Ka Makaainana, Volume VII, Number 18, 3 May 1897 — Page 3

Ka Makaainana.

HONOLULU, OAHU, POAKAHI, MEI 3, 1897                3

 

NA PALAPALA

            [Aole maluna iho o makou ke koikoi o na hala a me na hewa no na manao e hoopukaia malalo o keia poo, aka, aia no maluna o na poe na lakou i kakau mai.]

 

Na ka Mea Hewa Ole o Pehi i ka Pohaku.

E La Lunahooponopono: -

            E ahonui mai ia’u ma ka hoikeike ana aku i ke ano o na lima o ke Aupuni e paa a e lawelawe nei i ka Oihana Makai.

            Eia ma ke Kahua Ma’i Lepera nei kekahi makai, a he luna hoi no na paahao, na poe hoi i ahewaia e ke kanawai, ke malama nei oia me ka pololei ole.  He nui ka mahuka o na paahao i keia kanaka, oiai no hoi keia lunapaahao he wahine manuahi kana e noho nei.  Alua makahiki a oi o ko laua noho moekolohe ana, aole nae he ike iho o ka Luna Makai A. K. Hutchison i keia kanaka haiha kanawai a ho@.  Ea ke manao nei au, ina e mau aku ana keia launapaahao, e pilikia ana ka lehulehu.

            Malalao o keia, akolu puka ana o na paahao mai loko mai o ka halepaahao, a iloko o keia mau puka ana, hoopilikiaia kekahi poe, oia hoi, ua komoia ka hale o Mrs. C. Z. Pa a hinanui aku kekahi a o lakou no paha i kekahi wahine, o Mrs. K. Manuela.  Mamuli o nei hana a nei lunapaahao haihai kanawai, ua hoopilikiaia ka mea nana ia waiwai.  A aole o ia wale, aka, i ke kakahiaka nui Sabati, Aperila 4, ua holo mahuka aku la ua mau paahao nei, u oki nae oe i ua kanaka nei, nui ka waha i ke kahea i ka pa iho, malama ke koi, ka ipuhao, a pela wale aku, eia ka, ua ahai ka pupuhi noho ana ia Pokoo, ma ka aoao makani o Molokai.

            Nolaila, e pono o Mr. Kanoealii e noonoo pono i keia olelo a ka Baibala – “O oe anei ke ao aku ia hai, mai maoekolohe oe, e moekolohe no oe?”

            Me keia mau manao, ke haawi nei au i ko’u aloha ia oe e Misita Lunahooponopono.  Na’u no,

E. H. KAMAHALO.

Makanalua, Aperila, 1897

 

Apiki no ka Hana a ia Mau Ewa.

E KA LUNAHOOPONOPONO: -

            Aia ma ke awawa kuhohonu o Pololu, Kohala, Akau nei, aia malaila kahi i hanaia ai kekahi mau hana o ke au ia Waawaaikinaaupo, mawaena o hookahi wahine i lua i keiki a me kekahi kaikamahine opiopio.

            He mau haumana kula laua, ua komo like i ke kula o Mauna Oliva.  O ka mea i lua i ke keiki, mamua loa ia, a o ka mea opiopio, he hope loa ia.  Ua hoolilo laua ia laua iho i kane kekahi a i wahine kekahi, oiai, he mau wahine wale no laua a i elua, hui ae hookahi ke kaunu pu ana me Waiolohia.  Ua kohu no paha i keia, hoo@ ana a laua, aole paha?

            He mau ewa keia e eha ai ka aoao ikaika, eia nae, ua makau ia mai la, a ua lilo aku la no i ka lealea a ko laua mau kino iho me ke ano kohu ole loa.

            O ka inoa o kekahi, aia i na laau e ulu ana.  Ina aole ia mea, e maloo ana ia kumulaau, oiai, o kona kapa no ia i na wa a pau.  A o ka inoa iho hoi o kekahi, aia i ka liko o ka ohia, ho mea e ola ai na manu noho kuahiwi.  Ina e hookomoia iho o K. me A. a hoohuiia ao, e loaa pau loa ana, he lei kaulana no Hilo Bay, he ohu hoohihi na ka malihini.  Eo maino a ao e hana hou pela i ko olua mau kino maikai.

ESIDEPA PELEDO,

Imi Pohihihi o ua Mauna o Bevia.

Kohala, Hawaii, Welo, Kulu, 1897

 

Kue ke Keiki i ka Makua.

