Ka Nonanona, Volume I, Number 4, 17 August 1841 — Page 1

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, AUGATE 17, 1841. Pepa 4.

UA HOINOIA MAI O IESU.

                "Ua hoowahawahaia oia, a ua haaleleia hoi ia e na kanaka." Imi no o Herode e pepehi ia ia i kona wa kamalii. Hoao no o Satana ia ia ma ka waonahele. Ua inanaia oia e ke ao nei, ka mea ana i hele mai e hoola. Ua hoomainoinoia oia e na kanaka. Ua kapaia mai oia he hoopunipuni, a he hoalawehana a ka diabolo. Ua kipakuia oia mai kekahi wahi aku a i kekahi wahi, aole hoi ona wahi e hoomoe ai i kona poo. Kumakaiaia oia e kekahi haumana, a haaleleia e ka poe i koe a pau. Ua hooahewahewaia oia, kuhakuhaia mai la oia, hahauia. Hoowahawahaia a hoomaewaewaia oia e Herode a me kona poe koa. Kuuia e Pilato i ka makemake o kona poe enemi. Ua ahewaia oia e make i ka make ehaeha a ino loa. Ua kaulia oia ma ke kea iwaena o na powa elua. Hoomaewaewaia oia iloko o kona ehaeha nui. Hoohainuia oia i ka mea awahia i kawiliia me ka vinega.
                Hoomanawanui no ia i keia mau mea a pau me ka noi aku i ka Makua, e kala mai oia i ka hewa o ka poe i hoino mai ia ia.

KA MANAO O NA KUMU AO MA HONOLULU NEI, A ME NA KUMU HAOLE, I AE AI.

                E ka nonanona e, aloha oe; ke manao nei au, e haawi aku ia oe i keia olelo, a nau e hai aku i na kumu ao a pau o keia pae aina i ka ae like ana o na kumu ao a pau o keia kalana, mai Kapukaki, a Kanau, ma Oahu nei.
                Ua holo ka olelo a na kumu ao a pau, e kula lakou i kela la i keia la, e hoomakaukau ia lakou iho e holo mua,
mamua o na haumana.
                Ua koho no lakou nei i kekahi o lakou i luna no lakou, ia ia ka olelo a me ka papa aku, a me ka hana a pau e pono ai a e malu ai; a oia no hoi ke kumu.
                A o na kumu a pau malalo iho o ka luna, o lakou no hoi kekahi mau kumu; e kokua ana kekahi i kekahi.
                No ka mea, o keia poe kumu, he mau kumu akamai no, aole i hemahema loa, no ke Kulanui mai kekahi poe o lakou, a no na kula liilii iho kekahi poe o lakou.
                Na ka luna o lakou a pau e hai e aku ma ke kula ana i na mea e kula ai.
                Pehea ko oukou manao a pau e na kumu mai Kauai, a Hawaii?
                He pono anei keia manao o na kumu ao a pau o keia kalana? Ea!! He pono anei? Ina he pono, noho anei oukou me ka noho wale? Eia ko'u manao; ina he pono keia e hana oukou a pau na kumu noho kokoke. Ua lawe ia kekahi mau hora o ka la, i kela la i keia la no na kumu; aole ka hora o na haumana, o na hora kaawale. Na KAPEAU.
                Honolulu, Oahu, June 28, 1841.

                He haha pono loa keia i hoakakaia maluna iho, i ko'u manao; no ka mea, aole makaukau loa na kumu ao a pau loa: He nui ka hemahema i koe, a me ka hawawa i ka hoomalu i na kula. He pilikia nui loa keia iloko o na kula o Hawaii nei; aole malu iki kekahi mau kula; he nui ka wawa, a me ka haunaele, a me ka hana kolohe a na haumana.
                E pono no e huipu na kumu ao o kela wahi keia wahi, e hoomakaukau ia lakou iho: e imi i na mea hou, a e huli hou i na mea i nalowale: e kuka pinepine ma na mea pilikia iloko o na kula, a e imi i na mea e hanohano ai ka lakou hana.
                Ua makaala iki na kula ma Honolulu nei i keia wa. Ke kula nei na hoahanau ma na apana; a pela no hoi na hooikaika; he kula