Ka Makaainana, Volume VII, Number 21, 24 May 1897 — Page 2
This text was transcribed by: | Laila Poche |
This work is dedicated to: | Awaiaulu |
Ka Makaainana.
2 HONOLULU, OAHU, POAKAHI, MEI 24, 1897.
LEONE DE BOANE
KA MEA OHUMU KIPI O COADOVA
MOKUNA VI.
HE PALAPALA.
[Mai ka Helu 20.]
"Alia!" i leo nui mai ai ke alakai powa, me ke ani peahi mai i kona poe kanaka e kuemi hope aku. "Aia i ke Karistiano ka'u olelo paa no kona palekana."
"Eia nae, aole i loaa iaia ko makou," i pane aku ai ka lutanela i hele a pioloke.
"Ae, aole i loaa iaia ko makou!" i hooho ae ai ka hi poe e ae.
"Eia nae, aia me ia ka'u!" wahi a Miramolina, me ka hapai ae i kona kino a kona kulana kilakila loa, a nana hulili ae la kona mau maka o a maanei.
"Ua makemake anei oukou e uhaki i kekahi olelo hoohiki paa hemolele loa?"
Aole loa he wahi puai leo iki ia ae no keia.
"E hele laelae aku ka naita Karistiano a me kona hoa, o like me ka'u i olelo paa ai," i hoomau mai ai ke alii i ke kamailio ana, me ka haliu pono mai no imua o kona poe kanaka, a me ke kamailio mai no hoi ma na puana ana i hiki ole ke hoohewahewa a ke kuhihewaia aku e na poe ike iaia. "Ina au i moeuhana mua o keia ana la ka hopena e ukali mai ana, aole loa la au e ae i keia hoao hoopapa ane, a laa ka hopena awahua la; eia nae o ia iho la no hoi e like me ia i ikeia Aole loa e uhakiia ka olelo paa a Miramolina."
"Eia nae hoi," i walaau aku ai ka lutanela me ke ano pukiki, "heaha la ka kakou e hoike aku ai i ke kiaaina o---"
"Hamau!" i hooho leo nui mai ai ke alii powa, me ka haawi ao he awihi maka ao aku i ke aliikoa. "E akahele o hana ole oe i kahi hewa oi ae i ka'u i hana ai. Waiho mai ia mea me a'u. Ua hoohiki au ma o Ala la, a e hookoia hoi ka'u hoohiki! Owai la iwaena o oukou i makemake e hoolilo mai ia Miramolina i enemi? E pane ae---no ka mea, o ke kanaka e kue mai ana ia'u i keia wa, e hoeueu ae ana @a ko'u inaina."
Me ke akahele loa i kuemi hope aku ai na powa, a hiki i ka wa i haalele hookahi ia mai o ko lakou alii me ke Karistiano. Alaila, ko Miramolina wa ia i huli ae ai ka kakou kaeaea, a mahope iho o ka nana ana iaia mai ke poo a na wawae, me he la e hoomaopopo ana oia nona iho aole i manuheu iho ka mea i ku ai imua o ka pilikua, na olel@ aku oia---
'E Leone de Boane, mai make oe ma ka'u kauoha ana he hora i hala ae me ka piha hauoli; aka, aole loa au e uhaki i ka'u olelo. He hana kamahao kau i hana ai; ua hoopioia e oe ke koa oi loa aku o ka ikaika ma Sepania nei; a e like no auanei hoi ia me ka'u i olelo ai. Nolaila, e awiwi oe no ka hele pu mai me a u, no ka mea, aole maluna o'u ke koikoi no kou ola ke noho hooloihi loa iho oe maanei."
"Ua makaukau au e hele i keia wa," i pane aku ai o Leone de Boane. "Owau a me ko'u ukali."
"O olua a elua," i panai aku ai ka Mua. "Ua olelo au o olua; a pela no auanei hoi o olua pu no. Eia nae, e ae olua e palulu hou ia ko olua mau maka."
"E hilinai aku no au i kou hanohano," wahi aku a Leone.
"Ua pono."
Me kekahi mau olelo hou ole ae, na ani lima aku oia he elua o kona mau kanaka e hele mai imua, a ua paluluia ae hoi na maka o na pio a elua a paa loa, alaila, na alakaiia aku laua mai ia wahi. Ua lohe aku no laua i na olelo piha hoonaukiuki a inoino a na powa i hoopuka mai ai me ko laua lohe pono loa aku no, eia nae, aohe mau mea e ae i hanaia mai. Ua lawaeia aku laua ma na ala kikeekee e like no me mamua, e iho ana i na anuu hohonu awaawaa a e pii ana i na kualapa, a maloko aku hoi o na kahawai kuhoho, a hiki wale no i ko lakou ku ana ma kahi e lohe pono ia aku ai e ko laua mau pepeiao o ka owe mai o ka wai o ka muliwai. I ka wa i weheia ae ai o na palulu mai ko laua mau maka aku, ua ike iho laua e ku ana laua ma kapa o ka Muliwai Gadalakuiwa, ma kahi kokoke i ke alanui. O Miramolina wale no me iaua, ua noho aku hoi kona poe ma kekahi wahi mahope aku.