E KA LUNAHOOPONOPONO: -

            Ma keia, ua maopopo he hana koikoi ka i ala ae mawaena o ka papa a me kana keiki.  Penei na kumu i ala mai: Ua telepone mai nei o Misita Luna Makai i kahi makai o Kipahulu nei,ae eleu oia a e hoomakaukau no keia po, e hele i ka hopu Pake puhi opiuma, a he Poaono keia, la 3 o Aperila.  Oi kali aku ke keiki a poeleole, huli okoa ana, a loaa aku iloko o ka hale inu uwala a me ke sake, ua pau i ka ona na kane a me na wahine, a me ua wahi makai nei, a oia no kona papa.  A o keia makuakane makai hoi, e noho ana oia me kekahi wahine hapa-haole iloko o kekahi rumi okoa.  Ia manawa a ua keiki nei i ike au, ua ulu ae la kona huhu i kona mama.  Aia ka mama i Honolulu i keia wa, i hele no mamuli o keia kumu, i ka holokakeme ka ulua hou.  Ia manawa ua kii koke aku la ke keiki i kona papa e hoi, oi koi aku a lalau okoa no i ka makuakane.  O keia ka wa uluaoa, hui aku, hui mai, hui kalo i ka nawao, haluku o loko, o ia no oe i ka lua i piha i ka i’a.  Nunui ae la na leo, kuhi aku a kuhi mai na lima, o a puupuu wale iho no koe, uwe alala ne keiki ka kahi poe, hukiia aku la ua wahi makai nei, a owau kahi i ukali aku ma ia meheu a hoea wale i ka hale o na makai nei.  Ia manawa, kamailio poao aku la keiki i ua wahi makai nei, oia hoi, kona papa: “I kauohaia mai nei oe e kou poo ma ka oihana makai, oia hoi, o Luna Makai; ma ke telepone kona kamailio ana mai nei o hoomakaukau oe i lio nou, a kau a holo aku oe a loaa aku lakou ia oe ma ka hale o J. Nakila.”  Ia manawa i lohe pono aku ai ua wahi kaito nei, he holulelule, loloha, a kii ana i ka lio a hooko aku la i ke kauoha a ua paa io he Pake puhi opiuma ia po.  Mamua nae o kou a haalele ana iho, na hoopuka mai la oia i kana keiki i na huaolelo welenia: “Ea, e kuu keiki, e ku ee a hele, aole oi kuleana e noho ai ma ka hale a ma ka aina.”  Hoole aku nei ke keika me ka i ana: “Aole au i hewa a i @ue i ko olua maluhia, e na makua.  Nolaila, aole au e hele.”  No ko’u makuahine ka aina, a no ko’u mau kaikuaana keia malu hale.  O oe ke hele, he makai ona rama oe.”  Ia la, pau ae la ka ike o kou kiu.  Nolaila, e oluolu oe, e ahonui mai i keia itamu, i ole ai e poho ka’u poo-leta.

Me ke aloha nui,

F KANANI

 

S K PUA,

 

He Agena no na Waiwai Paa

He Mea huli i na Kuleana Aina i mea e maopopo ai;

He Mea Ohi Ana Aie i hiki ole ke Ohiia e na Poe no lakou na Aie, a

He Mea Hana i na Ano Palapala Pili Kanawai a pau.

KEENA HANA: - Ma ke keena o R. W. Wilikoki, Alanui Konia    

                                                                        aug. 31 – 1mk.

 

Hoolaha Manao Hooko a Kuai a ka Mea Paa Moraki

            Mamuli o ka mana kuai i hoikeia ma kekahi Moraki hanaia e H. KAUAIHILO a me POIPE, kana wahine, o Kapaka, Koolauloa, Mokupuni o Oahu, ia Isaac Testa, ma ka la 20 o Augate, M. H. 1889, i kopeia ma ke Keena o ka Luna Kakau Kope ma Honolulu, Oahu, iloko o ka Buke 119, ma na aoao 76, 77 a me 78.

            Ke hoolahaia aku nei ma keia ua manao ka Mea Paa Moraki e paniku aku i ka Moraki i oleloia no ka uhakiia o ke kumu aelike, oia hoi ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W. S. Luce, Luna Kudala, ma ka

POAKAHI, LA 10 o MEI, 1897.

MA KA HORA 12 AWAKEA.

            O na wahi i hoakakaia ma ka Moraki i oleloia, ua hoikeia malalo iho.

ISAAC TESTA

Mea Paa Moraki,

Kumu: Kuike, ma ke dala gula o Amerika Huipuia.

I ka mea kuai mai na lilo palapala.

No na mea e ae i koe e ninau ia A. Rosa, Loio, Alanui Kaahumanu, Honolulu.

Honolulu, Aperila 10,1897

 

            Eia iho na wahi e hooliloia aku ana:

            Akahi – O kela mau apana aina a pau loa e waiho la ma Punaluu, Koolauloa, Mokupuni o Oahu i oleloia, a i hoakakaia maloko o ka Palapala Sila Nui 1294, Kuleana 4364, no Kekaumiumi – Ili 1.50 Eka.

