Ka Makaainana, Volume XI, Number 4, 23 January 1899 — Page 3

Ka Makaainana.

KA MAKAAINANA: HONOLULU, IANUARI 23 1899             3

 

HIHIO NO KA PO.

Pilikino na Wehewehe a Ku i ka Hoomakeaka

 

            Ma ka po Poaono, la 10 o Dekemaba a ao ae Sabati, ua loaa iho la keia haawina pahaohao:  E hele ana ko'u uhane i ke kula, owau a me Kaaumoana.  No Honuapo nei keia kanaka.  Ia maua i hiki aku ai i ka halekula komo aku nei maua.  Elua papa i piha i na haumana; he okoa ko na keikikane, a pela no hoi ko na kaikamahine.

            Hoonee aku nei ko'u uhane i na keikikane ma ka noho mamua, he noho papa loihi; noho iho nei maua, owau ma kekahi poo, a o Kaumoana ma kekahi poo; a mahope komo mai nei ekolu kanaka hou a noho pu me makou, aole nae au i ike mua ia lakou.  Ma ka papa o na keikikane, hookahi kanaka makua, oia o J. K. Kaliula.  O ka noho ana o na papa haumana, huli aku nei makou a huli mai nei na kaikamahine.

            Huli aku nei au nana i na kumukula e noho ana iluna o ka noho.  O Mrs Kahoiwai, he kaikmahine keia ua Kaliula, oia ke kumukula a na kaikamahine, a e noho ana ilalo ke kumukula a na keikikane, oia o Mr. Kaulainamoku o uka o Manoa, Oahu (ua ike au iaia mamua), e nana nupepa ana, aole nae au i hoomaopopo i kana nupepa e nana ana.  I ka waiho ana i ka nupepa ilalo, pane mai la oia i keia mau huaolelo: "Pehea ka loihi o ka manawa o ko oukou hele ana i ke kula?"  A ua pane alu o Mr. Kaliula, "he umi mahina o ko'u hele ana i ke kula."  No makou iho, aole i hoikeia aku ko makou manawa o ka hele ana i ke kula.

            Mahope iho, ua waiho hou mai la o Kaulainamoku he ninau, a penei ke ano o ka ninau ana mai ia makou, -"Elima hua-palapala o kekahi mea nui i laweia mai mai loko mai o Halealii a kiloi wale ia aku la.  Eia ka ninau ia oukou, -"heaha ua mea nui la i laweia mai a kiloi wale ia?"  Aole he mea nana i hai aku keia ninau, nei a'u a i ko'u mau hoa.  Mahope iho, puka aku nei ko'u uhane iwaho, e makemake ana au e hele e hoike i na poe naauao i keia ninau, aole nae i loaa ia'u na poe naauao, he poe kamalii ka i halawai me a'u a me na poe elemakule, a hiki i ka wa o ko'u uhane i hoi hou ai i ka halekula, me ko'u manao e hoi a hai aku aole i loaa ka ninau, ua hiki no au ma ka puka o ka halekula a puoho e au.

            O keia ua hoikeike pahaohao a ka po ia'u.   Nolaila, ke noiia aku nei ka oluolu o ke Kilokilo Dimerata e ihohee mai i na hoikeike a ka po.

            Kou oiaio,

                        P. M. Malumalu.

Nakapauku, Kau, Dekemaba 17, 1898.

 

Na Hoaiai a ke Kilokilo.

 

            E like me ke noi a ka mea nana ka moe e ihohee aku ana nolaila, e hooko aku no au i ka makemake o ke noi.

No na Inoa

            1.--P. M. Malumalu.  He inoa maikai o "Malumalu," he pale ana ae ia i ka wela o ka la, ka ua, ka makani, a he pumehana paha kona olelo ana.  A ma kekahi olelo ana ae paha, he wahi no kekahi mau mea pono a pono ole e malumalu ai.

            2.—Kaaumoana.  He hoike keia inoa i ka noho ole i ka aina o ka au i ke kai ka hoike ana o keia inoa, e like paha me na poe holomoku, aohe moku kau ole.  Aka, aole paha pela ke kapaia ana o keia inoa.  Malia paha he aloha i kahi mea a pupule, a au i ka moana no ka naauaua i ke aloha, ke kumu o keia inoa i kapaia ai.

