Ka Makaainana, Volume VII, Number 13, 29 March 1897 — Page 6
HONOLULU OAHU, POAKAHI, MARAKI 29, 1897.
IOSEPINE
-KA-
EMEPERESE PUUWAI OLU O FARANI.
-
MOKUNA IX.
-
[Mai ka Helu 12]
UWO O IOSEPINE NO NA POE KIPI.
Ma ia hope koke iho no ua hoomaopopoia, aole no he poe e na poe na lakou kela hana hilahila ole, aka, na na poe no a Napoliona i hilinai ai, oia hoi, na poe Roialisa (poe kakoo alii). Aole wale o Napoliona ka i pahaohao no keia hana kumakaia, aka, o Europa holookoa a pau. O Napoliona ko lakou mea nana i hoopakele, a i kona hoomaopopo ana he mea hiki ole ke hoonoho hou ia na Borabona maluna o ka nohoalii o Farani, ua hoao oia e like me ka mea hiki iaia e hoomama ae i na hana hookaumaha a na Iakobina i hookau mai ai maluna o na Roialisa. Aole i hoonalonalo iho o Napoliona i kona hoowahawaha i na Iakobina a me ka lakou hooponopono aupuni lokoino. Nolaila, ua manao paa o Napoliona o lakou na poe na lakou kela hana karaima ekaeka. Aka, e like me na mea i hoikeia ae la maluna, aole na waho mai ka make, aka, he make no i ka hoaai.
O Fuke, he kanada no na Napoliona i makemake ole ai no kana mau hana lokoino a hoomainoino i kona mau hoa kanaka iloko o ke kaua kuloko, oia ke Kuhina Makai. Iloko o kona lima ka mana e hookolokoloia ai a hoopaiia o ka mea hoopiiia. Aole i hoohakalia o Iosepine i ke kakau ana aku i leta iaia, e hoike ana maloko o laila i ka haehae o kona puuwai, a e hoomaopopo pu ana hoi he mea pono e malamaia na koi a ke kanawai.
"I KE KUHINA MAKAAINANA - Oiai no au e haalulu nei no kela hana weliweli i hanaia, ke hoopilihua pu ia noi ko'u noonoo no ka makau i ka hoopai e hookauia mai ana maluna o ka mea i ahewaia, he mea hoi i pili, pela ka oleloia, i kekahi ohana i launa ia'u. Aole no auanei e nele ko'u koiia mai e na makuahine, na kaikuahine, a me na wahine i hoomehamehaia; a e naha no auanei ko'u puuwai ke loaa ole ia'u ke alohaia a'u e noi aku nei no na poe i hoopilikiaia.
"Ua ike au he nui ko ke kanikela mua iini no ko kala ana, a aole no hoi he palena o kona hoolohe i ka'u olelo iaia; aka, he ku maoli i ka weliweli ke karaima i hanaia e hiki ole ai ke nanamakaia. Aole wale o ke poo o ke aupuni ka i akelekele, a no ia mea auanei oia e uluku loa ai, nolaila, ke noi aku nei au ia oe, e hoohana oe e like me ka mana i loaa ia oe, e akeakea aku i na noii ana, i ole ai e hala loa aku ia mau noii a nieniele ana paha mamua o ka mea kupono. Mai hoao e owili pu mai i na poe i kokua i ka lawelaweia ana o kela hana karaima. Mai ae aku ia Farani e komo hou iloko o ke kanikau ana e like me ia malalo o na hooponopono aupuni i hala. Ua oi loa aku ka pono o ka hoomalielie ana aku i ka manao o ka lehulehu mamua o ka hoouluku hou ana aku malalo o na hana hoomainoino hou. I mea e hoopokoleia ai na hana, i ka wa e loaa ai na alakai o kela hana hoomahua, e kapae ae i ka huhu a me ka inaina no ke aloha ana aku i na poe malalo aku, he poe a'u e kanalua ole nei i hookonokonoia a i hoopiha pihaia paha me na manao haakei a imihala hoi.