Aole i pau.
I ke ku ana mai o ka mokumahu Kalaudine i kakahiaka La Pule, la 9 nei, a pili i ka uwapo, ua kau koke o J. Nipa, he ona kaa hali ukana a na hoehaia mai e kekahi luina oiwi. Ua hoopiiia ka mea hoeha a ua ae i kona hewa imua o ka Aha Apana i kahi kakahiaka ae a hoopaiia e uku i $10 me na koina.
Mai ka John K. Kahalio palapala o ka la 14 nei i lawe mai ai makou i ka hunahuna mahope iho: "Ke oomaemaeia nei ke Kahua Ma'i Lepera no ka hiki mai o na lala o ka Papa Ola. Nani na hale a maikai na alanui ke nana aku; ua kohu taona loa no o Kalaupapa nei i keia wa a ke pii mahuahua mai nei no hoi ke kukuluia ana o na hale maikai i ano like aku me ko Kaona Pake (China Town)."
MA KE KAUOHA.
OLELO HOOLAHA.
OIHANA WAIWAI,
HONOLULU, P. H., Mei 10, 1897.
Ke hoolahaia aku nei ma keia i na poe a pau e paa ana i na Bona Aupuni Hawaii o na la a me na heluna dala mahope iho, ma ka la a mahope iho o ka piha ana o ka wa hookaa o keia kupono (coupon--palapala hooia ukupanee) ae, iloko o na malama o Iune a me Iulai o 1897, e pau no ka ukupanee.
E ukuia no ke kumupaa o na bona i oleloia ke waihoia ae ma ka la o keia piha ana ae o ke kupona.
KANAWAI O AUGATE 5, 1882
Papa A, Bona Helu 395, hanaia Jan. 27, 1883, no $1,000.
Papa A, Bona Helu 396, hanaia Jan. 27, 1883, no $1,000.
Papa A, Bona Helu 397, hanaia Jan. 27, 1883, no $1,000.
Papa A, Bona Helu 398, hanaia Jan. 27, 1883, no $1,000.
Papa A, Bona Helu 457, hanaia Iune 27, 1883, no $1,000.
Papa A, Bona Helu 458, hanaia Iune 28, 1883, no $1,000.
Papa A, Bona Helu 460, hanaia Jan. 4, 1883, no $1,000.
Papa E, Bona Helu 277, hanaia Dek. 2, 1883, no $500.
Papa E, Bona Helu 279, hanaia Jan. 3, 1883, no $500.
Papa E, Bona Helu 280, hanaia Jan. 3, 1883, no $500.
Papa E, Bona Helu 281, hanaia Jan. 3, 1883, no $500.
Papa E, Bona Helu 285, hanaia Jan. 3, 1883, no $500.
Papa E, Bona Helu 286, hanaia Jan. 3, 1883, no $500.
Papa E, Bona Helu 287, hanaia Jan. 3, 1883, no $500.
Papa E, Bona Helu 288, hanaia Jan. 3, 1883, no $500.
Papa E, Bona Helu 300, hanaia Iune 19, 1883, no $500.
Papa E, Bona Helu 301, hanaia Iune 28, 1883, no $500.
Papa O, Bona Helu 307, hanaia Jan. 8, 1883, no $100.
Papa O, Bona Helu 308, hanaia Jan. 16, 1883, no $100.
Papa O, Bona Helu 309, hanaia Jan. 27, 1883, no $100.
Papa O, Bona Helu 310, hanaia Jan. 27, 1883, no $100.
Papa O, Bona Helu 311, hanaia Jan. 27, 1883, no $100.
Papa O, Bona Helu 312, hanaia Jan. 27, 1883, no $100.
Papa O, Bona Helu 321, hanaia Jan. 19, 1883, no $100.
HENRY E. COOPER,
Kuhina Waiwai no ka manawa.
H. W. Schmidt & Sons
(H. W. KAMIKA & KEIKI)
Eia lakou ke hooluhi nue nei ma ke kakau hoemi loa ana iho i ko lakou mau waiwai a
Kumukuai Kudala,
Ka emi loa i lohe mua ole ia ma Honolulu nei.
Ke wehe nei no hoi lakou i na Waiwai Hou ma ka Austeralia mai nei.
Halekuai ma Alanui Moi, e pili pu la me ka Hale Oiwi.
Hoopaneeia ka Ahaaina.
No ka Looaa Manwalea i manaoia no ka la 8 o Mei, ke hoakaka hou la aku nei i na makamaka a pau mai Hawaii a Kauai ua hoopaneeia a ka la 5 o Iu@ e hiki ma iana. A ke haawiia kau nei na hoomaikai i na makamaka a pau i kokua mai no ka pomaikai o ka Home Hooha nau Kapiolani. Owau no me ka mahalo.
EUGENIA REIS,
Kakauolelo A. H. M. L