Ka Nonanona, Volume I, Number 4, 17 August 1841 — Page 14

14 KA NONANONA. [AUGATE,

no hoi ko ka poe paa i ka hao i kela la i keia la, a me ka la Sabati kekahi.
                Ua hoike iho nei na kula o ko Mika kihapai, a ua oleloia, ua makaukau loa na haumana kamalii.
                Ua hoike no hoi na kula pope, aole nae au i lohe i ka hana ana.
                Ke hooikaika nei o Ioane Ii i kana Oihana kahu kula. He hana maikai loa kana.
Lim.

KA PUHI UILA

                Eia no maluna ke kii no kekahi ia kupaianaha, iloko o na loko a me na wahi opilopilo kona wahi i noho ai, ma Amerika hema. E hiki no ia ia ke hana i ka uila iloko o kona kino iho, a e hoolele aku no hoi ia mea make iloko o na kanaka a me na holoholona e hoopa ana ia ia. Pela oia e pale aku ai i kona poe enemi; a pela no hoi oia, i hana make i kekahi mau mea, i ai nana. Nolaila ua kapaia ua ia nei, o ka puhi uila. Ua nanaia ko loko, i ikeia ke ano o ka hana'na, a, o kekahi hapakolu ona, ua like loa no ka hana'na me ka lalani kiaha i hoopihaia i ka uila.
                Ua laweia kekahi puhi uila i Parisa, a ua hoikeia'ku la i na kanaka malaila. Ma ka hoopa ana'ku, ua maopopo lea i ka nui o lakou, he uila no ka iloko ona. Aka hoomaloka iho la kekahi kanaka, a lalau ae la ia i ua puhi nei a paa iloko o kona mau lima a elua. O ka maopopo koke iho la no ia, o kona kuhihewa. No ka mea, hoolele mai la ka ia i ka uila iloko o ua kanaka la, a kupaka oia io ia nei, me ka ue nui, aole okana mai o ka eha iloko o kona kino a puni. Pili mai la ka ia i kona lima, aole hemo iki i ka lulu ikaika. A kokoke pau ka hanu, hookomoia iho la kona mau lima iloko o ka wai, a, o ka hemo aku la no ia. Mai make loa ua kanaka la i kona hoomaloka.
KONEDE.

KA NONANONA.
Honolulu, Tusede, Augati 17, 1841.

                Ua hiki mai nei kekahi palapala na Mi. Binamu. Eia na mea i hooakakaia mai; Holo aku lakou ma ka moku Palora, a ku ma Bolabola; a holo hou, malaila aku ma Kepahone, iloko o ka makani ikaika loa, a me ke kai kupikipikio he nui loa, a ike lakou i kekahi moku hau, e lana wale ana, a ku hou ua moku la ma Perenamebuko ma Amerika hema, no ka pilikia i ka ai ole. Malaila aku ka holo ana, a i ka la 5, o Feberuari, ku ma Nu Ioka. Ua maikai ko lakou holo ana ma, ka moana; ua maimai no nae o Binamu a me kana wahine i kekahi manawa.
                Pae iuka lakou, a loohia koke iho la i ka mai, o na makua a me na keiki. He kunu ka mai, no ke anu paha o ia aina. Hookahi wale no nae i make, oia hoi, o Lukia Tatina ke kaikamahine lua o Mi. Tatina. He hoahanau ia a ua oluolu kona make ana. Pomaikai io ka poe make iloko o ka Haku.
                Ia Binamu i palapala mai ai (iloko o Aperila,) ua maha ko lakou mai, a ua hauoli nui i ka halawai ana me na hoahanau a me na keiki, a me na makamaka ma kela aina. Aole akaka ka manawa e hoi mai ai; aole hoi pau ka nawaliwali o Binamuwahine.

                Ma keia papa malalo iho, ua hoikeia na kula o Hawaii nei; Ua makaukau iki na kula, i keia wa, aka, he nui loa ka hana i koe. Hapa wale no na haumana ike, a he ole loa ka nui. He 18,034 na haumana kamalii iloko o na kula, a he 5,514 wale no ka poe ike i ka heluhelu!! E nana kakou i keia me ka noonoo. Hookahi pono i ko'u manao, o ka hooikaika pu o na'lii a me na lunakula, a me na kahu kula, a me na kumu ao, a me na makua. I nui ke aho; mai hoalu i ke kaula, a hiki nui mai ka naauao ma-