Ka Makaainana, Volume XI, Number 2, 9 January 1899 — Page 1
Ka Makaainana.
BUKE XI - Ano Hou Honolulu, Oahu, Ianuari 9, 1899. HELU 2
Nunui Kumukuai o na Aina
Awakea Poaono nei, ma ke keena kudala o Kimo Mogana, i pau loa ai na aina o A. Rosa, i make, i ka hooliloia ma ke kauoha a kona lunahooko, Keoni Kolopana. O na aina aekai o waho o Kaalawai ka oi loa aku o ka makemakeia e na poe mea dala, oiai hoi, ua uuku loa ka loaa o na apana aekai kupono a maikai i nei wa. Ua loaa ma keia kuai ana ka huina nui o $12,585, penei iho:
Elua mau apana aina kuleana iuka o Kalihi, lilo ia W. Savidge no $525. I ka pau ana o keia ae la, ua kaa aku no na wahi ma Kaalawai. O ke kai lawaia, lilo ia Gia, Lanasina Ma no $110; elua pana ia A.S. Humepere no $1,950 a me $2,050 pakahi; he apana ka i lilo ia Misasa Irene Balaunu a me Misasa Kele Lopikana no $2,700; a pela no hoi ia L.A. Kakina a me A.W. Kaaka no $2,675. O na apana kua ekolu, hookahi ia Kauka Emekona no $800, a elua hoi ia Hoke (F.J. Testa) no $875 a me $900.
Ua koe ke kahua hale, aole ia i hooliloia. Pomaikai no hoi ka wahine kanemake a me na keiki liilii. Ua manaoia ua lawa loa na dala i loaa e uku ai i kona mau aie a me na lilo a pau, me ke koe mai paha hoi o kau wahi hunahuna iki.
-
Hopuia no ke Apuka.
Ua loheia mai nei no ka hopuia ana o Julien D Hayne, malalo o ka inoa James D. Hallen, ma Nu Ioka, no kona apuka ana he $16,000 na kekahi wahine, o ka waiho ana iaia ma kona ano he loio he mau makahiki mamua aku. O keia mea no ka lunahooponopono o kahi nupepa puka malama Ka Hawaiiana (The Hawaiian) mamua aku maanei i noke ai i ka ulupa i na mikanele. Nui ke kamailioia nona ma na nupepa.
A ua lohe hou ia mai nei ma o kahi palapala i loaa mai nei i ka Lunakanawai Kiekie mai ia Alani, kana keiki, ua ahewaia ua Juliene D. Haina la. Ua ku hoike kue iaia ka wahine ana i mare ai ma Felorida a haaleleia ai e ia ma Kapalakiko mahope iho o ka lawe ana aku i ka ka wahine dala a pau loa, oiai, he wahine waiwai ia. iloko o ka Aha ua ike a hooiaia oia e keia Alani Kauka a me Wile Ralina, keiki a Kamaki liana kopa, Paulo Numana a me kahi poe e ae, a aia hoi oia ke paa la ma ka halepaahao.
Elua Puuwai i Uoia a Hookahi.
Hora 7 o ke ahiahi Poaha nei, ma kahi noho o J. Kaili mauka o Kapalama, ma Alanui Halepupule, i hoohuiia ai ole Lunakahiko Aberahama Fenanade o Robert Kaili ia Misi Anna Kamai. He mau opio oiwi no laua a elua, a he keiki hoi ke kane na na mea no laua kahi. Mahope iho o ka hoolaaia ana o kahi no kahi a na ka make e hookaawale, ke loaa wahi kulu ole ma keia noho ana aku, a makou nei nae hoi e manaolana ole nei e hoea mai ana kahi kuia mawaena o laua, ua haawiia he aha-ike a he papaaina luluu me na mea-ai malalo o kahi hae Amerika nui. Lehulehu na makamaka i hiki aku malaila. Ua hoohiwahiwaia ke alo o ka hale me kahi hae Hawaii. He poe himeni no hoi kahi malaila e hoolualea ai.
