Ka Makaainana, Volume XI, Number 7, 13 February 1899 — Page 1

Ka Makaainana.
BUKE XI. - Ano Hou Honolulu, Oahu, Feberuari 13, 1899. HELU 7

HON. H.A. WIDEMANN.
-
Niau a Hala Loa ma ke Ala Hoi
Hou Ole Mai.

                     Aole no i hoea mai ka hopena o keia luaui haole o Hawaii nei me ka upu mua ole ia, no ka mea hoi, no kahi wa loihi i hala ae i waiho ai oia mawaena o ke ola a me ka make a hiki wale no i ka wa a ka make i kikoo mai ai i kana, o ka uhane, a lawe loa aku la ma ke ala hoi hou ole mai no hope nei. Iloko o kona mau la o ka waiho kupilikii ana, ua makaukau loa ua ano hapauea la no ka hopena, a i ka hiki ana mai o kauoha i ka hora 9:30 o kakahiaka Poalua iho la, i hoopuniia e kona ohana nui, ua loaa he maha iaia mai na inea a me na ehaeha o keia ao a ua kaalo aku la hoi i ke kahawai kawahawaha kuhoho poeleele me ka ehaeha a auwe ole.
                     O kahi olelo ana hoi nona, ua hiamoe loa aku la oia mahope iho o kahi noho a ola loihi a waiwai ana ma keia ao mauleule. Ae, ua hala aku la oia me ka mahaloia e na poe a pau ma o kakou nei, a ua hookauia aku hoi maluna ona na hoohanohano ana a keia wahi aina uuku, ana hoi i hoolio ai i aina hookama nona a hanai ai hoi i kana ohana keiki i hoohuiia mai kahi oiwi ponoi mai o kakou nei. He mea oiaio loa no hoi, ua hooikaika oia ma ka hana no ka pono o kona ohana nui, a o ia pono no hoi kana i waiho iho la mahope noi no lakou e ola ai me ka maikai a me ke kuonoono.
                     Ua kamaaina nui loa ia oia iwaena o kakou oiwi, a oiai hoi, he ano mau iaia ke okalakala a paakiki ma kona manao iho, oia nae, he hoa'loha oiaio oia a he makamaka puuwai hamama hoi. Mamuli hoi o kona ano okalakala a me ka olelo - "Aohe i lewalewa iho Wilimana" - i kaulana ai no hoi oia i ka heaia e ko kakou poe ponoi o "Lewalewa," eia nae hoi, aole loa ia i manaoia he mea hoinoino aku iaia. Ma na wahi a pau ana i noho ai ma o kakou nei, ua nui no kona alohaia e ko kakou poe. A iaia hoi i haalele aku ai i ka noho ana ma ka mahiko o Waihee, Maui, a hoi mai no lalo o Waianae, ua hakuia he mele nona e hoomaka ana me na olelo - "Aia aku nei o Wilimana i Waianae."
                     No Hilideseima, Hanova, ko Hermann A. Widemann hanauia ana i Dekemaba 24, 1822. He aupuni kuokoa ia ia wa a hoopio a hoohuiia e Perusia iloko o 1866. Ua hele kona luaui i ke kaua i ke au o Napoliona iloko o 1812-13, Rusia a ma Farani Mahope o kona haalele ana i ke kula, kahi ona i hoonaauao maikai ia ai, ua manaoia oia no ka pualikaua e like no me kona luaui. No ka hiki ole hoi iaia ke pii ae maluna o kona mau hoa me na inoa koikoi i ikeia, ua haalele aku oia i ka aina a no ke kai maluna o kekahi moku kalepa ma ke ano "kapena poe" iloko o 1840. Elua makahiki o ka holoholo ana ma na Kai Balatica me Waenahonua, ua kepa oia no luna o kekahi moku o kohola e holo mai ana no ka Pakipika nei. Ma keia huakai i pae mua ai oia ma Honolulu nei iloko o 1843. Holo no ka Alika ma ia moku a huli hoi mai i 1844, a ua huli hoi hou aku no Europa e ao ai i ka ike hooholoia hookele moku. Iloko o 1846 mai oia i huli hoi hou mai ai no nei a hooholo ai oia e hoolilo ia Hawaii nei i home, a i aina hookama nona.