            3.—J. K. Kaliula.  He ano ahiahi keia inoa, he aneane ana aku no ka la e napoo aku, a i ole, ua napoo aku ka la, a o ka wena wale no ka mea i koe.  A ke hoauiia ae keia inoa, e komo auanei kona hai ana iloko o ka mea pohihihi i ka maka o ke kuikele.  Ke ike la no oe la?  A ma kekahi ano, he kuamoamu, a i ole, he ula aku.

            4.—Kaulainamoku.  Elua wahele o keia inoa: 1, Kaulai, pili i na mea na pulu a koekoa i manaoia e maloo;  2, na moku, pili i na mokupuni mai Hawaii a Kauai.  Me he la, he inoa keia no kekahi ano lawe olelo a hoolaha wale ia mai kahi mokupuni a kahi mokupuni, i hoea mai no ka hakukole pilikino, a lawe hele ia i o a ianei, e like me ka hakukoleia o Polani, a i ole, he uhi ana no ka ula ao ahi Pele a puni na mokupuni.

            5.—Miss. Kahoiwai.  He inoa paha keia no kekahi manowai i paniia a hoi ai ka wai, e like paha me ke "Paniwai o Iao" i Wailuku.  A ke hoaoiia ae keia inoa, e loaa ana kona hai ana aole e hoohu aku i ka wai i kahi punawai okoa aku, i kaua puuawai wale iho no.  Ke ike la no oe la?  He kumkukula wahine ae la keia, he kaikamahine keia na Ka Mea-pohihihi-i-ka-maka-o-ke- Kuikele "Kaliula."

            Na Kaulainamoku i waiho aku i keia ninau, -Pehea ka loihi o ka manawa o ko oukou hele ana i ke kula?

            "He umi mahina o ko'u hele ana i ke kula," wahi a Kaliula.

            I ka hoomaopopo ana, o ka helei ke kula ke kahua alakai a ka moa, aka oae, ua pahaohao loa na hoike ana mai a na inoa i ka hana malalo o ka inoa Malumalu.  Ke uhi nei ka inoa Malumalu, ke hoike ae nei ka inoa Kaliula a me ka inoa Kohoiwai i na haina o ko laua mau inoa, a ke niele mai la o Kaulainamoku, ka mea lawe olelo (nupepa).  A ke hoike mai la hoi ka inoa Kaaumoana i ka hana a na poe holomoku, aohe moku kau ole.  Owai o oukou ma ke apo o keia ihohee ana a ka mea wehewehe?

            Ua piha no hoi ka umi mahina o keia hoohuoiia ana e Kaulainamoku, puka aku la ia Kaliula.

            E kolohe paha auanei kamalii kula i ka walaau.

            Ninau hou o Kaulainamoku, "Elima hua-palapala o kekahi mea nui i laweia mai mai loko mai o Halealii a kiloi wale ia aku la.  Heaha ua mea nui la i laweia mai a kiloi wale ia aku la?"

            Eia ka haina a na inoa Kahoiwai a me Kaliula no elima huapalapala, he "keiki," i loaa ma ka inoa o Kaaumoana, a e uhiia nei e ka inoa Malumalu, a i haiia e Kaliula he umi mahina, ua nalowale iho la nae a kiloi wale ia mai Halealii aku.  (Aohe epa mai o koe aku o keia ihohee ana.)

            E manaoia o "Halealii," o ke kino ia a me ka hale o "Keiki" i noho ai a hiki i kona kiloi wale ia ana a nalowale.  (Aohe hoopunipuni a koe aku, ea?)

            "Aloha."  Elima hua-palapala keia, he mea nui keia mai loko mai o Halealii, ka puuwai o ka halekino.  "O ke aloha ko'u makemake, aole o ka mohai."  "O ke aloha, aole ia e mokuhia i na waikahe."  A o ka oi lea ae mamua o na mea a pau, "e aloha oe i ke Akua me kou naau a pau, me kou ikaika a pau, me kou uhane a pau; a e aloha ae i kou hoalauna e like me kou aloha ia oe iho.

            "Alahe."  Elima hua-palapala keia, he mea nui keia mai loko mai o Halealii, ka puuwai o ka halekino.  O ke Akua ka malumalu o ke kanaka pono a oiaio, o ke Akua no hoi ka malumalu o ke kanaka hookamani, e hoikeike wale ana i kona ano mawaho, aole me ka hoopono.  A o Alahe no hoi kahi kapaia ana o ke Akua.  Pehea ae la ia?

            O ka halekula a me na haumana kula he mau ouli pono ole a apiki lakou i kahi wa.