Ke kalokalo aeni KA MAKAAINANA e uhaiia na opio me na pomaikai a pau ma ka laua huakai o keia noho ana aku.
-
Make Emoole ia Oiwi.
Kakahiaka nui o ka Poalima nei, ia Uilama Balaunu e iho ana no ka hana i kai o ka uwapo a makai iho o ka Makeke Hou, ua loaa iho la oia i kahi ma'i kuhewa a halawai hoi me kona hopena. Oia noke iho na lima kokua i ka opaopa, ua pii ka hua ma ka waha, malule ke kino, a o ke aili loa ae la no ia.
He mea kino puipui oia a ua kuluma hoi kahi eha ma kona umauma, a ke hoomaka mai ka hoi a loaa koke i ka opaopaia, alaila, loaa no hoi ka maha. I nei hana ana nae hoi, oia wale no, aohe mea e ae, a haule iho la oia ma kae o ke alanui aoao. Mahope iho i ikeia ai e na kokua, eia nae, ua lohi loa, ua hoea mai la no i kona hopena.
Ua laweia mai kona kino no ka Halewai a mai laila aku hoi a kahi o kona kaikoeke, oia o Keoni Beka, mauka o Leleo. He hapa-haole kamaaina oia no kakou nei a he kapili waapa kana hana i kamaaina mua ia ai. Mahope mai he hana kaa kikane, hookele kaapio, he kiai no Kawa a he makai kumau, a ma ia mau hana a pau, ua mahaloia oia. Aohe i manaoia ua kupono e noho he aha kolonelo, no ka mea hoi, ua maopopo lea no i kona ohana ke kumu mai o kona make. Ia auwina la iho no oia i hoolewaia ai malalo o ka lawelawe haipule ana a ka Rev. Makua Kelemeneke, a malalo hoi o ka hooponopono ana a E.A. Wiliama, a nalo ma ka ilina o Koula.
Hoomanao Nu Ia ma Waimea.
Ua malama ko Waimea nei poe he paina Hape Nu Ia ma ka hora 3 p.m. o ka Poakahi iho nei, ma ka Hale Hookolokolo o Waimea nei. Ua hoohanohanoia ka papa ahaaina e ke Kama'liiwahine opio ka Mea Kiekie Kawekiulani Ahilapalapa Kaiulani a me kona mau ukali, na lede a me na keonimana hanohano o Mana, na lede o ka aina mauna o ka Ua Kipuupuu a me na keiki kiani kipuka ili o Paul Jarrett. Ua ai a lawa, ua inu a kena i ka momona o ka papaaina - Hape Nu Ia!
Ma ka po ana iho, hora 7, ua malamaia na lealea Europa ma ke keena hookolokolo i hoowehiwehiia i na lau palai o ka wao, mamuli o ke alakai ana a kekahi keonimana hanohano, e hookipa mai i ka malihini kiekie ke Kama'lii Wohi ma ia po lea o Halalii, a me na maka hanohano pu me ia. Ma keia lealea Europa ma Waimea nei, ua kaa mua ka hanohano o ke Aupuni Amerika ia Waimea mamuli o ke kipa ana mai o na Kama'lii Kawekiulani, Kawananakoa, Kuhio Kalanianaole a me kana lede, a me na lede ukali mai o na alii no ekolu po; o ka po hope Kawekiulani, Kawananakoa, Kuhio Kalanianaole a me kana lede, a me na lede ukali mai o na alii no ekolu po; o ka po hope loa ka i oleloia he Helu 1 a oi aku mamua o ko Honolulu Wahi a na poe ikemaka, "Waimea ka best."
MAUNAKEA.
Waimea, Hawaii, Ian. 5, 1899.
-
Lilo ia Hui Kalepa Kahiko.