                     Ua hoomaka oia i ke ola ana maanei ma ke ano kumuao penoi no kekahi ohana Pelekane. Ma ia hope iho no hoi, ua loohia oia me ka fiva gula o 1848 a holo no Kaleponi, a oia hoi kekahi o na poe mua loa i hiki malaila no ia mea. Ua noho hana ma ko laila hale dute a me kahi mau ano hana e ae, a no ka ike no hoi i ke ano ponopono ole, ua huli hoi hou mai la oia no nei iloko o Iune, 1849, a mai ia wa mai hoi oia i hoolilo ai ia nei i home nohopaa loa nona a hiki iho la i kona pauaho ana mai la i keia ola ana.
                     Ua mare oia i kana wahine e ola nei, oia o Mary Kaumana Kauai, i Mei 5, 1850, a ua noho laua me ka pili aloha mau me ka hiipoiia o ka aelike laahia. Ina oia i ola a hala ae he makahiki a oi i koe, ina la ua piha ko laua wa e hoomanao ai i ko laua mare gula. Na laua mai he eiwa mau keiki e ola nei, ehiku kaikamahine a me elua keikikane, o Misasa H.R. Makapolena, Misasa F.W. Makapolena, Misasa C.O. Bega, e noho wahine-kanemake nei, Misasa J.M. Laukeke, make nei, Misasa J.M. Laukeke, Misasa W. Lana, Misasa C. Conarada, Misi Ana Wilimana, a me Cala me Hemana Wilimana. Mai keia mau keiki mai me kana wahine, ua haalele iho ke "Alii" i na moopuna lehulehu. Ke noho nei kana wahine-kanemake me kona ohana iloko o ka-u lihaliha nona, ka mea hoi nana lakou a pau i malama me ka hiipoi a me ka pulama a hiki i ka loaa ana o ka lakou me kona hoopoina ole aku no nae hoi.
                     I ka hora 3:30 o ka auwina la o ka Poaha iho la i malamaia ai kona anaina pule hoolewa ma ka luakini o Malieokamalu, o ka hiki pono ana no ia wa mai kauhale mai mawaho o Punahou. Ua lawelaweia na hana haipule o ka Bihopa o Panopolisa, i ukaliia e ka Rev. Makua Valekino, a i kokuaia hoi e ka Rev. Makua Makia maloko o ka luakini. Aohe no he anoano a he eehia aku a koe mai Ua hooponoponoia ka hoolewa malalo o ke alakai ana a E.A. Wiliama.
                     Mamuli hoi o ka weheia ana o kana palapala kauoha i ka Poakolu iho la ma ke keena o F.M. Haki, kona loio, ua ikeia ua kauoha oia e malamaia kona hoolewa me ke akahai, aole hoi me na hana hookelakela wale aku no, a pela no i hookoia ai, a no ia mai paha hoi i komo nui ole aku ai ka lahui oiwi ma o na Ahahui Aloha Aina a me Kalaiaina la. Eia nae hoi, ua piha kui aku ka luakini ma ia wahi i ka lehuehu o na anuu a pau, mai na oiwi a na haole, a mai na hoa'loha a ua enemi. Iwaena o ia anaina ka Peresidena a me na Kuhina, na Luna Kuwaho Kiekie a me na Kanikela, na Lunakanawai a me ka Papa Loio, na poe naauao, na poe kalepa alakai a me na Hawaii a ka mea i make i noho oluolu ai. Ua hookipaia aku hoi ka lehulehu e Eli Kaila, Keoki Kamila, Ede Laukeke a me Laionela Hata.
                     Ua hoomaha ka Aha ia auwina la, a ua hoounaia hoi he mahele o na makai kumau i poe hele mamua o ka huakai a i poe hapai pahu maoli, o ka ke Aupuni hoi ia, a ma ko na poe kalepa hoi, ma o kekahi olelo hooholo a ka Ahahui Kalepa i hooholo ai i kakahiaka Poakolu, ua paa ua banako a me na hale kalepa i ke paniia ia auwina la, a he kohu anoano o ka La Pule ka hiona. Eia iho na poe hanai pahu hoohanohano: S.M. Damona, A. Arena, Kope Balaunu, W.A. Waitina, B.F. Dilinahama, J.F. Hakafila, F.A. Sefa-Kauka R. Makipine, Kauka Maina, S.C. Alani, Keoki Wilikoki a me H. Foke.
                     He nui okoa aku no hoi ma ka ilina, kahi ona i haaleleia aku ai "e hoomaha iloko o ka maluhia." Malaila no hoi ka hana Aupuni kahi i puhi ai i na leo mele kupapaukupono. (Ua koe kahi mau hoakaka ano nui e ae a makou mai keia helu no kahi wa okoa aku.) Awakea Poaono nei i waihoia aku ai kana palapala kauoha hope loa imua o ka Aha.

