Ka Nonanona, Volume I, Number 3, 3 August 1841 — NO KA PULE IA MARIA. [ARTICLE]

NO KA PULE IA MARIA.

Ua unuhiia ae nei na olelo i paiia malalo iho, mai loko ae o kekahi buke pope, i kapaia 'The Christians Guide to Heaven,' oia hoi, 'Ke alakai no ka poe Kristtiano i ka lani. Ua paiia ua buke la ma Ladana, i ka makahiki 1818; e Keating, a me Braona ma, a ua heluhelu nui ia ma na aina pope. Ua hoole mai ka poe mamuli o ka pope i ka pule ia Maria, a me ka hoomana ia ia. Aka, e nana pololei lakou i keia mau olelo pule a lakou i pule pinepine ai ia Maria, i akaka ka hewa a me ka hewa ole, ke ku pono a me ke ku e i ka ke Akua olelo hemolele. I ko'u manao, ua kapae ka poe pope ia Iesu Kristo, ke Kalahala mana loa, a me ka oiaio, nana e lawe aku i ka hala o keia ao, a ua hoonoho aku lakou ia Maria, he wahine make, mana ole, ma kona wahi kiekie; a ma na wahine la lakou e paulele nui nei, a e pule nui noi hoi. Na oukou no nae na ka poe heluhelu kekahi manao. E huli i keia mau olelo, alaila, hai mai i ko oukou manao. Ua ike iki kekahi mau kanaka o Hawaii nei i ka olelo Beritania, nolaila, ua paiia na hua olelo ponoi a ka poe pope a na ka poe ike e nana i ka hewa a me ka pono o ka hoohalike ana; o olelo mai kekahi poe, he olelo hoopunipuni wale no keia.