            Alua – O ke kuleana a pau loa i mahele ole ia o ka Mea Hana Moraki i oleloia iloko o ke Ahupuaa o Puheemiki, ma Koolauloa i oleloia, i hoakakaia maloko o ka Palapala Sila Nui (Aina Aupuni) 3053 no Kaaimanu a me kahi poe e ae – Ili 45 38-100 Eka.  O kahi i oleloia, o ia no hoi kahi i hooliloia i ka Mea Hana Moraki e J. N. Kaouli ma o ka Palapala Kuai i hanaia ma keia la like me ka Palapala Moraki a kopeia ma ke Keena Kakau Kope ma Honolulu i oleloia, iloko o ka Buke – ma na aoao –

            Akolu – O ka aina a pau loa i koakakaia maloko o ka Palapala Sila Nui 3012, Kuleana 4331, no Kamano, nona hoi ka ili o 1.40.  Eka, e waiho la ma Kapaka i oleloia, o ia no hoi kahi i hooliloia mai e S. Waiwaiole i ka Mea Hana Moraki.

            Aha – O na aina a pau i hoakakaia iloko o ka Apana 2 o ka Palapala Sila Nui 2909, Kuleana 4055, no Kaukaliu, a hooliloia i ka Mea Hana Moraki e Keaka, kaikaina a hooilina hookahi ma ke kanawai e ole ana o Kaukaliu i oleloia, e waiho la ma Kapaka i oleloia.                                                                                                    apr. 12 – 5ts

 

Robert Napunako Boyd

(ITALIA)

He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.

            Keena Hana: Mauka iho o ka Hale Leta, maluna ae o ka haleaina Pake, Alanui Betela.                                                                                                       apl 13-mp

 

William Kamalii.

            Pena Hale o na ano a pau, Kau Pepa a Lu One paha, e like me ko oukou makemake.  Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia.  Ua hiki ke hookoia na hana me ka eleu loa a o na kauoha a pau mai na kuaaina mai ua hiki ke hookoia.  He oluolu loa ka uku ma ke kuka olelo ana.  E kipa mai e na makamaka, mai poina.

            Keena hana, ma ko S. K. Pua keena, Helu 7 ½, Alanui Konia.

            Wahi Noho, Kapalama.                                                           mar 15-6m

 

NO KE KUAI.

            He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana.  Aia keia wahi ke pili kokoke la ma kahi noho o E. S. Boyd.

            KUMUKUAI: - $1,000; $500 ma ke kuike a ma ka Moraki ke koena no ekolu makahiki ma ka 8 pa-keneta ukupanee.

            No namea i koe, e ninau ia

BRUCE WARING & CO.

a i ole, ia F. J. TESTA, ma ke keena o keia nupepa. 

                                                                                                            sep 7-mhp

 

Hoolaha Manao Hooko a Kuai a ka Mea Paa Moraki

            Mamuli o ka mana kuai i hoikeia ma kekahi Moraki i hanaia o G. W. Okuu o Honolulu, Mokupuni o Oahu, Paeaina Hawaii, ia A. Rosa, Kahu Waiwai, i kakauia ma ka la 5 o Iune, M. H. 1889 i kopeia ma ke Keena Kakau Kope Aupuni ma Honolulu i oleloia, iloko o ka Buke 110, ma na aoao 368 a me 369;

            Ke hoolahaia aku nei ma keia ua manao o ka Mea Paa Moraki e paniku aku i ka Moraki i oleloia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W. S. Luce, ma ke kihi komohana o na Alanui Papu, me Moiwahine, ma Honolulu i oleloia, ma ka

POAKAHI, LA 10 o MEI, 1897.

ma ka hora 12 awakea, i na aina a pau loa i hoikeia maloko o ia palapala a i hoakaka piha loa ia hoi malalo iho.

A. ROSA

Kahu Waiwai no ka Mea Paa Moraki, Kumu: Kuike, ma ke dala gula o Amerika Huipuia.

I ka mea kuai mai na lilo palapala. 

            Honolulu, Aperila 10, 1897

            No na mea hou aku i koe, e ninau ia A. Rosa, Loio, Alanui Kaahumanu, Honolulu.

            O kahi i paa malalo o ka Moraki i oleloia, o ia no: Kela mau apana aina a pau loa e waiho la ma Moanalua, ma ka Mokupuni o Oahu i oleloia, a i hoakakaia ma ka Palapala Sila nui 427, Kuleana 1186, no Kukalamanu, no laua hoi ka ili o 465 Kaulahao, a i lilo mai i ka Mea Hana Moraki ma o kekahi Palapala Kuai i hanaia i Mei 12, 1886, i kopeia ma ke Keena Kakau Kope i oleloia iloko o ka Buke 102, ma na aoao 37 a me 38.

            Ua paa keia aina i ke kanu laiki ia e kekahi Pake e uku mua ana he uku hoolimalima o - Dala no ka makahiki.        

                                                                                                apr. 12-5ts.

 

HELE HOOLUOLU

O. R. L. Co.

MA NA POAONO A ME NA LA PULE

            E haalele mai no na Kaamahu i na hora 9:15 A. M. a me 1:45 P. M., a hoea hou mai i Honolulu nei ma na hora 3:11 a me 5:35 P. M.

 

Na Palapala Uku Puni

                                                                                    Papa 1             Papa 2

Manana                                                                         $.75                $.50

Mahiko o Ewa                                                                1.00                 .75

Waianae                                                                         1.50                1.25

F. C. SMITH

Agena Ohua a Palapala Nui