LAWELAWE INOINOA IA.
-
Kahi Wahine Oiwi e Kahi Makai
Kumau me na Koa.

                     I kahi wa o ka auwina la Poaono, la 4 nei, ua hookui mai kekahi koa Amerika iaia e holo ana ma kekahi paikikala me kekahi kaapio i hookeleia e J. Kalana, mauka koke ae nei no, ma ke kaalo ana o ua alanui Konia me Pauahi i kahi a me kahi. Ua ku keia koa ma ka opu i kekahi kolo, a no ia palapu mai hoi i make ai oia i ka hora 10 o kakahiaka La Pule ae.
                     E holo mai ana ke kaapio mai uka mai o alanui Konia a hoohuli ia alanui Pauahi no alanui Nuuanu a e hooiho paukiki ana hoi kela koa ia alanui Pauahi. I ka loaa ana o keia ulia me ka holo loa no o ke kaa, ua nee ke alualuia aku e ka nui koa iho e muimuia ana i na nalo keleawema ia wahi a paa ke kaa a mai hoopalahuliia, hoea aku ka makai, o Akakane, he Samoa nui.
                     He mau ohua ko luna o ko J. Kalana kaa, o Misasa Kieke Kaae a me kahi mea okoa iho. Ua koi aku ka makai i ka lele iho o na ohua, i hiki ai hoi ke hookau ae i ke koa eha a lawe koke aku no ka halemai, aole nae hoi i aeia aku, no ka mea no hoi, he mea ma'i popilikia no ko kauhale. O ka hopena mai o ia hoole ana, ua lalau oolea ia aku o Kieke e kela makai a hukiia ma na wawae a haule i ke alanui aoao, hookauia ke koa a lawe loa ia no kai o ka moku, ke Secanadia, kahi hoi i hoaoia mai ai e lapaau a make wale no, no ka mea, i ko na kauka hoomaopopo ana mai i ke kulana o ka palapu, ua hala oia mai ka hiki pono ke haawiia aku na kokua ana. He kaa okoa ae no kahi e ku kokoke ana malaila, aohe nae hoi ia kaa i kauohaia aku. Ua hookauia o Kieke ma ia kaa okoa ae a laweia no ka Halewai, me ka lawelawe ino ia a haule ilalo o ke alanui aoao e ke kau wahi makai haole a hoopaaia no ke keakea i ka ka makai hana. Ma ke kauohaia ua hiki ae o Loio Humepere, a ua hookuuia nae hoi ma ke kauoha a Lunakanawai Wilikoki.
                     Ua kahea koke ia he aha kolonero e Hope Ilamuku Kilinawota no ka lawe ana i na olelo ike a na koa e ae i ike o luna o ia moku mamua o ka haalele ana mai ia auwina la iho. A hiki mai i keia la, aohe i pau ka hana

-
(E nana ma ka aoao ewalu.)