"I kona wa i hoaahuia ai me ka mana nui, ke hoomaopopo nei au, ua oi aku ka pono o ko ke kanikela mua ahai ana mai i na puuwai mamua o kona noho hoomalu ana i na poe kanaka kuapaa. E kau i ka hoopai - ae, o kau hana pono ia - aka, ua oi loa aku ke kala. Ke noi aku nei au ia oe o oe pu kekahi e kokua ae i na kanaka i hoopilikiaia, ma o ko lakou mihi ana mai, e hoomama aku i ke koikoi o ko lakou karaima
"Oiai, owau ponoi nei kekahi i pakele mahunehune mai mai na popilikia o ko kaua kuloko, e hiki ana paha ia oe ke hoomaopopo iho i ke kumu o ko'u uwao ana aku no kela poe i hiki no ke hoopakeleia me ka hoopoino ole ana hoi i ke ola o kuu kane, ka mea a'u i minamina ai, a Farani holookoa hoi e hiipoi ai. Nolaila, ke noi aku nei au ia oe e hookaawale loa ae oe i na poe na lakou ka hana karaima a me na poe e ae, mamuli paha o ko lakou nawaliwali a me ka makau, e komo pu aku iloko o ua hana karaima la. Ma o ko'u kamaaina i keia kulana ma ke ano he wahine a he makuahine hoi, ke ike nei au i ka ehaeha o ko'u naau no na poe a'u e manao nei e noi mai ana ia'u. E hoao, e ke Kuhina maikai, e hoemi mai i ka heluna o keia poe e manaoia ana e laweia mai imua o ke kahawai. Ma keia kumuhana ke ike nei au, ua oi aku ka mea hiki ia oe ke hana mamua o ka mea hiki ia'u, a nolaila, ke koi aku nei au ia oe e kala mai oe no ko'u mahaoi. E hilinai mai i ko'u lokomaikai a me ka mahalo."
Aole i pau.
Moiwahine Ologa o Helene.
Iwaena o ko Europa poe Moiwahine a pau loa. me he la o ko Helene Moiwahine ka mea hoihoi loa ia e ka lehulehu iloko o keia wa. O ke kumu mai o keia, mamuli no ia o kona aa ana aku i ka nohoalii o Rusia a ua koe ole iho paha he kanaka Helene i ae ole e make nona. He Kama'liiwahine Rukini oia a he adimerala hanohano hoi iloko o ko Rusia oihana kaua moana. O kana mea i hana ai i hoihoi loa ia ai oia e na kanaka o kana kane, ka Moi o na Helene, o ia kona hoihoi hou ana aku i kona hookohu kulana adimerala i Sana Peterobuga, me ka olelo aku ua hiki ole hoi iaia ke paa iho i kona kulana maloko o kekahi aumokukaua i ki poka aku maluna o na poe Helene.
Oia ke kaikamahine hiapo a ke Duke Nui Konakanakine (Constantine) o Rusia a he kaikamahine hanauna hoi na ke Za Alekanadero II., i make. He oiwi kino loihi a kilakila kona a ua hoomaopopo hoi i ke kulana io maoli o kekahi Moiwahine, e like me ka mea i kamailioia, ma kona hele ana a me kona ano. Lamalama kona nanaina a ehuehu hoi kona lauoho, waiho like ka hiohiona me kekahi a-i a me na kipoohiwi nepunepu maikai. Ua hele oia ma o a maanei o Atenai me ka ukali ole ia, aole no hoi e kekahi wahine ukali, a ua ano akahai loa no hoi ke ano o kona komo aahu ana. Aia a he wa ike pili aupuni, alaila, ia wa auanei oia e ikeia aku ai e komo mai ana i na aahu nani i kupono i kona kulana kiekie. He mea punahele loa na momi iaia a aia hoi iaia kekahi o ia ano mea hoonani kumukuai kiekie a makamae loa.
