Ka Makaainana, Volume XI, Number 2, 9 January 1899 — Page 7
KA MAKAAINANA: HONOLULU, IANUARI 9, 1899. 7
NA AINA MAMAO.
-
Mau Lono Huikau mai na Wahi
a Puni keia Ao
No ka Hoopau aku i ke Kuikahi.
Ua hooia maopopo loa ia ae hoi ma na poai i ike maopopo lea loa o Wasinetona, Dekemaba 22, aole no e loaa ana he wahi mea e ano e ai no ka hoopau ia aku o ke kuikahi Clayton-Bulwer. Ua manaoia e loaa koke mai ana ia Emebasedoa Paunefota na kauoha mai Ladana mai e hoomaka koke aku i na kukai ana me Kuhina Nui He. Ua hoomaopopoia no hoi e noi ae ana o Beritania Nui no kahi panai oluolu ia aku e Amerika Huipuia no ia hana. Kapahola nei he kaaoia na Henry White ka i lawe aku i ko na Amerika iini i ko Haku Saulebure hoomaopopo mai.
Imi ka Poep i Kumu Hoomalielie.
Ua hoikeia ae ma Nu Ioka, Dekemaba 24, he telegarama i ka nupepa Honua mai Roma, e olelo ana: Ua ninauia aku o Cadinala Satoli, ko ka Pope Elele mamua i Amerika Huipuia, i keia la no kona manao e pili ana i ke "Ano Amerika" i lilo hoi i mea noonoo a i mea hoohoihoi nui loa i ka Vaticano. Ua olelo ae ke Cadinala:
"Aohe o'u manaoio e hoopuka ae ana ka Pope i kahi palapala pili hoomana no ia ninau i nei wa, e like me ka mea i hooiaia ae e kahi poe lehulehu e hana aku ana oia pela. Aia a hooholoia ka ninau, alaila paha hoi hoopukaia aku kahi palapala
"No ka manawa ua alakaiia ko ka Pope mau hooikaika ana ma ke ala e imi aku ai i kumu e loaa ai o ka hooluolu a hoolaulea ana. Aohe ka Pope i kalahea ae ma ke kokua ia Akibihopa Irelania a ia Akibihopa Corigana paha, no ka mea, ua hiki ole loa i ka Pope ke ae aia he mau poai kahi iloko o ka hoomana Katolika.
"Aohe au i ike no ka ka Pope mea e hana ai ma ka ninau. He mea oiaio loa nae hoi, ua lilo ia i mea nana e noonoo kuhohonu loa ai. I ka nana aku nae hoi, malia o kono aku oia i na bihopa Amerika e hiki ae i Roma no ke kukakuka pilikino ana me
He lono telegarama no mai Roma i ka nupepa La ka i olelo ae: Ua oleloia e kipa ike aku ana o Cadinala Satoli i Amerika Huipuia i ka makamua o ka makahiki hou ae. Ma ka Vaticano ua aeia eia keia luna ekalesia koikoi ke noonoo nei no kahi huakai o ia ano, eia nae hoi, ua hooiaia aku na poe nieniele ae me ka manao koikoi loa na kono kaokoa ia mai no ia e na kona mau ia ana ma na hana maoli. O ka loli nui ae ma ka hopena o Kuba, Poto Rico a me na Pilipine ka mea i kono ae i kahi hooponopono kumu hou ia ae o ke ano o ka hooponoponoia ana o ka Ekalesia, a he manao hoi ko ka Pooe he mea pono ke hanaia aku ia mau hoololiloli ana a ua hiki hoi ke hanaia aku ma ke ano hoa'loha, ina aohe ma ke ano pili oihana, me ka laulea pu aku me ke Aupuni o Wasinetona.
Aohe Ae o Dona Calosa e Haalele.
Mai Ladana, Dekemaba 26, ka hoikeia ua olelo ae ka mea kakau ma Venice o ka nupepa Manawa, penei: Ua makemake o Dona Calosa ia'u, e noho nei no hoi me ke ola kino maikai loa, e hoole loa aku i ka lono eia ka oia ke manao nei e haalele i kona kuleana i ka nohoalii o Sepania. Ua okoa loa ae nae hoi, wahi ana, a ua oi loa aku ka paa o kona manao e hooko aku i kona kulana ana e koi nei a ka hopena loa.