            O ka noho ana ma ke poo o ka noho a me ka hoonee ana i na keikikane, he ouli maikai ia no ka mea nana ka moe no ka pii ae ma kahi kulana iwaena o kahi kulana a hana paha.  Aka, o ke kanalua iki, o ia no ke poolua.  Oia hoi, o Malumalu ma kekahi poo o ka noho, a o Kaaumoana ma kekahi poo, a owai la o laua na mea noho poo?

            Me keia mau alapahi ana a ka mea wehewehe, ke kauleo aku nei au, mai lawe mai i ka epa o na epa i mea e nuha iho ai ke Kekake, a e peku ai paha ka hoki, a e owala ai ka lio.  Ke hana mai oukou pela, hoopiiia oukou e a'u imua o Walewale Kumuhonua.

                        Aloha Hape Nuia.

                                    Kilokilo Dimerata.

 

Ka Popilikia o Kahi Kaikamahine Ui.

(Mai ka nupepa Repubalika, Vesaile, Inidiana.)

 

            O na Tuke o Vesaile, Inidiana, e like me na makua punihei, ua lilo kaokoa loa ko laua manao iloko o na keiki.  O ka laua kaikamahine nae hoi, o Luke, ka i lilo i mea hoouluhua loa ia laua.  Ua umikumamalima oia, a mai kekahi kaikamahine kino ikaika a ola maikai, he ekolu makahiki i hala ae, ua lilo oia i mea nawaliwali me ka mau o ka emi pu aku, a hiki hoi i kona wa i lilo ai i iwi wale no.  Me he la aohe wahi ola iki iloko ona.  Ua inoino mai kona koko a mahope mai, ua lilo oia i mea pili mau malalo o na kauoha ana a ka ma'i waiho ino mamuli o ka hopohopo.  I ka hapanui o ka manawa ua waiho mau oia ma kona moe, a ua hopohopo loa hoi a me ka ukiuki wale, a me ha la ka hoi e hele loa aku ana oia e loaa i ka lolo eueu.

            "Hookahi kakahiaka," wahi a Misasa Tuka, "ua hahai mai ke kauka ia maua e hanai iaia me ka Kauka Wiliama Hua'le Akala, ana no hoi i lawe pu mai ai me ia.  Ua hahai mai oia ke lawelawe nei oia i kahi ma'i i ano like loa me keia mau hua'le a ke hoola nei hoi lakou i ka mea ma'i.  Ua hoomaka maua i ka hanai ana i na hua'le a ua ike aku hoi i kahi la mai i kau wahi loli ae no ka maikai.  Ua hele mai ke kauka a ua hoopahaohao loa ia hoi oia i keia pii ae o ka maikai.  Ua olelo mai oia ia maua e hoomau aku ma ka haawi ana iaia i ka laau.  He hookahi hua'le a maua e hanai ai iaia mahope o kela a me keia ai ana a hiki i ka wa i pau ai o ewalu poho i kona wa i oluolu ai.  Aole ia i ma'i iki mai ia wa mai, a aohe hoi o maua hopohopo no ka hoi hou mai o ia pilikia kahiko.  Ua manao maua ua aneane loa e kohu hana mana loa keia hoola ana."

                        Frank Tuckee.

                        Mrs. Frank Tuckee.

            Kakauinoaia a hoohikiia imua o'u i keia la 28 o Aperila, 1897.

                        Hugh Johnson, Lunakanawai Hoomalu.

 

            He kamahao loa ka ikaika o keia mau hua'le ma ka lapaau ana i na ma'i a pau e ulu ae ana mai ke koko inoino, a i ole ia, mai ke kauliilii ae o ka ikaika o na aa.  Ua kupono lakou no na poe opio a poe aoo paha, a e loaa no ma na halekuai laau lapaau a pau.

 

W. C. Achi.                 Enoch Johnson.

Achi & Johnson

            He mau Loio a Kokua ma ke Kanawai

            Keena Hana: Helu 10, aoao Komohana, Alanui Moi.            nov 28-ti.

 

Nalowale.

 

He Lei Hulu Manu O-o, ma ka la Nu Ia nei a mahope mai, mawaena o kahi noho o Uilama Kamaki, ma Kalihi, a me Keoneula.  E loaa no he uku makana Keoneula.  E loaa no he uku makana kupono i ka mea e loaa ai a hoihoi mai ma keia keena.

ju. 10-4t.