I ka la pau o 1898 iho la i hookoia ai ka hoolilo ana i na pono lako hao a waiwai mahiai e ae o ka hui o Kakela & Kuke a lilo pau loa aku la hoi i ka Hui Lako-hao pakipika. No 50 paha makahiki o ke ku ana o keia hui kalepa kahiko ma o kakou nei.
Ua hoopaakiki ka hui hoolilo e mau no kona poe paahana malalo o ka hui kuai mai, a no ka aeia na ae hoi i hoolilo aku ai. Nolaila hoi, e noho hana aku ana no na poe lawelawe mua malalo o ka hui hou. Eia nae, he hookahi mea i malele aku no kekahi kulana ano nui malalo o ka Hui Haha-hao Honolulu.
-
Ua haalele aku ke Aliiaimoku i kona noho ana ma ka hotele Ebbitt House (Hale Ebita) ma Wasinetona, a ua nee ae oia no kahi hale noho maoli mawaho ae, aia ma ka Helu 1418 Alanui Umikumamalima, Komohana Akau (1418 Fifteenth St., N. W). Aia o Misi Kini Makuea me ia ma ke ano ukali a me lawelawe nona.
Hoea Mai ka Nippou Maru.
I ke ahiahi molehulehu o ka Poaha nei i hoea mai keia mokumahu hou loa o kekahi hui Kepani, ua kaa nae hoi nei moku malalo o ka Hui Mokumahu Lawe-leta Pakipika, a ua pili mai i ka uwapo Pakipika i kakahiaka Poalima ae. Nui ka mahaloia mai o keia moku hou e na ohua no ka holo, a ua hiki mai la hoi ianei iloko o 9 1/2 la. Mawaho ae o na ohua lehulehu no nei, ua lawe mai la oia he 500 paha poe eemoku Asia a he 500 tona ukana. I ka pili ana mai, ua paniia na ipuka e komo aku ai i ka uwapo, oiai hoi na luna Oihana Dute e hooko ana i ka lakou hana noii.
He moku keia i oi ae ka nui i ke Kina, a he moku hou loa hoi. Ma kona holo hoao ia ana, ua loaa iaia he 17 1/2 nota. No Enelani kona kapiliia ana a he poe Pelekane wale no hoi kona poe alii me kahi mau Kepani kakaikahi a he poe Kepani wale no hoi na luina.
I ka Poaono nei i loaa ai he manawa e makaikai ai iaia a he nani maoli no o luna ona a me ka maikai pu o kona kii ke nana aku. A ua hala loa aku oia no Kapalakiko ia ahiahi ana iho.
-
Na Anoai o Hilo Akau.
Ma ka la pau o ka makahiki i hala iho la, hora 7 ahiahi, i awaiaoloia ai o Misita W.B. Kalino me ke kaikamahine lalawai Honohina, oia o Misi Liliana. I ka pau ana o ka mare, ua haawiia mai he papaaina i piha i na mea-ai ono a me na wai hoomalule kino a Maynard. Malaila pu ae no hoi na poe walaau po kahi i huli wahi ole ai. Ua hiki ae o Misita me Misasa E.K. Simmons, Willie Kittel, Misi Melekikekeka, Mokana a me Geo. Pukuniahi. Ke kalokalo nei kou mea kakau e ohaiia na paa mare me na pomaikai.
Ma ka la Hape Nu la nei i haawi ae ai o D.W. Kahele i kahiia ahaaina no na keiki walaau po.
Ma keia la, Poalima, ua holapu ae la ke ahi i ka hale noho o H.N. Baker a pakele mai pau, e ole e ike e ia e Sumida, he Kepani. Kou oiaio,
HAILI.
Laupahoehoe, Ianuari 6, 1899.
-
I nei kakahiaka e noho ai he kau kuikawa o ka Aha Kiekie. Ua ulu mai hoi keia mamuli iho nei o na hihia Pake noi kuu kino a me na la kulaia elua iho nei.