Ua hooia ae hoi kahi nupepa alakai o Roma, o Dekemaba 25, ua ae kahi hui Geremania e hoaie aku ia Dona Calosa i 30,000,000 farani iloko o ekolu mahele e ukuia ai , o ka mua ke loaa iaia he 10,000 kanaka i lako pono me na mea kaua, o ka lua ke lilo pio mai aia o Biliboa, ke kulanakauhale poo o ka apana o Bisice, a o ke kolu iloko o elua malama mahope iho kona hoomaka ana e nai.
Ko Aguinalado Popilikia.
No Manila mai, Dekemaba 23, ka hoike mamuli hoi o ko Aguinalado hoole ana e ike aku i ke kulana o ka mahele ilihune iho o na aliikoa kipi, ua lilo ia i kumu e aloko aku ai, no kahi popilikia kukonuonu loa. Lehulehu o na koa i haalele aku i ko Aguinalado hae, e lawe ana no hoi i ka lakou mau pu a me na lakou. Ua lele kue aku lakou i kekahi mau kaona lehulehu a ua powaia aku hoi na ola o na luna oihana oiwi maoli. Ma na kumu lehulehu loa, ua hana iho keia poe luna oihanalakona ia iho a hoihoi ole loa ia e na koa mamuli hoi o ko lakou hoolilo ana i ko lakou mau kulana i mea e hana pono ole ae ai, a ua imi aku hoi na koa i mea e hookoia ai o ko lakou inaina.
Hoolala Rusia no ka Hooki Kaua.
Mai Ladana, Dekemaba 26, ka hoikeia ae o na olelo a ka mea kakau ma Roma o ka nupepa Leta Puka-la, penei: Ua hoopaaia no Sana Peterobuga e noho ai ka aha-kuka i hookahuaia maluna o ka manao hooki kaua a Emeperoa Nicolasa no na la mua paha o Mei ae, a mamua aku hoi o ia wa e waiho pili oihana ae ana ke Aupuni o Rusia i na Mana i kekahi hoolala maopopo no ka hoopau ana i ke kaua, i hiki ai hoi ia lakou ke hoomakaukau ae i kahi mau hoololi ana, a i ole ia, waiho aku ia manao panai e ae e pono ai.
Kue o Siama i ka Noho Kuikawa.
Mai Hanoi, Tonokina, Dekemaba 27, ua hooiaia mai ua pololei ka lono no ke komoia aku o na poe Siama o ka mahele kuikawa ma ka Okana o Luana Parabane, Siama. Ua hoomaikeike aku ke Komisina Farani no nei mea i na poe manadarina, aohe nae hoi i hoomaopopoia mai e lakou a ua hoole nui hoi e haalele iho i ka mahele kuikawa.
Ua hooiaio pu ia mai no hoi na lono no na hana kue a na koa Siama. Aohe mea i make a i eha paha ma ka aoao Farani. O ke ano wale no o ka pilikia, aia ia ma na mea paa i hana lima ia.
Ka Hua o ka Aha-kua Maluhia.
Ua loaa aku ia Peresidena Makinile mai ke Komisina Maluhia Amerika aku i ka auwina la o Dekemaba 24 ke Kuikahi Maluhia mawaena o Amerika Huipuia a me Sepania. Ma ka haawi ana aku i keia palapala ano nui loa, ua olelo aku o Lunakanawai La, ma ke ano lunahoomalu no ke Komisina, aia ma ia ka hoike no na hooikaika kupaa ana a na elele Amerika ma Parisa, a ua waihoia aku hoi me ka manaolana e lilo aku ana ia i mea kokua ai i ka mahaloia aku no ka maluhia, ka hanohano a me ka nani o ke Aupuni Amerika.
Pau i ka Make i ke Anu.
Ua olelo ae ka mea kakau ma Viena o ka nupepa Telegarapa Puka-la o Ladana, Dekemaba 24, ua pau he mau haneri lehulehu o na koa o Monotenegero, i loaa koke iho nei i kekahi ino hau haule ma ke ala papali olowi a o Lara, i ka make mamuli o ke anu. O ka huakai i hoounaia aku e hoopakele mai ia lakou, ua loaa aku ua manoanoa maoli no ka haule ana o ka hau a ua hiki ole hoi ke hoopakele aku i kela poe o lakou i komo mua iloko o ka pilikia.