Aia iwaena o na wahine o Atenai kona hoihoi loa ia a ua nui kona mau hoa'loha iwaena o lakou. E like no hoi me ke ano mau o na lala o ae o keia ohana alii akahai, aohe hookelakela ae o ka Moiwahine iaia iho e like la me ke ano mau iwaena o na poai pili alii e ae, a oiai hoi oia he kilakila ke kulana, he oluolu, akahai a piha aloha loa oia. He loea naauao loa oia. Ua aloha loa oia i ka ike akeakamai a me na moolelo palapala kahiko, a ua hiki loa hoi iaia ke kamailio me ka maopopo loa ma na olelo Rukini, Italia, Helene, Farani, Geremania a me Enelani. Ano mai noi no, na hiki iaia ke kamailio ma ka olelo Alabania. Paulehia loa oia ma ka ike mele a me na hana noeau, a ua hoohala nui hoi i kona manawa ma na hana kokua aloha a me na hana hoonaauao, akea, a ua hapai ae hoi oia he hookahi a oi aku paha mau kula holomua ma Atenai. E hooi loa ia aku ana kona aloha loa ia e na poe Helena mamuli o keia hana hoike makee ona i ka aina a kana kane Denemaka, keikikane hiapo a ka Moi Karistiano o Denemaka, e noho hoomalu la, a keehi aku la hoi i kona aina oiwi ponoi.
S.K. PUA,
He Agena no na Waiwai Paa
He Mea huli i na Kuleana Aina i mea e maopopo ai;
He Mea Ohi i na Aie i hiki ole ke Ohiia e na Poe no lakou na Aie, a
He Mea Hana i na Ano Palapala P Kanawai a pau
KEENA HANA: - Ma ke keena o R.W. Wilikoki, Alanui Konia. aug. 31-1mk.
-
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la i kahi noho o E.S. Boyd.
KUMUKUAI: - $1,000; $500 ma ke kuike, a ma ka Moraki ke koena no ekolu makahiki ma ka 8 pa-keneta ukupanee.
No na mea i koe, e ninau ia
BRUCE WARING & CO.,
a i ole, ia F.J. TESTA, ma ke keena o keia nupepa. sept. 7-mp
-
E HOOPAA POHO
I Kou Hale a me na Pono o loko
mai ka poino ana i ke Ahi me ka
-HUI-
Panihakahaka Ahi Springfield
WAIWAI IO, $4,105,374.75.
-
Oluolu a Haahaa loa na hoouku ana.
-
W.F. WILSON, Agena,
Helu 209, Alanui Kalepa, Honolulu.
[fby. 15-6ml.]
-
HUI HAWAII KUAI AINA.
NA LUNA NUI.
JAS. H. BOYD ....................Peresidena
J.K. KAULIA ......................Hope-Peresidena
C.A. LONG..........................Puuku
ENOCH JOHNSON.............Kakauolelo
JOS. PAAKAULA................Luna Hooia
W.C. ACHI............................Luna Hoohana
NA LALA O KA PAPA ALAKAI.
J.K. KAHOOKANO, R.W. WILCOX
J.W. BIPIKANE.
He Hui i kukuluia no ka hookuonoono a kokua ana i ka lahui Hawaii; ua makemakeia na Hawaii a pau loa e komo mai i ka Hui.
Honolulu, Ianuari 11. jan. 11-1yr
-
HELE HOOLUOLU.
O.R.L.CO.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni
Papa 1. Papa 2.
Manana - - $75 $50
Mahiko o Ewa - - 1 00 75
Waianae - - - 1 50 1 25
F.C. Smith,
Agena Ohua a Palapala Nui
feb10-tf
-
Hui Papa a Kukulu
Hale Oahu.
(OAHU LUMBER & BUILDING CO.)
Leleo, Alanui Moi, kokoke i ke Kahua o ka Hui Alahao & Aina Oahu.
-
Poe Hookomo Mai a Hoolilo aku i na
Puka, Olepelepe, Kui,
Pepa, Pena, Aila,
Na Pono Kamana, A pela aku, a pela aku
Telepone 53. Pahu Leta.
apl0-tf2