina ua hana io ia pela.
-
I hoike hoi no ka hoihoi ole o ke Aupuni i kela pane a Loio Kuhina Kamika i hoole ai i ka ke Aliiaimoku palapala, waiho a haalele kuleana i ka nohoalii, ua mihi loa ia ka hoolaha akea ia ana ae o ua palapala la mahope koke iho o ke kakauinoaia ana, oiaino hoi makou e noho mau wale ana iloko o Kawa ia wa. Ma na nupepa o ia wa i humu buke ia a i hiki hoi ke loaa no ka ka lehulehu nana ana, ua okiia keia palapala, a ua hauoli hoi makou e olelo ae eia no me makou kekahi o ia nupepa a me ka unuhiia ana mahope mai.
-
Eia nae hoi, noke mau ke Kuokoa i ka hoopukapuka pinepine ae i ua palapala la, aohe noonoo iho he mea hoihoi ole loa ia e na poo alakai o kona Aupuni. I make no la hoi o Pamano i ka io ponoi, a pela no i nei wa e hana mau nei. E hooki no hoi paha i ka noke mau ae, oiai, ua lawa loa.
-
Ua ano like no ka nei hana, wahi a ka lono, me ka kekahi haku o ka makamaka i hana koke iho nei, oia hoi, o Wile Kakela. He palapala kana i kakau ai a paiia iho nei no ka hoouna aku i ko na aina e, e noi aku ana i ko o poe e kokua mai i ka ninau hoohuiaina. Ua kakauinoa oia i ua palapala la, a malalo iho o kona inoa keia mau
-
(E nana ma ka aoao ekahi.)