Waiho Omaimai o Senoa Sagasata
Mai Maderida, Dekemaba 23, ka hoike ae ua lilo i mea hopohopo loa ia ke kulana o Senoa Sagasata, ke Kuhina Nui. Eono poe kauka i kukakuka pu ae ia auwina la e pili ana no kona ma'i, a ua lokahi nui hoi he numonia ma ka puu kona popilikia, me ke kiekie o ka wela a me ka nele loa hoi i ke kahe ae o ka hou. Ua hoike ae na nupepa i ko lakou mau manao aloha a makee nona.
Ma ke Ala no Wasinetona.
Ua haalele iho o Agonocilo, elele kuikawa no Aguinalado, ke alakai o na poe makee aina o na Pilipine, ia Nu Ioka no Wasinetona i ka po o Dekemada 26. Ke hiki aku i Wasinetona e kali iho ana o Agonocilo i ka hoea aku o na poe Filipino ekolu haalele aku i ka aina a aia nui ma ke ala me na ao hou mai ia Aguinalado.
Na Hunahuna Laulaha.
Ua loheia mai Parisa, Dekemaba 22, malia o uwaiia aku o M. Iule Camabona, Emebasedoa Farani i Amerika Huipuia, no Berelina.
Dekemaba 24, wanaao, i hoea ae ai na Komisina Maluhia Amerika i ka aina maluna o ka mokumahu Amerika Sana Lui mai Soutahametona, Enelani.
Ua ae ke aupuni o Vitoria Auseteralia, e like hoi me kahi hoike kaokoa mai Melebona i loaa ae ma Ladana, Dekemaba 23, i ke koho a ka Hui Kila o Merelani me Penesilivania no 35,000 tona alahao kila ma kahi o $75,000 ke emi iho i ke koho Pelekane.
He pahu hookio wai kila o 178 kapuai ke ana waena a me 160 kapuai ke kiekie, ka i opa pu wale iho no ma Nu Ioka mai nei a ua kahe ae he 8,000,000 galani wai ma na alanu me he waikahe nui la. Lehulehu na poe i make a nui no hoi na waiwai i hooponoia.
-
Hoolaha Halawai.
E noho ana ka halawai makahiki o ka Hui Hawaii Kuai Aina (Kaupalena) ma ke Keena Loio o Aohi & Johnson ma ka Poakolu elua, la 11 o Ianuari, 1899.
ENOCH JOHNSON,
Kakauolelo.
Honolulu, Dekemaba 30, 1898. 2t.
-
Ma ka Aha Kaapuni Apana o ka
Hookolokolo Kaapuni ekahi o
ko Hawaii Paeaina.
J.S. RAMOS VS. MARIA J. RAMOS.
Ka Repubalika o Hawaii:
I ka Ilamuku o ko Hawaii Pae aina, a i ole, i kona Hope, Me ka Mahalo: Ke kauohaia aku nei oe e kii ia Maria J. Ramos, mea hoopiiia, ina e waiho mai ana oia i kana pane i kakauia iloko o na la he iwakalua mahope iho o ka hookoia ana o keia, e hele mai imua o ka Aha Kaapuni i oleloia ma ke Kau o Novemaba o ua Aha la, e malamaia ana ma Honolulu, Mokupuni o Oahu, i ka Poakahi, la 7 o Novemaba ae nei, ma ka hora 10 A.M., e hoike mai hoi ina he kumu kahi e ae ole ia ai ke koi a J.S. Ramos, mea hoopii, e like me ka mea i hoakakaia iloko o kana palapala hoopii oki mare i pakuiia me keia. A e hoihoi mai i ka Palapala Kii me ka hoike piha o kau mau hana no ia mea.
Ikea ka Mea Hanohano A. Perry, Lunakanawai Ekahi o ka Aha Kaapuni, Apana Hookolokolo Kaapuni Ekahi, ma Honolulu, Oahu, i keia la 4 o Okatoba, 1898.
(Inoa) GEORGE LUCAS,
Kakauolelo,
Ke hooia aku nei au he kope oiaio ka mea maluna ae no ka Palapala Kii Kumu ma ka hihia i oleloia, a ua kauoha ua Aha la e hoolahaia ia mea a e hoopaneeia ka hihia a ke Kau o Feberuari, 1899, e hiki mai ana o keia Aha.
J.A. THOMPSON,
6t.nov. 14- Kakauolelo